(純愛、洋蔥、懸疑)她從A片走出來(舊名:我女友竟是田中美佐)(更新至結局): Chapter 107

Chapter  107
 
在一間樓上的Café，我與久違了連淑珊對坐，她道：「邢英帥，好耐無見喇！」
 
能再見連淑珊，得知她安然無恙，我打從心底感到高興，我道：「連淑珊，可以見返妳，我真係好開心啊！」
 
她瞧了瞧我，現出一臉難以啟齒的模樣，道：「嗯，其實…其實我…」
 
我奇道：「連淑珊因咩事吞吞吐吐？」
 




「其實我發咗一個好恐怖嘅夢，個夢好真實架，我夢見你，又夢見有一位帶住面具嘅人追殺我，我…我仲死得好慘添…」連淑珊說到這裡不禁哭了出來，焦急的她不禁抓住我的手道：「我…我覺得嗰個唔係夢，好似…曾經發生過，你信唔信？」
 
我拍了拍她的手背，道：「妳冷靜啲，我信妳。」
 
「我好驚，我好驚係一啲不祥嘅預兆，我好驚真係有個變態佬會殺我。」
 
我安撫道：「唔駛驚，已經過咗去，無事架喇！」
 
「你唔知架喇！個夢好真架，個人戴住個面具…」
 




我斷言道：「我真係知道，你同我係平安夜嗰一晚遇上，嗰晚仲有鯨魚、有蝙蝠，同落雪添。」
 
連淑珊雙目膛大，一臉訝異道：「你點知架？」
 
這時，到我不知如何說起，我道：「連淑珊，有好多嘢，我唔知點講，但係請妳相信我，成件事已經告一段落，唔會再有咩變態佬追殺妳，妳唔會有事，妳就當命運可以選擇，妳嘅生命再一次take two，妳依家應該重新作一次正確嘅選擇，好好做人，其實係妳身邊有好多人好關心妳，因為一啲唔值得嘅人，妳傷害自己，自甘墜落，對妳好嘅人會好傷心架。」
 
連淑珊呆呆瞧著我，沈吟了片刻，噗哧一笑，道：「關心我嘅人，包唔包括你？」
 
「包括，仲有鄭綺文、陳祖強、吳志謙，每一個同學仔都好關心妳，所以妳唔好再令我地擔心，過去嘅我地改變唔到，希望妳可以為自己嘅將來好好努力！」
 




我的話勾起了連淑珊的心事，她再次眼泛淚光道：「你…真係知道我嘅事。」
 
我頷首，遞了一張紙巾給她，她接過紙巾拭淚，笑了笑道：「哈，我唔知道點解你會知道我所有嘢，包括嗰個夢，不過我相信你嘅說話，我應承你，從今日起，我會好好珍惜每一日，唔會再作賤自己，多謝你。」
 
臨別時，連淑珊問道：「邢英帥，係嗰個夢裡面，我地相…遇嘅時候，你同我講你搵緊一個叫田中嘅女仔，你…搵到未？」
 
我苦笑道：「搵到，但係又走失咗，佢嘅步伐太快，已經走到一個好遠嘅地方。」
 
連淑珊安慰我道：「邢英帥，奸爸爹，我相信總有一日，你地會係一個最適當嘅時候，最適當嘅地方相遇。」
 
別過連淑珊，我收到了Jude的電話，她要我回公司。
 
我回到公司，發現除了Jude外，大舊、阿雄、小莉、Kelvin、Mandy也在，大舊道：「阿帥，今日起身嘅時候，嚇咗我一跳，今日居然係二零一一年十月二十一日，我以為得我一個發咗依個夢，但係其他人都發咗一個一模一樣嘅夢。」
 
Kelvin糾正道：「依個唔係夢，平行世界的確存在，嗰位叫田中嘅女仔係特殊嘅情況下由另一個平行世界嚟到我地依個世界，佢返番去嘅時候，所有嘢重新setting，所以今日去返一一年嘅十月二十一日。」




 
我黯然道：「係啊！我地唔係發夢，田中的確嚟過，不過佢為咗拯救依個世界，佢選擇離開。」
 
Jude拍了拍我的膊頭，道：「阿帥，你唔好太難過。」
 
Kelvin突然大喊一聲，道：「弊！Jude，我地咪要註冊多一次，擺多一次酒，影多次婚紗相。」
 
Mandy也驚呼道：「咁我咪要做多次人情？」
 
阿雄囁嚅道：「咁我係咪可以選擇同唔同妳係埋一齊？」
 
Mandy怒道：「你講咩話？夠膽你講多次！」
 
其他人哈哈大笑，我知道他們耍這一場白爛是想令氣氛沒有那麼沉重，可是我真的笑不出聲。
 




小莉拍了拍我的肩膀，道：「毒男，你唔好咁難過，田中都唔想見到你咁樣。」
 
我點了點頭。



以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl