〔100%FF〕我愛上樓下個女仔: 十七

我用手指指著她的的額頭推了一下 

「搞錯呀，唔識咩係禮尚往來咩？」她睜開眼睛後說 

「我同你補習架而家」 

「成個氣氛比你破壞哂」她拿起筆不理會我 

「考完個試，你想點都得啦」我用手戳一下她的臉頰 





「咸濕佬」她用筆戳回我的臉 

我並沒那種意思，只是她想多了 

在不知道是拍拖還是補習的氣氛中又到了十二時三十分 

「差唔多要走喇我」我站了起來 

「唔坐多陣呀？」阿寧拉著我的手 





「坐到屎忽都痛喇，聽日唔駛返工咩？」 

「唉...咁樣又過一日，你話如果我地係住埋一齊就好喇」她也站了起來 

「點解呀？」我牽著她走到門邊，準備把門打開 

「咁咪可以日日都見到你囉」 

「你而家咪又係日日都見到我」我笑著說 





「如果朝早起身第一眼都見到你，你話幾好」 

「哈哈，傻女」我把她抱進懷裡

我離開的時候，叔叔姨姨早已回到房間，還把外面的燈都關上了 

反而我回到家時我媽還在看電視 

「咁夜仲唔訓嘅？」我問 

「追緊套劇吖嘛，補完喇？」 

「嗯...」我坐到沙發上 

「你阿哥同爹子好似吵大獲喎」 





「係咩？」 

「嗯...今日兩個都冇去跑步，一食完飯就入自己房」 

「冇沖涼？」 

「我見佢地面阻阻咁，咪輪流叫佢地沖囉」 

「哦...應該好小事啫，聽日就冇事架啦」 
「我訓喇，一陣關客廳燈呀」 

說完我便回到房間，躺在床上 

阿寧好像也馬上睡了，沒有傳訊息給我 






第二天的晚上，我哥和我爸是分別回家的 

我哥在我們三人正在吃飯時回到 

「尋晚你有冇問發生咩事呀」我低聲地問我媽 

「我入房嗰陣佢已經打哂鼻鼾，點問呀」我媽說 

「食不言，寢不語」我爸突然說了這一句，讓我和我媽嚇了一跳 

看來事態比我想像...

看來事態比我想像中嚴重... 





我吃了飯後準備洗個澡便到阿寧家 

正在把頭髮吹乾的時候，阿寧打電話給我 

「喂？」她說了第一句 

「做咩呀？掛住我呀？」我開玩笑說 

「都係架，不過我另外有事想同你講」 

「想點呢我嘅公主」公主這個名字是我在上班和她傳訊息時想到的 

「你今日唔好落嚟囉...」 





「點解呀？你唔想見到我咩？」 

「我想，不過我屋企人唔係咁諗呢...」 

「佢地知道我同你...？」 

「唔係...係我阿爸應該唔會想你落嚟啫」 

「點...點解呀？」 

「你屋企唔係應該有兩個冷戰緊咩？你應該由佢地到可以知」 

「咁即係...」 

「唔同你講住喇，比人敲緊門...」打斷我的話在自己說完後秒掛電話 

我整理了一下思緒，便想到他們應是三人發生了些事... 

而且是和他們公司有關的...

我哥正在房間上網，我便在外面敲門 

「做咩呀？」我哥看到是我便問 

「你同爹子搞咩呀？」我坐在他的床上 

「公司嘅事啫...」 

「兩仔爺，唔駛搞到啲關係咁僵呀？」 

「呢啲說話係媽子叫你同我講架？」 

「唔係，我純粹好奇你兩個同阿寧老豆喺公司發生咩事啫...」 

「個女仔講比你聽架？話說你地拍緊拖呀？」 

我猶疑著要不要告訴給我哥 

「諗咁耐，即係我估啱咗啦」他說 

「諗得耐就等於你估啱，咩道理...」 

「你真係想知咩事？」他突然又轉移話題 

「唔想知就唔駛問你啦」 

事情大概就是阿寧和我的父親都是公司的老臣子 

最年公司打算轉攻內地市場，便派阿寧父親「試水溫」 

也就是為何他經常都是中港兩地走 

最近公司打算在兩地同時推行一些政策 

我哥便提議一個新政，但公司裡由阿寧父親為首的管理層人員都否決了 

他們認為應該跟從以前的做法，不能操之過急

而我哥則找了老闆的小兒子提出建議 

老闆希望小兒子能做出些成績，於是整個項目便由他和我哥負責 

結果便惹來那群管理層的不滿 

認為雖然老闆同意了，但是直接繞過老闆和管理層來表達意見是不能接受的 

阿寧的父親甚至因為我爸持中立的態度而遷怒他 

雖然我爸口裡是指責我哥，但只是覺得大家應該理性討論，然後作出好的決定 

我哥則明白我爸的用心良苦，但是這次他是想要證明自身的能力 

結果便形成今天的局面 

按照阿寧的說法，應該是她父親甚至對我都感到不爽，也成為我不能到她家的原因 

「好無辜...」我說 

「你都覺得我好無辜呢？」 

「我講緊我呀...」我站起來走回自己的房間 

我拿起電話躺在床上，阿寧接下來都沒找過我 

「公主你喺到做緊咩呀？」我傳訊息問她 

「溫書囉」她秒回我 

「竟然冇咗我都掂？」 

「你女朋友我分分鐘讀書好過你啦」 

「即係你唔需要我喇？」 

「而家需要我男朋友陪著多過需要我補習老師囉」 

「一係陣間落去囉見個面囉」 

「嗯，咁我夜少少再搵你啦」

到了大約一時阿寧才打電話給我 

我那時已經睡了 

這天旺仔又沒有上班 

而這次又是我在大廈外等她 

她把大閘推開後看到我便一彈一跳的走了過來 

「有冇掛住我呀？」她抱著我 

「緊係有啦」我笑著摸摸她的頭 

「我地有冇咩目得地呀？」 

「唔係你諗咩？」 

「麥當勞？」 

「嗯，咁行囉」 

我牽著她在家附近走，這應該只有深夜的時間才能做 

「話說你阿爸同我兩個屋企人搞成咁，以後咪好難公開比佢地知我地一齊咗囉」 

「嗯…不過如果比我屋企人知我拍拖，可能已經鬧死我喇」 

「佢地有冇話你幾時先拍得拖呀？」 

「又冇講，不過細個嗰陣，話起碼要出嚟做嘢先囉」 

「咁我咪要等到你大學畢業？」 

「嘻嘻，考完個試返兼職應該都計掛」 

「不過佢地如果唔比你同我一齊咁點算呀？」

「唔理呀，就算離家出走我都要同你一齊」 

「哈哈，傻女」 

「如果到時我咁樣做，你一定要娶我呀」她停下來說 

「點解呀？」我因為被她牽著所以被她扯停 

「我為咗你連屋企人都唔要喎」 

「咁到時我地住邊呀？」 

「飛去其他國家住囉」 

「遠走高飛？」 

「嗯…不過我冇護照…」 

「可以留喺香港啫」 

「咁都時唔怕會撞返佢地？」 

「就算有咩事，我都會同你一齊面對架喎」 

「嗯，算你啦」她又牽著我走了起來 

真是個傻丫頭… 

我們兩人見面了快要一個小時 

好幾次我都忍受住了眼皮的轟炸 

結果她也睏了才讓我回家 

躺到床上時已經是快要到兩點的事 

我沒想太多我爸他們的事，立刻便入睡了

結果好像只睡了一會兒的樣子，鬧鐘便響起 

我這天上班時都因為睡眠時間不夠所以沖了好幾杯咖啡 

「老友，過成點呀？」德頌走進我的房間 

「你幾時喺到架？」我只顧著工作都沒留意到他來了 

「啱啱囉，今次冇敲門啫，見你唔係望住部電腦，今次應該唔係睇緊A片掛」 

「你就睇A片，點呀咩事大駕光臨呀？」 

「過嚟探吓你同我表妹啫，不過你好唔情願咁喎」 

這時我電話傳了訊息，我看一眼德頌 

「睇啦，做咩望住我呀？」他說 

我拿起手機看，是阿寧傳了一張自拍給我看 

我忍不住露出幸福的笑容 

「睇咩呀？今次真係AV呀？」德頌問 

「冇嘢呀」我把手機放回桌上 

「係呢，你阿哥幾時結婚呀？」 

「好似八月定唔知九月，我都唔係好記得」我一邊看著文件一邊回答他 

「咁都唔記得？喂，比你杯咖啡我飲啖」 

「隨便攞，又唔係我結婚，點記得喎」 

「仲未派帖嘅佢？」他站起來把我的杯拿走 

「應該準備緊掛，實有你份架啦」

接著他便靜了一會兒 

我抬頭看一看他，原來正在玩手機 

「阿寧？」他自言自語 

「咩呀？」我問 

我看清楚一點，原來他拿著的好像是我的手機 

再看一下桌上，手機已經不見了 

「你幾時拎咗架？」我問 

「頭先拎你杯咖啡嗰陣囉」 

「你唔去做賊真係嘥哂…不過你又解到鎖嘅？」 

「你仲可以有咩密碼，咪又係自己生日」 

「Hi…」 

「又話同人地冇嘢嘅，睇啲對話好似好親密喎」 

我站起來想要搶回自己的手機 

「嗱，做老闆緊係要知道員工嘅私生活架啦」他說 

「唉，比你睇喇比你睇喇」我再次被他的歪理打敗 

「幾時一齊架？」 

「早幾日囉」 

「又話唔中意人嘅？」 

「本身覺得一係等拒絕佢，一係接受佢，唔好拖落去，但係相處呢幾日覺得佢係個好女仔，可能係我之前都有中意佢係我唔覺啫」

「你應該唔會係玩緊人地感情掛...」 

「我又唔係player...」 

「你條女又搵你喇」他把電話遞給我 
「我走喇，有咩事再搵我啦」 

他來了好像只問了我的事便走了 

但是他自己則好像心事重重的樣子 

話說他那個秘書女朋友沒有跟過來，可能是有事做吧 

這天阿寧約我出去吃飯，我也答應了 

上次下班後到外面吃飯是和同事一起 

再上一次則是和阿晴... 

說起來，不知道她過得怎樣 


我下班後準備過馬路時站在路邊玩手機 

突然被別人牽著手 

「嘻嘻，嚇一跳呢？」阿寧說 

「你點會知我公司喺邊架？」我確實有點驚訝 

「直接上網搵你間公司咪知囉」 

「不過而家呢邊離公司都好遠吓喎...」我大約走了五分鐘的路程吧 

「我頭先見到個人好似你，行過嚟睇吓囉」 

「咁好眼力？」 

「你錯喇喎」 

「吓？」 

「我係沿住條紅線先搵到你咋」 

「哈哈，傻女」 

正好換了綠燈，我們便走過對面