〔100%FF〕我愛上樓下個女仔: 六

在我打算繼續偷看她的日記時 

她突然的一個轉身令我嚇了一跳以為她醒了 

以防她突然醒來後看到我在偷看她日記 

我還是趕快回家睡覺比較好 

回到家後我還有點腰酸背痛 

雖然我沒說，但是阿寧最後還是知道了事實 

剛才她的看起來十分心痛 

不敢想像她會不會做出甚麼傻事 

還好的是她只是借酒消愁 

但是一個女生夜深人靜的自己喝醉都沒有人理會很危險的 

而且她喝醉也不只一次 

看來要找個機會在她清醒時和她談談 


「起身返工喇」我媽叫醒我 

我看一下手機，原來已經是九點半 

「弊！」我立刻換好衣服連早餐都沒吃便出門了 

升降機下了一層後打開門，進來的又是阿寧 

「你今日唔駛返學咩？」這時候應該是上課時間 

「請咗假…」她說 

「哦…」

升降機到了地下，正當我想衝出去時 

阿寧拉住了我的手 

「尋晚又係你送我返嚟架？」她問 

「係呀，飲到咁醉，好彩我搵到你咋」我說 

我看一下手錶，出門的過程又用了不少時間，已經快十時了 

「趕時間走先喇，唔好做傻事呀」我把手壓在她的頭頂說 

接著便是電單車狂奔的時間 

回到公司後，一如以往都是十分忙碌 

「Eric」在我看資料的時候Mary敲我的門 

「入嚟吖，做咩呀？」我問 

「公司下個月調走輝仔返中環嗰邊，咁會計方面會少個人」 

「跟住呢？」 

「所以公司要請返個人返嚟代佢個位」 

「吓？呢啲唔係不嬲都係中環嗰邊決定咩，你同我講做咩呀？」 

「老闆話今次我們決定返請咩人，如果你ok嘅話我就喺報紙到落廣告喇喎」 

「嗯，你搞掂咗再比我睇吓啦」 

公司本來已經很忙碌，而且現在還要少一個人 

會計的那個同事的辦事效率也很高，這應該公司調他回去的原因吧 

但是下廣告不一定馬上有人面試，臨時又找不到人代替他…

「今日我地去邊到食飯呀？」阿晴傳訊息給我 

「你想去邊到吖，我就返你」 

「你諗啦，我都唔知邊到餐廳好食」 

其實我平時都吃住家飯，而且又不清楚哪裡的餐廳比較好 

「不如去你嗰邊食囉？」 

「上我屋企？咁突然？」 

「去你嗰邊食啫，唔代表上你到喎」 

「咁好啦，一陣我喺九龍灣地鐵站等你」 

在我們約好後，我開始有點後悔 

由我這邊去也算遠，但又不想駕駛電單車，只好明天下再開車吧 

到了七點多才下班，我這時才記起約了吃飯 

「Sorry呀，啱啱先收工」 

「唔緊要啦，我都仲搭緊火車」 

「我搭緊地鐵呀，有排先到，一係你去先啦」 

「唔駛啦，我喺a出口等你」 

「咁好啦，我叫個車長開快啲啦」我開玩笑說 

「哈哈，傻仔，一陣見啦」 

「嗯，一陣見」 

能在電話中聽到她的笑聲，我已感到十分開心

經過不長不短的車程，我終於和阿晴見到面了 

「咁耐架」她說 

「所以我咪叫你唔好等我自己去住先囉」 

「一個人等位好悶啫」 

「我都知我搞笑，令你唔會悶」 

「唓，自信心爆棚」 

「BOOM」 

「你做咩呀？」她被我嚇到了 

「爆棚吖嘛」 

「小學雞，唔睬你喇」她轉身走到扶手電梯那邊 

「等埋我呀」我馬上追上她 

她帶我到一家在德福廣場的日本餐廳 

她說那裡的食物和日本的有點相似，不像其他餐廳 

雖然我沒吃過正宗日本的味，但是她說像，就是像了吧 

「係呢，上次我地嚟呢到好似係睇戲架可？」她突然說 

「係呀，做咩咁問？」 

「唔知套戲落咗畫未呢？」 

「傻架咩，都過咗兩個月喇差唔多」 

「咁又係，咁一陣我地去邊呀？」

「咁你想去邊吖？」 

「我知道有個地方小朋友好中意去，我好想去吓，不過唔知你中唔中意」 

「邊到呀？」 

結果她把我帶到MegaBox的玩具反斗城 

「點呀呢到？」她問 

「我地兩個大人行呢到好似唔係太…」 

「行囉」我話未說完便被她拉了我進去 

雖然玩具反斗城沒其他的大，內裡的東西也不算少 

但是大部分都是為小朋友的 

「好似冇乜嘢行喎」我說 

說罷，她就好像看到甚麼東西的走了過去 

我跟了過去，然後她便拿著一樣東西戴到我的頭上 

原來是迪士尼的公主頭冠 

「哈哈，你唔好除落嚟，比我影返張相先」她拿出手機 

「好瘀呀」我感覺其他人好像都在看著我 

「哈哈，唔緊要啦，冇人見到架」 

雖然她這樣說，但是九時多這裡還有不少人 

「哈哈，笑吓啦」她還要求我笑 

「仲邊笑得出喎」但我還是強行露出了笑容

「比我睇吓張相」我說 

「唔得喎，你一定會delete咗佢嘅」被她發現了我的企圖 

「行多陣就走囉，人地都就快閂門」 

雖然玩具反斗城對很多人而言是十分幼稚 

但是和自己喜歡的人一起來，卻會令你重拾童真 

「我聽日要返早呀，咁我返屋企喇喎」阿晴說 

「我送你吖」 

「唔駛喇，你早啲返去瞓啦」 

「哦，咁好啦，返到去打比我」 

「嗯，byebye」 

我和她道別後，我隻身搭著地鐵回家 

搭乘地鐵的時候我太累所以睡著了，醒來的時候已經到了旺角 

我也急忙的走上一層轉荃灣線 

當我上車過了不久後，我的電話響起 

我以為會是阿晴打來給我報平安 

但是來電顯示上的名字卻是阿寧 

「喂？打比我做咩呀」我問 

「可唔可以同我落嚟上次個公園同我傾吓計呀？」 

「我而家唔喺屋企喎」

「哦，咁算啦」她的語氣好像有點可惜 

接著她便掛掉電話了 

這天工作太累，回家一定要睡一好覺 

可惜我洗澡過後，就被我哥迫我去7-11幫仔買凍咖啡 

真是大少爺，又要喝又不想喝熱的 

他說自己還有工作沒完成，那麼我只好幫他一回 

雖然家樓下有不少茶餐廳，但是7-11就要走一會兒才有 

幫他買完咖啡後，突然我想起阿寧叫我去公園陪她坐一會 

不知道她現在是否已經回到家 

還是去繞個圈去看一下好了 

到了那裡，公園已經空無一人 

那也是正常，畢竟她明天還是要上學的 

由於我也要上班加上太疲累的關係 

一躺上床我便睡到天亮 

起床時，家裡便只剩下我和我媽 

「老媽子，佢地返咁早嘅？」我問 

「聽講今朝要開會，我冇問咁多喎」 

吃過早餐當我打算去取電單車時才記起電單車放在公司 

那麼還是去坐地鐵吧

Mary只花了一個上午便將招聘廣告的內容定好，並給了我過目 

而我向她提出到勞工處網頁刊登職位空缺 

但是她說昨天就做了，我也開始明白為何之前德頌會這麼信任她 

說起來，這天是阿寧和阿俊分手後第一次上學 

不知道她會不會和阿俊「面阻阻」 

算了，年青人的事就交給她們自己解決吧 


又過了兩天，公司還是一樣的忙碌 

在某一晚一起吃飯的時候 

我也問過她在公司的工作忙不忙 

表面上和實際上都是關心她一下 

而且也打算把她挖過來代替那快要騰出的會計空位 

可惜她的工作範圍不涉及那一方面 

她既不想將所有工作重新學習，又不想離開她現在的公司 

所以我和她一起工作的機會便幻滅了 

那麼只好等求職者來面試了 

在我出外開會期間，阿晴打電話給我 

但是我沒有接聽，她就只留下訊息給我 

「Sorry呀，今日阿爸生日，陪唔到你食飯，下次請你補返數」１４：５５ 

那麼今天就是要我回去享天倫之樂的意思

「返嚟喇」我剛回到家說 

家裡沒有人回應我，但是客廳的燈卻還亮著 

我走到我哥的房間，原來他正在睡覺 

「媽子爹子去咗邊呀？」我問 

「去飲呀」他好像在說夢話的回答 

「去邊個到飲呀？」 

「唔知咩三叔公個孫女定咩啦，總之唔關我地兩個事啦」他開始說得有點煩躁 

「哦」我趁他未被我吵醒發下床氣時趕緊離開 

但是不知道他有沒有吃飯，所以我吃完便隨便買了一飯加例湯給他 

「我買咗飯比你呀，放喺飯廳，要食就食啦」 

他沒有回答我，而且睡得一動也不動的 

話說我買了電單車回來都沒好好的保養 

趁這天有空我便順便給它洗了個澡 

回程時，看到對面公園的鞦韆坐著一個女生 

我看清楚一點才發現是阿寧 

我走了過去，把水桶放在一邊，坐在她旁邊的鞦韆 

「做咩自己坐喺到呀？」我問 

「你幾時喺到架？」她剛才在看著自己的電話，所以留意不到我 

「啱啱先坐喺到，睇緊咩呀？」我看到她的電話螢幕還亮著

「冇嘢呀」她立刻把電話收起來 

「你又會咁得閒坐喺到嘅？唔洗溫書咩？」 

「坐低吓，散吓心啫」 

在面對這樣的事後，的確要讓自己的心情平伏下來 

我沒說話，只是坐在她旁邊陪著她 

她也沒說話，只是用雙腳慢慢推動著自己的身體和鞦韆 

「我以前好中意嚟呢到咖」她突然說 

「點解嘅？」她說甚麼，我問甚麼 

「你知我以前係肥妹架可？」 

「嗯」 

「以前我小學中意一個男仔，不過班男同學成日都笑我，我本來以為佢會同其他男仔唔同，點知佢都係一樣，係個衰人」 

原來這是她減肥的動機 

「等我仲以為瘦落嚟，就會咩都好，中五同個男仔同班，今年做咗我男朋友，結果原來又係一個衰人」她接著說下去 

「咁係你未遇到個好男仔啫」我說 

「算啦，如果男人信得過，就唔會有咁多女人唔信愛情啦」她說的話有點像剩女們會說的話 

但是她的經歷，的確能讓她對男生失去信心 

「明明我已經唔似啲港女咁樣咩事都有所要求，自問唔會亂發脾氣，點解都仲會有咁嘅下場？就係因為我同你行得太埋？因為你係我補習老師？算罷啦，全部都係佢出軌嘅藉口」