［人性/有甜］- 屍•家•馬鞍山（隔日更新）: Chapter 86 - 示愛

我熱得透不過氣來... 雙眼睜開，原來我已經回到了現實世界。

還是，剛剛的才是真實？

我拿開包裹著我的棉被，發現身上除了一條內褲外，便甚麼都沒有。

雖然室外秋意正濃，但在這門窗緊閉的房間內，蓋著一張冬天用的棉被，難怪我會熱出一身汗來。

我想移動身軀下床走走，但身體上各部位隨即發出不同的訊息阻止。



「呀～」身體發出的劇痛令我乖乖的躺在床上。但當我躺下時，後腦亦傳來另一陣痛楚。

究竟，我身上有那一處仍是完好的？

房門打開，出現在眼前的是 Coco。

「咦？頭先我好似聽倒有聲，原來你真係醒咗呀？」Coco 説著，「你成身傷唞吓先啦，我攞啲粥比你食吖...」

「吖... 妳哋冇乜嘢吖嘛？」我擔心地問道。



「你都睇倒我行得走得，係個肚同塊面仲有啲痛囉，不過，我都知你其實想問 Carey 個情況多啲㗎喇...」Coco 答道。

「我都話"妳哋"囉，妳係要咁諗，我都冇計...」雖然，我真的比較緊張 Carey 的情況。

「嘿嘿... 係咩？不過我都唔 care 啦... Carey 喺你暈咗之後已經醒番，係條頸瘀曬同好痛囉...」Coco 好像已經把我看穿，「你琴日仲差啲食埋佢添呀！食人隻豬都唔夠，仲真係想食埋人添，哈哈！」

「咁琴晚即係你扑濕我㗎啦！」我作出反擊。

「家陣你扑濕我就得，係咪我唔可以扑濕番你吖？」Coco 大聲叫道。



「喂 Coco 姐，唔該妳唔好咁大聲啦，佢會聽倒㗎...」我壓低聲浪哀求著。

「哼！淆底喇咩？夠膽做又唔夠膽認！琴日嘈到隔離屋條友都聽倒，佢又點會唔知呀？我勸你都係坦白啲好... 都唔知一個二個鐘意你啲乜！」Coco 不屑地説著。

「話時話，我哋都要快啲走，唔知佢會唔會再嚟...」我立刻轉移話題。

「你琴晚咁癲，我諗佢未必會喇... 同埋我閂門嗰陣發現，佢係用鎖匙打開出面度鐵閘，所以先咁易入倒嚟。佢臨走冇將條匙攞走，我諗佢唔會有多條匙啩...」Coco 分析著。

「唔... 佢唔係呢間屋嘅屋主，但又有呢間屋嘅鎖匙，可能有啲內情...」我推想道。

「唉... 有乜內情吖，你咪又有呢間屋嘅鎖匙... 就算真係有內情又點吖？你打得贏條友咩？」Coco 質問道，「不過話時話，點解你琴晚突然間咁癲，好似變咗隻怪物咁，仲想咬埋 Carey？」

「我都唔知呀，我只係心裡係咁諗住救妳哋，不斷同自己講唔痛唔痛，要向佢反擊... 之後就冇乜記憶喇！」其實，我自己也沒法弄清楚是什麼一回事。

「Coco 姐，阿 Roy...」Carey 擦著惺忪睡眼走過來。



「喔... Carey 妳醒喇，唔訓多陣？」Coco 問道。

「吖...」Carey 好像欲言又止。

「得喇，明喇，妳掛住妳個 Roy 哥哥吖嘛！」説著 Coco 已經把 Carey 推進房內，「咁你哋慢慢傾喇，覺得肚餓就出嚟食嘢啦！」

房間頓時鴉雀無聲。

「妳，冇事吖嘛？」我還是先開口。

「嗯... 冇乜嘢喇，係條頸仲有啲痛...」Carey 向我展示著傷勢。

「陰公囉，瘀曬...」我用心觀察著，「對唔住，係我保護唔倒妳哋。」



「傻啦，我知你盡咗力㗎喇...」Carey 答道。

房間內再次沉默。

「對唔住～」寧靜的環境令我得以聽到這小如蟲叫的聲音。

「咩對唔住呀？」其實，我已經大概估計到原因。

「我... Coco 姐同我講咗啲藥嘅事，係我誤會咗你...」Carey 尷尬地説道。

「哦？」我有意戲弄她一下。

她好像對我的反應有點不知所措，「咁... 而家... 我哋即係點呀？」

我裝作聽不明白，「咩點呀？哦... 我哋而家養好傷先，遲啲先再決定下一步點啦！」



「唔係呀，我講緊我同你點呀...」Carey 説罷已經滿臉通紅。

「哦... 我冇所謂呀！」我漫不經心地説。

「咁冇嘢喇...」Carey 説罷便想轉身離去。

「同妳講笑咋！」我拉著 Carey 的手説，「放心，我會負責任照顧妳嘅。」

「咁你即係追我呀？」Carey 面帶笑容問道。

「我認我係鐘意妳，不過我之前已經有女朋友㗎喇...」我為自己留著後路，「仲唔止一個添...」

「咁，我點呀？」Carey 問得有點無奈。



「唔好誤會我，我只不過係唔想呃住妳，如果妳唔介意嘅話，我係非常有誠意想妳做我女朋友，比機會我保護妳...」我凝神看著她説，「可唔可以呀？」

Carey 沒有回答，只是紅著臉微微點頭...