［人性/有甜］- 屍•家•馬鞍山（隔日更新）: Chapter 128 - 誘惑
吃過早餐，也是時候跟她們道別了。
「我要去恆安會合我啲隊友，之後再去搵我兩個失蹤咗嘅朋友，可能短期都唔會返嚟住。不過，我睇過呢度都儲咗唔少嘢食，應該夠妳哋兩個用幾個禮拜㗎喇！總之，萬事小心，唔好亂噤開門...」交代完畢，我便打算向她們道別。
「你可唔可以留多一陣？」Mandy 的眼神流露著不捨。
「我都想... 不過我啲朋友處境可能好危險，我唔可以咁自私唔理佢哋...」我無奈地回應。
Mandy 默不作聲，我只有打破沈默。
「至多我應承妳，會合完我啲隊友，我就返一返嚟先，因為佢哋都帶住班人，需要搵地方住...」我提議道。
「不如我哋同你一齊去吖？」Mandy 提出反建議，「你唔洗刻意保護我哋㗎，我哋識自己照顧自己...」
自己照顧自己？我聽後不禁由心笑了出來。
「你笑咩呀？唔信呀？我有學過泰拳㗎！你睇...」Mandy 説罷已經在我面前展示起來，看來真的有板有眼，不過在喪屍面前，這些也遠遠不足夠吧！
「算把啦！記唔記得我第一日見倒妳，妳完全冇反抗能力呀？」我挑戰著她。
「你試吓連續幾日都食唔飽，睇吓你仲有冇力反抗吖嗱？總之我唔理，我一定要跟埋你一齊去！」想不到 Mandy 雖然已經是一女之母，但性格卻仍像小女孩一樣。
「唔得！我都係為你哋好。出倒去唔係講笑，真係九死一生。我連自己都未必保護倒，唔好話妳哋。就好似琴晚 Connie 咁...」想起昨晚的事，不禁令我黯然神傷。
「總之我唔理，我要去！你可以唔理我哋，不過你冇權阻止我跟住你！總之我哋兩母女嘅安全，我自己會負責！」Mandy 突然變得認真起來。
「乜妳咁萌塞㗎？肯定係比妳老公縱壊曬啦！完全都唔聽人講嘅！」我回應著。
「你無啦啦講咩我老公呀！」説罷她已經拉著我的手，「你跟我入嚟！希婷乖乖地坐喺度，我同哥哥有啲嘢要講！」
「哦...」不等希婷回答，Mandy 已經把我拉進睡房中。
「唔好誤會，我係要同你講清楚，我又唔想個女知，所以先拉你入嚟...」Mandy 説罷已經把門鎖上，「其實我老公之前已經同我離咗婚，不過為咗唔想希婷唔開心，我哋先喺佢面前做戲。」
「所以佢都同希婷講要返大陸做嘢而成日唔喺屋企，其實佢係同佢女友一齊。」Mandy 續説，「初頭我都冇乜所謂，諗住對佢都冇曬感覺，個女開心就得，所以咪比佢一個月返嚟一、兩日做場戲囉！」
「唉... 點知過咗二個月倒，佢返嚟個陣又無啦啦攪番我，我初頭都好抗拒，但唔知點解我又覺得好似偷情咁好刺激，跟住好似上咗癮咁控制唔倒自己...」Mandy 忽然滿臉通紅，「我甚至偷偷約佢出嚟，自己比錢同佢開房，又買咗好多自慰器喺屋企用，我好似變咗性上癮咁...」
「我曾經以為佢會同番我一齊，不過後來我先發覺佢淨係當我係泄慾工具... 不過，我就算明知係咁都要繼續落去...」Mandy 説著眼泛淚光，「我係咪好 cheap 呀？」
「吖... 又唔可以咁講嘅... 每個人追求嘅嘢都唔同...」其實，我也不知道自己在説甚麼。
Mandy 也好像沒有理會我的答覆，只自顧地説著，「緊急狀態發生嗰日佢啱啱返咗嚟，我哋都訓到好晏。知道咁大件事之後佢就即刻諗住走，點知條街已經好混亂，又有人到處咬人，根本就出唔倒去。個"食Q"仲索性鎖埋度門唔比人出入添，佢無辦法唯有返番屋企等...」
「之後過咗幾日，大家都開始物資短缺。有啲人仲趕走埋屋企個工人，攪到大家開始混亂。直至個法團主席陳生帶班人出嚟主持大局，啲人先冇咁亂。」Mandy 續説，「不過原來佢只係以主持大局為命，實質對我哋壓詐... 佢將大家嘅物資收歸公家分配，發現有私藏不報嘅就趕出屋苑，仲要每家派一個男人出去出面搵物資，冇男人嘅就要同佢哋"做嘢"，如果唔係就乜都唔比你... 如果佢發現有人病或受傷，陳生就會趕佢出屋苑...」
「吓，乜你哋無人反抗咩？」我好奇問道。
「初頭都有，不過得幾個人冇乜作用。佢哋事敗之後唔單止自己冇命，仲連累屋企人比佢哋公開虐待。之後就再冇人敢企出嚟反抗嚕...」Mandy 回答。
「一路直到幾日前，有人話我老公出去搵物資嗰陣失咗蹤，唔知係咪死咗... 不過我覺得佢可能係乘機走咗去搵佢女友...」Mandy 説著變得失落，「唉... 之後嘅事，你都唔洗我講啦...」
「所以你可唔可以帶埋我走呀？我唔想一個人喺度胡思亂想... 最多我好好服侍你吖？我識嘅嘢，你個女朋友仔都未必識過喎...」Mandy 説著已經把她的身體向我靠近。
「喂！你冷靜啲先，你個女喺出面喎！」我努力地迴避著她。
「你唔好扮嘢喇，我知你想嘅... 嚟啦，應承比我去啦，我包你唔會後悔㗎喎...」Mandy 咄咄相迫。
雖然我也認同這條件十分吸引，一個條件不錯的人妻，主動的為你提供"貼身"服務，又有誰不動容。
可惜，我好像仍沒有心理準備去接受這一段有性無愛的關係... 只少，我也不想處於被動的角色...
於是我立刻站起，把她推到床上。當 Mandy 認為我終於按捺不住時，我赫然回身準備奪門而出。
「阿 Roy，你啱啱話爭我一個人情，我而家就要你還！我要你帶埋我哋走！」Mandy 躺在床上叫嚷著...