<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ２０　黑夜（中）

Chapter ２０　黑夜（中）
 
韓軍看到父親的墳墓再次遭到破壞，不禁暴跳如雷，額上的青筋暴現。
 
疏忽職守的王炳與史享見狀驚恐不已，他倆知道韓軍為人表裡不一，平常笑容可掬，實則口蜜腹劍，是那種笑著動刀子的人，王炳連忙想辦法開脫，他心生一計，立時抓著身邊的一個手下，喝道：「我唔係叫你睇緊啲咩？點解有人可以入嚟放火燒韓公個墳頭架？」
 
那名臭飛一臉詫異地用手指著自己，道：「吓！我？」
 
王炳不讓對方有辯解機會，一拳打在臭飛的肚子上，臭飛捂住肚子，王炳罵道：「都叫咗你醒定啲，睇緊韓公個墳，唔好畀任何可疑人入嚟，依家韓公個墳頭又畀人燒咗，你當我嘅說話耳邊風啊？韓主席，對唔住，我唔識教細佬，我畀個交代你。」
 




話畢王炳與史享一同狠揍著那名臭飛，以推卸自己的負責，那名臭飛就是這樣不明所以地成了兩人的替罪羊。
 
城府甚深的韓軍怎會不知道兩人正在推諉責任，就在此時，史子義氣急敗壞地走上山，氣喘如牛道：「嗄、嗄、嗄，韓主席…」
 
「子義，有咩事唞順條氣先講啦！」
 
「嗄！頭先有個記者走近礦場，嗄！但係畀啲兄弟發現趕走咗，佢應該影唔到啲咩野，不過頭先…啲兄弟發現有個朝鮮妹走甩咗。」
 
韓軍愕然道：「吓！點會咁架？仲未搵返咩？」
 




史子義有點惶恐道：「我地發散晒人搵勻成條村都唔見人，唔知佢匿埋喺邊？」
 
韓軍沈吟了半晌，才道：「條村有幾大啫？搵咗咁耐都搵唔到，唔通走咗出村？等陣先，民主戰線班人頭先喺村口上車，唔通條女混入班人入面？子義，你同隔離村大飛借兵，反轉成個元朗都要搵到佢返嚟，就算係條屍都無所謂，仲有…嗰個記者都要捉佢返嚟。」
 
史子義訝異道：「韓主席，但係搞到件事咁大唔怕咩？」
 
韓軍承諾道：「依方面你唔駛擔心，我打個電話畀本初，今晚你放心帶班兄弟去做野，萬大事我幫你撐腰。」
 
史子義等人離開後，韓軍致電給阮本初，道：「阮ＳＩＲ，礦場又走失咗條女啊！」
 




電話彼端的阮本初，壓低聲音道：「韓主席，咩事咁唔小心啊？」
 
韓軍道：「我已經諗緊方法補救，叫咗子義佢地盡量出人去搵條女返嚟，但係希望你可以配合，撳住你啲伙計唔好理。」
 
阮本初愕然道：「吓！你地唔係諗住反轉個元朗啊？玩到咁大，我地都唔浦頭嘅話，出面睇到好肉酸架！」
 
韓軍焦急道：「阮ＳＩＲ，如果單野揚開咗，我地全部人都唔掂啊！嗱，我幫你諗咗個藉口，依家我條村有好多處地方畀人縱火，你叫晒啲伙計嚟調查，到時出面真係有咩大鑊野，就話警力不足，要時間調配，畀時間啲圍村兄弟做野。」
 
阮本初猶豫道：「咁樣…你地千祈唔好搞出人命啊！我盡量拖延時間，你地爽手啲。」
 
掛上電話後，韓軍瞧著再次被毀的韓俊之墓，韓俊競逐新界王的寶座敗給劉帆，而現在他為父報仇，把劉帆踢下寶座。
 
之前他與花生幫合謀幹著販賣人口這些傷天害理的惡行，從而讓花生幫的勢力急速發展，甚至具備了鯨吞數字幫的能耐，其後搭上官氏三兄弟後，人肉市場的販賣變得更具規模。
 
然而韓軍知道，萬一他的惡行遭到揭發，這世界卻沒有自己的容身之所，他卻不容自己承受任何風險，所以他要把礦場內的十多名女人蛇滅口。他剛才煽動史子義去進行暴動，亦是有找替死鬼的企圖，只要把這些惡行全都轉嫁到對方身上，他便安全了，就算這件事會牽連到湯伯符身上，他亦有信心說服阮本初與自己站在同一陣線上，從來黑社會都是被政客用來做一些不見得光事情的工具。




 
＊＊＊
 
我們乘坐旅遊巴開往市中心，萬黛向阿興道：「點啊？元朗係咪好好玩呢？」
 
阿興瞧著萬黛，點頭道：「都ＯＫ啦！美中不足係無得騎牛。」
 
萬黛鼓著腮道：「成日話要騎牛，都唔知你想點？喔！我知道大棠有騎術學校可以騎馬，下次你入嚟，我帶你去吖！」
 
「咦！喺元朗大馬路騎馬都幾好喎！如果下次我一個人入嚟，妳會唔會陪我騎馬先？」
 
萬黛想了想，才道：「如果我得閒都無問題架！」
 
在旁的榮仔把一切看在眼內，雖然他未曾談過戀愛，還是察覺到二人之間好像有些事情正在蘊釀。
 




萬黛道：「榮仔，靜間去嗰間大光榮酒樓啲豬油撈飯好出名架！你要試下啊！」
 
榮仔嗯了一聲。
 
阿興插言道：「豬油撈飯好肥膩下喎？妳唔怕肥咩？」
 
萬黛道：「一餐半餐怕咩喎？你唔係平時操開拳咩？一碗油飯消耗到有餘啦？」
 
阿興道：「我緊係唔怕啦！係驚妳怕啫！睇妳平時除咗騎牛都唔會點做運動架啦！」
 
萬黛別過頭，氣鼓鼓道：「一次就話好笑啫！成日話騎牛騎牛，你再咁講，下次你入嚟我唔帶你去騎馬。」
 
阿興吐了吐舌頭，道：「Sorry囉！唔講喇！唔好嬲啦！我真係想試下喺馬路騎馬啊！」
 
阿興服軟給萬黛面子，她點頭道：「嗯，咁下次帶你去騎馬啦！」




 
這時旅遊巴停下來，到達了大光榮酒家。
 
萬喜已為我們訂了檯，矮仔文要侍應把三條魚拿去清蒸。
 
尚興國訝異道：「矮仔文，你邊到整三條魚返嚟？」
 
矮仔文道：「頭先我喺漁塘釣架！咁難得入到嚟元朗，緊係要試下啲新鮮魚啦！」
 
飯桶武把一袋荔枝放在桌上，道：「仲有啊！頭先經過荔枝園，我見啲荔枝幾靚，大家試下啦！」
 
尚興國愕然，道：「睇你兩條友平時傻下傻下，估唔到咁沙膽，圍頭佬啲魚同荔枝都夠膽偷？」
 
矮仔文辯道：「咩偷啊？我地先無咁低裝，有擺番低錢架！」
 




尚興國剝開一顆荔枝品嚐，讚道：「咦！真係好甜好多汁喎！」
 
其他人聞得尚興國讚不絕口，紛紛去試食。
 
呂靜宜見我對荔枝沒有興趣，把一包糖果遞給我，問道：「成皇志，食糖吖？」
 
呂靜宜遞給我的是二寶果汁糖，二寶果汁糖是我們從前在一起的時候，常常買來吃的糖果。
 
我接過她遞過來的糖果，道：「多謝。」
 
楊鳳瑤搧著鼻子道：「成皇志，你踩完單車，成身臭汗味，好心你就換衫啦！」
 
我見在場仍有不少人穿著那件民主戰線的Ｔ恤，但我怕了楊鳳瑤囉唆，只好去洗手間換上帶來的衣服。
 
更衣後回來，萬喜走到我身旁，道：「成皇志，你創立嘅自強會人才濟濟，唔單止學生，喺其他年齡層都有人加入，當初我都喺畀你同自強會嘅事蹟吸引而加入。」
 
我笑道：「其實有啲傳聞太過誇張，有人以訛傳訛，你都喺唔好太認真。」
 
萬喜搖頭道：「雖然傳聞有誇張成份，但係並無失實，人都係渴望現實裡面出現有傳奇色彩嘅英雄，既然你有依種潛力，點解唔好好去發揮呢？之前你打算喺娛樂圈發展成為偶像，其實你有無諗過利用自己嘅號召力，組黨從政？」
 
我愕然道：「從政？點可能啊？我咩都唔識，而且我咁後生，邊會有人信我啊？」
 
萬喜搖動道：「投票嘅大眾好多都唔會去理一個人嘅經歷同學識，佢地會更傾向著重個人包裝，你嘅故事已經係一個吸引選票嘅賣點啦！而且你唔係一個人作戰，如果你從政，棉總、民主戰線都會全力支持你。」
 
我問道：「恕我直言，你大伯係建制派，點解你會企喺佢嘅對面打對台嘅？」
 
「因為我睇唔過眼，佢地只係重視自身嘅利益，成為議會入面嘅投票機器，民意授權嘅代議士唔係咁架！佢地應該重視人民嘅福祉多於自身嘅利益。」
 
我道：「我好欣賞你出身喺依種特殊嘅階層入面，居然會有依種想法，但係我暫時無從政嘅想法，我無議政嘅能力，而且我唔係你諗嗰種無私嘅英雄，我只係想搵錢，名成利就咁樣。」
 
萬喜聞言現出失望的神情。
 
布正麗喊道：「成皇志，萬喜，你地喺嗰邊傾咩啊？開飯喇！」
 
大光榮酒家內解恍交錯、喜氣洋洋；市中心附近的小商鋪紛紛落閘關門，只因不斷有臂上纏上紅絲帶的人士逐漸集結，他們一副兇相，手上拿著木棍、鐵喉管等武器。
 
史享走向史子義，道：「老豆，有兄弟見到民主戰線部旅遊巴停咗喺大光榮附近。」
 
史子義把香煙摁熄，道：「嗯，咁我地出發啦！」
 
王炳道：「甫少，唔好話有好野唔預你喇！嗰班人入面有三條女好正架！照舊捉上ＶＡＮ仔慢慢玩。」
 
戴上黑色飛虎面罩阮顯甫，拍了拍王炳的肩膀，道：「算你夠老友啦！」
 
當年兩人架著貨ＶＡＮ，在街上尋找獵物，看中了便拐上車施暴，事後雖然有人報案，可是阮顯甫利用關係、職權讓事件不了了之。
 
現在他們又打算照板煮碗再來一次禽獸的惡行，可笑的是身份本應勢不兩立的仇敵，竟然變成一起同行犯罪的共犯。
 
何是兵？何是賊？抑或兵賊本來是一家？
 
＊＊＊
 
菜餚紛紛上桌，先來一個海鮮羹，看見身旁的楊鳳瑤津津有味用湯匙刮著吃，讓我回想起昔日的事情，那時我頭腦一熱，在學校強吻了她，生出了不少事踹。
 
楊鳳瑤發現我看著她，她可能與我一樣想起往昔的事情，神情亦有點不自然道：「仲咩咁望住我啊？」
 
呂靜宜和布正麗聞言瞧向我們，為了沖淡這種尷尬的氣氛，我隨便找些話題去聊，道：「係呢！楊鳳瑤，妳去日本留學，長遠有咩計劃啊？」
 
「其實我諗住讀設計，不過依家最緊要惡補啲日文先，如果唔係都幾惡搞。」
 
「呂靜宜同布正麗佢地喺外國，我唔擔心啊！係驚妳咋！」
 
楊鳳瑤冷哼一聲，道：「你真係當我係妹釘啊？」
 
「妳份人面對啲陌生人就好細膽，我驚妳喺嗰邊畀人蝦唔識出聲啫，日本有唔少有蘿莉控嘅電車痴漢，我驚妳畀人欺負，唔識反抗啫！」
 
「吓！依件事邊個同你講架？」楊鳳瑤反應甚大瞧向布正麗與呂靜宜。
 
她們兩人搖著頭，異口同聲道：「我無講過啊！」
 
楊鳳瑤用手捂住自己的臉，我訝異道：「我隨口講咋！妳真係喺日本畀人非禮，仲要唔出聲啊？」
 
楊鳳瑤辯道：「咁…我日文唔得吖嘛！而且佢又未必有心，或者佢企唔穩，唔覺意啫！」
 
我嘀咕道：「如果妳咁識得體諒人，當年就唔會差啲咬斷我條脷啦！」
 
「吓！成皇志，你講咩話？」
 
「哦！無，我話如果依啲情況發生喺布正麗同呂靜宜身上，嗰個痴漢下場會好慘，妳啊！份人唔好咁驚青，一個女仔喺外國要識反抗啊！知唔知啊？」
 
倏地，隔離桌的陳依官指著一人喊道：「妳唔係自強會嘅人，究竟妳係咩人？」
 
這一異動吸引了我們的注意，我們不約而同循陳依官所指的方向看去，只見一個女人正在狼吞虎嚥地扒著飯。
 
女人見我們瞧著她，她才停下手來。
 
游大輝問道：「陳依官，我仲以為依個女人妳識嘅添！」
 
陳依官道：「我唔識架！因為佢坐喺Humphrey，我仲以為係佢啲大學同學，但佢一句聲都無出，只係顧住食野，我先覺得奇怪咋！」
 
Humphrey搖頭道：「我都唔識佢架！不過見佢著住件民主戰線嘅Ｔ恤，我以為係自強會嘅新會員嚟！」
 
這時，女人張聲向我們說話，我們面面相覷，不知道她說的是什麼話？
 
宛琳珊插言道：「依個女人講嘅語言好似日文，楊鳳瑤，妳知唔知佢講啲咩啊？」
 
楊鳳瑤瞥了宛琳珊一眼，搖頭道：「雖然我日文程度得半桶水，但係聽得出佢講嘅唔係日文嚟嘅。」
 
女人見我們只是瞧著她，她便把一張便條塞到陳依官手上，陳依官打開便條，唸道：「這是北韓女人，請通知南韓大使館。」
 
陳依官此言一出，我們立時感到震驚。
 
宛琳珊現出難以置信的神情，道：「依個女仔係北韓人，點解佢會跟我地上車嘅？我地係咪要報警啊？」
 
陳依官阻止道：「等陣先啊！張紙條叫我地聯絡南韓大使館。」
 
萬喜神色凝重道：「無錯，我同意陳依官嘅講法，我地應該聯絡南韓大使館，因為依位女仔好可能係脫北者。」
 
阿興問道：「脫北者？咩嚟架！」
 
萬喜點頭道：「脫北者就係由北韓偷渡到其他國家嘅北韓人嘅稱呼，北韓係一個極權國家，人民生活得好痛苦，有啲人為咗生存，佢地會冒住生命危險偷渡去中國，再搵機會走去南韓希望得到政治庇護，如果我地聯絡警察，佢地或者會將依個女人遣返翻去北韓，佢嘅下場會好慘。」
 
那名北韓女人瞧了瞧我們，以生澀的普通話道：「我…是…朝鮮人…」
 
北韓女人指了拍便條，續道：「男人…給我，我給你…救我…」
 
布正麗以普通話問道：「妳如何來到這裡？給妳便條的男人是誰？為什麼他不幫助妳，而要找我們去幫妳。」
 
北韓女人呆呆的瞧著布正麗，顯然她的普通話水平只是有限公司，她努力用手去比劃，道：「很大…貨倉…很多女人…」
 
呂靜宜道：「佢嘅意思係咪話有個貨倉入面，有好多佢依種女人啊？」
 
陳依官道：「等陣先，我地入嚟元朗嗰陣都無見過依個女人嘅，我地喺韓家村坐車嚟依到先發現佢，唔通佢講嘅貨倉喺韓家村附近？」
 
布正麗聞言如遭雷殛，想起了之前金碧韻的說話，她道：「頭先遊行嗰陣，我撞到金碧韻，佢話收到人報料花生幫有做開販賣人口嘅交易，佢入去韓家村搵料，唔通依個北韓女仔係喺花生幫嘅地方偷走出嚟？」
 
一瞬間，我腦海裡急速整理各人的對話，得出了一個結論，道：「弊！依件事好大鑊，如果花生幫真係做埋啲販賣人口依啲唔見得光嘅勾當，佢地發現唔見咗個北韓女人，一定會派人嚟搵佢，我地要即刻埋單走人喇！」
 
阿興道：「阿哥，我地依到有咁多人喺到驚咩喔？」
 
我罵道：「驚咩？我地依到全部都係學生，有三份一人係女仔，人地黑社會嚟架！點輪到我地唔驚啊？」
 
萬喜點頭道：「成皇志，你嘅擔憂係有道理嘅，你地都係快啲帶埋個北韓女人離開元朗好啲，始終依到喺佢地地頭，唔知佢地會做啲咩？張單我埋啦！你地快啲走啦！」
 
這頓飯的氣氛急轉直下，由喜氣洋洋變得膽戰心驚，很多人都沒有興趣再作逗留。
 
布正麗向北韓女人道：「別擔心，我們會保護妳的。」
 
北韓女人好像明白布正麗的意思，點了點頭。
 
阿興向萬黛，道：「喂！記住喇！下次我嚟要帶我去騎馬啊！」
 
萬黛急道：「得喇！你乖啦！快啲走啦！我應承得你，就唔會反口。」
 
我們離開了大光榮酒家，矮仔文打量四周，道：「我仲以為出面會有幾百人埋伏我地添！」
 
飯桶武和應道：「咪就係囉！唔好話黑社會，連途人都唔見有，奇怪喇！今日星期日啲鋪頭都咁早收嘅，係咪元朗先係咁架？」
 
由大光榮酒家步行到旅遊巴停泊處，路程需要五分鐘，司機先我們一步去取車。
 
我瞧見楊鳳瑤的神情有些慌張，我安慰道：「妳唔駛咁驚喎！轉個彎就上車喇！就算佢地要搵都係搵嗰個北韓女人，佢地邊會知北韓女人同我地一齊喔！」
 
楊鳳瑤點了點頭，道：「係囉！我自己攞嚟緊張啫！」
 
前方出現刺眼的車頭燈光，司機已經上了旅遊巴等候我們。
 
一陣踏著碎石的腳步聲從遠處傳來，突然四周湧出了數以百計臂上綁上紅絲帶的人士，他們手上拿著木棍、竹枝等硬物，他們發現我們，然後朝我們的方向跑過來。
 

=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl