能擁有你嗎？哪怕只有一天: 十四 節日

話咁快又聖誕節喇，由於小欣佳人有約，而我又未有著落，我都係屋企過算喇。點知何逸霖就問我

霖：你聖誕節有咩做呀？

我：無呀，應該都係屋企過嫁喇。

霖：咁得啦，你同我地岀黎啦。

我：下，會唔會唔係咁好呀？你地成班男仔。





霖：唔驚啦，你又唔係唔識佢地，就咁話啦。

就係咁，我就應承左平安夜個日同佢地岀尖沙咀倒數。

因為我同何逸霖住得近，我地就約埋一齊搭車去，而黃俊佢地就一早去左酒吧度。我同何逸霖搭車去到尖沙咀就一齊行過去尖東海旁個邊既酒吧，其實我一直都唔敢去酒吧，因為自知酒量唔好，仲要今次同成班男仔。佢地個個都一支接一支咁飲，而我就好慢好慢咁飲緊自己支蘋果酒，黃俊見到我咁都忍唔住笑我。

俊：做咩呀你？驚飲醉呀你？唔驚啦，有何逸霖係度，醉左佢會返屋企嫁喇。

我望一望何逸霖，佢又無乜特別反應，繼續係度飲酒。而我地就係酒吧倒數左我地既聖誕節，到左凌晨兩點左右，佢地就話肚餓，之後我地就去左一間24小時既m記食野，食完佢地又話想再繼續飲，佢地就去左7仔買左兩打既啤酒，去附近一個公園飲。





而我從來未試過飲到斷片，只係飲一罐啤酒就會面紅，所以每次飲酒，身邊既人見到我咁都唔比我再飲落去。飲下飲下，黃俊佢地就開始係度發酒癲，而我就繼續係度飲，我身邊既何逸霖就一啲事都無，真係佩服佢酒量咁好。

到左天光喇，大家都開始酒醒喇，我地就行去碼頭m記食個早餐，之後就各自返屋企喇。我同何逸霖一早就講好一齊返屋企，同黃俊佢地道別之後，我地就一齊行返去巴士站等車。

係等車期間。

霖：攞你部電話黎睇野。

我：你想睇咩？





霖：你攞黎先啦。

我比左部電話佢，佢就開始不斷㩒唔同既app，好似係度搵緊啲野咁，最後佢㩒左入snapchat度，而佢停留左好耐既畫面就係凌詩同佢男朋友既相。我知佢係為左報復，所以佢攞左我部電話同我自拍左一張，po左係我既snapchat my story。

上到車之後，我同佢坐左係上層既最前個排，我扮到好似未酒醒咁，我直接挨左係佢膊頭度瞓，佢就繼續攞我部電話玩，到佢落車既時候，佢叫醒左我同我講再見。雖然成程車不斷搖，而我同佢既高度又唔係好岩，係瞓得麻麻，不過因為呢個係佢既膊頭，所以感覺好溫暖。

而之後既除夕，我一樣係同佢地過，係倒數到0個下我攬住左何逸霖，同佢講左句happy new year。而之後既事已經好模糊，我只記得我係酒吧飲左好多杯，到醒返個時，我已經係何逸霖屋企，無錯，我斷左片。而點解我會係佢屋企，我都唔知。