【真人真事改編】《去年暑假，我在街上賣寬頻。》: 《去年暑假，我在街上賣寬頻。》（二十九）

　　突然，一個青年從天橋奔下來，緊張地向我報告：「喂！師兄！『食環』嚟緊啦，我頭先畀人捉咗，你快啲走！」
 
　　「咁大檸樂？喂唔好講咁多，一齊入坪石邨避下先！」我們背著背包，從「鑽石樓」樓梯直上坪石邨商場平台，二話不說走入一間舊式茶餐廳暫避，順便吃個下午茶，畢竟「吊頸都要唞下氣」。
 
　　「金華茶餐廳」，一貫港式的茶餐廳名字，室內裝修亦保留一種懷舊風味，四人座木椅卡位、淺綠色方格階磚、泛黃了的牆紙，據說它已屹立於坪石邨三十多年。環觀四周，都是些五、六十歲，配戴著老花眼鏡看馬經的老伯，當我們向老伙記點了「西多士」配「凍奶茶」時，隱隱感覺到他眼光裡打了個問號──「乜而家啲後生仔仲會落嚟老店食嘢㗎咩？」
 
　　我問拯救我的哥兒：「師兄多謝你救我一命，頭先你企咩位？要跑過嚟通水嘅？」他吸了一口凍奶茶道：「冇，我企『彩隧』（彩虹港鐵站外行人隧道）姐嘛，你知嗰度好多無牌小販，咪搞到小販管理隊嚟掃場囉，我一個唔小心畀佢地捉咗，成個壇同易拉架都冇咗！」
 
　　我吃了口西多士，抹了一下汗說道：「嘩，咁你咪收咗張『牛肉乾』？聽講要罰千五㗎喎！」他淡定地說：「啱啱打咗比我『掃把』（組長），佢話一區每個月有四張Ｑｕｏｔａ，好彩我係第四個畀人捉，可以問公司攞返錢，唔係就要自己食咗張罰單啦！我驚班食環好快去埋你個位，咪嚟同你單聲囉！」
 




　　我有點兒感動，想不到眼前這個外表忠厚老實的小伙子，會那麼考慮到其他同事的安危，我問：「係喎，仲未自我介紹添！我叫偉仔啊，係Ｄ區Ｔｅａｍ　１８嘅新人，跟阿浩哥嘅，唔知你點稱呼呢？」「哦，我叫細輝，同你都係堅爺嗰區嘅新仔，組長係Ｍａｒｙ姐。」
 
　　為報答細輝，我結了他的賬，他行裝被沒收了，閒著沒事幹，跟我一起回壇，交談時方知他是應屆高考生，昨天才經歷了放榜！「唉，除咗中化科考到個『Ｄ』，其他全部都攞『Ｆ』啊，不過都預咗一定入唔到大學……」細輝感慨。
 
　　我關心地問：「咁你有冇報啲咩『高級文憑』之類？有啲課程對出嚟做嘢都幾實用！」他輕鬆地回答：「我咩都冇報啊，反正都唔鐘意讀書，屋企又唔係有錢，所以出嚟做嘢算，我阿媽都叫我讀唔到就出嚟幫補吓家計。係呢，你啱啱讀完『高級文憑』？」
 
　　我咳了兩聲道：「唔……我仲放緊暑假，雖然我個樣唔似讀書人，但都讀緊大學……」他一臉驚奇道：「吓！讀大學都嚟Ｓｅｌｌ寬頻？讀『社會大學』啊？」他問得很搞笑，使我忍俊不禁，接著解釋道：「真係讀Ｄｅｇｒｅｅ啊，就升Ｙｅａｒ　３啦，我啲學生尋日先同你一齊放榜……」
 
　　接下來的時間，我以個人經驗，不斷跟細輝分析出路問題，當正他是我補習學生一樣，我認為暫時不想讀書不要緊，但應趁年輕多嘗試不同工種，發掘自己的專長，並建議他日後一有機會，可以進修相關文憑或証書，以便長遠發展，他亦點頭稱是。
 




　　升上大學以後，像輔導教授老師所說，每人都很容易成了一個「孤魂野鬼」，遊走於大學課室與圖書館之中，很難覓得知心好友，與其他同學多是「同台食飯，各自修行」，不像中學時會大伙兒在自修室內互相討論Ｐａｓｔ　Ｐａｐｅｒ的答題技巧了，只管埋首屬於自己的象牙塔之中，不管他人死活。
 
　　雖然不管他人是生是死這個我覺得誇張了一點，但真的很難找到一個會主動關心你的朋友，像細輝那樣為人設想的類型就更難遇上了，古語有言：「仗義每多屠狗輩，負心多是讀書人。」人越大越覺得這句有味道，無論學歷成績有多好，做人還須忠實真誠，樂於助人。當然，向自己友通風報信逃避小販管理隊追捕，只是一個特殊的例子啦！哈哈！
 
【　焗到呼氣也覺難過　
　　焗到鬱結也會傳播
　　焗到街裡人人行過　
　　也推我
　　就會想去約你與我　
　　跳出悶熱唱飲歌

　　今晚節目很多　
　　能共你痛快渡過
 
　　〈小涼伴〉　Ｒｕｂｂｅｒｂａｎｄ　】
 
Facebook專頁: 大雞小事 ( https://www.facebook.com/bigchickenlittlethings )