［人性/有甜］- 屍•家•馬鞍山（隔日更新）: Chapter 168 - Venci 的故事

我在睡夢中醒來，看來這一次，死神仍是沒有把我帶走。

身體正躺在舒適的雙人大床之中，室外的晨光正好把光和溫暖，帶進這一個寂靜的空間。

我想從床上爬起，可是身體卻完全動彈不得。

百無聊賴的我，只能有限度地環顧四周，映入眼簾的，是一個有著簡約裝修的房間。

面前的一張全家福吸引了我，相中的一家四口中，不難認出其中一個便是在外面遇見的女孩。



但看清一點，那兩姊妹的樣貌近乎一樣，只是有著髮型的分別，才令人看起來不完全相同。

那就是説，她們很有可能是對攣生姊妹。

在房間多待了一會，相中的女孩终於開門走了進來。

「你... 醒嗱？」Venci 戰戰兢兢的走進了房間。

「嗯...」我不知道該回應什麼。



「我煮咗啲粉吖，你食唔食呀？不過，唔知好唔好食...」Venci 捧著熱騰騰的通心粉問道。

「好呀！咁啱肚餓...」我無法對撲鼻而來的香氣產生抗拒，但我知道，內心有一種比食慾更強的慾望在翻騰著。

Venci 把食物放在我身旁的床頭柜上，可是現在的我根本無法享用。

「我... 起唔倒身...」我只能尋求幫助。

「噢... 咁我幫你...」她説罷用力把我扶起，然後狼狽地把我向後拉，使我可以倚靠在床板上。



把我安頓好之後，Venci 主動的替我餵食著，我們亦開始閒聊了起來。

「吖... 係呢，點解我會喺度嘅？我仲以為我死緊添！」我先把話匣子打開。

「喔，係呀... 琴日見你同怪物打緊，我就即刻跑返去搵人幫手救我個朋友，順便幫吓你...」Venci 説話時有點尷尬，「不過佢哋當初都唔肯幫，係我係咁求佢哋，嗰新嚟嘅阿頭先肯幫手。」

我越聽越不明白，面前的小妮子有什麼能耐，可以令其他人冒險去救她的朋友？

「咁佢哋點打得贏隻人猿怪㗎？」我對此比較好奇。

「咁我就唔知喇... 佢哋話好危險唔比我出去，我淨係聽倒啲槍聲同爆炸聲。隔咗一陣就見倒行動組啲人拉番你哋入嚟...」Venci 續説。

「之後佢哋問你係邊個，如果冇乜關係就唔比你入嚟... 咁我嗰陣驚得滯，就話你... 係我男友...」Venci 説罷已經滿臉通紅。

「咦？咁即係妳救番我㗎喎！」我轉移話題道。



「都係㗎，所以我哋算打和咯！」Venci 興奮地説道。

「唔係喎，她爭我兩個人情，而家妳還得一個咋喎！」我咄逼著她。

「吖... 咁、咁妳想點吖？」Venci 説著已經下意識地慢慢退開。

「呀！」我見狀立刻把她緊緊抱住，嚇得她花容失色，「我未諗倒住，諗倒先至話妳知！」

「你... 隻手冇事嗱？」Venci 用奇怪的眼神看著我，「咁你可以自己食啦？」

「都餵咗大半啦，唔爭在餵埋佢啦！」我立刻把視線轉移，「係呢，妳話我係妳男朋友，佢哋信㗎嗱？乜琴日個男仔唔係妳男友咩？」

「我都話咗佢唔係我男友囉！」Venci 隨即澄清著説，「不過，佢同我都算係好 close 嘅朋友嚟。」



我側耳恭聽。

「琴日個男仔叫阿俊，係我孖生姐姐嘅男朋友嚟，佢哋啲感情一直都好好。」Venci 開始訴説著，「不過，就喺幾日之前，我哋出去搵物資嗰陣遇倒好多喪屍。咁啱我之前係商場扭親隻腳，阿俊就負責狽住我走。我哋一班人一路係咁走，跟住有人提議沿扶手梯跑上二樓，所以大家都跟住。」

「本身我哋都應該可以走得甩，點知我家姐唔小心叉錯腳，就碌咗落扶手梯下面，跟住佢... 佢就比啲喪屍...」Venci 説著已經雙眼通紅。

我輕輕拍了一下她的後背，讓她把頭倚在我的胸膛上。

「阿俊見倒就即刻放低我，想跑落去幫手。不過其他人即刻捉住佢，因為我家姐已經冇可能救得番...嗦嗦...」Venci 終於忍不住啜泣起來，「阿俊仲係不斷咁掙扎，而啲喪屍亦開始爬上扶手梯，喺冇辦法之下，有人用棍打暈咗佢帶走，我哋先可以走得甩...」

「之後我哋返番嚟，阿俊都要第日先醒番... 醒番之後就好似失咗憶咁，唔單止唔記得嗰日發生嘅時，就連我家姐有個孖生細妹都唔記得。佢當正我喺家姐，雖然呢幾日我不斷同佢解釋，但佢只係覺得我唔再鐘意佢，仲繼續追住我唔肯放手...」Venci 續説。

「不過我哋都冇佢辦法，只有對佢繼續隱瞞真相。而只要佢唔太過份，我都唔會太介意佢當我係家姐...」Venci 解釋著，「始終，當日都係因為我先攪成咁...」