［人性/有甜］- 屍•家•馬鞍山（隔日更新）: Chapter 56 - 離開商場

這一次已經是我第二次因為同一事情而被取笑，我又再次被笑得呆立當場。

「啜...」突如其來的一吻令我的尷尬盡消，「多謝你咁緊張我。」少女説道。

我好像看見 Suki 的面色一沉，但轉眼已經回復原狀。

「哦... Carey，人哋個女朋友喺度㗎，妳錫錫之前有冇問過人呀？」其中一人説。

「阿 Coco 姐，我都有男朋友㗎！呢個係 thanks kiss 嚟咋，冇嘢㗎！阿女朋友唔會介意嘅呵？」Carey 反駁著。



「Thanks kiss，咩嚟㗎？妳想話 French kiss 咋嘩？」Coco 繼續説。

「妳哋誤會曬喇，我係佢細佬個女朋友嚟，唔係佢女朋友...」Suki 努力地解釋著。雖然這是我們協議好的答案，這班人也應該會跟隨我們與 Keith 他們會合，她這樣説我十分理解。但不知怎的，她説的話令我有種酸溜溜的感覺。

「咁即係冇女朋友啦，good！」Coco 在大笑著。

「你哋不如睇吓 Heidi 先啦，佢好似好唔開心咁...」Carey 説道。

「佢條仔算把啦，我不嬲都話佢唔係路㗎啦！係佢先咁死心塌地啫！」Coco 不屑地説道。



「算，妳唔去，我入去換完嘢就去。」眼見 Carey 拿著一包紙內褲和一包衛生巾，就凖備走進應該是員工休息室的地方。

「Carey，等一陣！」Suki 從背包中取出，之前在內衣店拿的長褲交給 Carey。

「多謝妳！」Carey 向 Suki 道謝後，便去更換衣服。

之後 Carey 與 Coco 過去安慰不斷飲泣的 Heidi，我和 Suki 因為不太方便參與，便在一旁整理好大家拿來的物資，然後放在一個個加厚了二/三層的大背心袋中。

「你... 啱先有冇唔開心？」Suki 突然輕聲問道。



「咩唔開心？」我忽然醒覺，「哦～妳話妳唔係我女朋友嗰件事，我 okay 㗎，傾好咗㗎嘛。何況妳又真係我細佬個女友嚟，妳冇講大話吖...」

「真係一啲唔開心都冇？」Suki 追問。

「少少緊有嘅...」我無奈答道。

「Yeah！我都覺得係㗎喇！」Suki 突然的興奮大叫，引起了其他人的注意。她伸一伸小舌後，便繼續小聲地説，「但我睇得出你好似對 Carey 有啲意思喎...」

「冇吖...」我立即否認。

「你唔洗唔認喇...不過人哋已經有男朋友，唔係好騷你𡃓。同埋 Vicky 係我好姊妹，你咪洗旨意對佢唔住呀！」Suki 忽然認真地説道。

「我明白...」我不置可否，然後用很疑惑的眼神看著她。心想，其實第一個對不起好姊妹的，不就是妳嗎？

她好像看都穿我的眼神，便道，「我哋唔叫鐘意，係同病相連啫，所以唔算...」



「哦...」我沒有辦法反駁，真是龍門任妳搬...

擾攘一輪後，Heidi 亦好像平伏了心情，我們確定了目的地後，便準備好再次出發。

我們打算原路回去健康院，我簡單探視過室外情況，確認安全後便踏出商場平台，沿著樓梯往下走。

我們小心翼翼地橫過馬路，走到米線舖門口前，Suki 與我都不其然向舖內張望。

人去樓空。

我們沒有時間懷緬，走到十字路口，發現我們之前放低的單車已經不翼而飛。

看來有人曾經來過，把它借用了。反正一輛單車也不夠我們五個人用，我們需要另覓代步工具。



我想起不遠處有一間單車舖，於是便提議去碰碰運氣。經驗告訴我，踏單車比走路來得安全。

路上泊著一輛七人車，當我們經過時，Coco 探頭入去觀看。

「喂喂，架車仲插住車匙㗎，有車咪唔洗行得咁辛苦囉！」Coco 輕聲地向我們説道。

「好就好，不過喺咪有人用緊㗎？咁樣攞咗人，好衰啫！」Carey 説道。

「理得佢吖！正常人都唔會插住條匙就走咗去啦！」Coco 二話不説，已經嘗試把車門打開，「妳哋睇，度門仲冇鎖添！」説罷她已經坐在司機坐上。

「咪住，㗎車個車頭仲暖㗎喎，仲逆線咁泊喺度，應該真係有人用緊！」我對 Coco 説。

「怕咩吖，快趣啲上嚟啦！咁多嘢，唔通行番去咩！」Coco 説罷已經開著引擎。

引擎聲在靜夜中迴蕩，我們沒有選擇，立刻跳上七人車準備離開。



「喂，你哋同我落車！」遠處有幾個人向我們跑過來，跑在前面的男人揮著棒叫道。

「Coco，開車走呀！」坐在司機位旁的 Carey 慌張地叫道。

七人車突然向前一衝，然後停了下來，全車失去動力。

Coco 慌張地扭動車匙，希望能重新啟動汽車。這時，男人與我們大概只有十數步之遙...