［人性/有甜］- 屍•家•馬鞍山（隔日更新）: Chapter 145 - 孝信的目的

「吓！呢樣我話唔倒事喎，不如你自己同孝信講吖...」素恩冷冷地答道。

「吖... 咁好啦...」我失望地回應。

「唉... 我試吓幫你問喇，不過我唔肯定得唔得㗎喎...」素恩最後還是答應了。

「好呀！錫曬你！」説罷我便報以輕輕一吻。

清潔完畢，素恩便替我換好衣服，坐在大廳等待著孝信的來臨。



「叮噹～」素恩把大門打開，孝信在之前看見的兩男開路下，慢慢走進了房間。

素恩關門後，便低著頭跟在他的身後。

「喂，早晨！琴晚玩得開唔開心呀？」孝信帶著奇異的眼神問道。

「吖... okay 啦...」被他突如其來一問，我只有戰戰兢兢地回答。

「Okay 咋？即係唔滿意啦！」孝信轉身向他身後的素恩責罵道，「妳點做嘢㗎！琴晚我同妳講個咩嘢呀？」



「對... 對唔住... 我已經... 呀～」素恩一邊説著，一邊驚慌地跪到地上，冷不防被孝信一腳踢倒。

「我唔要聽解釋！你哋兩個，同我扚佢出去！」孝信怒極向兩男吩咐著。

「咪住阿孝信大佬！佢嘅服務我好滿意、非常滿意，求吓你唔好咁對佢吖...」我焦急地説道。

「你做乜咁緊張我女朋友呀？你唔係鐘意咗佢呀？」孝信語帶挑釁地問道。

我對他的提問一時説不出話來，如果素恩是他的女朋友，她又怎會...



孝信看著我的反應，頓時哭笑不得。然後淡淡地説道，「唔緊要喎，我哋係好兄弟，我嘅嘢咪即係你嘅嘢囉！以後我哋一齊打天下，有乜就兩份分，哈哈！不過，下次你同我講嘢就記住要肯定啲、清楚啲！我冇乜耐性，到時有乜誤會就唔好啦...」

我真的不知道該怎樣應對，現在的我，活像是一個被威迫利誘之下，無奈加入黑社會的黃毛小子... 但現時我的處境，真的騎虎難下...

我望著因她而被擺了一道的素恩，可是她卻只有羞羞的低下頭來...

「好！食完早餐之後，就比兄弟我見識吓你嘅實力...」孝信説著命人把早餐放到茶几上，「我落樓下酒樓等你...」

孝信説罷便打算動身離開，於是我硬著頭皮把他叫住，「可唔可以，放咗我兩個朋友？」

「哦？咩朋友呀？素恩，乜我捉咗佢啲朋友咩？」孝信好像充滿疑惑地，向著素恩問道。

「係，前幾日我同 Karen 捉嗰兩個...」素恩輕聲地答道。

「兩個？哦，我記得喇！一日捉咁多女，真係唔會記得...」孝信搔著頭答道，「放心，佢哋而家好安全... 係呢，佢哋係你邊個？」



「吖... 其中一個係我女朋友，另一個係好朋友...」我尷尬地回應著。

「呵呵～女朋友...」他説著向素恩望去，「放心，你女朋友即係等於我女朋友，我一定會好好照顧佢嘅。等你出去做完嘢返嚟，我就平平安安咁送佢哋去到你面前...」

他的説話令我感到更為不安，於是我再追問道，「可唔可以，比我見吓佢哋先？」

「頂！你都幾多要求㗎喎！」孝信突然怒火中燒，破口大罵... 然後又慢慢冷靜下來，「好呀... 食完早餐我比你去見吓...」説罷他便轉身帶著素恩和兩男離開。

房間內只剩下我一人，為了儘快和 Carey 她們相聚，我用極速吃掉枱上的早餐後，便準備出發。

我打算執拾一下個人物品和裝備，可惜它們全部已經不翼而飛。

沒有辦法，我只有乖乖地出發去赴約。



我走到地下酒樓的門外，看見𥚃面約有幾十人聚集。他們都全副武裝，活像一隊整裝待發的軍人。

而孝信正站在眾人中間發言，他亦很快便發現了我的存在。

「喂，兄弟，咁快食完嗱！嚟，同你介紹，強哥，你哋應該見過㗎啦！你條 team 嘅 team leader... 以後，佢就跟你！」孝信向我介紹著這個早已認識的人，但從強哥那被紗布包裹的左耳，加上他那目露兇光的眼神，便知道我們不只是單單停留在"認識"的層面。

「嗱！我知道你哋之前有啲誤會，既然而家坐埋同一條船，有咩都一疋布抹咗佢好冇？」孝信充當著我們的和事佬。

「信哥叫到，冇話唔得㗎！不過我驚有人不屑同我哋一齊啫！」強哥首先開口説道。

「放心，我冇問題囉！」我的回答明顯口不對心，但為了仍在孝信手中的 Carey 與 Vicky 著想，我亦只有暫且放下私怨。

而我亦從強哥的眼神看到，他並沒有打算為我們過去的恩怨就此劃上句號。

「咁就好喇！嗱，阿 Roy 係我嘅兄弟，雖然佢而家好多嘢都唔識。不過，我深信有一日，佢會係大家嘅支柱嚟。所以，你哋一定要比萬二分嘅支持佢，知道冇？」孝信興奮地向大家説著。



「係～」眾人異口同聲地和應著，除了一個人...

不，是與這個人坐在一起的整群人...