<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter 60-2 ２００２年世界盃（中）

 
柯家的私人飛機正在飛往首爾途中，柯恩隆原本打算與一眾公子和幾位穿著空姐制服的女明星來個多人混戰，可是計劃不似預期，三姨太突然要跟他去首爾，留給小明星的機位便被三姨太和他的三位弟妹坐上。
 
柯麗華戴上耳機聽著Galaxy girl的歌曲，一邊輕聲哼著。
 
在旁的柯麗萍不禁搖了搖頭，柯麗華一向對娛樂圈的偶像深感興趣，最近火速冒起的Galaxy girl俘獲了小妮子的芳心，搜購了不少Galaxy girl的周邊產品，這次隨著他們到韓國、日本，其中一個目的就是要到當地搜集Galaxy girl的限定商品。
 
坐在兩人身後的柯恩繼有些想念宛琳珊，自從宛琳珊加入了Galaxy girl後，脫胎換骨成為了當今娛圈炙手可熱的偶像歌手，風頭直迫星旺的雙生兒。宛琳珊那種獨有的楚楚動人魅力，深深植入他的腦海中，他亦感覺到宛琳珊對自己與其他人不一樣，如果不是母親嚷著要乘搭柯家的私人飛機，他便可以與宛琳珊乘搭同一班飛機到韓國。自從兄長柯恩承罹難後，母親便很少出門，不知為何這次居然與他一同前往韓國。
 
飛機還有一個多小時才抵達，柯恩隆獨個兒喝著酒，他斜睨了三姨太一眼，就是對方連累自己在飛機上獨個兒喝悶酒，他道：「三娘，之前妳一直摺埋，乜突然咁有興致跟我地去韓國啊？」




 
三姨太緩緩轉過頭來，道：「阿隆，你好似唔歡迎三娘咁喎？依架飛機係柯家嘅，我地都有權搭㗎！」
 
柯恩隆笑了笑，道：「三娘，我知道妳一向都鍾意爭嘅，無非都係驚啫！其實妳放心喎！爹地成日同我講要兄友弟恭，我身為大佬實會睇住啲弟妹，話晒佢地都係柯家嘅人，一定會食得飽、著得暖㗎喎！」
 
三姨太道：「阿隆，邊個係將來尚燈嘅主席都未知？阿生派恩繼去日本、韓國傾賭船嘅野，就係俾佢去歷練下。」
 
柯恩隆哈哈一笑道：「三娘，賭船嘅生意對於尚燈嚟講不嬲雞肋嚟，唔蝕太多錢已經好好㗎喇！你都係叫阿繼佢陪你去周圍行下仲好啦！不過就唔好坐咁多飛機，話晒阿承佢都係……」
 
三姨太聞言眼內閃過一絲陰狠之色，柯恩繼怒道：「阿隆，你唔好咁過份喎！」




 
柯恩隆道：「ＯＫ！ＯＫ！我只係善意提醒，無其他用意嘅！你地唔鍾意，我收聲，我收聲。」
 
機上的其他公子都在低聲抱怨著，方貞光道：「隆少話有空中淫亂派對，我先跟佢機，點知嚟到咩都無得玩，真係無癮。」
 
江彬淫笑道：「唔緊意，我已經叫agency準備好，飛機落地後，各式佳麗任君品嘗。柏奇，我知道你奄尖，要食幼齒同處，我叫人準備咗喇！」
 
樓柏奇的目光一直停留在柯麗華身上，他喝了一口酒，才道：「出得嘅賣嘅，都係啲出身低賤嘅女人，一諗起佢地流住下等人嘅血就令我反胃喇！木門對木門，竹門對竹門，就算要搞，啲女都唔好同自己嘅地位差太遠。」
 
江彬笑道：「柏奇，你真係寧舍要求高喇！有咁嘅條件嘅女，都係大家閨秀，佢地邊駛出嚟賣身啊！」




 
＊＊＊
 
飛機已經飛離了香港空域，王采堤瞧向窗外的景色，都是一片白茫茫的雲朵，坐在她身邊的陳依官一臉辛苦的閉上雙眼休息，飛機起飛引起的氣壓差，讓他的耳朵很難受。
 
坐在陳依官身後的Humphrey笑道：「依官，你隻耳仔仲痛緊啊？靜間飛機降落都會痛多次㗎！」
 
陳依官搖了搖頭，道：「唉！你唔好嚇我啦！我已經係咁𡁻香口膠，但係都無乜幫助，究竟你地有咩方法可以令耳仔無咁痛㗎？」
 
Humphrey道：「以我搭咁多次飛機嘅經驗，其實猛吞口水嘅方法係最好。」
 
Humphrey分享了自己的經驗，陳依官便不斷去吞嚥唾液。
 
王采堤問道：「係呢！Humphrey，我地去到機場，係咪有人接機啊？」
 




坐在Humphrey身邊的管佳莉搶著道：「係啊！靜宜同我地講楊鳳瑤去咗東京，佢知道我地今日去日本，佢會接我地機啊！」
 
坐在王采堤前排機位的飯桶武別過頭來，道：「估唔到今次去日本，會同楊鳳瑤學姐見面，上次見嘅時候，都係元朗嗰次喇！」
 
矮仔文道：「飯桶武，乜你咁好口，叫人學姐啊！記唔記得之前你仲鬧過人地。」
 
飯桶武哼了一聲道：「矮仔文，你唔好篡改歷史先得㗎！嗰次你都有份鬧佢，講到唔關你事！」
 
萬季常插言道：「其實件事都過咗咁耐，仲有咩好講，嗰次罪魁禍首係湯仲謀。」
 
飯桶武道：「係囉！嗰次係小誤會，我一早就無放喺心上，係矮仔文你成日提起。」
 
王采堤一直都對吳林六美的事情很有興趣，她先後與管佳莉、呂靜宜、布正麗、宛琳珊見面，現在有機會與吳林六美的楊鳳瑤見面，不禁有些興奮，其實她正在暗地去繪畫一幅自己、加上吳林六美與成皇志的畫作，現在只差楊鳳瑤與柳豔，她快將與楊鳳瑤見面，不知日後有沒有機會和柳豔碰面呢？
 
＊＊＊




 
我們抵達韓國，還未安頓好，Galaxy girl便要馬不停啼在當地進行宣傳活動及拍攝工作。當日王采堤的生日會，游大輝為我引薦游稻，於是我承諾他當Galaxy girl的隨行員工，在機上我安排他與其他工作人員同坐。
 
游大輝對我的安排甚感不滿，抱怨道：「點解頭先你唔安排我同宛琳珊一齊坐啊？」
 
我道：「之前我已經講明，俾你跟埋嚟做工作人員，但係大前提係唔影響Galaxy girl嘅工作，我地喺到留兩日咋，之後又要飛去日本，佢地啲工作排到密密麻麻，無乜時間休息，所以我唔想你打擾佢地」
 
「超！佢地喺飛機上面都不知幾咁精神，都無瞓過覺。」游大輝嘀咕道：「咦！成皇志，你手上戴嘅咪係我堂哥嘅追蹤器？你唔係唔知道吓？」
 
我聞言不禁有些尷尬，道：「咁……我見王采堤織條手繩織得咁靚，無謂辜負人地一番心意啦！而且你堂哥要收集數據，要搵人做臨床測試，所以……」
 
游大輝牢牢地盯著我，搖了搖頭， 一本正經道：「我覺得依啲都唔係主要原因，主要原因……係你心理變態，我聽講一啲明星好鍾意事無大小都俾人知道，而你就希望有人可以知道你嘅一切。」
 
我不禁啞然失笑，道：「你就心理變態，我以為你個樣咁認真，有啲咩高見，點知……我都係唔應該對你有咩期望。」
 




我跟隨著Galaxy girl出席活動，我的身份除了是藝人外，還是順勢娛樂公司的主席，要和各個主辦單位協調商議，儘管尚興國已經跟隨我左右，但明顯他是當不了秘書、經理人的角色，我應該要阿葆或王采研與我隨行，分擔我的工作。
 
直至差不多十二點，我們才回到酒店，經過一整天舟車勞累和緊密的工作，我們所有人都已經疲憊不堪，Galaxy girl眾成員情願餓著肚子回房休息。
 
我匆匆沐浴過後，打算上床休息，同房的尚興國道：「阿志，陳依官佢地到咗日本喇！楊鳳瑤去咗接機。」
 
「哦！咁幾好吖！聽日睇完揭幕戰，我地都坐夜機去日本。」
 
尚興國道：「仲有啊！文光義頭先打過電話嚟，叫你沖完涼打俾佢。」
 
看來我還未可以上床睡覺，明晚就是世界盃正式開鑼的日子，文光義應該是找我商量這些事情，想到這是今後發展的關鍵一役，我勉強抖擻精神拿起了手機，回撥文光義的電話號碼。

以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl