《千萬不要乘往堅尼地城的137號死亡電車》－實體書現已出版，感謝支持！: 第31話：《我們，其實已經死了》（3）

      「其實呢，你有冇第二句，呢句真係太作狀喇。」我將這句話啃在喉嚨裏，只是苦笑，直到目睹那被還原的六面扭計骰。

      她……是怎樣做到的？

      「小琳姐姐，你好犀利啊，分析得好清楚啊……」小穎錯愕的道，千琳則難為情的扯著灰裙子，還是一副缺乏自信的模樣。

      即使千琳並非樣貌很出眾的女孩，人際關係亦非很出色，但她至少有很好的性格、才華，其實沒有需要如此自卑吧？

      相反，我才是最應該自卑的人吧？





      坦白說，我們真該慶幸遇到千琳這靈異小說作者。若果沒有她在場，即使我們得到茹霜的日記，看到「祝福三遍」，亦不可能知道發生什麼事──即使是思考細密的James亦未必知悉。

      「哈哈……假設，我係話假設咋……」咸爺揉著耳朵，一副半信半疑的模樣，「如果真係『祝福三遍』搞鬼，咁我地有咩方法翻去現實世界？」

      「嗯……」千琳胡亂的扭動著扭計骰，「網絡其實流傳過一個方法挽回。祝福者靈魂被分散係三個祝福物度，理論上應該將三個祝福物都歸還比事主，咁就可能可以歸還靈魂比佢，咁既話我地先可能有轉機。」

      至少還有解決辦法，這已是不幸中之大幸了。

      「咁既話目標就明確不過，我地應該盡快搵到果三個祝福物，然後再去搵茹霜。」我思緒清晰起來，「不過問題就係……祝福物到底係咩黎──」





      「千琳頭先話係咩都得，任祝福者自行選擇……」芊琴打斷我的話，「我地唔會知道……」

      「哈哈，我有個建議。」咸爺忽爾輕鬆的笑道，真虧他還笑得出，「如果搵到茹霜其他日記部分睇一次，就可能知道佢選擇咗咩物品做祝福物，同埋送比邊個。」

      眾人連番點頭，我卻瞬間猶疑起來：「但係……白髮女孩，即係茹霜既日記可以係邊度搵到……」

      「哈哈，本大爺可能知道。」咸爺豁然一笑，「頭先我躲避電鋸女……即係茹霜既時候，佢不斷重複講『翻7樓、翻7樓……』。我覺得，7樓可能係佢經常徘徊既地方，可能我地會係果度搵到線索。」

      我想說的是，咸爺的輕鬆淡然與絕望氣氛存在很大的違和感，儘管程度遠遜在利物浦球衣印「BECKHAM」。





      真是一位有趣的傢伙。

      眾人沉默一番，最後一致贊成先到7樓一趟，或許因為根本並無其他選擇。

      「已經21:49喇，仲有大概2個小時就到『0 left』，時間無多喇。」我首先提著電筒站起，拉起雙腿痲痹的小穎。

      事實上，沒人知道12點會發生什麼事情……但是，比較可能是不好的事情吧？

      我們開始整裝待發，咸爺在鐵櫃子掏出了另一個電筒，以及一把棍子──

      「比你。」

      「嗯？」

      我接過咸爺拋過來的棍子，仔細端詳，那是拆除掃把頭的鐵掃把棍，長一米左右。





      「出面周圍都係癲佬，你赤手空拳點得架。」咸爺莞爾一笑，我一愣後報以微笑：「咁你呢？」

      「哈哈，我用唔慣長棍，界刀就得喇。」

      遲些有機會，真的要拜問一下，怎麼他每句前都總愛加「哈哈」，現在真的有心情笑嗎。

      待我們都收拾好一切可出發時，我卻看到小穎仍然手抓那袋生活麵包。

      「傻妹。」我輕戳一下她的小腹，而她亦意料之內的報以還擊：「喂呀，你個變態又搞女仔！」