完美.情人?: 終章:奔向未來日子

我慢慢睜開眼,發覺我正身處醫院,身邊既係April,而時間已經係夜晚。April伏係張床度訓著左,係我第一次見到佢無戴眼鏡個樣,心裡諗其實佢樣唔差,係副眼鏡搞到佢睇落好傻咁。
「唔...你醒喇...」我想起身但唔小心整醒左佢。
「我昏迷左幾耐?」
「差唔多十幾個鐘...」
「發生左咩事?我唔係記得太清楚,我中左槍,跟住...」
「其實我都唔太清楚,我記得當時黑晒之後,過左陣我就被人打暈左。之後突然聽到槍聲就醒左,於是走去睇下發生咩事。跟住就見到你訓左係地,身仲有好多血...龍哥同個好似你既人係你身邊幫你急救緊...龍哥話佢槍傷左你,又因為粒子彈關係,影響左個人工心臟...」佢斷斷續續咁講返俾我聽,而佢雙眼已經通紅...
原來我中槍之後,心臟一度停左,令我無左知覺。雖然龍哥不停為我急救,但我個心臟漸漸衰弱,當大家束手無策時,Danny卻提出使用佢個心臟移植我身上,而佢最後講:「佢仲有好多野等住佢做,個世界仲有好多野須要佢,佢須要個心臟多過我...我...我終於知道靈魂係邊喇!就讓佢帶住我個心同靈魂繼續活下去...」
聽到依度,不禁摸自己個心,感受佢既心跳,感受佢既生命力,每一下就好似話俾我知唔只一個靈魂係個心度,我愛既同愛我既都同我一齊活下去。
「你真係唔返公司喇?」
「嗯...過去,我背負太多野,我而家想拋開一切,重新學習。」




過左個零月後,我同阿Roy一齊食早餐。
「你真係捨得?公司唔係你爸爸既心血咩?」
「就因為係心血,我先放心交俾你,我信唔過姓周果個女人,雖然佢好似革左職。但事先聲明,我唔係放棄間公司,只係打算休息下,出下國學習新既事物,或者發展新既事業...不過暫時未有頭緒...」
「打算去邊?自己一個去?」
「美國...睇下有無人陪囉...」
「嗯...好啊!祝你一路順風!」
同阿Roy講再見後,我同佢各自離開。若問我仲有無嬲佢,老實講我仲有少少既,不過經過咁多事,應放低既就放低,而且自己無辦法改變過去,只有積極面對未來。
「點呀?執好野未呀?又話想跟我去見識,聽日就出發,而家仲執緊行李!」
「你仲好講?邊個臨時臨急先問我去唔去?」
「嘩...四日都執唔掂?而家唔係移民喎,唔使搬晒成間屋過去喎!」




「又唔知去幾耐,又要執定啲衫...」
面對April鋪晒係地既行李,我只能抱怨,若果我插手應該被佢鬧到狗血淋頭...
「啲書又唔知帶唔帶去好?你唔好企係度...唉...到出唔到發唔好賴我!」
佢垂頭喪氣個樣其實幾好笑...
「嗱,淨係帶幾套衫內衣褲替換,唔夠咪買囉,書唔使帶啦,執左護照未呀?」
「啲書擺係度呀?咦?去幾個月咪白交租?」
「唉...聽日我叫人來將啲野搬晒去我果度,咁咪唔使交囉!」
「吓?咁我返來住邊呀?」
「我度囉...」佢微笑個樣其實幾動人,「呀,送俾你!」
「眼鏡?我咪有囉!」




「戴副無框既,咁咪醒目啲囉...仲靚啲添!」我將副眼鏡同佢果副換左,仲借啲倚錫左佢,而佢又無反抗...
「係喎!咁你仲會唔會整返Judy出來?」
「應該唔會,過去既就過去,我而家擁有既係現在仲有將來...」
「依個就係我既故事,每個人都有佢既故事,分別在於精彩或者平淡。有人會攬住佢既過去唔放,固步自封,亦有人積極面對將來,帶來無限可能,就好似創科一樣,我希望大家可以拋開過去既自己,踏出自己既comfort zone,勇往直前!多謝大家!」
台下一片掌聲...
「唔該,韋生!而家有請韋氏四月教育基金主席韋社小晴女士上台演講。」
「唔該!我出生貧窮既家庭,過去亦有參與一啲偷竊既罪行,然而當我重新接受教育後,再加上機遇得到份好工作,改變人生,所以我充心感受到教育既重要...」
又十年,十年來同April一齊生活,一齊努力,有歡樂有悲傷,大家一齊面對一齊分擔,最重要既係大家既心互相連繫,帶住依份靈魂既重量步向未來...