一次無心嘅表白，竟然令到佢同咗我一齊: 第十六章

「喂，阿強，我而家點做好？」我其實唔奢望阿強會俾到咩意見我，純粹想搵人傾訴下。

「其實條問題可以簡單好多，你想同邊個上床先？」

我頂……果然好簡單……

「關咩事呢？」

「屌，你咪同我扮嘢啦，你溝chloe嘅最終目的唔係想攪嘢？爭在攪一次定攪一世咋麻。」





呢番說話好彩得我哋兩個知，咁仆街嘅嘢如果出咗街又唔知幾多道德撚要將阿強批判至死。

「說話唔可以咁講呀，我真係好愛chloe架！」

「咁如果佢肯同你一齊，條件係一世只可以同佢神交你肯唔肯丫？」

屌……講呢啲……

「咁咪係囉，咁你話啦，你想同邊個上床同揀同邊個出街，兩條問題係咪有異曲同工之妙呢！」





「我同意……但唔接受你咁睇我，我明明就唔係咁嘅人！」

「算吧啦，人少少，扮咩吖，咁點啫，你想同邊個上床啫？」

雖則阿強嘅比喻好似ok，但我相信大家咁熟悉我為人，我點會係呢啲咁嘅人呢！

其實真係唔明，點解近排會出現咁多要我揀嘢嘅局面，先momo同阿靜，再chloe同阿靜……而明明chloe嘅地位理論上，情感上，實際上都應該比阿靜高，點解我仲要諗……

其實原因好簡單，我仆街囉。大家試諗下，一條毒咗十幾年，所有嘢都唔輪到自己揀嘅死毒撚，兩個月內竟然可以咁多機會揀同邊條女出街，邊個會唔自high，邊個會唔想自尋煩惱多陣先！





係我煩緊嘅同時，留意到阿靜嘅status改咗做＜仲有10日>，但望住個日曆，我哋嘅約會日子明明係7日架，10日係咩嚟……

唔好睇我平時天不怕地不怕，又口才了得，聰明絕頂，其實我個人係極度缺乏安全感，少少嘅未知數已經足以令我幻想出無限嘅可能性……10日後會唔會係佢同佢條仔嘅拍拖紀念日，其實我一直都係俾人玩緊嗰個；十日後會唔會係佢同我斷絕聯絡嘅日子……

當然我知道齋諗唔係辦法，所以……

「你話咩仲有10日係咩意思呀……？」

「你話呢！？」

又關我事……？拍拖就算你每10日慶祝一次，計返都唔係吖；你嚟m紀念日應該都唔關我事吖（而我都唔認為嚟m要慶祝，除非早幾日玩完啲危險遊戲但又冇安全兔做吉祥物，咁就另作別講啦……）；相識記念日又過咗吖，冇事呀……頂，點估呀……

「我……真係唔知……」

「:@哼，我生日呀衰人！」我頂，你唔講我實知啦天才。





「係係……我會記住架啦，15號丫麻，一世都記住呀！」直到而家，我依然每年都買一份禮物放係屋企，希望將來可以有機會送到阿靜手上。

「咁你有咩表示先！」

「你到時咪知囉！」如果你見到我唔調頭走的話……

「你真係記住記住記住到時唔好發脾氣呀，佢把口真係好衰架！」

「係啦係啦，應承你啦！」

「咁就乖啦！」

我連出唔出嚟都未知，應承定唔洗死嘅……不過應承咗唔出好似死得仲甘喎……





呢兩日同chloe傾電話嘅時候，佢都好似冇提起中秋出嚟嘅事，我以為佢已經冇咗件事啦，點知又問：

「喂呀，幾多點邊到等啫？」

「我要做節喎，我食得飯嚟，你隻國家重點保護瀕臨絕種嘅史前生物都要返屋企啦，你唔好忘記，你咁大個人仲有門禁，你屋企對你真係好……」

「唔係喎，媽媽話今次可以11點先返屋企呀，yeah！！！！」

呢鋪我真係唔荒唔yeah……

眼見兩邊都好似好期待中秋嘅來臨，而我就攪到好似一個一腳搭兩船嘅仆街咁，何必呢……呢個時候，我個腦海再次浮現阿強話：「你想同邊個上床呀？」我有理由相信我只係俾阿強煩得多而被洗腦，同我本人人格完全無關。

《男人從來都唔係貪新忘舊，只係得一想二……》