【真人真事改編】《去年暑假，我在街上賣寬頻。》: 《去年暑假，我在街上賣寬頻。》（三十五）

　　「阿靚女同事，唔該幫我Ｃｈｅｃｋ哂九龍灣ＭＴＲ附近所有屋苑啲Ｃｏｖｅｒ吖！好似彩咩邨、彩乜邨、淘大花園、德福花園之類，仲有牛頭角嗰邊啲居屋，好似安基苑同振華苑……」振波一到兩點便立即致電公司支援部，打聽附近屋苑的寬頻覆蓋情況。
 
　　記得浩哥提點過我，一開工沒客人比較空閒時，最好先調查戰場情報，因為如果熟知當區各屋苑線路，便能即時應付不同客人，為他們推介最合適的服務，反之若叫客人大熱天時企在街邊等你Ｃｈｅｃｋ　Ｃｏｖｅｒ，會令其欠缺耐性，所以Ｓｅｌｌ嘢要快、狠、準和流暢，盡量不要浪費人家時間。
 
　　不過，如果我是那位電話支援部的女同事，第一個偵查任務就是來自振波的委託，要連續查十幾個屋苑資料，一定會燥過「流Ｍ」！對講完畢，振波亦已把有用訊息手錄至筆記簿上，然後圈圓畫方的，把重點勾勒出來，好像在寫作文大綱，甚是認真。
 
　　「嘩，波哥，乜搞到好似抄筆記咁？」我驚訝地問。「趁得閒嗰陣，諗下應該Ｓｅｌｌ咩嘢畀住喺唔同地方嘅人嘛！」他邊寫邊答。「咁你有咩策略呢？」我好奇。「咁我問返你嘞，如果一個客住『彩德邨』，另一個客住『德福花園』，你會向邊一個客Ｓｅｌｌ貴Ｐｌａｎ？」他的問題讓我遲疑了一會，因為我覺得問題背後有點深意想要帶出。
 
　　「理論上嚟講梗係同個私樓客Ｓｅｌｌ貴啲啦……」我沒信心地回答。「哈！如果你咁諗，我洗咩Ｃｈｅｃｋ哂附近所有屋苑最高用到幾多速度，直接Ｓｅｌｌ哂最平純１００Ｍ上網服務畀人算啦……如果換著我，我會話『全部都Ｓｅｌｌ最貴Ｐｌａｎ』！」他的言語真讓我大惑不解，也不是人人都那麼有錢和打Ｏｎｌｉｎｅ　Ｇａｍｅ，需要極速連線享受啊！
 




　　「吓？竟然！請問點解呢？」我準備聽他發表特別的論點。「嗱，當然唔係所有客人都願意每月畀多百幾兩百蚊用５００Ｍ或者１０００Ｍ上網，不過如果你次次都Ｓｅｌｌ平嘢，點跑分追數啊？……你以為住公屋就一定生活水平低啊？而家有錢人邊有樣睇？邊可以用住邊嚟斷定？住公屋都揸靚車啦！越來越多香港人追求生活質素㗎啦，特別係電子科技嘢！你一開始Ｓｅｌｌ啲平嘢畀人，人哋分分鐘嫌你睇唔起佢添啊！五、六千蚊買一部『Ｓ－Ｐｈｏｎｅ　３』都捨得，上網都唔洗同你慳啦……」振波之言，不無道理。
 
　　「咁又係！師奶都有幾部電話，仲識玩平板電腦！」我好像領悟了什麼，待他繼續解釋：「冇錯！人人都有幾部智能裝置，加上而家冇人會睇啲無聊電視台，寧願上網睇片，一家人同時上網嘅話，如果網速唔夠咪會互搶Ｗｉｆｉ囉？……所以話，一開始我一定會就住呢點進攻，特別係公屋住戶先多年青人同時上網啊！如果佢屋企根本上唔到高速，咁我都冇嘢好講，到時自然Ｓｅｌｌ返普通嘢，一早Ｃｈｅｃｋ定唔同屋苑網速咪唔洗浪費時間！」
 
　　振波教導我一番後，趁暫無客人問津，便與我對答操練，給我過兩道「散手」，並告訴我就算真的拍烏蠅也好，腦海裡都要不停「預演」各種臨時情況，以備不時之需。認識振波之前，我以為企街Ｓａｌｅｓ大部分時間都很悠閒，可以玩一整天手機，認識振波之後，始明白我們可以「自製」繁忙。
 
　　在九龍灣鐵路站Ａ出口天橋上，我勤奮用心地拉客，然後觀察振波銷售的風采，他真的能利用剛才解釋的觀點開了兩張貴單。臨走時，他說分一張給我，我說不用客氣，所謂無功不受祿，況且他還面對面和我「補習」，示範什麼叫作敬業樂業，精益求精呢！
 
【　敬業與否定高下
　　區區的小角可變作佳話

　　即使只得四句低級笑話
　　用心去　演繹它
　　小小的經典可傳萬家
 
　　〈如花〉　謝安琪　】
 
Facebook專頁: 大雞小事 ( https://www.facebook.com/bigchickenlittlethings )