【真人真事改編】《去年暑假，我在街上賣寬頻。》: 《去年暑假，我在街上賣寬頻。》（九）

　　「伯伯，尋日執紙皮件事，可能係場誤會啦，如果我哋講錯嘢，唔好意思先！不過，而家唔該你移一移開啲紙皮，畀些少位我哋好嗎？」我誠懇有禮地說。「啱啱執咗幾個鐘，成身都散哂，冇哂力添，今晚得閒咪移囉！」想不到他會道出如此一句。
 
　　其實，如果他無動於衷，我們也是無可奈何的，事關好像沒有法例說明我們直銷人員可以優先佔用公共空間，如果我們阻街，也一樣會被人投訴，被「小販管理隊」拿去祭旗的，所以我們沒有道理叫人離開，最多也只能動之以情。
 
　　「嗱，阿伯，大家都係搵食姐，我次次嚟呢頭都見到你好勤力嘅，咁啦，如果你肯攞開啲紙皮，我一陣買個『開心樂園餐』畀你個仔食啦，你點睇？」朱仔說罷，伯伯臉色一轉，雙眼發光，睜得大大的，疑問道：「真係？係咪呃我老嘢㗎？不過，你點知我有個仔？」朱仔微笑一下：「我個個月都喺呢區開工㗎嘛，你經過嗰時唔見我咩？我成日見你同個仔行天橋過對面龍翔廣場啦，每次你個仔都攞住『開心樂園餐』啲玩具返嚟，仲玩得好開心添！」
 
　　「爸爸，爸爸！我要食『麥記』，我要食『麥記』！」一把兒童撒嬌聲音從後傳出，原來是老伯伯的兒子。兒子與有些許駝背的老伯伯差不多高，不足一米六，他眼睛細細，臉蛋圓圓，頸子短短，樣貌與一般人有些區別，然而卻有比我們更天真無邪的笑容，他是一個「智力較低的人士」，他是一個「三十多歲的兒童」。
 
　　「好啦，好啦，明仔唔好扭計，爸爸一陣賣埋啲紙皮就帶你去食『開心樂園餐』，好冇？」老伯伯拍了拍兒子的頭，用和藹可親的聲線安撫著他。此情此景，我都不知道怎樣形容自己的感受，我有點兒想哭，亦有點兒欣喜，前者因為同情，後者緣於感動。總而言之，與老伯伯爭地盤的嫌隙，都被「開心樂園餐」所消除了，我和朱仔各湊了二十元，多請老伯伯吃一個「廿一蚊餐」。
 




　　開壇以後，我們四人坐在路邊，天氣炎熱，我和朱仔吃著雪糕，明仔則玩著玩具，剛才方得知他姓陳的老伯伯便分享他的生活來：「唉，個仔一出世就患上『唐氏綜合症』，有中度弱智，心臟同視力都唔多好，咁多年嚟成日進出醫院……佢阿媽又死得早，十幾年前就走咗，一個人孤身寡佬照顧個仔咁耐，其實真係好辛苦……而家我都六十歲啦，就退得休，你想做看更人哋都唔請你啦，不過就算做到看更，有時叫你開通宵，又點樣睇住個仔……所以咪靠政府養，落街執下紙皮幫補一下咁囉……」
 
　　一人有一個故事，想不到陳伯的經歷如此淒楚，我這個出身草根的人，十分理解他的心情，我問了他一句：「有冇諗過明仔第日一個人點樣生活？你知道你都會老㗎嘛……」「哈，而家邊諗得咁多吖？有時佢都會去庇護工場學下做嘢嘅……有明仔呢啲病嘅人，平均都係得五十歲命，我望就望自己長命啲，可以照顧佢成世，人地就唔想『白頭人送黑頭人』，但係我就相反啦，如果我死先過明仔，佢一個人點生存……」陳伯說得老淚縱橫，我默然無語。
 
　　我常讀中文典籍，記得《禮記‧禮運大同篇》有這麼一句：「使老有所終，壯有所用，幼有所長，鰥寡孤獨廢疾者皆有所養。」其實，現在本地社會福利能夠完全達致這程度嗎？雖然相比起許多地方也不差，但如果真的足夠，還會有那麼多老人家要靠一塊一塊紙皮來過活嗎？身為大學生，未來將要挑起建設社會的責任，我們一定要盡力幫助弱勢社群，改變社會！
 
　　與陳伯談了一個多小時後，遲到王Ｌｅｏｎ也未出現，但我早已預料，突然浩哥又來電，心想又要替Ｌｅｏｎ說謊了，一接電話，浩哥膽顫心驚地說：「Ｌｅｏｎ到咗未？收到風經理今日偷偷落區巡視啊……」未及他說畢，遠處已望見堅爺緩緩走來，這次「大鑊」了……
 
【　衣著矜貴的
　　溫暖飽滿的

　　與身處福中不覺的
　　這天你有否興趣
　　聽他訴苦幾句
 
　　〈愁人節〉 謝安琪 】