<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ３ 人生有幾多個十年
Chapter ３ 人生有幾多個十年
KYLE載我到西貢，這次KYLE所說的梁導演，真的是一位導演；而我今次所擔當的也並非如以往一樣可有可無的跑龍套，KYLE為我爭取到一個甚有發揮的角色，電影中的邪教大魔頭由尚未成為視帝的劉耀暢所飾演，而我則扮演他的青年時代，我是一位轉世靈童，其中一場戲我要在信徒膜拜下高呼教義。
這幕劇拍攝完畢，梁導演讚道：「以新人嚟講，阿志你嘅表現真係唔錯，我就係要一個外表十幾歲，但係靈魂係三十幾歲嗰一種，你嘅神情同講野嘅語氣就表現到嗰一種感覺，KYLE真係無介紹錯。」
我聞言不禁暗地裡苦笑，心想：「依個角色嘅背景，真係為我度身訂做，我諗世界上應該無第二個比我更加適合做依個角色。」
其他工作人員準備拍攝另一場戲的工作，這場戲沒有我份，我在旁觀摩，這場戲是講述邪教教主劉耀暢向企圖退教的叛徒處刑，拿著滴血兇刀的劉耀暢，流露出乖戾猙獰的神情，一邊凌遲叛徒，一邊舐著刀上的鮮血，我看得不禁心裡發毛。
導演停機後，有人喊道：「喂！阿志。」
我抬頭一看，瞧見來人有點訝異，道：「包叔，點解你會喺到嘅？你今日唔駛返電視城咩？」
包叔道：「我電視、電影兩邊都有做，之前好景，一日踩九組戲，都幾好搵架。梁導演以前都喺大台同事。佢開戲，問我有無興趣試下，我當然嚟啦！頭先我見你睇劇本睇得咁入神，先無同你打招呼之嘛！話時話，頭先你嗰場戲真係做得好啊！我做教徒，真係覺得你有一教之主嘅氣勢喺到。」
「吓！包叔，乜頭先你喺到咩？唔好意思啊！頭先我太緊張，只係掛住記住啲對白同導演嘅要求，無留意其他野。」
「唔緊要，專注拍攝、投入角色係作為一個演員應有嘅專業操守，你做得好好啊！」
我聞言，想起了昨天因為自己一時情緒低落，而得過且過的工作態度，便不禁汗顏，我歉意道：「包叔，對唔住啊！我知我尋日嘅工作態度真係好差。」
包叔點頭道：「你尋日嘅態度真係唔要得，不過我都明白你嘅情況，主角有邊個唔想做，但係一部劇主角得一個，大多嘅人都係做配角、甚至無對白嘅臨時演員。我初時見你個樣咁灰，仲以為你會放棄。做依行咁耐，我見過好多人，有唔少人初時好有熱誠，但過一排發現無咩突破就係依行消失，講真依一行有幾多個陞爺、韋仔吖！佢地係有料，但係都要時來運到，把握到機會先上到位，好似嗰邊嗰個暢仔咁，佢唔係無料，佢演技好好，但係做咗咁多年戲，仲未遇到欣賞佢嘅伯樂。」
包叔所說的暢仔，就是當這套戲的大魔頭，亦即是未來那個三奪視帝的劉耀暢。
這時，完成拍攝的劉耀暢走過來，打招呼道：「喂！包叔。」
「喂！暢仔，你嚟得啱喇！我地啱啱講起你啊！讚你演技一流。」
我瞧著劉耀暢，剛剛還是一名厚黑歹毒的邪教教主的他，此時滿臉堆歡，和顏悅色地拍著包叔的肩膀話當年，道：「包叔，你又笑我喇！當初我入行時，都係得你教我咋！我嗰陣連對白都講到一舊舊，啲人唔係叫我暢仔，佢地笑我做『漏口仔』，係得你照顧我咋！」
包叔笑道：「依啲都係你自己爭氣，暢仔，你信包叔，你未遇到伯樂啫！你將來一定會紅嘅！」
「承你貴言啦！包叔。」劉耀暢的視線轉向我，拍了拍我肩膀，鼓勵道：「小朋友，我睇過你之前嗰場戲，演得幾好吖！你點稱呼啊？」
想不到好戲之人劉耀暢會稱讚我，我道：「暢哥，你好啊！我叫成皇志，我好鍾意睇你做戲架！你好多作品，我都有睇架！你真係好好戲，做咩角色都咁似，好似豬八戒、周伯通咁，連啲變態角色都拿捏得好好。」
劉耀暢哈哈一笑道：「估唔到你依啲咁嘅年紀會鍾意睇我做戲？」
包叔插言道：「暢仔，觀眾眼睛係雪亮嘅，你有料，遲早會畀人賞識嘅。」
劉耀暢道：「包叔，走未啊？我車埋你吖？」
包叔搖頭道：「唔駛喇！暢仔，靜間我仲有一場戲，你走先啦！聽日你仲要返早。」
劉耀暢轉向我道：「阿志，你住邊啊？車埋你吖？」
「吓！我住石梨，好遠喎！」
劉耀暢笑道：「叫得你跟我車，你住長洲，我都諗辦法送你返屋企啦！」
劉耀暢在這時期扮演的角色，大多是唯利是圖的市井小人或心理變態的狂徒，但想不到戲外的為人這麼和善客氣。
坐在車上，看著身旁的劉耀暢操控著軚盤，我才有些自己身在娛樂圈的感覺。
劉耀暢突然道：「阿志，你幾大啊！睇你個樣，好似廿歲都無？你應該入行無耐。」
「暢哥，我今年十七咋！喺依行做咗兩個月到，我咩都唔識，有啲咩野真係要指點下細佬啊！」
「你做咗兩個月，就可以有機會擔演到依啲角色，真係好好彩。我８６年出道，頭三年都係做茄喱啡，做電視做咗十幾年，都做過啲受歡迎嘅角色，好似西遊嘅豬八戒咁吖！嗰時好多人識我架！唉！但咁又點吖？事業都係載浮載沉，最近連電視都無得撈啊！依家我都係做一日和尚敲一日鐘咋！」
我有點愕然，想不到劉耀暢原來有著這樣的煩惱，亦想不到他會向我這認識不久的人透露心聲。
如果我沒有記錯的話，現在應該是劉耀暢的低潮期，他在大台沒有工作，驅使他全心全意到電影圈闖盪，可是他通常擔演Ｂ級電影甚至是「爛片」中的小人物，有些電影更只是發行影碟，成了家的他應該有不輕的經濟壓力。
劉耀暢見我默然不語，他苦澀地道：「唔好意思，我唔係嗰啲只會同後輩講鼓勵說話嘅人，我唔想只係同佢地講只要努力，就一定會有回報。因為我試過好努力，但係到依家都未成功，我講依啲鼓勵說話一啲說服力都無啊！哈哈哈！依一行好現實，又或者係依個世界好現實，識人好過識字、曉做人好過曉做戲。」
劉耀暢現在處於人生的低谷，我的人生亦經常受到不同程度的挫折，我亦好明白他此刻內心的痛苦。
劉耀暢續道：「唉！做咗依行十幾年，都係上唔到位，人生有幾多個十年啊？我再唔係一個無負擔嘅靚仔，我有頭家，屋企仔細老婆嫩，佢地靠晒我，我唔可以只係諗自己。我有朋友做保險，我諗住跟佢搵食，話晒我做咗十幾年藝人，都有啲知名度，應該有啲作用啩？」
什麼？「人生有幾多個十年」這金句居然是出現在這時候，但為什麼給人的感覺完全不一樣的？劉耀暢在「鬚眉英雌」裡高喊這句說話時，讓人熱血激昂；可是現在劉耀暢說這句話的時候，語氣滿是悲愴淒涼。不，這不是重點，劉耀暢是三屆視帝，還有很多膾炙人口的角色未擔演的，怎可以在這時候放棄的？只要他多堅持數年，他的人生便會不一樣，他會在電視上大放異彩，如果他在此時放棄，那不單是他個人的損失，還會是整個演藝圈的捐失。難道又是因為我的關係？我加入娛樂圈產生了蝴蝶效應，影響了劉耀暢的人生。
如果我只是一名普通的晚輩，我不敢對同行前輩的人生有什麼意見，可是我來自未來，見證過對方的輝煌，便不能坐視不理。
我道：「暢哥，你有無聽過兵仙韓信嘅事蹟啊？」
劉耀暢訝異地盯了我一眼，然後把焦點放回前方的道路上，道：「聽過下啦！韓信點兵，多多益善吖嘛！」
我以劉耀暢將會擔演的角色來作比喻，希望他可以像韓信般永不放棄，最後得以吐氣揚眉，我道：「韓信前半生都好坎坷，貧窮失業，阿媽死咗都無錢做白事；寄人籬下，俾人白眼；畀人恰，要做胯夫；投靠項羽，又俾人睇低；轉投劉邦，又畀人投閒置散，仲差啲畀人斬頭，搞到要二次出走，不過有料嘅人，始終會有人慧眼識英雄，最後成就一番業，將相王侯都做過晒，名留青史。」
劉耀暢苦笑道：「我做咗依行十幾年，如果真係有伯樂，我晨早遇咗啦！人貴自知，我無畫仔、韋仔咁靚仔，做唔到主角架！」
「邊個話主角一定靠樣架！肥貓、生抽王、光頭佬等等，佢地一樣唔靚仔，但一樣攞影帝。依十幾年你嘅伯樂未出現，唔代表永遠唔出現，如果你依家放棄，就永遠遇唔到你嘅伯樂喇！」
「我唔細架喇！有頭家要我養，我唔為自己，都要為佢地打算，我承認我好鍾意演戲，但係興趣唔可以當飯食。」
「暢哥，乜你覺得保險真係適合你咩？明明你嘅強項就係演戲，如果你做一份你唔鍾意嘅工作，你係唔會開心架，你唔開心，你家人亦都唔會開心。真係要轉行先可以撐起頭家咩？」
「阿志，我…」
我斷言道：「暢哥，人生有幾多個十年，之後仲有一句係…最緊要痛快！當年如果韓信放棄，依個世界就無咗兵仙。暢哥，你信我，我亦都希望你相信自己，有料嘅人一定會遇到伯樂。」
此時交通燈轉紅，劉耀暢把車停下，他瞧著我，點頭道：「阿志，你講得啱！人生真係無幾多個十年，最緊要痛快。演戲嗰陣，我真係好快樂，我人生嘅意義就係喺電影同電視入面。唔夠錢，最多我踩多幾組戲，我真係唔想放棄依家嘅工作啊！」
我搖晃著拳頭，道：「啱啊！暢哥，你同韓信一樣，只要唔放棄，總有一日，你會大放異彩架！」
交通燈由紅轉綠，劉耀暢踩下油門，汽車迎前方駛去，他笑道：「我有韓信咁巴閉咩？佢做過王侯喎！」
「暢哥，咁電視圈嘅王就係視帝，將來你會成為視帝架！」
「視帝？邊有可能啊？撈家就攞過兩屆，如果有得做主角，我都開心死啦！」
「暢哥，你得嘅！你同撈家一樣，都係三屆視帝，難分軒轅。」
劉耀暢啞然失笑，道：「三屆視帝？講到似層層咁，唔知嘅，仲以為你曉預知未來。如果有一日我真係攞視帝，我一定上台多謝你。」
昨天，呂靜宜讓我重燃鬥志；今天，我讓劉耀暢打消轉行的念頭，留在演藝界。如果昨天呂靜宜沒有找我，可能我已放棄這份工作，更不會對劉耀暢說些什麼鼓勵的說話了，不知他最後會不會真的轉行，有些事情一環扣著一環，好像冥冥之中有所主宰。
翌日，主要拍攝男女主角撈家和海芙蓉的戲份，我只有一場回憶戲要拍攝。拍攝完畢，我在旁觀摩海芙蓉與撈家的攜手演出，撈家不愧為三屆視帝，戲路甚廣，什麼角色也難不到他；而海芙蓉能紅遍兩岸三地，與撈家同場，完全沒有被對方比下去的地方。
正當我把注意力都放在兩人的演出時，感到有人用手指戳了我的背脊一下，別過頭一看，發現戳我的人赫然是宛琳珊。
我愣了愣，才道：「宛琳珊，點解妳會喺到嘅？」
我們怕我們說話的聲量影響到現場收音，於是走到一旁再說。原來宛琳珊與掌天下旗下的beauty song簽約，成為beauty song的旗下藝人，由於公司要力捧跳唱新人王香圖圖，加上她只是新人的關係，所以沒有為她提供太多的機會，幸好她得知海芙蓉剛剛成為掌天下旗下的藝人，她去找海芙蓉尋求幫助，因為有著自強會這一層關係，海芙蓉願意向宛琳珊施以援手。當海芙蓉有擔正的演出時，她會向監制爭取一些角色給宛琳珊，監制大多不會拒絕海芙蓉的要求。當海芙蓉擔演千金小姐，宛琳珊會被安排成為她的俏丫環；當海芙蓉擔演公司總裁時，她會被安排當公司的接待員，這些角色雖然不太起眼，但至少有對白、在片尾會顯示出擔演角色的名字。
我道：「嘩！妳個宛琳珊吖！唔怪得之前係咁痴住海芙蓉，原來係有咁嘅企圖嘅？」
「咩喎！咁啱喺公司撞到咋！你唔好諗得我咁市儈先得架？」宛琳珊轉話題，道：「係呢！你嗰間dream music係咪有個好鍾意著粉紅色西裝，好鍾意噴啲好濃香水嘅男人啊？」
「哦！妳講KYLE？係啊！咩事啊？」
「我未簽beauty song之前，佢搵過我，但係當我知道佢連OFFICE都未有，就覺得伏伏地，後來入到beauty song先知，個KYLE之前搵過好多人，但係佢地都覺得唔對路，無同KYLE簽約，喺掌天下旗下三間音樂公司入面，dream music嘅規模同實力完全比唔上其餘兩間。」
原來KYLE在我之前，曾經聯絡過很多人，我不知是他的第幾個選擇呢？想到這裡，我有點不是味兒。
我又想到另一個問題，三間公司裡，亳無疑問dream music的規模及實力最弱，beauty song與golden song都能夠做出成績，幕後老闆蔣天殺自然會把更多的資源投放在其他兩間公司上。
親身看過撈家與暢哥的演技後，我知道我不可能勝過他們，而他們這麼有實力的演員都要在娛圈浮沉十載，才可以上位，我沒有這麼多時間可以浪費，只有在音樂那方面，我才有優勢。在決定投身樂壇前，我不斷去找植爺、暉洋練習音樂，在樂理與歌藝上長進了不少，加上我「擁有」不少「未來」傑出作品的優勢，我相信定可讓我有一番作為。現在問題就是怎樣去讓幕後老闆關注dream music，只要能夠取悅他，便可以得到更多資源，支持我發展音樂，究竟怎樣去取悅他呢？
有一件事說來好笑，因為爸爸的關係，之前我很憎惡黑社會，可是我的大老闆蔣天殺與真技安有著千絲萬縷的關係，現在我居然要想辦法去接近他、取悅他，這也沒辦法，歌亦有得唱人在風暴中，無奈的打轉。我說服我自己為了上位、為了得到機會、為了提高自己實力自保，個人尊嚴、道德底線，我不得不放下，而且現在的蔣天殺已經是一位正當商人了。
此時，導演喊了一聲GOOD TAKE，完成這場戲的拍攝，劉耀暢與海芙蓉討論剛才那場戲的細節，劉耀暢道：「芙蓉姐，頭先妳嗰場戲其實可以再爆啲，我覺得既然劇情講我殺咗妳全家，妳應該同我仇深似海，就算妳殺咗我都唔可以解恨，應該歇斯底里將我鞭屍。」
海芙蓉臉上呈現沉思狀，點頭道：「嗯，阿暢，你講得啱，靜間我問導演可唔可以補返一場戲。」
「麻煩晒妳啊！芙蓉姐。」
「客咩氣吖！阿暢，你都係想個效果出嚟好啲啫！仲有啊！我地大家差唔多同期出道，叫我芙蓉咪得囉！」
劉耀暢苦澀道：「咁唔同，妳依家大紅大紫，我連電視都無得撈。」
「阿祥，依行好睇機遇，我運氣比你好，唔係代表你唔掂，俾心機啦！」
「嗯！多謝！」此時劉耀暢的視線落在我身上，他道：「喂！阿志。」
劉耀暢介紹道：「芙蓉，阿志扮演我細個嘅角色，新人嚟講算做得唔錯架。」
我與海芙蓉的視線相觸，她臉上現出訝異之色，道：「你係…成皇志？原來你都入咗演藝圈啊？」
「係啊！芙蓉姐。」
劉耀暢看了看我，再看了看海芙蓉，詫異道：「乜原來你地識得嘅咩？」
「係啊！芙蓉姐係我中學嘅師姐。」
之前為了籌募自強會的經費，我與一眾自強會的成員親自去遊說海芙蓉加入自強會。
宛琳珊賣乖道：「芙蓉姐，你好好戲啊！妳啲演技真係無得頂啊！」
海芙蓉對宛琳珊笑了笑，然後她在我耳旁輕聲道：「睡仙嘅說話真係好靈，佢叫我北上發展，我依家嘅片酬多咗成倍啊！而且哮喘嘅問題都舒緩咗好多啊！真係好多謝佢老人家啊！」
三十歲的海芙蓉明豔照人，散發著成熟女人的韻味，她在我的耳旁輕聲細語，讓我耳朵癢癢的，當我看到她因為微微彎身而露出深不可測的事業線時，我更加心癢癢的。
這時，導演答應了海芙蓉的要求，補拍剛才的一場戲，海芙蓉與劉耀暢埋位拍攝。
劉耀暢與海芙蓉走遠後，宛琳珊問道：「喂，頭先芙蓉姐細細聲喺你耳邊講咩啊？」
我笑道：「佢讚我好戲過妳，佢驚妳唔開心先要咁細聲咁講啫！」
「哼！你唔講咪算囉！我演出經驗多過你，唔信你啲戲好過我啊。」
未幾宛琳珊又酸溜溜道：「聽講依套電影嘅主題曲係由golden song嘅林昌奴唱架！鬼叫人地係糧油大王個仔咩！一般人就係唱片公司出錢捧人，而佢就係老豆畀錢唱片公司捧佢，我都想出碟啊！」
我聞言亦有與宛琳珊相近的感覺。如果我再只是乖乖去服從KYLE的安排，相信下年亦未必有機會出碟，KYLE只是替蔣天殺打工，dream music的經營成本大都來自於母公司掌天下娛樂集團那裡。出碟的關鍵因素在於幕後大老闆蔣天殺，只要能夠得到他的賞識，一切便好辦了，但問題是如何接近蔣天殺，總不能貿貿然登門拜訪吧？他是大老闆，我還未見到他，已被他身邊的親信趕走了。
我想著如何去接近蔣天殺，宛琳珊逕自道：「今年男新人太勁，聽講林昌奴同香圖圖都唔會角逐今年新人，留返下年先出手機會大啲，唔知我下年有無機會呢？」
宛琳珊見我沒有理她，她皺了皺嘴角以示不滿，可是她靜默了不久，又道：「喂！你地公司諗住送咩野賀細蔣生細蔣太啊？」
我愕然道：「仲咩無端白事要送野畀佢地啊？」
「搞錯啊！你真唔知定假唔知啊？你公司無同你講咩？」
宛琳珊說到這裡，我依然很茫然，我道：「無喎！究竟發生咩事啊？」
「有無搞錯啊！你身為掌天下旗下嘅員工都唔知大老闆嘅事，就算你公司無同你講，你都應該有睇報紙啩！」
說真的，因為最近我忙於練歌和工作，很少翻閱報紙。現在快將年尾，我猜宛琳珊可能說掌天下會舉行ＡＮＮＵＡＬ ＤＩＮＮＥＲ吧！可是ＡＮＮＵＡＬ ＤＩＮＮＥＲ要送禮物給老闆嗎？
宛琳珊看見我依舊像呆頭鵝一樣，她沒好氣道：「你真係呢！細蔣生細蔣太銀婚紀念啊！半個月後，喺會展擺成百圍，邀請圈中天王巨星、城中政要巨商，到時仲熱鬧過台慶，我地會有機會上台表演娛賓啊！」
＊＊＊
這天拍攝完畢，我與昨天一樣乘搭劉耀暢的順風車，劉耀暢的臉上踵起了一大片、手腳也有不少地方擦傷，都是由於剛才補拍的那場戲，不小心被海芙蓉弄傷；但他滿不在乎，認為只要拍攝出來的效果好，這一點皮外傷算不上什麼，他的專業態度，我是很佩服的。
劉耀暢讚道：「海芙蓉，真係唔話得喇！我同佢講話加場補拍戲好啲，佢就即刻遊說導演。佢頭先仲話，如果我想返電視台，佢會打去同洛小姐傾啊！依個朋友真係唔話得，真係抵佢由出道紅到依家嘅。」
「暢哥，我一早同你講過，你唔放棄，實會遇到你嘅伯樂嘅。」
我心不在焉聽著劉耀暢分享自己的喜悅，心中想著另外的事情，大老闆蔣天殺銀婚紀念，身為員工的我亦可以出席，這是接近蔣天殺的最佳機會，問題是到時賓客雲集，他是當晚的主角，一定有很多人聚在他身邊，我如何可以讓自己在蔣天殺心中留下印象呢？
我知道如果循規蹈矩去按照KYLE所安排去工作，在這四年一定不能混出什麼成績。人家不給我上位機會，只有自己去尋找，蔣天殺的銀婚紀念就是一個尋找機會的地方。
「阿志，尋日你先同我講韓信嘅故事，添哥就話籌備緊套楚漢，海芙蓉仲同添哥講幫我爭取做韓信個角色，你話世事有無咁橋架！希望真係可以做到韓信啦！佢嘅生平同我好似，我真係好想演啊！」
劉耀暢遇到他扭轉人生的契機，而我又是否可以找到上位的機會呢？
=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl