一次無心嘅表白，竟然令到佢同咗我一齊: 第三十一章

「頂…落雨呀，而家兩頭唔到岸，點都要淋至少10分鐘喎……」

「唔緊要吖，我有遮呀！」阿靜突然係佢個袋到拎咗把遮出嚟。

「你呢個百寶袋嚟架喎……」「咁行返去奧海城啦。」

「洗咩啫，呢到返到深水埗架！」

我個腦即時浮現咗地鐵站路線圖出嚟……奧運南昌荔景美孚荔枝角長沙灣深水埗…………落咁大雨唔係諗住咁行呀……





「你……講笑咋……咁多個站，點行呀？」

「得啦，好近架咋！」

阿靜捨易取難呢啲咁有玩命感嘅行動，我係揀咗陪佢癲……於是，我一邊攬住阿靜，一邊擔遮咁行返去……

經過個工地嗰陣，因為開始入黑嘅關係，附近又冇乜街燈，成個氣氛就好似拍緊鬼片咁。我哋每行一步都令到腳下嘅鐵板發出啲令人心寒嘅磨擦聲，加上海風令到泊係岸邊嘅船搖擺不定，整個氣氛令原本已經有啲涼意嘅雨天更添詭異……

行咗幾分鐘，終於見到個頗為可以避下雨嘅地方。





「嘩，你濕哂啦……」阿靜一邊攪我個頭一邊講。

「咁大雨，梗係遮你好啲啦，一間淋病咗我嘅小寶貝點算呀！」

阿靜整咗下可愛版嘅惡樣出嚟，然後將我個頭摷得更亂，之後話：「咁大雨，等佢細返啲先行啦！」

「你肯定行到……？」其實我信係行到架，環繞地球都得啦，何況區區個7個地鐵站！差在要用幾耐時間啫……

「係呀，你跟我行就得架啦！」





過咗陣，啲雨開始細返，我哋亦都起行。但行到南昌公園附近，啲雨開始停，但阿靜突然話：「其實我唔係好記得路……」

「唔緊要……」係條啱啱落完雨嘅街道上，唔好話人，連畜生都冇隻。我哋唯有亂咁行，寄望搵到個商場問下啲保安。

原本由海邊行去地鐵站再搭車，20分鐘就可以返到阿靜屋企嘅路，最後竟然用咗超過幾倍嘅時間……果然係好近……

幾經波折，終於將阿靜送到返屋企樓下：「返到去記得快啲沖涼呀，唔係凍親呀！」

「我都冇乜濕過，反而係你呀，濕到好似跌咗落水咁……」

我望一望自己，帶點奸笑咁話：「咁我係咪應該即刻沖涼呢？」

「係呀，你返到屋企記得沖涼呀！」

頂你真唔知定假唔明呀……





「好囉……不如，聽朝出嚟食早餐吖！」

阿靜用帶點鄙視嘅眼光望住我：「聽住先啦，可能聽日地鐵又塞車呢！」

就憑阿靜呢句，我set咗4個鬧鐘，兩個放我房，兩個係呀爸呀媽間房。咁樣就算我間房嘅兩個被滅聲，都仲有人肉鬧鐘！

雖然呢日行到好攰，但都始終習慣咗一定要同chloe同hailey傾陣電話先瞓。

不過唔傾還好，佢哋一駁埋我入去就叫我約阿靜出嚟見下……幾日嚟我一直係三個女人之中不停避呢個話題，不過我都知任我再點轉移視線，佢哋都一定要見下先心息（唔排除見完係安息）。

Hailey：「我同chloe星期4落堂時間早呀，你問下阿靜得唔得。」

「好……」





我突然有種不安嘅預感……

《熱戀期的甜蜜叫衝動，熱戀期過後的甜蜜叫感動……》