【真人真事改編】《去年暑假，我在街上賣寬頻。》: 《去年暑假，我在街上賣寬頻。》（四十七）

　　「喂喂喂？浩哥啊？『友善』個師兄話呢個位係佢哋擺㗎喎，姐係點先？」我急不及待地質問。「嗱，你唔好心急住，我都係啱啱先知呢個位原來係新開返嚟，但係堅爺之前又冇同我講，可能佢同隔離公司阿頭傾好咗啩！你知呢行企位呢家嘢係好鬼馬，但無論如何，你都開咗壇，唔好理啦，照擺住先，我一陣落嚟睇住你！」浩哥解釋。
 
　　我心諗：「唔通上頭想搵我做『磨心』？我咁生面口，就算冒犯其他公司嘅人都可以扮傻仔……算啦，唔諗咁多，最後一日樣衰就樣衰囉！」然後，我立即烚熟狗頭般向其公司師兄解釋：「啱啱打咗畀我『掃把』浩哥，佢話叫我擺住先，我新仔咩都唔知，多多包涵，最多一陣有人嚟擺嗰陣，我移開少少啦，哈！」怎料其他師兄卻道：「哦，你組長係阿浩啊？早講啦，佢出名有義氣，應該唔會嚟偷位嘅，等佢一陣落嚟先講啦！」嘩！原來我組長是那麼有面子？失敬，失敬！
 
　　半個多小時後，浩哥終於來了，向其他行家現身說法：「頭先我就問清楚我老頂，呢個位係佢話新開，同你地阿頭傾好數，詳細情形我就唔知啦！總之，今日就我同我手下一齊擺。而且，頭先我打咗畀『友善』大傻哥，我同佢好熟，佢話佢手下今日放假唔擺，叫我哋擺住先，所以呢個位唔會好迫，聽日未必我哋喺度，聽日點擺聽日先算啦，好嗎？」其他師兄並無異議，而我首次覺得浩哥那麼「型棍子」。
 
　　下午四時前，菜街還未開放行人專用區，所以壇開在行人路上，以免被車輛輾過，但一到四時，全街師兄紛紛將攤位搬落馬路，把易拉架好像轉風帆般面向外邊，準備開戰，迎接傍晚絡繹不絕的人流。
 
　　全條街總共五六十個Ｓａｌｅｓ，其實許多人都互相認識，所以會邊工作、邊吹水、邊遊戲，遊戲除了指玩手機外，還有「鬥開單最快」、「鬥開單最多」等，更可以「個人名義」或「團體名義」參與，落敗者要請勝出者喝東西或吃小食，例如附近的「許留仙」果汁、珍珠奶茶與牛雜魚蛋等。
 




　　２０１２年７月２７日，倫敦奧運開幕，今日，旺角「Ｅ」出口四大位置──「雪糕屋」、「天使」、「永成」、「大快樂」，也快將上演「鬥最快開下午單」大戰，時限設在下午四至六點，參賽者有我和另外三個同事，最慢開單的要請其他人飲「珍珠奶茶」，如果沒有開單者「雙炒」。
 
　　多得浩哥從旁協助，四點半左右，我成功打了一飛，報單後立即舉起申請表飛舞，示意勝利，其他三人看見之後面色一嚇，立即加把勁上岸。最後，各人都成功開單，值得慶賀，但企「永成」的肥仔Ａｌａｎ手腳最慢，故要掏荷包了。
 
　　Ａｌａｎ說道：「好彩五點九開咗個師奶單，唔係就雙計，肉赤死！」浩哥卻說道：「你都唔知咩叫輸得甘，之前『哈根大師』雪糕屋未執嗰陣，我地鬥一張單一球雪糕啊！有次我包尾冇開單雙計，夾埋輸咗八球！一球都成三十幾蚊，一個下午就冇咗差唔多三百蚊啊！」Ａｌａｎ聽罷，呆了一呆：「嘩，好彩少嚟菜街，唔係我實被迫減肥……」
 
　　六時多，我站在西洋菜街裡，喝著珍珠奶茶，人潮如鯽，好像置身於奧運場館中，參與著一個「寬頻奧運會」。
 
【　有一日我想飲波霸珍珠奶茶
　　點知個哥哥話：「小姐無珍珠啊」

　　果一刻我心諗：車不過無珍珠之嘛
　　咁你淨係俾波霸我都無所謂啦
 
　　〈蘇菲亞的波霸珍珠奶茶〉　Ｓｅｒｒｉｎｉ　】
 
Facebook專頁: 大雞小事 ( https://www.facebook.com/bigchickenlittlethings )