<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ２７　再戰樂壇

Chapter ２７　再戰樂壇
 
阿鼻道三部曲被譽為港產片的最後高峰，隨後的港產片雖然不乏佳作，可是已經江河日下，這套電影其後把版權賣給荷里活製作，亦能在奧斯卡勇奪包括最佳影片、最佳導演的四個大獎。
 
網上對這套電影的評論分析文章不知凡幾，當年我亦很沉醉這套電影，看了不少關於這電影的文章，所以對這套電影有挺透徹的理解。
 
我以一個影迷的角度去述說這套電影，果然這套享負盛名的電影鉅著，吸引了他們的注意力，說來好笑，其實這套電影是出自他們的手筆。
 
我們四人邊吃聊，畫哥三人亦不斷對我口述的阿鼻道故事加以自己的看法，畫哥擔演過數以百計的電影和劇集，以演員的角度去表達自己的意見，道：「嗯，我好鍾意阿明嗰個角色，佢想做好人，但係受到黑白兩道嘅逼迫，一方面又驚畀其他警察發現佢係黑社會派過嚟嘅臥底；另方一面又驚森哥發現佢想叛變，嗰種焦慮感令到個角色好立體。」
 




我剛才述說這套電影時，儘管已經說得挺詳細，但只是口述，並不能完全覆蓋整套電影每一個細節，畫哥從我的說話已經完全拿捏到阿明這個角色的心路歷程，那份敏銳真的殊不簡單。
 
劉導演道：「阿明同阿仁天台最後嗰場戲，阿明上到天台四圍望，個鏡頭唔直接影住佢，而係影住另一幢大廈嘅玻璃外牆，玻璃外牆反映住阿明嘅身影，佢不斷四圍望想搵阿阿仁出嚟，突然一把鎗指住阿明條腰，揸鎗嘅人就係阿仁。」
 
劉導演聽完我轉述的劇情，便已經勾勒出一個很有電影感的橋段，只是聽他口述便已經很有畫面，劉導演從事攝影出身，他的鏡頭運用相當有功架，只是數個鏡頭的交錯運用，便能營造出緊湊的氣氛。
 
麥導演道：「阿畫，阿志依個故事掂啊！拍出嚟一定成為金像獎大贏家啊！」
 
畫哥拍了拍我的肩膀道：「阿志，你嚟緊會好忙，幫我寫好阿鼻道個劇本佢，有咩問題就搵麥導演，佢係依方面嘅專家。」
 




我聞言先是愕然，片晌才喜道：「係嘅！畫哥。」
 
劉導演道：「我心目中已經有初步嘅人選喇！阿畫你當然就做阿明啦！阿仁嘅角色我想搵少偉、生抽就做王ＳＩＲ、至跩就做森哥，年青版嘅阿明同阿仁，我諗住搵啲新演員。」
 
畫哥道：「就搵阿志啦！」
 
我訝異道：「吓！要我做畫哥你嘅後生版。」
 
畫哥道：「咩啊！好失禮你啊？」
 




我苦笑道：「緊係唔係啦！畫哥，係我驚失禮你咋！」
 
劉導演道：「其實阿明嘅年青版，我心目中有位人選，我覺得阿志做阿仁嘅年青版更加適合，佢對眼同少偉好似，同樣有對憂鬱嘅眼睛。」
 
劉導演的說話讓我愣住了，要我取代原本的費殊文去當少偉的年青版。
 
＊＊＊
 
席散，畫哥說要送我回家，並且還有事情要與我商討。
 
在車上，畫哥道：「阿志，估唔到你除咗識音樂，仲識編劇，你嗰個阿鼻道嘅臥底故事喺幾時諗到架？你咁嘅年紀就諗到個咁精彩嘅故事，真係好有才華喎！」
 
畫哥的讚賞讓我汗顏，我的才華是由最近十多年的影樂精髓去成就出來的，作的歌、編的劇豈能不好？
 
心想歸心想，可是我嘴巴卻是謙遜一番，道：「個故事我好早之前諗到，不過唔知好唔好，得到畫哥同兩位導演嘅認同，我真係好開心啊！」




 
畫哥道：「阿志，你儘快寫好個劇本佢，我就同阿劉、阿麥去籌備套戲，同埋我想你寫一首有意思、符合套戲嘅主題曲。」
 
畫哥勤力如牛的工作態度在行內一直是出了名的，據說他曾經為了工作，有三個月沒有回家睡覺的記錄。
 
我道：「畫哥，其實我一早諗好首歌架啦！」
 
畫哥喜道：「咁快，你哼嚟聽下。」
 
「生命太短　明日無限遠　始終都不比永遠這樣遠
不理會世上長路太多　終點太少　木馬也要去繼續轉圈…」
 
我唱畢後，畫哥不斷地點道：「好，依首歌嘅歌詞填得好好，同個故事好夾。」
 
「畫哥，如果少偉應承咗參演依套戲，我覺得你地合唱就最好，依首歌係講述你地依對臥底嘅故事。」




 
「嗯，你嘅建議非常好。」畫哥道：「阿志，其實你咁有才華，有無為自己打算下，始終做臨時演員有啲浪費。」
 
畫哥的說話說中我的心事，我苦笑道：「依層我都無方向，有野就做啦！」
 
「你之前做過歌星，突然要你做臨時演員，你甘心咩？以你咁嘅才華，點解唔去其他唱片公司敲門啊？」
 
「我有試過架！但係都無回音。」
 
畫哥道：「如果你想繼續喺樂壇發展，我可以幫你架！」
 
我愕然道：「畫哥，你講真架？」
 
畫哥反問道：「依啲野有乜好講笑呢？」
 




「但係…我原本係細蔣生嘅旗下藝人，你唔驚得罪細蔣生咩？」
 
畫哥哈哈一笑，道：「我諗你搵嗰啲唱片公司，都係同你有相同嘅諗法。你地實在太唔清楚蔣生佢地兩兄弟喇！佢同你和平解約，就代表你地一場賓主關係完咗，唔係代表成為敵人。我同佢地識咗二十年，之前我生意上有啲糾紛，都係佢地幫我解決，更何況你同天誅公有一重關係，係啲人太過捕風捉影啫。你依家只需要考慮你想唔想再係樂壇重新出發？」
 
我默然一會，然後瞧向畫哥，堅定地點頭，道：「畫哥，我想啊！我真係好想再次企喺台上唱歌啊！」
 
畫哥拍了拍我的肩膀，道：「好，嚟緊你會有排忙啊！會忙到連瞓覺嘅時間都未必有。」
 
＊＊＊
 
畫哥並不是要簽我成為他旗下的歌手，而是出錢投資給我製作唱片，並用他的唱片公司給我發行唱片，好處是自由度較大，壞處是很多事情都需要自己去負責，好像宣傳及負責把歌曲派台的工作。
 
幸好的是畫哥向其他相熟的電台ＤＪ知會了一聲，要多播一些我的歌曲；又讓他的音樂團體向我提供支援，我才沒有那麼徬徨，不過饒是如此，應付電影拍攝、撰寫劇本、籌備唱片的工作，已經足夠我忙了，真的應驗了畫哥的說話——忙得連睡覺的時間也沒有。不過我認為現在的充實生活，比起之前的日子過得有意義得到多，至少我真的朝著我想走的方向前進。
 
關於籌備新唱片一事，我向暉洋請教，他說由於我在娛樂圈失蹤了一段時間（其實我一直在娛樂圈當臨時演員），新人在第一年出道是要不停在媒體裡曝光，我經過了一段空窗期，在這競爭那麼大的樂壇裡，恐怕有不少人已經把我這樂壇新人遺忘，所以他建議我以新曲加精選的形式去推出第二張大碟。




 
我苦笑道：「但係我之前嗰隻係ＥＰ嚟，得幾隻歌咋！」
 
「咁就將所有舊嘅歌加入新嘅唱片入面啦！」
 
第二張唱片是不容有失的，我決定選四首新歌曲，上一隻唱片我選了很多柏豪的歌，派台成績也相當不錯，但這次我並不想再選對方的歌曲，今次我選歌的條件依舊是我能夠駕馭和受歡迎的歌曲作為前題。
 
我選了一首鄭倫的你聽得到、無賴、啟示錄，選完這三首歌之後，我覺得這隻碟全都是慢歌，應該要加入一首快歌，這樣會更加多元化，於是我決定加入一首熱血的歌曲黃金入球。
 
這一首是日本的改篇歌，我記得原本那首日文歌的歌名，於是找人替我搜查一下，發現這首歌並未在日本發行，於是我便把這首歌加入大碟內。
 
呂世伯知道我再戰樂壇，繼續大力去贊助我，讓我得以有資本去作宣傳，可是我對宣傳一事並沒有任何經驗，於是我唯有向營銷的高手文光義請教。
 
文光義只是簡單地說了幾句：「有效嘅宣傳，不外乎鋪天蓋地俾人知道你嘅存在，夠錢就狂賣廣告同。無錢你就做一啲野去吸引傳媒報導你，你有本事就同某個明星或者名人傳下誹聞，又或者好似你上次元朗黑夜咁，好多報紙同雜誌將你放上去封面到。」
 
這個時代網上行銷並不流行，有效的宣傳渠道是紙媒、電視和電台，我並沒有資源像林昌奴大灑金錢在電視、紙媒上宣傳自己的大碟，文光義戲言要我來多次元朗黑夜的大事件，就算我願意拿自己的性命去賭博，也不知怎樣去籌劃這類事情。
 
除了籌劃唱片的事宜，我亦忙於寫阿鼻道的劇本，雖然我已經觀賞了這部電影很多次，然而要動筆去寫劇本，就是另一回事，幸好有麥導演和他的好拍擋阿John去指點我，於是我以每天三千字的速度去撰寫這個劇本。
 
劉導演審視我的劇本，他翻了幾翻，突然問道：「阿志，你覺得傻強依個角色，由邊個去演好啊？」
 
這角色歷史已經有答案，於是我說出那個演員的名字。
 
劉導演沉默了一會，才道：「嗯，佢啊！依個角色我反而覺得另一位演員去演更加好，一係你同我聯絡下阿責，叫佢嚟試下境先。」
 
＊＊＊
 
劉導演心中的傻強居然另有人選？我不知他心儀的演員是誰？但我個人挺喜歡陶民責這位演員。陶民責就是因為這個角色開始得到觀眾的廣泛認識，因而走上個人的演藝高峰，如果劉導演另覓別人去飾演傻強，說不定對陶民責的今後的個人事業有很大影響。
 
這個時期的陶民責除了在兩奶台拍攝電視劇集、客串一些電影外，亦會在電台主持節目，他相約我在電台的canteen見面。
 
畫哥之前向我分享他的經驗，他說他自己一定會有記事簿在身，好讓他可以一有頭緒便把一些點子記下。我在等候陶民責的時候，沒有浪費時間，在canteen奮筆疾書，撰寫阿鼻道的劇本。
 
我全情投入在撰寫劇本當中，不知過了多久，倏地一把聲音響起，道：「你係咪成先生啊？」
 
我抬起頭來，發現陶民責站在我面前，我連忙站起，伸出手道：「你好啊！陶生，叫我阿志得架喇！」
 
陶民責伸出手與我相握，笑道：「咁公平啲啦！我叫你阿志，你好似其他人一樣叫我阿責得架喇！」
 
「好啊！阿責，其實今次我嚟搵你嘅目的係有個電影角色好適合你嘅。」
 
阿責問道：「唔，係一個點嘅電影角色嚟？」
 
我開始述說阿鼻道這套電影，又講述傻強在這套電影的角色。
 
我道：「雖然傻強係依部電影佔嘅比重唔多，但係佢嘅角色好鮮明，佢跳脫嘅性格，我覺得由你去演就係最合適架喇！」
 
阿責拍打著桌子笑道：「個句『做緊一樣嘢但又好唔專心咁望住我哋嘅就係差人』，真係好撚到啊！我真係喺現實生活遇到啲咁嘅事。」
 
我見阿責很滿意這個電影角色，便道：「阿責，你幾時方便，劉導演想搵你試鏡。」
 
阿責訝道：「試鏡？你唔係覺得我適合依個角色，先嚟搵我做咩？」
 
「其實咁嘅，我寫依個劇本嗰陣，心目中就係你做傻強，但係導演有其他心水，所以想你去試下鏡。」
 
「吓！乜原來你係編劇嚟架？好少編劇咁後生喎！」
 
「哦！係啊！本身我拍緊畫哥同妹姐部電影，有次同畫哥食宵夜講開我有個咁嘅故事，佢覺得個故事幾好，就叫我同麥導演寫個劇本俾佢。」
 
「嗯，雖然我幾鍾意傻強依個角色，但係我唔係咁鍾意試鏡。況且我都有幾套電影要拍。」
 
阿責的回應出乎我意料，可是我想深一層這回應又乎合他的個性，據傳他之前與很多人鬧翻，其實他那種直腸直肚的人，都是把心底的感受說出來，不喜歡他的人，覺得他口沒遮攔，喜歡他的人覺得他是真性情，然而在這個圈子裡，傳媒最喜歡把藝人的一言一行放大，好讓一些小事發酵成大事，炒作誰人與誰人不和，那便可以吸引觀眾的注意。
 
阿責知道他自己並非導演的首選，自然感到不快，既然知道原因，便容易說服他。
 
我道：「阿責，我唔知劉導演點諗啦！正如我所講你係我心目中嘅第一人選，我好有信心當劉導演見到你試鏡嗰陣，你就會成為佢嘅首演。我寫依個劇本嗰陣，個腦好自然咁諗邊個演員做邊個角色，好似少偉做阿仁、畫哥做阿明、生抽做黃ＳＩＲ咁，而你陶民責就係傻強。」
 
「又少偉、又畫哥，聽你咁講依套戲好大卡士下喎。」
 
我續道：「唔係我賣花讚花香啊！我敢講依套戲，打後廿年都無同類型嘅港產片超越到，而且仲會衝出國際，成為經典。每個成功演員都會有一個電影、電視嘅角色，成為佢演藝生涯嘅起爆點，好似畫哥嘅神雕大俠、少偉嘅學警偉杰咁啦！我覺得傻強依個角色會促進你嘅事業更上一層樓。」
 
阿責聞言笑咪咪地道：「點啊！你個靚仔，家陣你係編劇定sales啊？把口浪過油，不如轉行啦！」
 
我笑道：「咁你真係應承嚟試鏡喇！」
 
「緊係啦！你講到傻強會帶挈我風山水起，我出賣屎忽都要劉導演俾傻強我做啦！」阿責又道：「喂！講真你條友全名叫咩名啫？硬係覺得你有啲面善。」
 
「我叫成皇志。」
 
阿責詫異道：「你就係成皇志？」
 
看來我真的越來越出名了，連明星也知道我是誰。
 
我苦笑道：「睇嚟經過元朗件事之後，多咗好多人識我，希望依個唔係我嘅起爆點啦！」
 
「我知道你個名唔係因為元朗單野，而係之前你打嗰個北佬，條北佬係西環辦你都敢打，雖則我想咗好耐，但無你咁夠GUTS，真係畀個服你。」阿責豎起拇指道。
 
我與官幹爭執一事，蔣天殺打人情要傳媒不要報導，想不到陶民責居然知道，他的消息真的挺靈通。
 
我苦笑道：「嗰次我係因為救朋友，而且之後我都付出咗沉重嘅代價。」
 
阿責道：「嗯，我知你之前係歌手嚟，我做電台ＤＪ嗰陣都有播你嘅歌，有傳你俾公司雪藏。」
 
我為難道：「依層…做依一行，有時有啲野唔係咁方便講，況且依家我都有機會再次出碟。」
 
這宗事件因為涉及到的人較為敏感，我與陶民責只是初相識，所以我並不想多談。
 
「咦！真係？咁快就搵到新唱片公司幫你出碟？我真心覺得以新人嚟講，你啲歌ＯＫ架？起碼好過今屆九成新人，我同依個台啲ＤＪ都幾熟，叫佢地播多啲你嘅歌，你幾時有歌派台啊？」
 
我聞言喜道：「我今個星期有新歌派台架喇！多謝你先。」
 
「應該嘅！我隨時靠你個角色彈起，我要你射住射住架！」
 
我笑道：「唔好玩我啦！陶生。」
 
想不到居然這麼快便與陶民責混熟，這時候他在電台工作，說不定他真的可以為我提高歌曲的播放率。
 
阿責又道：「你知唔知點解我咁憎嗰個北佬啊？」
 
「嗯，佢斷咗你衣食？」
 
阿責搖頭，道：「阿志，你有無夢中情人？即係唔係要溝嗰陣，係當咗某個明星係你嘅幻想對象。」
 
我道：「你嘅意思係官幹上咗某個明星？」
 
陶民責的話讓我產生好奇，究竟誰是他的幻想對象，而官幹搞上的明星又是何人？
 
阿責瞧著我，道：「睇你嘅表情係咪好想知道係邊個呢？」
 
我點了點頭，阿責靠過來，耳語道：「條仆街擒咗海芙蓉啊！係著小鳳仙妝好好睇嗰個海芙蓉啊！個官幹成隻豬咁，居然畀佢執咗海芙蓉一劑，你話我慶唔慶？」
 
阿責此言一出，我著實嚇了一跳，問道：「你講嗰個喺咪拍大鬧摩天輪嗰個海芙蓉？」
 
「唔係佢，仲邊有第二個海芙蓉啊？」
 
我在娛樂圈工作過一段時間，深知人言可畏的道理，一段無中生有的緋聞隨時可以毀掉一個人的人生。
 
「依單野你聽邊個講啊架？放風俾你嗰個人信唔信得過？」
 
阿責瞪大雙眼道：「咩邊個講啊？我喺酒店食buffet，親眼見住佢地一齊上房架！海芙蓉仲著埋小鳳仙裝，成兩個鐘頭先落返嚟，海芙蓉髮尾仲要濕嘅，你唔好同我講佢喺上面學完瑜伽，所以要沖涼洗頭。」
 
陶民責並不像說謊，他亦沒有必要在此事上向我說謊，只是我難以想像到海芙蓉居然與官幹搭上，官幹是有老婆的，而且他有萬妞王的稱號，他們怎也不像是正常男女發展的關係？可是我想深一層，娛樂圈裡有不少女星會為了利益，與一些有家室的富豪發展不倫關係，只是恰巧這個女星是我認識而已。
 
阿責繼續抱怨道：「你明唔明我嘅感受？心目中嘅女神居然俾隻賤肉橫生嘅豬壓喺床上面抽插，當堂幻想破滅，我真係想同個北佬交換，可以砌著住小鳳仙裝嘅海芙蓉，命短幾年都制啦！」
 
我都很明白陶民責的心情，穿起小鳳仙裝的海芙蓉真的很惹人垂涎，而與她交手的竟是一個又老又肥又醜的男人。
 
與對方再談了一會，陶民責便要趕著回二奶台進行拍攝的工作。
 
我離開電台時，在門口碰見了宛琳珊。
 
「咦！宛琳珊，你今日嚟電台做咩啊？」
 
宛琳珊喜孜孜道：「我轉咗去dream music，今日有第一首歌派台啊！上嚟做宣傳。」
 
「吓！乜原來妳轉咗去dream music到啊？」
 
宛琳珊道：「係啊！雖然話係兩間唱片公司，但係都係同一個老細，你解約後，dream music無晒歌手，於是蔣學勤就係beauty song揀人，佢覺得我合適，問我有無興趣出唱片，咁做歌星一向係我夢想，緊係應承啦！之前我拒絕咗dream music，估唔到最後輾轉都係做咗dream music旗下嘅歌手。」
 
離開dream music後，除了文光義外，我再沒有與dream music的人聯絡，所以並不知道dream music的情況。
 
「哦！原來係咁，咁妳會幾時出碟啊？係咪會角逐今年嘅新人獎？」
 
「會啊！隻ＣＤ籌備緊，如無意外十月推出。」宛琳珊問道：「係呢？成皇志，你嚟電台做咩啊？」
 
我把來電台與陶民責見面的事對宛琳珊說，宛琳珊道：「原來你依家跟畫哥搵食，唔單止幫佢寫劇本，佢仲打本俾你出第二隻ＣＤ，真係令人羨慕，點解你成日都遇到啲好事架？」
 
「依家妳都出ＣＤ啦！駛乜羨慕我啫？」
 
「成皇志，聽你講嗰套阿鼻道係大製作，又少偉、又畫哥，不如你安排個角色俾我啦！」
 
「吓！我幫人寫劇本，妳當我係監制，可以話事咩？如果我話到事，就唔駛嚟叫陶民責試鏡啦！」
 
「你問都未問就拒絕我，你有得演青年少偉，就幫口問下我可唔以做青年少偉嘅女朋友囉！話晒大家一場同學，係咪咁都托手踭先？」
 
我以調戲的語氣道：「戲入面做我女朋友？妳唔怕同我傳緋聞咩？」
 
「怕咩啫？傳之嘛！又唔會係真嘅！依啲免費宣傳，多啲人識，都唔錯喔！」
 
宛琳珊的話讓我想起海芙蓉的事，於是我問道：「係呢？宛琳珊，妳同芙蓉姐行得咁埋，有無聽過芙蓉姐嘅緋聞啊？」
 
宛琳珊一臉戒備地道：「你講邊單先？」
 
我向四周掃視了一眼，才輕聲道：「同官幹嗰單。」
 
宛琳珊神色慌張，打量了四周一眼，道：「依單野你喺邊到聽返嚟架？」
 
我把陶民責親眼瞧見海芙蓉與官幹上房的事告知宛琳珊。
 
宛琳珊頹然道：「依單野有狗仔影到相，都畀官幹夾硬撳落嚟，估唔到最後都俾人發現。」
 
「吓！咁陶民責講嘅野即係真嘅？」
 
「你細聲啲啦！」宛琳珊發現四周沒有人，才道：「芙蓉姐都唔想架！佢之前套戲因為官幹一句怪力亂神，所以喺上面上唔到啊！影響咗好多人啊！佢喺被迫架！依單野你真係唔好同人講，芙蓉姐受咗好大嘅委屈。」
 
我點頭道：「依層當然啦！」
 
與成皇志道別後，宛琳珊憶起海芙蓉對她的說話：「喺依一行做，就係咁身不由己。妳想紅就要放低妳嘅底線，付出相應嘅代價，咁多女仔投身依一行，妳唔想賣，其他人願意賣，老細就捧肯賣嗰一個，現實就係咁殘酷架喇。珊珊，或者有一日妳都會出賣妳自己，妳都係諗清楚先好唔好繼續喺依一行發展啦！」


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl