《千萬不要乘往堅尼地城的137號死亡電車》－實體書現已出版，感謝支持！: 第40話：《Best Friend》（4）

      「千琳你就係知自己一無所長，大眾臉，成績廢，人緣差，所以唯有靠扮乖扮善良博取人注意，我有冇講錯？」韻初舔著染血的食指，理應嬌美的姿態在此時顯得恐怖。

      「小初……你係咁睇我？」千琳如芒刺背的拉扯著校裙，額頭淌著冷汗，雙腿顫抖不已。

      「傻西，原來你咁Pure and true？你以為我唔知，你親近我係為咗有接觸James既機會？」韻初狡猾一笑，跟茹霜的笑顏同等詭異，「仲係度問我用開邊款暗瘡膏……學我鍾意鬆弛熊、鼻窿雞……為咗迎合James口味寫埋曬D靈異小說，明明係個女廁都唔敢自己入既無膽女……仲有啊，係度扯條裙引人注意……姣貨！你以為James會理你咩，人地當你白痴咋，暗瘡醜女！」

      千琳……原來對James……

      我看著千琳把一邊裙子扯裂，臉頰是不絕的淚水：「你……講笑咋？你一定係講緊笑喇……小初點會咁對小琳……」





      韻初口中的……是情急下的癡語，還是久藏心裏的真心話？

      韻初捧腹而笑：「哈哈係呀，我想提下你呢，你D暗瘡啊，買幾多護膚品都遮唔曬架喇，你整容算吧喇！不過呢，你就算整容都不及本小姐咁魅力四射架喇……你不如……自殺算喇，等投胎變女神喇！等等……唔好跳樓啊，驚你砸死人啊，嘻嘻！」

      「小初！」芊琴也聽得哭起來，「你好過分……好過分啊！」

      我完全給不到反應，姑且堅信自己身處噩夢之中。

      我認識的韻初，不可能是這樣的……





      千琳緊握拳頭，崩潰的飲泣著：「你……話過我地係……Best Friend……仲要一齊去大阪畢業旅行……永遠唔離開對方……」

      「係啊，我地係Best Friend啊，Best of the Best啊，」韻初裝了個鬼臉，「如果冇咗你，又係邊度搵到個姣醜女襯托我呢？哈哈……」

      「你──」芊琴才欲衝向韻初，已被我制止，因我感受到箇中的不妥……有一種很不祥的預感。小穎坐在樓梯上哭著，我卻無暇理會。

      「小琳，你好蠢啊，一直比本小姐利用都唔知，仲話Best Friend，哈哈……」韻初指著千琳大笑，我感到心寒多於憤怒。

      「夠喇……」千琳抖動得更厲害，梯級上是被愚弄的苦澀。





      「唔好再勉強喇，你點扯條裙，最多都只係一個姣醜女咋。」

      「夠喇……」千琳遮掩雙眸，如喪考妣的飲泣著。

      「姣醜女、姣醜女、姣醜女……」

      「夠喇。」

      千琳從口袋扯出鐵剪刀──原來用於處理我傷口的剪刀，飛身躍向歡呼中的韻初。

      「啊！」韻初才於亢奮中醒覺，剪刀已深深插進喉嚨之中。

      血色夢魘從韻初的嘴巴噴出，是源源不絕的驚心，使我、芊琴和小穎僵直站立原地。

      「我當你朋友……我當你朋友……我當你朋友……」千琳用剪刀猛戳著韻初的喉嚨，「你當我係咩！」





      「咕……咕咕……啊……」韻初眼睛睜大，渾身抽搐著，雙手緊纏著千琳提著剪刀的手臂。

      「你同我收聲……我要將你條脷剪咗佢……」千琳失控的用剪刀在韻初的嘴巴中瘋狂亂剪。

      「剪咗佢……剪咗佢……剪咗佢……」

      血水濺到我的臉龐上。

      「我唔要再聽到……唔要再聽到……」

      芊琴抱著小穎尖叫起來。

      「去死喇……Best Friend。」





      那是千琳對Best Friend說的最後一句話。