［人性/有甜］- 屍•家•馬鞍山（隔日更新）: Chapter 96 - 回家
大門打開，出現在眼前的，是久違了的面孔。
「阿 Roy？真係阿 Roy 呀！」Suki 興奮地叫道，「你哋入嚟先啦！」説著 Suki 已經把門打開。
屋內還站著 Keith，Vicky 及一位大叔。當我與 Keith 四目交投時，我們再也不能抑壓心底的想念，激動的相擁起來。
「對唔住，大佬！」首先開口的，是我的好弟弟。
「傻啦，應該係我講對唔住先啱...」我緊緊的摟著 Keith，一種骨肉相連的感覺湧上心頭，令我默默地流下淚來。
「我就知道你一定會返嚟，所以我哋堅持喺度等你...」Keith 説著便轉身移向 Vicky 她們，「佢哋，都等咗你好耐...」
我打算走過去先跟 Suki 來過久別重逢的擁抱，豈料她卻只是冷冷的點了點頭，便走回去 Keith 身邊。
難道，他們已經和好如初了嗎？
還是，Suki 仍在他們面前，假裝和我不太稔熟嗎？
我轉向身邊的 Vicky，眼前的她一手繞著身旁一個健碩的大叔，如無意外，他應該是 Vicky 的父親。
「Hi，好耐冇見！」我不知道 Vicky 是否仍在生我的氣，所以只有用這個進可攻退可守的見面語。
「Roy，你知唔知我... 哋好掛住你呀？」Vicky 説時眼泛淚光，令我不其然打開我的雙手，示意我們來個久別重逢的擁抱。
Vicky 猶豫了一會後，便開步走打算投入我的懷抱。
就在此時，Carey 突然出現在我的身旁，並把我的手拉下，環抱在她的胸前。
「Hello，我叫 Carey，係阿 Roy 嘅女朋友！」Carey 高聲地説道。
眼前的 Vicky 立刻停下腳步... 臉上流露著複雜表情的她，一時説不出話來。
「女朋友？阿 Roy 少，你好似識咗人幾日咋喎！之前又話出去搵嗰個 Johnson，做乜搵搵吓搵咗條女比自己呀？咁 Vicky 佢點呀？你開心得啦！」想不到 Suki 對著我破口大罵。
「算啦 Suki，我同佢根本都冇關係...」Vicky 嗚咽著説，「我有啲攰，返房瞓先喇...」説罷她已經轉身離開。
「哼，衰人！我入去睇吓佢先...」Suki 緊隨 Vicky 進入房間。
一時間，大廳內的氣氛變得十分尷尬。
「我叫 Clara，當我路人甲得㗎喇！反正我聽朝訓醒就走...」説罷她已經走到梳化上仰卧著。
「你就係嗰個阿 Roy 呀？」大叔的語氣不太有善，「我係 Vicky 老豆，啲人叫我華哥，或者華叔都得！」
「係... 我係阿 Roy... 阿 Keith 嗰阿哥，上個禮拜約咗 Vicky 佢哋出去，所以識嘅...」面對眼前的健碩黑實男，我就好像一個犯了過失的兒子向他解釋著。
「咁... 你同我個女係咩關係？有冇掂過佢？」華叔金睛火眼地看著我問。
「吖... 我同佢，係有啲曖昧關係，不過，我發誓我冇掂過佢...」我就好像被家人撞破好事的小伙子，生怕被他一拳打死似的，把所知和盤托出。
「真係冇掂過？唔好比我知道你呃我！」華叔好像看出我有所隱瞞。
「我淨係拖過吓佢隻手同攬過佢咋，真係冇其他喇...」我慌忙地答道。
「咁都好，冇蝕底比你個賤人...」華叔説罷靠近著我説，「你唔好諗住攪佢呀！唔係有排你受！」
我只有唯唯是諾。
華叔説罷便返回 Vicky 所在的房間。
「吖，大佬... 你哋未嚟之前，Vicky 係同世伯一間房，而我就同 Suki 一間嘅... 我哋預咗你會返嚟，所以主人房冇郁過，你哋可以用嚟訓。至於 Clara 姐...」Keith 安排著。
「咪姐姐聲咁難聽，我唔係大你哋好多咋！」Clara 跟著已經擺好睡姿，「比張被我，我訓呢度得喇！」
「Okay，我轉頭攞比你... 夜喇，早啲訓，有啲咩聽日再講...」Keith 為 Clara 安排好被鋪後，便返回他的房間。
「咁我哋都返房囉...」我亦只有無奈地帶著 Carey 返回房間。
「阿 Roy，Vicky 同你係咪有啲嘢...」果然，Carey 回房後便向我追問。
「頭先你都聽倒啦... 咪曖曖昧昧咁囉，冇其他嘢發生過...」我回答道。
「咁... 其實你係咪想同佢有嘢呀？我唔理呀，以後你都只可以愛我一個！」Carey 認真地説道。
「Okay... 我應承你...」雖然心有不甘，但我實在不忍再傷害多一個女孩。
既然我們還沒有開始過，就讓我對她的愛慕，永遠藏在內心的深處吧。
Carey 高興地給我回報了一吻，我亦樂於沉醉在她那柔軟的雙唇上。
這夜，實在發生了太多的事情。Coco 就這樣悄悄的離開了我們，但身邊的人，好像都沒有多問。我明白 Vicky 她們與 Coco 認識不久，沒有多大感覺，但連身邊曾經與 Coco 共事的 Carey，也沒有任何哀傷的舉動。
甚至我，在一陣的悲痛過後，也開始沒有太大的感覺了。是我們根本認識得不太深，還是，大家都在不知不覺間接受了這一切？
接受了生離死別，會隨時發生在任何身邊人身上？
此時，身旁的對講機再次響起了聲音...