［人性/有甜］- 屍•家•馬鞍山（隔日更新）: Chapter 42 - 再遇

「大佬！」Keith 不理會四周的環境，向我大叫著。

我立刻飛奔走到他面前，與他熱烈地擁抱起來。Keith 的笑容掩蓋不住他的憔悴，他們之前的路應該不易走。

「細佬，好耐冇見，掛死我喇！」我興奮地道。

「阿哥，我都係！」Keith 説罷把我摟得更緊。

「吖... Vicky 佢哋呢，唔會？」我不其然擔心眼下看不到的人。



「佢哋喺上面！我諗住出去搵啲嘢食同日用品，所以先出嚟，Vicky 佢行動唔方便，所以由 Suki 陪住佢。」Keith 答道。

「佢唔方便？整親？咁嚴唔嚴重？」我擔心道。

「吖，不如上去先講！」Keith 示意我向外望，我看見有喪屍在隧道口徘徊，可能剛才 Keith 的叫聲引起了它們的注意。

電梯到達一樓大堂，我不忘向四周視察，這時 Keith 説道，「放心啦！呢度得部𨋢可以上落，喪屍應該唔識用。地下樓梯口度門喺向外推，經驗話我知佢哋唔識拉開啲門。以防萬一，我都堆咗啲雜物喺門口。後樓梯又鎖住曬，只可以喺𥚃面開，所以應該安全。」

一樓母嬰健康院的大門緊閉著，Keith 上前扣著門，透過小窗叫道，「Suki，係我呀，開門吖...」



「你咁快番嚟嘅？」Suki 打開門後才注意到站在 Keith 身後的我，「哦？阿... 阿 Roy？Vicky！阿 Roy 番咗嚟喇！」

「你快啲入嚟啦，我去扶佢出嚟！」Suki 興奮地走進診所內。

我走進診所之後，Keith 謹慎地把大門鎖上。對著大門的是一個詢問處及辦公室的地方，左手邊是一個放滿嬰兒床的房間，而她們身處的，是右手邊的候診大堂。大堂四周圍著的，應該是診症室的房間。

Vicky 在 Suki 的攙扶下慢慢地走過來，她雖然面色蒼白，但臉上仍掛著一副興奮的笑容。

「真係你呀阿 Roy？」Vicky 眼泛淚光，「你去咗邊吖？知唔知我哋搵咗你幾耐... 我以為... 我以為... 以後都見唔倒你...」Vicky 説著已經飛撲過來摟著我，在我肩上訴説著。



「對唔住，要你哋擔心...」我輕拍著她的背脊，「你係咪整親腳？比我睇下...」

「邊個話我整親腳喎！我... 我唔舒服之嘛！」Vicky 臉紅著説。

「吖，我都係聽 Keith 話你唔方便...」我摸不著頭腦。

「哦～哈哈哈... 乜你原來整親腳呀？哈哈...」Suki 已經忍不住大笑。

Vicky 看來十分尷尬，「咦... 唔係呀，人哋 M come 咋...」

我被她們笑得面黃，看來我成了他們今日的一個大笑話。

但這種感覺卻十分親切。

因應 Vicky 的追問，我娓娓道出這幾天的經歷，當然一切激情的環節以及小喬變異後的事情，我都沒有如實説出。



在我的敘述間，我留意 Vicky 強忍著痛楚。

「喺咪好痛吖？不如我出去搵藥比你食先，番嚟再講過！」我説著便打算動身。

「大佬我同你一齊去！」Keith 也準備好和我出發。

「唔得！」他們被我意料之外的大反應嚇倒，「對唔住嚇親你哋... 要兩個女仔留喺度太危險喇，呢度係可以防倒喪屍，但更恐怖嘅，可能係同我哋一樣嘅"人"。」

Keith 好像明白我的意思，「咁，大佬，不如比我去吖？橫掂我本身都諗住出去...」

「唔洗喇！既然出去主要係搵 Vicky 啲藥，比我幫下佢手啦。你個樣都好攰喇，呢幾日都應該辛苦你喇，你不如唞下啦！」

Keith 沒有再堅持下去，看來他真的十分疲累，「咁大佬，你有冇咩武器？」



「完全冇，淨係有部單車泊咗喺出面。」我説。

「你之前比我把切肉刀可以比你用，不過已經有啲崩咗。」Keith 説完便把連套的切肉刀及背囊交給我，我打開刀一看，可見切肉刀與他們都應該經歷過一定的風霜。

「咁好啦，我出發喇，你哋都小心啲！」我走向大門方向。

「等埋我！」説話的竟是 Suki，「我頭先都想出去㗎喇，不過又要睇住 Vicky... 而家 Keith 喺度我就可以放心出去喇...」

「吖，但係...」我看著 Keith，但他沒有太大反應。

「但係乜吖，你唔係信唔過你細佬呀嘛？況且，我哋而家都交換咗人質啦，怕乜喎...」Suki 努力遊説。

「算啦，你比佢去啦！佢之前跌咗落坑渠成陣味，佢想換咗成套衫好耐㗎喇。衰婆，揀開記住同我攞埋！同埋阿 Roy，記得睇住佢呀！」Suki 也和議道。

其實，我最擔心的，不是這一樣。



「大佬，唔好睇佢弱質纖纖呀！佢係喪屍殺手嚟㗎，哈哈...」Keith 好像看穿了我的想法，但仍不能消除我的擔憂。

「放心喎，我唔會連累你嘅...」Suki 説著便背著背囊向大堂走去。