【真人真事改編】《去年暑假,我在街上賣寬頻。》: 《去年暑假,我在街上賣寬頻。》(五十)【大結局】
![](http://vmagimg.next.hk/images/apple/20150113/large/1421137784_f08e.jpg)
「喂!偉仔,做咩發呆啊?」浩哥吐出香煙後問,把神遊於上年暑假的我拉回現實,我回過神來答道:「冇,諗返起上年暑假賣寬頻好多往事姐,哈哈,真係記憶猶新!」然後,便將Zippo打火機還給他。
「係呢,其他隊友點啊?仲有冇做Sales?」我關心昔日Team 18同事的近況。
「佢哋啊?你話繼續Sell寬頻嘅就得返阿志龍咋喎,不過就轉咗去『線上遊』做。振波同嘉寶呢,就去咗金行賣金,聽講收入都幾穩定,你知彌敦道幾多『自由行』㗎啦!」浩哥答道。
「咁阿文叔同Leon呢?」我續問被辭退組員的下落。
「文哥早牌喺旺角某間茶餐廳撞到佢,同個客Sell緊保險,咪打咗個招呼囉,原來佢都幾多佣金賺,好多大陸親戚朋友幫佢買,因為香港啲保險係有保障少少……而阿Leon條衰仔,兩個月前先結婚,我哋成班中學死黨都去咗飲,佢而家識諗好多,跟人做地盤,自力更生,人工唔差,遲到都少咗,唔洗做『遲到王』,可能結咗婚之後有返啲責任感啦!」浩哥再分享。
「咦!咁幾時輪到你結啊組長?」我奸笑問。
「結咩先?腎結石就有份,哈哈!」他說了一個玩笑。
「好啦,浩哥,我要做嘢先,今日要Check多兩間舖,得閒就再約出嚟飲嘢吹水啦!」與浩哥談了大半個小時,是時候要繼續巡察下間商店的香煙銷售情況了。「嗯,咁就下次再見啦,記住好好讀埋個碩士佢,將來大把世界,發咗達記住請『小弟』我食飯啊!」浩哥拍拍我肩膀道,眼神帶著希冀。
他繼續在大圍站A出口的通道外派樓盤傳單,我繼續做兼職任務,準備到公共運輸交匯處乘坐803K小巴到顯徑邨工作。下午三時多,太陽仍不減暑氣,熱得我汗流浹背,感覺正如去年暑假,在街上賣寬頻那樣,勤奮而艱苦,卻又相當快樂。
青春無悔,歲月輕狂,未來還有很長的路要走。我慶幸能在2012年經歷了這麼一段特別的日子,我想我永遠也不會忘記──「去年暑假,我在街上賣寬頻」……
【連載完畢,多謝支持!】
Facebook專頁: 大雞小事 ( https://www.facebook.com/bigchickenlittlethings )
特別鳴謝插畫師:「Nothing Serious」( https://www.facebook.com/nothingseriousfans )