一次無心嘅表白，竟然令到佢同咗我一齊: 第二十七章
隨住我將個頭慢慢咁靠近，阿靜亦默許般閉上雙眼，我哋嘅雙唇終於有零距離嘅接觸。
阿靜嘅雙唇真係好柔軟，心跳嘅感覺比起同hailey每一次嘅kiss都嚟得更要強烈。而且同阿靜咁近距離，佢身上嘅香氣經過我嘅嗅覺，傳入我嘅大腦，控制住我嘅思考……
經過咗5分鐘嘅熱吻，我隻手開始不安分咁係佢身上遊走，由佢條小蠻腰由下而上咁掃到佢嘅胸部……
「喂呀！你捨得起身未啫，你咁壓住我，我點瞓喎！」
我回一回神，發現自己一路維持住呢個姿勢幻想，不禁佩服自己嘅臂力。
「咁你瞓啦，我出去先啦。」雖然頭先只係幻想，但作為一個眾多朋友口中嘅「死咸濕仔」，當然好想知幾時可以實現到啦！
出到去，我不停咁係個腦到幫頭先發生嘅事續寫劇情，諗到真係幾乎鼻血都流埋……
點知阿強又話：「屌，你條死咸濕仔，咁好機會都唔食，話你廢架啦，抵你做毒撚！」
「其實我依然同啲港女一樣，係生勾勾架，唔好下下死死聲好冇？仲有，可唔可以唔好成日咸濕仔前咸濕仔後咁叫我呢，真係好唔專重我囉，我明明就係色魔，成日要矮化我，將我同啲有色冇膽嘅人相提並論，真係唔要得！」
「妖，你同啲咸濕仔有咩分別，啊，唔係，佢哋仲好過你，起碼人哋有女係身邊會抽水，而家直頭你條女瞓係你張床都唔食，你唔死有咩用？」
我懶理阿強嘅冷嘲熱諷，徑自走咗入房……
望住阿靜熟睡嘅樣，個心就愈跳愈快。當然大家唔好有任何幻想阿靜瞓覺嘅時候依然儀態萬千，阿靜都係人，呢啲咁超現實嘅嘢只會係啲科幻小說先會出現。微微張開雙唇，隨住呼吸而泛起小波幅嘅胸部，因為微曲重疊住而顯得更修長嘅雙腳……加上阿靜白皙嘅皮膚，真係勾起唔少人類最原始嘅慾望……
屌……我又諗咩呀……
我行近張床，仔細咁望阿靜，佢嘅臉龐我只係諗到用清秀去形容，佢瞓覺嘅樣真係好可愛，應該係話，因為我愛佢，所以佢嘅一切都好可愛……
「做咩眼金金咁望住人喎……」阿靜突然醒咗，仲搵張被遮住自己。
俾佢咁嚇一嚇，原本彎腰望緊佢嘅我成個人向後仆咗去個櫃到……頂……有冇得告阿靜傷人架……
「你又做咩詐瞓呀！」
「未瞓著咋麻！你都未答我，做咩眼金金咁望住我呀！」
「哦，我平時呢就冇乜機會見到啲豬瞓覺嘅，咁今日有機會咯，梗係睇返夠本啦！」
之後阿靜就扯咗我隻手埋去，「呀……」慘叫聲伴隨住阿靜咬我嘅一刻發出。
「嘩，謀殺親夫呀……」但其實個心真係甜過生吞糖漿。
「邊個我親夫呀，唔知喎！我豬嚟咋麻，邊有老公架啫！」
「呀…哈哈……救命呀……唔好吱呀……呀……呀……哈…」我跳咗上張床向阿靜反擊。
「死未！！！」我騎住阿靜，擺出一副勝利者嘅姿態。
「呀……救命……對唔住，我…哈…哈…我錯…」所以做人真係唔應該鬆懈……一唔留神又俾阿靜反擊成功……
經過5分鐘嘅互相虐待，我同阿靜都已經筋疲力盡，攤咗係嗰張勉強瞓得落兩個人嘅床上。
唔知點解，當兩個人係同一張床嘅時候，即使乜都冇做，手指尾都冇掂，但感覺上距離好似又拉近咗咁。我同阿靜兩個互相凝視住大家，慢慢愈靠愈近，阿靜默許般閉起雙眼……
今次終於真真正正咁同阿靜嘅雙唇嚟一個零距離嘅接觸，由雙唇碰上嘅一刻，觸電嘅感覺傳偏全身……就係張床到，我環抱住阿靜嘅小蠻腰，同佢熱吻咗十幾分鐘……
「你又話瞓！玩咗咁耐，捨得瞓未！」
「哦，而家你玩完我就叫我瞓啦！衰人！」阿靜掙開我嘅懷抱，轉身背向住我。
我借勢從後攬住佢：「傻婆，點會啫，我怕你眼瞓咋！」
阿靜雙手疊住我對手：「我要你陪我瞓！」
其實陪阿靜瞓本身冇問題，仲求之不得添。之但係我話哂都係一隻血氣方剛嘅禽獸，我寧願眼不見都好過瞓係身邊冇得掂吖……
不過個天就係鍾意玩我，就係咁，我攬住阿靜，望住佢瞓咗幾粒鐘……真係又硬又痺……
我相信唔少女性都好嚮往瞓係自己條仔嘅手臂或者自己條仔攬住自己瞓……不過呢啲事真係個幾鐘好啦……呢日我俾阿靜壓住咗幾粒鐘，我要用返幾分鐘去同隻手嚟個心靈感應先feel到隻手仲有知覺……
呢日，我哋因為怕我呀爸呀媽隨時返到，所以阿靜冇留係到食飯，我照舊送到佢返屋企樓下，不過今次，梗係嚟多個good bye kiss先走啦！
走嗰陣，諗返起今日俾阿靜恥笑我啲衫嘅事，第一時間打俾阿樂：「樂哥仔，邊日放假出嚟陪我買衫吖！」
「咦，仲以為上次買完啲衫你著都唔敢著添，睇嚟你真係好有決心脫毒咁喎！」
「摺埋啦，點啫，幾時得閒啫？」
「星期三啦，你有冇堂？」
「呢個世界有樣嘢叫落堂。」
「屌你，而家連講句嘢都串啲咁喎！」
「睇下對邊個啦，我係對啲仆街先咁串！」
「你啱啱照完鏡嚟咩？」
雖然平時我會同佢串落去，但因為我有其他更緊要嘅事做，所以同佢確認咗時間地點之後就收咗線。
跟住，我打咗俾chloe……
「你哋仲係街？」
「係呀，你唔洗陪女咩，咁得閒打嚟？」
「陪完啦，我過嚟搵你哋吖！」
《愛情最甜蜜嘅時候就係另一半打你，而你依然感到心甜嘅時候……》