(純愛、洋蔥、懸疑)她從A片走出來(舊名:我女友竟是田中美佐)(更新至結局): Chapter 98

Chapter 98
 
我像瘋子一般漫無目的在街道上奔馳，那一次田中出走，還有一些線索給我去碰運氣，但這次沒有古怪的夢和幻覺給我指引，而且那次還是田中突然地出現在我面前，
這次她又會否像上次那樣，瞧見我像孩子般痛哭撒嬌便會出現在我跟前。
 
這次我會在什麼地方與她重遇？迪士尼？山林道？銅鑼灣的某個窄巷？
 
我茫無頭緒，像極一匹瞎了的馬向四周亂衝亂撞。
 
我致電給結子、大舊、圭司，他們以問題回覆我的問題：「吓？田中又走咗？佢因乜事走？你地之間發生咗咩事？」




 
我沒有多說半句，便掛線。
 
我哭著喊田中的名字：「田中，點解妳要走？我究竟做錯咗啲乜？」
 
途人除了側目外，並沒有為我提供答案。
 
手機鈴聲響起，我接聽，電話彼端傳來Jude的聲音：「阿帥，聽講田中又再次出走？」
 
我可以對大舊、圭司等人鬧情緒，但我並不會以同等的態度對待Jude，我道：「阿姐，我真係唔知田中點解走咗去？我地之前仲好地地？」




 
「咁尋晚有無發生啲咩事？」
 
我想起昨晚的溫馨綺旎，我道：「尋晚，我同田中…」
 
倏然間，一個答案電閃我腦海，我知道田中為什麼離去，昨天，阿俊想侵犯田中，被我撞破，我和阿俊打了一場，然後我勸田中原諒阿俊，一定是這樣了，她惱我不站在她那一邊，只顧幫著阿俊，所以她懷著悲憤傷痛的心情失望離去。
 
電話彼端不斷傳來Jude的聲音：「喂！阿帥！喂！阿帥，你聽唔聽到？」
 
恍神的我被乍現的答案震撼著，並沒有對Jude作出任何回應，更甚是我並沒有把送禮勤的話放在心上──馬路如虎口，我居然在紅燈高懸的情況下橫過馬路，一輛風馳電掣的輕型客貨車眼看便會因收掣不及而攔腰撞向我。




 
一盞懸在天花上的老舊鎢絲燈一擺一擺搖曳，借助那微弱的燈光，瞧到這裡是一間二百平方尺的斗室，斗室周遭散落凌亂的雜物，中央置著一張四腳方桌，乾涸的血塊及一堆手術器材為空洞的桌面帶來一些點綴，兩隻顢頇的老鼠在一角溫吞地撕咬半塊方包，整個環境瀰漫著一股詭異的氣氛。
 
在鎢絲燈的搖擺令斗室中的兩個身影時隱時現，昏黃的光暈灑落在其中一人身上，那是一名年近五十歲的中年婦人，那赫然是媽子，媽子神色揉集著惶恐、擔憂、哀傷，她道：「阿俊，你做乜帶住個面具？仲有你帶我嚟依度做乜？」
 
咿呀咿呀！
 
鎢絲燈的光芒映在另一張臉上，那張臉上赫然覆蓋著一個純白底色、佈滿小孔的面具，面具背後傳來一把沙啞蒼老的聲音：「妳睇過我本日記！」
 
「俊…點解你把聲唔同咗？你…係咪阿俊？」媽子伸出顫巍巍的手朝向那副傑森面具。
 
「妳好想知道我係邊個咩？唔駛急，等我親自為妳掀開答案。」話畢那人把面具拿下。
 
不是阿俊？還有何人。
 




「阿俊…阿俊，你真係嗰個變態殺人犯？點解…點解你要咁做啊？」媽子泫然。
 
「嘻嘻，妳知咩喔！佢地抵死架！佢地一個二個都不思進取，用肉體換取利益？咁樣對其他努力工作嘅人好唔公平，而且佢地肉體、心靈、靈魂都污穢不堪，我咁做一嚟可以繼續我進一步研究靈魂嘅神聖工作；二嚟我只不過將佢地從罪惡嚟泥沼釋放出嚟，我嘅工作係神聖偉大。」
 
「咁施姑娘呢？」
 
「嗰個老姑婆？邊個叫佢發現咗我嘅秘密？佢知道我甦醒前離開過醫院，於是我催眠佢，令佢上咗天台，佢跳樓嗰時我都係到，佢一跳，呯啪一聲跌咗落樓，好似爛番茄咁散晒，嘿嘿嘿，哈哈哈，全身散晒。」
 
媽子看著眼前這個視人命如草介的冷血狂魔，直搖其頭，慄慄道：「你…唔係阿俊？你係邊個？」
 
阿俊一邊獰笑，一邊攤開手，道：「妳面前嘅係羅達輝，內裡嘅一部份靈魂係刑英俊，剩下嘅就係一直畀人誤解百幾年，比孫中山、甘地、愛因斯坦、牛頓更偉大嘅人，發現人體最神秘嘅四分三安士嘅科學家，一般人最經常稱呼我做開膛手傑克。」
 
媽子感到眼前人是位不可理喻的瘋子，道：「開…開膛手？傑…克？依家係二零一二年？你點會係嗰個英國殺人犯？」
 
「嘿嘿！我開始掌握咗靈魂嘅奧秘，係犯完最後一單案，開創咗史上第一宗密室殺人案，然後被捲入另一個平行世界，之後一次又一次到咗唔同嘅平行世界，直到係一個平行世界成為咗刑英俊，之後嚟到依家依個平行世界成為咗羅達輝，估唔到妳認咗羅達輝做契仔，可以同妳再續母子情。」




 
媽子傻了眼地瞪著眼前人，狠狠道：「你…嗰惡魔，你利用完阿俊，依家又嚟害達輝。」
 
驀地，阿俊的獰笑被兩行眼淚取代，聲音也變回原來的那把，他低頭痛哭，道：「媽…媽子，其實我唔想架，我唔想殺人架，我嚟依度只係想見返田中、妳同大佬，但係我…控制唔到啊！」說到後來阿俊跪在地上雙手掩面。
 
媽子瞧著眼前的阿俊，緩緩步近他，她一臉溫柔撫著阿俊的頭，道：「阿俊，媽子見返你真係好開心。」
 
阿俊抱住媽子的大腿像孩子般一直哭，道：「媽子，妳唔好揼低我，係另一個平行世界裡面，你知道我係殺人犯，妳登報同我斷絕關係，妳話妳當年好後悔，點解揀嘅係我，而唔係阿哥？」
 
「俊，媽子唔會咁做，唔會同你斷絕關係，你永遠都係我嘅乖仔。」
 
阿俊現出一副可憐模樣，瞧著媽子道：「真…真嘅，妳唔會呃我？」
 
「媽子唔會呃你，但係阿俊，你做錯咗嘢，你依家殺咗人，你去自首，媽子同埋你阿哥都會等你架。」
 




阿俊聞言現出茫然之色，他搖著頭一步一步後退，他退至方桌，把桌上的雜物撞在地上，他身旁的玻璃映出一副猙獰的臉，那張臉正擠出一個邪惡的笑容，那把沙啞蒼老的聲音再次響起：「嘿嘿，刑英俊，你睇到未，所有人都係騙子，佢地只係希望將你拉入監房裡面，依個世界除咗我之外，無人會再企係你嗰邊，由一開始，佢地已經選擇企係刑英帥嗰邊，嗰個架妹、你阿媽、其他人都選擇佢，而犧牲你啊！」
 
「阿俊，唔好聽佢講，你聽媽子講收手啦！唔好再錯落去喇！」
 
阿俊撿起了地上的手術刀，神色哀傷，一步又一步邁向媽子，問道：「媽子，如果再畀多次妳揀，妳會揀阿哥定揀我？」
 
媽子淚爬滿面，欲言又止，最後她瞧向阿俊，有氣無力答道：「阿…俊，如果媽子知道個結果係咁樣…媽子，寧願唔再見…返你。」
 
阿俊臉色一下子煞白，媽子的話狠狠傷害了阿俊，阿俊雙目通紅，大喊一聲，撲向媽子。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl