［人性/有甜］- 屍•家•馬鞍山（隔日更新）: Chapter 38 - 巴士上的早晨
經過一日的奔走，再加上一場激戰，我已經體力透支，回到上層後倒頭便睡。
「喂，起身喇！」這句話似曾相識，但説話的不是 Keith，而是 Frankie，「唔夠 fit 就唔好攪咁多嘢啦！我哋要出去搵嘢食喇！同埋你攪到㗎車成陣味，你要搵啲嘢洗番乾淨呀！都唔知會唔會野埋嗰啲嘢嚟。」
我用力嗅著，車內真的好像洋溢著一陣臭鯹味，只怪昨晚的過份激情。
回望小喬，仍在睡夢中，旋旋卻已經跟素恩在車尾談起話來。
「得未呀？行喇！」Frankie 催促著。
我檢查一下裝備，切肉刀，短弓... 咦，我的短弓和箭筒在哪裡？是的，昨天我把它們放低在車尾。
正要走過去找尋，Frankie 好像看穿了我的用意，便道，「唔洗搵喇，我比咗素恩傍身。佢話學過射箭，問我可唔可以要，我代你答咗冇所謂嚕。」
「吓，啲嘢係我㗎喎！」我有點憤怒，「你係咪應該問吓我先呢？」
「對唔住，我應該問咗你先...」素恩拿著弓箭走過來，「不過你琴日，唔方便... 所以...」素恩低著頭説，「如果你唔鍾意，我可以比番你...」説著她已經雙手托著弓箭奉上。
「吖... 我唔係咁嘅意思... 啲... 啲箭你隨便攞去用啦！我只不過嬲有啲人慷他人之慨啫！」我矋著 Frankie 説道。
「對唔住阿 Roy 哥，係我唔啱，最多之後我聽曬你講，你話曬事喇！」Frankie 恭敬地説。
「哼，我今日就唔同你計！」我轉頭向素恩説，「素恩，我哋而家出去搵嘢食先，你幫我睇住佢哋吖！」
「Okay!」素恩笑著説。
Frankie 跟我一起先走到下層觀察，一會後才離開車箱。
目的地依舊是附近的便利店，一路上都沒有甚麼阻礙，我們輕易地走入店內。
店內的食物已經所餘無幾，連貨倉內的食物也被搜掠一空，看來有很多人已經光顧過這間小店了。
「呢度好似有間惠康，點解唔去？」我好奇問。
「唉，果度一早落曬閘啦！應該係啲員工喺𥚃面。」Frankie 無奈地説。
「有冇試過拍門叫佢哋幫幫手？」我不想輕易放棄。
「之前同啲 Friend 試過喺門口細聲叫，佢哋剩係識講嗰啲係公司財物，唔可以比我哋。跟住我哋就話會用錢買，佢哋都唔肯！我就話佢哋諗住留番比自己用就真！」Frankie 氣憤地説。
「我都明白嘅，比著我都可能會咁。咁嗰啲食肆呢？」我仍然抱有希望。
「唔... 都可以試下嘅... 不過我覺得啲熟食擺咗咁多日，應該都唔食得㗎喇... 啲生嘅又唔攞得走，唔通喺嗰度煮咩？到時煮到香噴噴，未食已經比喪屍死咗嚕！」Frankie 語帶輕蔑地説。
「咁又係...」我承認我這次想得不透徹。「咁不如去迎海嗰邊睇吓？」
「嗱，我唔係唔撑你，不過一來一回需要時間同有一定危險。如果真係要去，就不如帶埋佢哋！咦？好似有好嘢！」Frankie 一邊提議著，一邊滿意地研究著一把放在收銀處地下的鐵筆。
我同意 Frankie 的説法，便準備離開。甫踏出便利店門口，正想返回巴士時，忽然間看見一隻喪屍從遠處跑過來。
「J... Jason???」Frankie 呆在當地大叫，沒有逃走的意思。
「走喇PK！仲 J 乜鬼吖，喪屍嚟㗎！」被我大聲喝罵之下，Frankie 終於回過神來與我拔足狂奔。
喪屍 Jason 跑得十分之快，我們與它的距離越拉越近，彷彿它的魔爪已經能觸及到我的髮尾。它一邊跑一邊咆吼，它應該是在呼喚著同伴的幫忙。
Frankie 停下來轉身望向我，因前面已經無路可走。
他手握著鐵筆，看似做好戰鬥準備。
我向他使了個眼色，希望他能明白我的用意。
我加速向 Frankie 正面跑去，就在快要相撞的一剎，我從 Frankie 的左手邊閃過。
策略成功！按計劃應該是 Frankie 揮動鐵筆重重的打在喪屍 Jason 頭上。
「呀！！！」身後傳出的，竟是 Frankie 的叫聲...