完美.情人?: 第五章:哀傷同流淚?

「April,得唔得閒入來傾啲野?」
「哦!」佢入左房,但佢仲好似對我有啲避忌...
「咁我而家就有個計畫做緊...」於是我將Judy展示出來,「咁我就想搵你幫手負責改良佢既思維,就好似保母咁教佢,因為你係女性,依樣工作你會比我更適合。」
「嘿嘿嘿...哈哈哈...」佢係咁大笑,大約笑左分零鐘,「唔好意思...哈...我諗返上次...件事就想笑,哈哈哈...」
「咁你幫唔幫手?」我強忍笑意一本正經同佢講。
「好啊!」佢笑到眼角標眼水...
「咁你好就得,仲有上次真係誤會來,你唔好當我淫魔高層咁先得嫁...」
「淫魔高層...哈哈哈...」佢又係度狂笑,「上次我都係講下,估唔到你真係當真,哈哈...其實我無諗過你係變態囉...」
佢咁講我個心舒服好多,至少工作上唔會有所避忌。
終於,Judy既身體已調整完畢,而我亦將智能系統安置在身體,而家硬件上已經完成...




「Judy,同你介紹,依幾個就係有份設計你既,依個James,Jay,Johnny,仲有呢排教你同你傾好多計既April。」
「終於都見到你地個樣喇。同我想像差唔多,嘻嘻...」
而家Judy仲要係公司內進行各種測試,為左令佢更人性化,每日都會係辦公室出現,而我地亦會當新同事咁對待佢。唔知係唔係我地太少女同事(基本上我地有時都當左April係兄弟,因為佢性格太男仔頭),男同事們都被Judy吸引,就算其他部門都過來望一望。但之後佢地知道Judy係「服務員」時,情況冷卻左好多...
「Judy,你同佢地相處左個幾禮拜,你覺得佢地點?」我想知道佢係同我地相處,系統既人性化學習進展如何...
「唔...James份人比較成熟穩重,做野有條理,但有時過於謹慎同埋保守,思考亦比較單一;阿Jay性格比較活潑,有時好多鬼主意,但佢就係太多主意,所以好多時就三分鐘熱度;Johnny雖然年紀較細,但做野絕對唔馬虎,而且盡善盡美,但有時太執著同太偏激,令佢做事效率偏低。」
「April呢?」
「你想要詳細定簡短嫁?」
「簡短得...」我驚詳細既真係好長,始終佢地相處時間比其他人甚至我仲長...
「April...佢外表看似柔弱,但佢做事好堅定,要做既一定會做到,但佢又唔似Johnny咁執著,都會聽人意見。雖然佢已經成年,但內心仲好細路女。」
「係得咁多?咁詳細既係點?」我對簡短既有啲失望...




「我有樣野唔係分得太清楚,而且我應承左April唔講出來,所以暫時唔可以講俾你聽。」
「你分唔清既係咩野?」
「仰慕同愛慕。」
「你既意思係April對某人有好感?咁佢有無話你知係邊個?」
「有,但唔講得!」依啲就係女仔之間既秘密?
「好!咁就完喇!」突然佢伸出隻手指尾出來...
「頭先講既野可唔可以唔好講俾佢地知?我驚佢地以後唔當我朋友咁對待。」
「好,我唔講出去!」其實我根本無意講出去,不過見佢可憐個樣就同佢勾手指尾。
Judy既智能人性化到呢個地步,確實令我感到滿意,甚至認為完美,但幾日後發生既一件事,我先知道仍有不足...
事源當日我返到辦公室,見到Johnny嬲爆爆咁整理緊佢張枱,而Judy同April係會議室,April好似係度安慰緊Judy。於是我問April咩事...




「頭先Judy好心幫Johnny執好張枱,點知整唔見左啲好緊要既野,於是Johnny發晒脾氣咁話Judy,而Judy就不知所措咁呆左。而家佢仲好迷惘唔知點反應...」
我行過去睇下Judy,佢目無表情,雙眼呆滯,就好似墜入無盡深淵咁...
「Judy,Judy...」我嘗試叫醒佢,但都無用,於是我將佢既情感反應系統關掉...
「Judy,發生咩事?」
「剛才我正整頓Johnny工作枱,好讓他工作效率提高,卻因此遺失了他重要東西,我被他責罵,因而陷入情感困局。我不停在系統找尋應對方案,卻發現系統沒有應對的情感表達及機能,因此系統不能作出反應。」
「咁你想表達咩情感?」
「我諗係哀傷同流淚...」April係一邊插咀,「一直以來我都無見過佢有負面情緒,我仲以為佢無...」
的而且確,我係設定情感系統時無將負面情緒加入去,因為有時謀殺戰爭都係人既負面情緒而起,經歷過果次事件後,我唔想重蹈覆轍,但我估唔到佢竟然憑空產生出負面情感...