<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５１－2　選秀（上）

Chapter ５１－2 選秀（上）

 
我們一行人我、布世伯、阿興、萬黛四人七時正已經到了新月酒店中菜部，由於我與謝家進的關係友好，平常並不對外開放的謝家進專用包廂，亦破例給我使用。
 
布世伯打量四周，道：「依間就係嗰個二世祖專用嘅包廂？咁多字畫同古董嘅？嘩！依盞燈用純金做嗰喎！有錢人真係唔同啲，望住幾百萬嘅字畫食飯係咪特別好味啲呢？」
 
「布世伯，靜間你食飯咪知囉！」阿興喜道：「靜間布甸姐見到阿哥搵咗間咁豪華嘅房食飯，唔知佢會唔會好開心呢？」
 
萬黛亦道：「如果我係布甸姐一定好開心啫！有男仔咁上心對自己。」




 
聽他們這樣說，我不禁有些期待稍後布正麗到來時的反應，我心想：「難得布正麗回來，應該使用高規格的款待歡迎她，不知她看到我這樣隆重的安排會不會歡喜呢？」
 
已經到了約定的時間，布正麗還未出現，我道：「布正麗應該嚟緊，我地等多陣啦！」
 
布世伯道：「係囉！阿麗應該收工架喇！過嚟都要時間，我地再等多陣啦！」
 
隨著時間的過去，已經是晚上九時正，我們還未看到布正麗，阿興和萬黛已經把那些花生和鹹酸菜吃光，侍應亦多次進來詢問可以上菜沒有。
 
因為布正麗剛下機，她沒有香港的手提電話號碼，我們聯絡不到她，阿興問道：「阿哥，布甸姐唔似係啲咁無交帶嘅人，佢會唔會遇到啲咩事？」




 
我道：「布甸同黃尊義一齊，黃尊義有咁多人跟出跟入，邊會有事啊？」
 
布世伯道：「我諗阿麗仲做緊野，都九點喇！唔好等喇！佢唔嚟架喇！叫人上菜啦！我打包返去俾佢食。」
 
一說曹操曹操便到，我正要通知侍應可以上菜之際，包廂的大門敞開，遲到的主角終於出場，然而讓我們訝異的是除了布正麗之外，她的身旁還伴隨著黃尊義。
 
黃尊義的前來是我們始料不及的，難道是布正麗邀請他來吃飯？他們真的是報紙說的那種關係嗎？
 
布正麗道：「唔好意思啊！遲咗成粒鐘添，頭先場活動有啲阻礙，我又要同佢補妝、卸妝、執埋啲手尾。」




 
貴為台灣人氣新星的黃尊義，丰神俊朗、魅力非凡，與香港的潮流歌星艾狄燊可以說一時瑜亮，都是近年華人圈難得一見的頂級美男子，之前在遠處觀望他，已經覺得他儀表非凡，現在近距離與他碰面時，更感覺到那種獨特的翩翩貴公子優雅氣質，那種讓人自慚形穢無形又霸道的氣勢。
 
阿興看見萬黛呆呆的盯著黃尊義，注意力完全被對方吸引住，不禁有些嫉妒。
 
萬黛喜道：「布甸姐，係咪黃尊義都同我地一齊食飯啊？」
 
布正麗搖頭道：「我未嚟過依到唔識路，佢話識嚟，所以帶我嚟，你地同我洗塵之嘛關佢咩事喎？」
 
萬黛聞言現出失望的神情，但我看到布正麗對黃尊義這樣冷淡，並又有點高興，我相信黃尊義這輩子並沒有多少人會用這樣的態度對待他。
 
布正麗道：「喂，我到咗喇！你走啦！拜拜！」
 
黃尊義道：「其實我之前都嚟個依到食過飯。」
 




這時，謝家進匆匆忙忙趕了過來，他臉上滲滿汗珠，樣子十分狼狽，他喘著氣道：「王子，你…嚟食飯…點解唔同我講啊？我依家叫…人執乾淨依間房佢。阿志哥仔，我叫人帶你地去第二間房食啦。」
 
我聞言不禁愣住了，是我們先進來，但還未上菜便被謝家進趕走，而且是當著布正麗面前，要我讓房給黃尊義，但我可以向謝家進說不嗎？
 
這時，布世伯、阿興、萬黛、布正麗的目光集中在我身上，我感到相當尷尬。
 
黃尊義道：「進哥，佢地係我嘅朋友嚟。」
 
「哦，原來你地識得架！」謝家進吩咐道：「人嚟，加多兩個位。王子，今餐我同你洗塵。」
 
雖然我們可以繼續留在這裡吃飯，但主角卻變成了黃尊義。
 
侍應在我和布正麗之間添加了兩個坐位，黃尊義與謝家進分隔開我倆。
 
謝家進道：「王子，我地都好耐無見喇！估唔到你廣東話講得咁好，嗰陣蘇丹同你第一次嚟食飯都已經十幾年前喇！估唔到時間過得咁快，當年你仲喺小朋友，喺呢！蘇丹佢近況好嗎？」




 
黃尊義道：「謝叔叔，爸爸身體都唔錯，你有心喇！」
 
謝家進道：「王子，我地依到除咗佛跳牆之外，近年出品嘅鮑魚好出名，都係用頂級嘅吉品鮑做食材，如果王子唔鍾意食中菜，我地酒店仲有日本菜同法國菜，都好有水準。」
 
黃尊義笑道：「謝叔叔，嚟香港我反而想食啲地道啲嘅野食，好似雞蛋仔、蛋撻、菠蘿包、雲吞麵、魚蛋燒賣、臭豆腐，依啲街頭小食。」
 
謝家進笑道：「乜王子你鍾意依啲野咩，我依家叫人去買。」
 
黃尊義道：「謝叔叔，叫人買返嚟就無意思架喇！你地好似叫做『掃街』，要去現場做先好味。」
 
謝家進道：「咁…不如我地叫人上菜先啦！」
 
席間，謝家進與黃尊義兩人你一言我一語在訴說舊情，我們變成了陪襯品，只好聽他們說話。
 




謝家進漸漸把話題從兩人的交情轉到生意上，道：「係呢！王子，其實我地大細界一直都想做石油嘅生意，我知道你地同成哥佢地合作開，但係以我地嘅交情，王子不如俾機會我地試下。」
 
汶萊這個在當時不太讓人熟悉的國家，人均ＧＤＰ在東南亞裡只是僅次於新加坡，經濟只都是依賴石油，而黃尊義的家族一直與利天成的黃河集團有緊密的合作。
 
謝家進這麼看中黃尊義的原因，就是希望從利天成手上搶過黃尊義這位黃河集團的合作夥伴。
 
黃尊義搖頭笑道：「謝叔叔，我依家嘅身份只係一個藝人，嗰啲石油貿易，你都係同翻我爸爸傾好啲。」
 
謝家進倏地想起什麼，道：「係呢！王子，成皇志間娛樂公司就嚟舉辦一個選秀嘅活動，不如到時你嚟做評判吖？我地大細界會支付令你滿意嘅酬勞。」
 
謝家進的目的很明顯是藉此去討好黃尊義，好讓黃尊義與大細界共同合作石油貿易。
 
謝家進的提議，對我當然有利，而黃尊義現在的名氣，他為我的選秀活動當評判，一定會有很多人留意。
 
黃尊義卻有自己的一番打算，這個成皇志與布正麗很熟絡，與他合作定必可以得知布正麗更多事情。




 
黃尊義答道：「好啊！我地合作愉快。」
 
謝家進道：「乾杯！」
 
我們舉杯輕碰，喝下了愉快的一杯。
 
＊＊＊
 
飯局結束，我要霍去登駕車來載我們離去，車上布正麗道：「阿登，你依家幫成皇志打工啊？佢有無刻薄你？」
 
霍去登道：「鳩爺，對我好好架！人工高過出面！又唔係多野做。」
 
霍去登的工作態度比姚智風要好得多，到時年尾派發花紅時，應該要多給他一點，可是如果姚智風知道霍去登的花紅比他多，他應該很不高興，還是兩人也不給花紅最為妥當。
 
布世伯氣憤道：「頭先嗰個謝家進真係喧賓奪主，明明今餐係我地同阿麗洗塵，佢就同嗰個黃尊義傾生意，成晚聽佢地講野，講我地觀眾啊？」
 
阿興道：「布伯伯，你咁唔滿意，頭先又唔出聲？你係咪怕咗謝家進？」
 
布世伯道：「哎！興仔，大家咁宅友，係咪咁講野先？我唔出聲係尊重個場合。」
 
阿興道：「嗰個黃尊義都唔係好人，睇佢個樣一定係花心蘿蔔，之前報紙寫佢一時鍾意Hilary、一時又鍾意Regina。」
 
萬黛插言道：「唔係啊！我覺得佢好靚仔喎！」
 
阿興道：「靚仔無本心，布甸姐，你千祈唔好俾佢啲甜言蜜語呃到啊！」
 
布正麗道：「阿興，你放心啦！我依啲醒字派，唔會咁易俾人呃到嘅！而且嗰個黃尊義都係口花花啫！咁多女喺佢身邊，我先唔會同人爭。」
 
我問道：「布甸，妳返嚟香港，平時除咗幫黃尊義化妝外，仲有咩做？」
 
布正麗吐了吐舌頭道：「平時服侍個黃尊義已經麻煩，得閒嘅話或者去見下啲老友囉！仲咩啊？」
 
我道：「無，我睇雜誌黃尊義個髮形好前衛，係咪你設計架？」
 
布正麗沾沾自喜道：「哦！嗰個『飛落海頭』，係我嘅傑作嚟架！依家台灣有好多男仔都指定要剪嗰個頭，你想我幫你剪？」
 
原來這個風靡一時的潮童髮形「飛落海頭」是出自布正麗之手，我道：「我駕馭唔到依種髮形，既然妳喺形象設計咁有天份，我想妳幫我為宛琳珊做形象設計。」
 
「要我幫宛琳珊？」
 
「妳介意？」
 
「我無問題啊？只係怕佢有問題咋。」
 
「嘿嘿，依家我係佢老細，我講嘅說話佢唔敢ＳＡＹ　ＮＯ。」
 
布正麗白了我一眼，道：「你依啲人有小小成績就擺款，有無用你老細嘅身份去迫人地做啲唔鍾意嘅野啊？」
 
我笑道：「咁要睇下邊方面喇！假公濟私就未至於。」
 
中學時期布正麗與宛琳珊仇敵是稱不上，但貴為校花榜上的頭兩名，二人間暗地去比較和競爭總會有的，現在促成兩人作出合作，我也是成全了一件美事。


 以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl