［人性/有甜］- 屍•家•馬鞍山（隔日更新）: Chapter 35 - 小喬 • 夜會 I

「點解你會咁講？」我好奇問。

「冇，純感覺。佢唔似喺南韓土生土長。」素恩咬著餅乾説，「咁，Karen 係你女朋友？」

「吖，唔係，我哋只不過係好朋友。」雖然，我們有著跟好朋友多出一點的親密關係。

「咁，我哋聽日出發去搵你朋友吖！今日有啲攰，想早啲瞓，goodnight 喇！」素恩説罷便倒頭大睡。

回看四周，只剩下小喬還沒有睡，好像滿懷心事的坐在前座往外望。我走前坐到她的旁邊，旋旋已經熟睡在媽媽舒適的大腿上，十分幸福。



「仲乜唔瞓？」我先打開話題。

「唉...前路茫茫...」小喬嘆道，「旋旋仲咁細，佢未來嘅路都好難行...」

「唔洗擔心嘅，我哋會保護佢㗎嘛。況且，我相信總有一日會有人嚟救我哋嘅！」雖然這只是個假設，但我想小喬安心。

「阿開，你真係好人。你可唔可以應承我，如果我有乜事，幫我照顧旋旋吖！」小喬眼有淚光。

「吖... 傻啦，你唔會有事㗎！我哋共同進退㗎嘛！」我真的受不了這突如其來的重託。



「求吓你啦！得你可以幫倒我㗎咋！」小喬苦苦哀求。

「好，好啦！不過你自己都要小心啲。」我答允了她的請求。

「多謝你，我會，我一定會！我都唔想見唔倒佢，只不過驚佢冇人照顧啫...」此時旋旋好像被我們的談話聲騷擾，身體微微一動。

「不如落去傾囉？費事嘈住佢哋。」小喬已經在慢慢移動身躺。

「但係樓下有喪屍喎...」我擔心道。



「放心啦，我喺度望咗一陣，鬼影都冇隻。我諗佢哋都瞓曬，我哋細細聲，應該乜事嘅！」小喬説罷，竟伸手拖著我走。

落了下層後，我便警戒地四處張望，果然看不見喪屍的蹤影。

小喬帶領我在後排的座位，相對而坐。下層因沒有像上層一樣，能夠開著太平窗來通風，故顯得有點侷促。幸好現在已經入秋，才令車廂氣溫不至於太熱。

「係咪呀，我都話安全㗎啦，冇膽鬼！」小喬淘氣地笑。

我雙眼直視著小喬，這兩天來的逃亡日子，加上 Karen 在身邊，我完全沒有像這一刻一樣凝視著她。雖然之前在洗衣房都試過單獨相處，但卻沒有這一刻那樣看的真實。

她擁有一隻明眸，瓜子臉加上櫻桃小嘴，配上幽幽的長髮，是典型的美人兒。皮膚雖稱不上是晶瑩剔透，但也絶不比二十出頭的女孩差，甚至比我的女友還要好。若不是帶著旋旋，你絕對看不出她已經是一個七歲小孩的媽媽。

「你，做乜望實我又唔講野？」小喬被我看得有點尷尬。

「吖，冇，冇呀... 我，我定神諗緊嘢之嘛...」我也不知道自己在説甚麼。



「咁你喺度諗緊乜？」小喬咄咄逼人。

「吖，我... 不如講吓你啲嘢吖？點解你會喺老人中心出現嘅？」我急忙找話題解脱，一時忘記了旋旋之前已經説過她們到老人中心的原因。

「其實我冇乜好講... 大約十年前識咗上嚟東莞做野嘅旋旋爸爸，佢嗰時對我好好，又照顧我屋企，冇幾耐就同我結咗婚，仲有咗旋旋。嗰女出世後就申請咗我落嚟，落咗嚟之後就發現佢成日喺上海住，唔喺香港。之後仲同我離埋婚...」小喬説得語氣平和。

「唔好意思，或者我唔應該問...」我為我的問題感到抱歉。

「冇所謂啦，其實你問仲好。我都從來冇機會同人講我嘅故事。喺一般人眼中，我只係一個貪錢嘅大陸女人...」小喬的表情一轉，「吖，比我講埋先... 咁離婚之後，佢都仲有比錢我同囡囡，咁我見老爺自己一個住老人中心，咪間唔中去探吓佢囉。點知嗰日我唔醒起佢話過上晝要去迪士尼，一朝就入咗嚟，結果咪留咗喺個度囉！」

「哦，原來係咁...」其實，我都不是有心問這問題的，估不到小喬卻這樣認真詳盡地回答。

「好喇，我就答咗你個問題喇，咁你而家可以認真啲答我個問題未呢？」原來小喬在拋磚引玉。



「咩，咩問題呀？」我不知所措。

「我問，你做乜望實我又唔講野？唔好再答諗緊嘢嚟敷衍我喇！」此時小喬已經身體前傾，用我的大腿支撐著她的雙手，目不轉睛地看著坐在對面的我...