<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５5-2　Galaxy girl（下）

我與游大輝達成共識便回到生日會的場地，這時布正麗亦牽著王采堤的手回來，布正麗興奮地道：「登登登，大家睇下，今日壽星女係咪零舍神采飛揚呢？」
 
王采堤貴為吳林紫娣的新任校花，平常已經受到會內的眾男生垂涎，現在經布正麗的巧手施展，突顯了那種初熟少女的味道，可愛中粹集著一分嬌媚，讓數名早已對王采堤暗生情愫的男生，目光一時間不能從王采堤身上抽離。
 
朱思遠讚道：「係啊！壽星女今日零舍靚，都係布甸姐嘅功勞，真不愧為星級化妝師。」
 
萬季常亦附和道：「係啊！布甸姐人又靚又識化妝，佢最令人佩服係有器度，幫王采堤化個靚妝，唔怕貨比貨。」
 
飯桶武道：「就算Galaxy girl嘅隊長宛琳珊嚟到，我都係咁話，喺我飯桶武心目中，布甸姐先係吳林紫娣第一美人，宛琳珊排第二啦！王采堤就第三。」
 




在場的管佳莉聞言感到有些不是味兒，當年她在吳林紫娣的校花榜只是僅次布宛二人，現在連後起之秀的王采堤也超過了自己。
 
Humphrey看到管佳莉的表情立時會意，他輕聲道：「喺我心目中，妳靚過佢地。」
 
得到Humphrey的讚賞，她臉上漾出甜甜的笑容。
 
布正麗笑道：「得喇！得喇！你地班友唔駛咁好口，好聽嘅說話留畀壽星女啦！今日佢先係主角。」
 
關國安道：「係囉！係囉！正牌布甸同小布甸各有各靚，趁住依個歷史性嘅時刻，我地影多幾幅合照啦！」
 




各人踴躍地舉手，嚷道：「我影，我又要影。」
 
王采堤雖然在自強會人氣急升，但看到眾人對布正麗這般推崇備至，才知道自己還與布正麗相差很遠。
 
王采堤心想這也是沒辦法，誰叫那位是正牌的布甸，對方的風采連自己也為之著迷。
 
眾人爭相與布正麗和王采堤合照之際，宛琳珊亦珊珊來遲抵達了生日會的現場，現在貴為人氣組合Galaxy girl的隊長，自然吸引到全場的目光。
 
多番歷練後，宛琳珊的一舉手一投足，都散發著明星的風采，這刻與布正麗同場較勁，居然有著把對方壓下去的勢頭。宛琳珊見狀亦展現出笑容，儘管她已經開始衝出香港，邁向國際，可是依舊介懷在校花榜上排名次於布正麗一事，現在勝回一仗，讓她心情大好。
 




自強會的會員向宛琳珊索取簽名和合照，在韓國明星學校接受訓練的宛琳珊，以友善客氣、儀態萬千的姿態去滿足眾人的要求，在旁觀察的我感受到宛珊琳越來越有巨星風範，投資這麼多資源去栽培她也是值得的。
 
宛琳珊受到眾人包圍，游大輝立時上前充當護花使者，阻擋其他人，道：「喂！你地班友仔，唔好借啲意去抽水。宛琳珊，妳放心啦！我依個頭號ＦＡＮＳ會保護妳安全。」
 
宛琳珊睨了游大輝一眼，沒好氣道：「嘖！行開啦你！」
 
面對宛琳珊的冷待，游大輝沒有感到頹喪，反而將這種差別對待解讀成因為他們熟絡，所以宛琳珊對自己沒有像陌生人那麼客氣。
 
游大輝「想通」這點，心情大好，自己終歸在宛琳珊的心中與其他人是不一樣的。
 
游大輝糾纏著宛琳珊，拿出一張唱片道：「珊珊，妳地Galaxy girl最新隻專輯，我買咗妳嗰隻特別版，Galaxy girl咁多靚女，妳都係最出眾嗰個，妳幫我簽個名啦！」
 
宛琳珊不勝其煩，草草在唱片上簽名，可是游大輝依然糾纏著她，道：「珊珊，我地咁耐無見，我有好多心底話想同妳講。」
 
「名都簽咗啦！你快啲行開啦！」




 
「我地未影相嘛，我好鍾意妳擺出個心形手勢，我地一齊做依個手勢啦！」游大輝伸出手道。
 
宛琳珊向四周掃視了一眼，看見我走向她，以為我是來為她解圍，她道：「成皇志，游大輝搔擾我啊！你快啲趕走佢啦！」
 
「宛琳珊，妳作為公眾人物會碰到唔同類型嘅支持者，妳唔可以因為對方係痂漢就嫌棄人，畢竟我地嘅工作就係娛樂大家，應該要一視同仁，何況游大輝咁支持妳，妳應該對佢態度好啲，就當係成為天后嘅歷練。」
 
宛琳珊聞言楞住了，她想不到我會站在游大輝那一方。
 
游大輝看見我的立場傾向她的一方，很滿意地笑了笑，而宛琳珊只好目無表情伸出手與游大輝共同做出心形手勢拍照，游大輝道：「珊珊，世界盃會有好多唔同嘅人去日本，到時日本聚集唔同國家嘅人，品流複雜，治安一定唔會好架喇！我知道遲啲妳會去日本做野，妳放心啦！我會去做妳廿四小時嘅貼身保鑣，好似上次元朗咁保護妳嘅安全，成皇志已經應承咗喇！」
 
「咩話！」宛琳珊杏眼圓瞪地瞧了瞧游大輝，再瞧了瞧我。
 
我點頭道：「游大輝講得無錯，嚟緊有好多唔同人去日本睇世界盃，咩三山五岳嘅人都有，所以我地需要啲信得過嘅人做助手。」
 




宛琳珊嘀咕道：「就係佢先信唔過。」
 
儘管宛琳珊很抗拒游大輝跟她一同前往日本，可是我畢竟是順勢娛樂公司的社長，她也不好在這麼多人的場合去違抗我的說話。
 
為了得到抗拍機的技術，只好暫時委屈宛琳珊。
 
最近人氣急升的宛琳珊成了生日會內的風頭躉，眾人的焦點都放在她身上，不過王采堤並不介意，反而覺得宛琳珊來為她慶生感到高興。
 
陳依官掃視了生日會場一眼道：「真係估唔到啊！成皇志，講真吖！當初你唔升中六加入娛樂圈，我係唔睇好你，估唔到你依家撈到風山水起。」
 
「講真吖！我都估唔到。」
 
「係呢！之前你話有隻基金短時間可以升價十倍，係咪同世界盃有關架？」
 
「都可以咁講嘅！」




 
「兩個月前，我仲質疑你嘅決定，但你係依兩個月已經成立咗娛樂公司，聽宛琳珊講你地公司合作嘅Ｐ廠係世界盃嘅贊助商。我嘅想法係咪太保守，跟唔上你嘅步伐？又或者你有啲秘密係唔可以向我透露？明明我同你一樣咁大，點解我地嘅視野差咁遠，我只係停留普通人嘅思維，做一個平凡嘅學生，你就已經做一啲我想像唔到嘅事，我驚我會阻礙到自強會嘅發展。」
 
「依官，你唔需要妄自菲薄，你嘅能力已經得到好多人嘅認同，一個團體緊係需要唔同嘅人，有啲保守啲，有啲進取啲，你諗野慎重，唔係一件錯事。」
 
陳依官點了點頭，又道：「我聽飯桶武佢地講，有好多人私底下參加咗你個基金計劃，你仲打算叫埋佢地參與實際嘅操作，你……可唔預埋我？」
 
我訝異道：「依官，你對我嘅計劃有興趣？」
 
陳依官道：「我打算私人參與下，記唔記得當年花蕊展，我地一齊擺檔賣馬卡龍啊？」
 
「哦！當然記得啦！」
 
陳依官苦笑道：「明明當日我對你仲有信心，攞晒全部積蓄同你一齊擺檔，但依家經歷咗咁多仲反而抱有懷疑，可能當日我地要付出勞力，依家就只係蹺埋雙手等待個結果啩！依啲係唔係知識限制想像呢？」
 




「以前你只係攞自己錢出嚟，今次涉及到係自強會嘅其他會員嘅利益，你自然會緊張啲啦！」
 
這時，王采堤走過來，道：「會長，我阻唔阻你地傾計啊？」
 
陳依官道：「我地傾完架喇！你地慢慢啦！」
 
「咩事啊！」
 
「會長，多謝你搵個場地幫我慶祝生日會啊！」
 
「哦！依啲舉手之勞啫！唔駛客氣，其實自強會有好多人都好錫妳。」
 
王采堤一臉羞赧，結結巴巴道：「會長，其實你咁本事，唔知可唔可以幫我一個忙呢？」
 
我聞言有點訝異，王采堤從未要求我幫忙，究竟她拜託我做些什麼呢？
 
「係咩事啊？」
 
「係咁架！我家姐今年考完ＡＬ，佢覺得讀唔上去，想出嚟做野，所以我想問會長你間公司咁大，可唔可以請佢啊？」
 
我聞言笑道：「原來係想幫你家姐搵工？佢有無你咁標青先？有嘅話，我叫佢加入Galaxy girl啦。」
 
王采堤聞言臉色一紅，道：「我邊到算靚喎！宛琳珊同布甸姐先叫做靚。」
 
「你家姐想做啲咩職位？」
 
「我家姐叫王采研，佢畫畫仲叻過我，不過我都唔知道佢想做咩？佢啱啱嚟咗，我叫佢過嚟啦！」
 
王采研？這名字有點熟稔，在那裡聽過呢？
 
「家姐，依邊啊！會長喺依到啊！」
 
一名樣子清秀亮麗，身型纖瘦的少女走到我面前，我與她打了一個照面，不禁喊道：「王采研。」
 
王采研是誰？為什麼我瞧見她會這樣驚訝？她並不是什麼明星名人，不過是我在預科時轉讀另一間中學的同學，在那間中學她是該校的校花，每當她經過的時候，學校的男生焦點都會放在她身上，那時的我雖然心中被管佳莉佔據，可是仍禁不住對她行注目禮。
 
在那間中學，我與她僅僅是認識而已，單獨說話並沒有說上十句，畢業後大家便沒有再次聯絡，她之後的日子過得怎樣我也不知道，這情況正與布正麗一樣。
 
我吃驚的原因除了是因為王采研就是王采堤的姐姐外，另一個原因就是我來到這時空後，走上了另一不同的路，居然還是會與王采研遇上。
 
王采研訝異道：「你……識得我？」
 
我回過神來，笑道：「無，我只係估唔到王采堤嘅姐姐，居然都係生得咁靚啫！」
 
王采研臉上漾出笑容，道：「成先生，你身邊咁多靚女，我邊算得上靚吖！真係估唔到成先生同我同年，已經得到咁嘅成就。」
 
從前的我過得很失敗，是沒有這種勇氣與美女調笑，我亦相信從前的我如果說出這類話語，對方一定會很反感，可是現在的我已經不同了，我不再是與她一同唸書的其中一名男同學，而是眾人所說的成功人士；她亦不是萬綠叢中一點紅的校花，而是一位求職者，彼此的身份已經對調，但當然我只是自我感覺良好，並沒有打算藉此欺壓對方，滿足一些變態的欲望。
 
我問道：「阿研，妳唔介意我咁叫妳嘛？妳想應徵我公司邊個職位？」
 
王采研有點尷尬道：「其實我之前只係做過兼職，無咩工作經驗，畫畫有啲天份咁囉！」
 
「咁啊！妳無咩工作經驗，介唔介意做住我助理先啊？人工就一萬，唔知妳點睇呢？」
 
王采研詫異道：「咩話？一萬…你講真？份工要做啲咩架？」
 
「係啊！份工似打雜，唔會太辛苦，有時可能要ＯＴ，但會補返錢俾你，因為妳始終無工作經驗，又唔知妳啱啱做，放心啦！如果我覺得妳適合，我會上調妳嘅人工。」
 
「我見勞記啲工都係得四五千，成先生你公司居然出一萬蚊請我，我緊係應承啦！」
 
在這個時代中五畢業生的人工，大多都是五千元，大學畢業也亦必有一萬元的起薪點，所以這個薪金對於王采研來說是非常吸引。如果她不接受這個條件，我亦會提高金額，直接她答應，我這樣做並不是在打她什麼歪主意，而是對昔日的自己作出一種「補償」，這種心態儼如一個童年時生活困乏的小孩，對那些模型玩具未能擁有，長大後，生活改善便買下童年未能獲得的玩具一樣。
 
＊＊＊
 
「喂！喂！嗰個王采研邊個嚟架？你好似識得佢嘅？」
 
王采堤的生日派對仍在進行中，我和布正麗在陽台的一偶碰上，自從她回到香港，這次是我們難得獨處的時光，豈料她劈頭的第一句話居然就是這句。
 
我聳了聳肩道：「佢咪係王采堤家姐囉！」
 
布正麗雙見咪成了一線，狐疑地打量著我，道：「你出咁高人工請佢，就係因為佢係王采堤家姐？」
 
我笑道：「如果妳幫我打工，我會出更高嘅價。」
 
「我布甸依家個朵喺化妝界好響架！你要我幫手，我收得好貴架！」
 
「咁妳布甸姐做到野，收得貴都合理啦！妳幫Galaxy girl嘅新專輯做形象顧問，外界評價好高。」
 
我把話題從王采研身上岔開，問道：「係呢！今次妳打算留喺到幾耐啊？」
 
布正麗道：「留多陣囉！橫掂榮仔都去咗寄宿學校，我又想裝修間屋等老豆住得舒服啲。」
 
我問道：「係呢！榮仔佢點樣啊？」
 
「嗯！佢讀書成績好好，插班都考第一，但係佢好似好多心事咁，或者佢開始踏入青春期啩！」
 
「其實你地可以隨時返嚟，就算湯仲謀出返嚟，我依家都有能力保護你地，又或者你地有其他打算？」
 
布正麗瞧著我，道：「依樣野我未有打算，要同榮仔商量下，嚟緊我黃尊義喺日本有商業活動，到時完咗個ｊｏｂ再諗啦。」
 
雖然是工作關係，但布正麗最近和黃尊義走得很近，他們會不會日久生情呢？
 
布正麗又道：「聽阿登講你幫姚智風搵咗律師，仲俾咗筆錢佢屋企人。」
 
「咁我地一場同學，佢又幫過我打工，我盡番啲心意啫。」
 
「咁你份人對其他人都幾有情意，你知我老豆有濕疹同關節痛，搵人去泰國買虎骨酒、北韓買長白山人參俾佢。」
 
「咁妳去咗台灣，佢得一個人喺香港，我都係盡下啲心意啫。」
 
「你對人地老豆就咁上心，但自己老豆呢？你有幾耐無去探佢？佢一個人喺入面坐好難頂架！」
 
爸爸因為保護阿興坐牢，當初我還希望待他服刑出來，我們能夠修補關係，可惜他在獄中再次犯事，監禁的刑期延長了。
 
「我知道入面唔好受，但點解佢唔忍耐多一陣呢？本身佢已經出咗嚟，成世人都係咁衝動。」
 
布正麗搖了搖頭道：「你一口咬定佢唔啱，你有無問佢點解要咁做先，你可以俾幾次機會姚智風，到依家你仲照顧緊佢，但點解你唔可以對你老豆多啲體諒呢？」
 
布正麗提出的問題我也未能提出一個確切的答案，為什麼我可以不斷忍受犯錯的姚智風，而不能多體諒爸爸一點，或者是因為能夠傷害我的人，就是我愛的人。
 
「如果佢唔再係入面犯事，年尾都出返嚟，到時有咩再講啦！」
 
布正麗搖了搖頭，道：「你有啲野成日都係唔嗲唔吊，明明可以即刻去做，但係就搵各種藉口去拖，有句好老土嘅說話叫珍惜眼前人，唔係所有野都必然架！」
 
我推搪道：「依排我真係多野做嘛，等世界盃完咗我會得閒啲，聽妳咁講，妳有去探過我老豆？」
 
布正麗道：「早幾日我同阿興去探佢。」
 
我笑了笑道：「好啊！妳照顧我老豆，我就照顧妳老豆，咁幾好吖！」
 
「我先同你唔一樣，我同老豆嘅關係不知幾好。」
 
我尷尬地道：「不如轉一轉話題，妳話屋企要裝修，咁妳同妳爸爸依段時間住喺邊？」
 
布正麗道：「初時打算住酒店，黃尊義話佢香港有地方可以俾我住一排。」
 
我聞言大駭，儘管他們極可能是命中注定的一對，但我難以接受他們未婚的時候，在同一屋簷下住在一起。
 
「吓！咁點得架！妳同佢同居，記者實有好多寫嗰喎！到時佢啲ＦＡＮＳ實憎死妳，而且一個女仔唔係咁方便。」
 
布正麗道：「我怕咩啊？我又唔駛靠佢地啲ＦＡＮＳ食飯，更何況我又唔喺自己一個，係同老豆一齊入去住。」
 
「咁都係啫！你阿爸行開行埋，都唔係咁好吖！」
 
布正麗笑道：「嗯，咁就算發生咩事！都無乜野吖，黃尊義咁靚仔，又係王子，好多女仔都幸做王妃啦！我以前都哀家前哀家後咁叫自己，不過後嚟你話哀家係死咗皇帝老公，我先無咁叫咋。」
 
「咁點得呢？妳…布甸姐，醒字派嚟，點可以咁蝕底架！咁會破壞形象」
 
布正麗點了點頭，道：「你嘅說話都有啲道理，之但係我又要搵地方暫住。」
 
「其實……你地可以搬嚟我到。」
 
布正麗獃了獃，半晌才道：「嗯，都可以考慮嘅。」
 
 
 
以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl