完美.情人?: 第一章:2136年

由夢中醒來,睜開眼,再望個鐘,已經十點幾。伸手打開擺左係床邊平板,再打開通訊軟件...
「早晨,Henry!你有四個留言,一個係Mr.Johnson,其餘三個係老韋生。」
「Mr.Johnson?今日係星期日喎,我星期一先覆佢...」我伸個懶腰再講:「駁去老韋生既留言...」
「下一個留言。」
「喂,阿俊,你醒未呀?醒左打俾我!」唉...唔使問阿貴...
「下一個留言。」
「喂,阿俊,仲未醒呀?我想炒阿Anna啊!」又係關Anna事!
「下一個留言。」
「喂,阿俊,你仲唔醒呀?快啲來搞返你啲蘇州屎啊!」
我熄左個通訊,走入廁所沖涼洗面。打開窗簾,刺眼既陽光照入室內,好似提醒我今日係星期日咁,我亦換衫出去搞返我啲蘇州屎...




「早晨,Henry!今日想去邊?」
「返老韋生度,幫我自動導航。」
「今日星期日,交通暢順,大約十至十五分鐘到達。」
「好!開車。」我對住車既智能系統發施命令,車就開動。
「哎呀!我醒起有野買,轉手動模式。」
「係,手動模式將於三秒後啟動,三,二,一。」
買完野,經過花鋪,見到啲百合幾靚,而且阿爺又鍾意百合,買啲俾佢先...
「唔該,半打百合啊...唔該?」我對住個企係出面服務員揮手,但佢一啲反應都無...
「係!請問要啲咩?」把聲係鋪裡面個肥師奶發出。
「咦?你個服務員壞左?無理由架?」我打開個平板幫佢檢查,「你俾個序號我,係頸後面有。」




「哦!DF0135。會唔會無電?」
「唔會!用光動能,就算陰天都充到電,不過D序號可能比較舊...」
我用平板檢查佢既序號,發現個版本已經係三四年前,於是我幫佢提升最新。
「嗱!我幫你提升左個軟件版本,攞你個平板出來我教你用丫...」
今日係2136年10月12日,星期日,我叫韋嘉俊,係世界上最聰明既人。我屋企出左兩個世上最偉大既發明家,我爸爸同我。我爸爸發明將人類所有組織,包括肌肉,骨頭等完全複製既機械,製造出人造器官完全代替壞死或衰竭既器官及其他組織,而且完全無排斥及無觸及複製人道德問題。而我就發明左可以自我思考既人工智能,當年我十五歲,而三年後我將兩者結合,製造出現在眼前呢個「服務員」...
「就係咁,仲有你平時叫佢搬好重既野架?」
「咁我買服務員就係想佢做粗重野嘛!」
「係!但你買既係女性,所以肌肉組織無咁強,就好似普通人咁,搬得多就好易壞。」
「咁麻煩架,好心就唔好整到咁似人啦!」
「依張我卡片,你到我公司話識我就唔收維修費。」




「哦...原來你就係韋生!」
同老闆娘講拜拜後,我就揸車返到阿爺屋企。
「阿爺,我返來喇!」
「終於返來啦!你個Anna煮野好難食呀!」阿爺好激氣咁由廚房行出來,順帶一堤,Anna係我整俾阿爺既「服務員」。
「阿爺,醫生叫你食淡啲,我咪設定個食譜淡味啲囉!咁我較返濃啲嘞。」
「唔係呀,味就有,但無心。」佢又講埋啲懶高深既語言...
「吓?唔明...」
「即係無靈魂呀,你都唔明呀?煮野食係用心煮...」
阿爺又講佢啲理論,又話太婆啲咕嚕肉幾好味呀,又話我造既服務員幾唔掂...
「你尋晚又係公司過夜呀?」
係,基本上我已經將公司裝修到自己間屋咁,咁可以方便我做野。
「阿俊,你談過戀愛未呀?我唔係講拍拖搞野果啲,我既意思係你有無鍾意過人?」
我個心好似中左槍咁,我無力反駁佢,我唯一可做既就係逃避...
「唉...你都就三十歲啦,手都未拖過,簡直浪費晒我啲優良遺傳,我好似你咁既年紀,食過既女可以由...」
我都聽厭佢啲威水性史,我獨自返房(我係阿爺間屋有間房,有時佢會返去訓),訓係床度諗返佢講過既野。唉,有時覺得搵一個鍾意自己而自己又鍾意既真係好難!而我又成個毒男咁,有時真係寧願對住啲程式同「服務員」都好過拍拖...




唔...其實我可以創造出一個我鍾意既完美情人喎,於是我既瘋狂計劃就咁開始...