《千萬不要乘往堅尼地城的137號死亡電車》－實體書現已出版，感謝支持！: 第30話：《嗜血祝福》（2）
「你地應該都係生還者，唔知發生緊咩事啊嘛？」男生將濕透的黑髮往左撥，「我同你地一樣，只不過頭先遇到一班癲佬，為咗躲避先匿埋入櫃裏面。」
「點解要係櫃裏面？」我隨口道，審慎的打量著他，「點解唔鎖門？」
「鎖門係冇意思，」男子將臉上剩餘的血跡都抹掉，「個電鋸女有鎖匙，鎖門反而會引起佢注意。」
聽罷，我和同伴面面相覷。
「我好似係晨福電梯見過你。」男子將界刀塞進褲子裏，對千琳友善的微笑。
「嗯……係……」千琳苦思著，「不過……你叫咩名？」
事情在數分鐘內起了極大變化，我自問無法掌握。本來還以為櫃子裏有什麼，原來不過是一個生還者而已，甚至是千琳認識的？
荒謬程度簡直媲美下一秒出現一道隨意門，然後多啦A夢走出來說「玩夠了是時候回家了」。
如果是這樣便好了。
「我叫雲一哲，哲學個哲，」男子笑道，「所有人都叫我咸爺。」
咸爺？
我掃視他的全身，才警覺他似乎跟我們相同年紀，大概16-18歲。濃密的黑髮長至耳際，差點兒遮蓋眼睛，而頭頂位置卻有少部分頭髮是純白色的。他的膚色偏白，鼻子挺高的，左臉有一道刀痕，粗眉及有神的雙目令他看上去很認真嚴肅似的。那標緻的輪廓，散發著神秘的帥氣，甚至有點像……台灣電影《星空》的男主角林暉閔。
他大概175公分高，身形比我略壯丁點，身穿紅色的利物浦球衣。下身是米色鬆身短褲，配以淺啡色的Woodland高筒鞋。
坦白說，儘管我仍未擱下戒備，但他予人一種豁然的安全感。
「我係呢度遇到過好多住晨福大廈既人……」自稱「咸爺」的人轉身搜尋著鐵櫃，此時我才明白為何他這樣自居。
那利物浦球衣背面，竟印著「BECKHAM」及「7」的號碼，使我不禁苦笑。
麻煩告訴我，現在的年輕人都怎麼了？
「咁點解你會……黎咗呢個異世界？」千琳繼續問道，眾人裏僅她與男孩相識，儘管那是一面之交而已。
「異世界……你地係咁稱呼佢？」咸爺在鐵櫃裏端出數支COLD蒸餾水，拋到我們手上。
「我一醒咗，就發現自己身處呢棟醫院既2樓，一切好似幻覺一樣。」咸爺提著一頂棒球帽，在我們面前坐了下來，「希望我唔會嚇親你地啦，我同你地一樣，唔知發生緊咩事。」
他不像是懷惡意的人，否則必定早已出手……還是小心觀察多一會兒好？
千琳見狀，也坐了起來，芊琴和小穎亦然。小心眼的我是最後一個坐起來的，與他們圍成一個圓圈，電筒置於中間。
頃刻的沉默後，咸爺戴上棒球帽，語氣淡然：「我一直搵緊一個人。」
「嗯？」我傻眼的注視著陌生男孩。
「你地有冇遇過一個叫晨小絲既女仔？」咸爺誠懇的道，「25歲左右，長髮皮膚白，戴住一條十字架頸鍊，而佢係啞既……」
眾人陷入沉默，只因我們並無遇過任何啞女。死靜顯得窗外雨聲更鏗鏘，窗內氛圍更尷尬。
「Sorry……麻煩到你地……」咸爺含羞一笑，站了起來，「我會自己去搵佢──」
「唔好啦，」千琳堅決叫住了他，「不如……一齊搵佢？我地都冇所謂架……」
「嗯。」芊琴微笑著，小穎亦道：「係囉，出面好危險……」
唯獨我仍在思考，為何一名利物浦球迷會在球衣印上曼聯球星的名字，這是多麼荒謬的事情。
「咁……你地呢？你地有咩打算？」咸爺猶疑著，終究再次坐下。千琳以驚人的歸納能力將事情的來龍去脈都交代一次，但當千琳說到白髮女孩的日記時，咸爺卻皺眉了。
「我入黎呢間房既時候，係角落搵到呢張野，但唔知咩黎……係咪你地講既日記？」咸爺從米色短褲的口袋抽出一張皺摺斑斑的白紙。我拿過紙張，心情是七分驚三分喜。
那些字體……跟之前所看的6張日記字體如出一轍──一樣的難看。而且，這張紙同樣是A6的大小，而且右上角寫著一個號碼。
71
「我地手上既日記只係去到70……原來71係呢度……」千琳取過我手中的日記紙一看，十秒後臉色卻驟然大變。
「咩事？」眾人大惑不解的瞧著她，可她只管死盯著日記的字，喘息急促，臉色蒼白無比。
怎麼了？難道日記的內容怎麼了？
「小琳？小琳？」芊琴搖著千琳的肩膀，她卻無甚反應。
「我……我……應該一早發現……」千琳緊張的咬著右手手指，呼吸顯得艱困，「但點解真係咁……」
「發現D咩？」芊琴抓著她的手，一頭霧水。我才取過日記紙第71頁，千琳已經驚懼的吐出一句話：「茹霜可能已經死咗……而我地……我地……」
「我地點？」我緊張到頂點，完全不理解千琳的話。
「我地身處既地方……」千琳吞下一口口水。
「並唔係活人應該黎。」