一次無心嘅表白，竟然令到佢同咗我一齊: 第四十五章

之後幾日，我哋都只係係海邊吹風，傾計，阿靜都冇再提起佢學校嘅嘢。但人類就係咁架啦，無啦啦講起就覺得人哋此地無銀，唔講又覺得人哋心虛。所以我認定佢依然繼續同啲厹玩得好埋，不過冇證冇據都廢時攞嚟嘈…

直到星期5晚，我哋食緊飯嘅時候，阿靜俾咗條sms我睇，係阿狗嘅sms。

「阿靜，其實每次同你玩我都好開心架，我都唔知點解只要同親你玩個心特別甜，我諗我可能鍾意咗你呀，我知你有男朋友，我都無心想拆散你哋，但我真係控制唔到我自己，好想話你知我嘅心意，我真係好鍾意你呀！」

我已經唔計睇佢啲火星文睇到壞眼，單係啲「表白」都已經夠我想掟爛阿靜部機。或者睇緊嘅你並唔覺得段對話有問題，但你唔覺有問題就已經係問題啦！其實我諗極都唔明，冇心拆散人但又去表白，啫係咩呀？冇心打劫但又拎住支ak入銀行？

我唔知其他人係點，但如果係我鍾意咗個拍緊拖嘅女仔，我都唔會講出嚟。大佬呀，呢樣嘢已經唔係俾唔俾佢知嘅問題，已經係意義何在嘅問題。講出嚟令到自己鍾意嘅人多一重煩腦做乜啫，如果真係鍾意佢，唔係應該想佢開心架咩？所以話，厹嘅手法層出不窮，為咗氹女上床真係可以去到幾盡？點解我咁清楚？我從來都認為所有男人都係厹，差在厹到何等程度啫！





「咁你俾我睇想我點？」

「俾你知咋麻…」

「不如我問你吖，你又諗住點做？」

「…………」

真係，聲都唔洗出我都已經估到阿靜又會話唔想冇咗個朋友之類嘅廢話。所以話女人幾有趣，自己啲異性朋友就係朋友，一定唔會有嘢，男人嘅異性朋友就個個發姣，呢啲咁完美嘅邏輯思維真係叫男人如何招架得住呀…





「真係唔明你哋啲女性生物，我講完你同啲厹玩得咁close嘅事俾chloe佢哋知之後，佢哋竟然企係你個邊。」

「咩話？你話俾佢哋知做乜？」

「有咩問題？聽下佢哋有咩睇法咋麻。」

「咁係咪佢哋叫你飛咗我你又飛吖！」

其實我真係真係唔明，我講咗啲咩可以令到阿靜過份推理到chloe會叫我飛咗佢出嚟呢……不過女人嘅邏輯就係反邏輯，呢點我應該一早就知。





「傻啦，我發誓，只要你唔飛我，我都唔會飛你！」嗰陣，我一直堅信分手兩字係唔會出現係我哋之間…

「一係咁啦，玩盡啲，聽日上我屋企同我呀爸呀媽食飯啦。」

「下…咁快…我好驚喎…」

「天下間最得人驚嘅色狼你都收伏咗，你仲邊有嘢好驚啫！」

「真係去？」

「你驚嘅可以算嘅。」

「嚟咪嚟，洗驚你！」

食完飯，返到屋企我冇刻意提起帶阿靜返嚟食飯，但就叮囑呀爸呀媽聽晚唔好約人。





到咗星期6，雖然同平日冇乜分嘢，但我同阿靜嘅緊張程度都不相伯仲，用電視control嚟㩒dvd機，屋企電話響但聽手機…

經過幾個鐘嘅時間折磨，終於入黑，我同阿靜就走咗入廚房煮飯，諗住俾返個好印象我呀爸呀媽。但係係廚房入面，阿靜依然好無聊咁睇我嗰啲千篇一律嘅sms，實行我煮完佢掛名……

係呀爸呀媽返齊嚟之後，我同阿靜出咗去，當然只係用朋友嘅身份去介紹佢啦…

「佢叫阿靜呀。」

爸：「靜？靜香？咁你咪大雄？」

嘩…我屌…好撚爛…

媽：「哎呀，傻仔，做咩紅都面哂呀？」





經過tvb多年嚟嘅教育，我一直認為另一半先係父母夾擊嘅目標，點知成餐飯我就係咁俾呀爸呀媽講到我個心不停咁叫救命…

爸：「哎呀，乜個戈冷氣唔夠凍咩，塊面咁紅嘅！」
媽：「阿靜真係好靚女架啫，點識架？」
「……」

為咗逃離呢兩公婆嘅魔掌，我同阿靜好有默契咁快快手手食完就返咗入房。

「啊…救命，嚇撚死我啦………」一入到房，我即時喘氣踹到好似參加完三項鐵人咁。

「傻瓜！你屋企人幾得意呀。」

「屌，啲箭唔係射落你到梗得意架…多得我呢個完美男友幫你擋哂啲問題咋！」

「唓，懶叻！」阿靜一邊講一邊搣住我兩邊面頰。





「反正而家都見過家長，不如……今晚留係到瞓吖！」

《如果擁有你同你可以永遠幸福注定唔可以共存，我願意退出……》