<第叄期實體書,經已有售>今年我三十三歲,回到了1998年 (校園、穿越、奇幻): Chapter　１２２　馬交行

 
Chapter　１２２　馬交行
 
踏入六月，連最後一科的英文oral亦考完。
 
閉關奮鬥了這麼久，也是時候給自己喘一口氣，陳依官聯絡了另一隊足球隊，在葵芳運動場的草地足球場對戰。
 
雖然有四個月沒有踢足球，可是我的球技一點也沒有生疏，反而「餓波」已久，一落場便如猛虎出閘，協助己方大勝對手。
 
賽後，我們到了榮昌路附近的大排檔吃飯敍舊。




 
吃飯的時候，陸永祥只顧拿著手提電話聊個不停。
 
看到他現出含情脈脈的樣子，我不禁向身旁的林海原問道：「喂！阿原，因乜解究阿祥傾電話傾到成個狗公真人咁款嘅？」
 
林海原有點愕然道：「乜你唔知咩？阿祥同宛琳珊一齊咗喇！電話嗰個係宛琳珊嚟架！」
 
我聞言大駭，道：「吓！幾時嘅事嚟架？」
 
霍去登插言道：「鳩爺，你咁耐無出嚟緊係唔知啦！佢地行埋都成三個月架喇！阿祥又真係幾叻仔，連宛琳珊咁高竇嘅女都溝得到。」




 
我內心不禁替游大輝感到難過，歷史終究不能改變。
 
得知這消息，我還未從震撼中恢復過來，黎早強問道：「喂！大鳩志，成兩個月都唔見人，我以為你人間蒸發添？」
 
「唔係啊！考中文、生物，我就見到姚智風；考數學，我就撞到陳依官、郭左杰；考化學、英文，我就見過霍去登同林海原，會考嗰陣，我撞到好多人啊！係無見過你啫！」
 
黎早強再問道：「依兩個月，你真係匿喺屋企不停溫書啊？」
 
我點頭道：「係啊！」




 
黎早強道：「嘩！你咁勤力實可以原校升上中六啦！我同姚智風佢地都無乜點溫書，仲成日約埋去鋤ＤＥＥ添，應該炒硬架喇！不過我阿媽同我講如果會考考得差，就送我去澳洲讀書，其實咁都好嘅，我都唔覺得自己讀多年就可以升上中六。」
 
陳依官聽見我與黎早強討論會考的事情，他亦搭訕，道：「喂！成皇志，你覺得今次會考考成點啊？」
 
我笑道：「之前我地返去學校練oral嗰陣，你已經問過我啦！」
 
陳依官道：「咁你依家可能有唔同嘅睇法呢？」
 
「嗯，啲問題我都夠時間答，應該ＯＫ啩？」
 
陳依官有點擔憂道：「數學同物理，我有啲擔心，我唔係好夠時間做。」
 
我安慰道：「唏！都考完咯！諗嚟仲咩喔！等８月放榜就知道成績啦！」
 




陳依官再問道：「係呢？你係咪諗住原校升讀中六啊？上次模擬試，你成績咁好，我覺得你會考會好高分，你可以試下去其他中學升中六，但係自強會可以復辦，無你依個靈魂人物喺到，好似爭啲咁。」
 
我道：「其實自強會，依家都運作得幾好啊！依啲野薪火相傳，舊人退咗落嚟，自然有新人補上，就算我原校升中六，終有一日都係會離開依間學校架！咁唔通我留低只係為自強會續多兩年命咩？」
 
陳依官道：「你咁講，即係你未必會原校升中六？」
 
「其實之前我係打算繼續原校升中六，但係依家我有其他想法，都係等放榜之後先再決定啦！」
 
郭左杰道：「係喎！我收到隔離班通知，七月頭喺荃灣酒樓擺廿幾圍搞謝師宴，你地諗住去唔去啊？」
 
何敏傑道：「緊係去啦！到時睇下啲女著成點都好啊！」
 
姚智風問道：「咁我地駛唔駛去旺角荷李活做定西裝啊？不如整返套一模一樣，到時一齊著去。」
 
郭左杰笑罵道：「家陣制服啊？如果係咁，到時不如一齊著校服算啦！」




 
＊＊＊
 
應付完會考，接下來我還要為錢而煩惱，有些同學早在五月已經找到了兼職賺取外快，我已經很久沒有去打工賺錢，戶口的數字一直是負增長，現在是時候解決財赤問題。
 
我已經踏入了十七歲，比起早兩年有更加多的選擇，距離放榜還有兩個多月的時間，我到圖書館翻閱報章，打算尋找工作；可是到了六月，除了會考生和高考生外，還多了另一批放暑假的學生加入競爭，好工作近乎絕跡。
 
我看著求職版發呆，心想：「如果我係女，就可以落酒吧做拳手，最多畀啲麻甩佬抽下水啫；再唔係去啲展覽會做下show girl，同人影下相就可以賺快錢。」
 
正當我打算在茶記侍應和倉務員二擇其一的時候，一陣風吹來，報紙翻開到體育版。
 
我看到體育版的標題立時欣喜若狂，報紙的標題寫著２０００年歐洲國家盃列強分析。
 
我是來自２０１６年的未來人，我一直有著以預知未來作為致富的打算，既然我有這得天獨厚的能力，我還這麼辛苦工作幹麼？我埋沒這技能不用，會遭天譴的。
 




一念及此，我把報紙放回報紙架上，走去警署找房侍農。
 
到了警署，我向當值的警員說：「阿ＳＩＲ，我想搵房侍農啊！」
 
那名警員先是愕然，然後不屑道：「靚仔，你乜水啊？房侍農你叫架？要叫房ＳＩＲ。」
 
「咦！阿志，你喺到做咩啊？」
 
我循聲一看，原來是水桂麗。
 
水桂麗向那名當值警員，道：「伙計，識得架。」
 
那名當值警員瞧見水桂麗與我相識，臉上盡是訝色。
 
水桂麗問道：「阿志，你為咗湯仲謀單案嚟啊？」




 
我道：「唔係，我有啲野搵房侍農傾啫。」
 
一說曹操，曹操便到，房侍農恰巧從樓梯走下來。
 
房侍農瞧見我，道：「咦！阿志，嚟搵我啊？」
 
「係啊！房…房幫辦，我有啲野想同你傾啊！」
 
房侍農搭著我的肩膊，道：「我地搵個地方，慢慢坐低傾。」
 
房侍農領我到了一間雜物房，我打量了四周一眼，問道：「乜無啲正常啲嘅地方傾計嘅咩？」
 
「你當我升咗做警司，有自己房咩？依到傾都一樣啫！」房侍農喜形於色，道：「喂，阿志，講個好消息過你聽喔！madam畀我嘅誠意打動，佢終於接受咗我嘅愛喇！我地兩個年紀都唔細，希望一兩年後可以拉埋天窗，madam屋企有啲家底，可能兩老未必會放心嫁個女畀我，不過我依家都叫做個幫辦仔，之後努力工作，儲兩年錢，應該畀得起首期嘅。」
 
房侍農滔滔不絕地訴說他的人生大計。
 
我待他說畢，才道：「見到你事業愛情兩得意，作為師兄嘅我都好高興，頭先你講到錢依個問題，咁啱我嚟搵你，就係有個發達大計要同你斟斟。」
 
房侍農聞言立時精神為之抖擻，道：「阿志，師父又報夢畀你聽？」
 
我點頭道：「嚟緊歐洲國家盃，師父佢老人家已經過咗料畀我，做人做狗就睇依鋪，但係有一個問題，我依家個本唔係好夠，你有無一百幾十個借住我先。」
 
房侍農苦笑道：「我有一百幾十個就娶咗madam啦！」
 
我再問道：「你有無啲相熟財仔，問佢地借住幾十個先啦！」
 
房侍農為難道：「我咁辛苦先還晒錢，唔想再行返條舊路啊！」
 
「怕咩啫！師父報夢，贏硬架！師父佢老人家幾時有水過我地先，上次曼聯都係補時反勝，照足師父個劇本做，你唔係信唔過師父啊？」
 
我拿出睡仙的「波神」招牌來強壓房侍農，房侍農道：「我唔係信唔過師父，師父啲料不嬲準到爆炸，之但係…」
 
我斷言道：「我知你對借錢有陰影，你怕又孭落一身街數，但係你之前未識我同師父喔嘛！你諗真啲，你都想快啲同madam結婚架！你贏咗依一筆，夠畀首期、裝潢有突啦！到時madam父母自然放心將個女交畀你啦！」
 
正當房侍農漸漸被我說服之際，大門呯一聲打開，水桂麗怒目而視瞪著我，道：「唔准借錢去賭！」
 
＊＊＊
 
水桂麗發現了我叫房侍農借錢賭博，她狠狠地訓示了我一頓，說我的想法極錯，這樣「導」房侍農借錢是讓朋友走上不歸路，這不是朋友之義；而且香港並不允許賭波，警方會在歐洲國家盃進行期間積極打擊外圍的賭波集團，她還說要糾正我這錯誤的價值觀，建議我去參加一些戒賭課程。
 
水桂麗為防房侍農被我勸誘參加賭博，她採取一系列緊縮措施，她要求房侍農每月均要上繳全份工資，並且交出銀行存摺、提款卡及信用卡，然後她會每天會酌情給予房侍農二十元零用錢。另外她一天三餐均會為房侍農作出安排，上班下班亦會親自接送房侍農，房侍農不需要擔心交通和膳食的支出，而房侍農有額外開銷的需要，可以向水桂麗提出申請，但一切審批權全看水桂麗的心情，並沒有既定的準則。
 
在寶石冰室中，我不斷數落房侍農，戲謔道：「房幫辦，我真係服Ｑ咗你喇！依啲喪權辱國嘅不平等條約，你都可以應承，你以後點抬起頭做人啊？我應該叫你戰敗國喔、奴隸喔定懦夫好呢？你未結婚都搞成咁，結咗婚駛唔駛改成水啊？以後叫你水房侍農好唔好？」
 
原本我是滿懷憧憬來與房侍農商討發達大計的，可是遇到水桂麗的阻攔，猶如一盤冷水淋下來，所以我的說話難免不留分寸。
 
可是房侍農並沒有因此發怒，只是苦笑道：「阿麗咁做都係為我好啫！其實做人知足啲好，我大難不死，升職加薪，依家又成家有望，到咗我依個年紀仲有咩要求喔？都係希望平平穩穩嘅啫！阿志你唔同我，你後生仔大把世界，緊係希望去拚去搏，但我依啲隔夜油條，無晒火架喇！我覺得珍惜現有嘅野，比去追求一啲未必屬於我嘅野更適合依家嘅我囉！」
 
我嘆了一口氣，其實站在房侍農的立場，他這樣的取向是無可厚非，正如他所說，我和他的年齡與背景都不同，他有自己的顧慮，難以承擔失去現在所擁有的風險。
 
房侍農拿起帳單，道：「阿志，我知你對我嘅做法好失望。嗱，依餐我請啦！」
 
我從房侍農手中奪過帳單，道：「你每日得廿雞零用錢，我仲要你請？會有報應架！依餐我請啦！啲錢你留番結婚啦！」
 
房侍農搥打我一下，道：「你個死仔又笑我。」
 
＊＊＊
 
我未能勸服房侍農借一筆錢注資到我的「賭波基金」裡，可是我這一趟也沒有白走，他介紹了一份兼職給我。他有一位前同事兼炮友名叫毛三雄，朋友都稱呼他為大哥雄。
 
大哥雄在多年前離開了警隊，在外成立了一家裝修公司，名為毛家班裝修公司，憑著他與一班手足打拚多年，不單在這一行頭裡薄有名氣，現在還涉獵到建材等其他相關範疇。
 
大哥雄答應了房侍農的要求，讓我在他的公司裡當暑期工，工作大多是當跑腿把文件從公司送到別處及一些瑣碎的「執頭執尾」工作，而工資在暑期工來說已經是十分可觀。
 
大哥雄體型肥胖，可是動作十分麻利，雙目炯炯有神，聲音十分雄壯，可能他曾經當差的關係，眉宇間有種不怒而威的氣勢。
 
上班前，大哥雄先要我到他公司進行面試，我走進了他的辦公室，他先與我閒聊一番。
 
大哥雄道：「聽農仔講，你係佢貴人嚟，佢識你無耐就破咗幾單大案。」
 
「咁啱啫！」
 
「唔係咁啱架！命理玄學依家野我信架！十幾年前，遇到轉世活佛，佢話我再繼續當差，隨時命都無。幾日後，一次行動我個同事就畀個犯一刀捅死咗，原本死嗰個係我嚟架，不過鬼頭臨時調咗人咋！之後我就唔當差，出嚟搞生意。上次去泰國，就係我帶農仔去見活佛囉！」
 
我嘀咕道：「哦！原來同佢去金魚缸嗰個就係你。」
 
大哥雄問道：「你講咩話？」
 
我嚇了一跳，道：「無啊！我無講野啊！」
 
「明明我就聽到你話我同房侍農去金魚缸。」
 
糟了，看來我應該不獲雇用了。
 
大哥雄見我默不作聲，他笑道：「去金魚缸咪去魚缸囉！我當差嗰陣成日約埋農仔一齊去馬欖到玩架啦！」
 
我有點詫異，想不到大哥雄居然向我這個初次見面的人，坦承自己私生活不檢點。
 
大哥雄問道：「你玩唔玩女人架？」
 
我啞然失笑地搖了搖頭。
 
大哥雄繼續問道：「咁食煙飲酒呢？」
 
我同樣搖了搖頭。
 
大哥雄道：「咁即係乖乖仔啦？你嚟打暑期工，諗住儲錢，賺下零用、交下書薄費咁啊？」
 
我搖了搖頭，道：「其實…我諗住賺番筆賭本，去賭波啊！唔知毛生可唔可以借糧呢？」
 
我見大哥雄與農侍農這麼友好，而他的性格又這麼稀奇古怪，於是便大膽一問。
 
大哥雄先是愕然，接著便哈哈笑道：「原來嫖賭飲吹，你都中一瓣嘅，爛賭二，哈哈哈。」
 
大哥雄笑了一會，然後瞪著我，正色道：「你有無搞錯啊？邊有人見工會問老細借糧賭波架？仲有點解我要借畀你啊？你輸Ｑ咗，唔返工，我咪蝕底，不過…如果你講得服我，我借畀你點話喔！鬼叫我同農仔係老死咩？」
 
我想了想，才道：「毛先生，可能喺你眼中，我咁樣做係賭博；但係你當時唔做穩定嘅政府工，而選擇出去闖，喺旁人眼中，你咁樣做未嘗又唔係一種賭博呢？只不過我係用錢去賭；而你係用前途去賭。我想問當時你選擇創業嘅時候，你有無成功嘅信心喔？而我依刻可以好肯定咁答你，我好有信心贏錢，而且係九成九嗰隻。」
 
大哥雄先是一呆，然後拍著桌子笑道：「哈哈，有意思，真係有意思，唔怪得房侍農咁睇你，我未見過啲人賭錢會咁有自信，我借夠兩個月畀你。你輸咗就算喇，唔好再借錢賭啊！咁樣真係變爛賭二架喇！不過我欣賞你，後生仔有自信先做到大事，就算遇到挫折都要識得爬返起身，唔好氣餒啊！知唔知啊？」
 
我跟隨大哥雄兩名得力手下工作，分別是加洛仔和添名。加洛仔跟隨大哥雄已久，工作態度非常認真，甚至可以說奮不顧身那種，他曾經在搭棚時，從三樓直墜墜地面，早上到醫院打了止痛針，下午便回來工作；而添名是大哥雄的姪仔，人稱模型大王，具親和力、人緣好，負責客戶服務的工作。兩人均有尋花問柳的嗜好，所以分外投契。
 
大哥雄在上環的柯氏中心接洽了數單裝修工程，我這陣子經常在柯氏中心與位於紅磡的毛家班辦公室兩邊走。
 
大哥雄曾向加洛仔和添名二人交代，我是房侍農的子姪（其實我是房侍農的師兄，以輩分論的話，我與毛三雄是同輩，不過我這份人對輩分這些虛無縹緲的東西看得很淡），要好好關照我，而我亦很快與兩人混成一片。
 
柯氏中心的二樓有很多店舖，出售名叫「龍票」的色情套餐，「龍票」就是包含來回港澳船票及到色情場所玩一趟那種，午飯的時候，加洛仔和添名經常都會大模廝樣走進去看板。
 
這份工作並不像一般的文職工作在星期六日休息，而是視乎工作而定，恰巧今晚歐國盃開鑼，明天並不用上班。
 
之前我與房侍農到８座投注外圍足球，可是現在數字幫在８座的業務被警方打壓，再沒有接受外圍投注。
 
現在房侍農被水桂麗牢牢看管，他難以與我一起去投注外圍足球，而且那些外圍賭波集團給我的感覺並不可靠，我常常會覺得他們隨時會承受不了「煲爆莊」的風險而卷蓆走人。
 
我知道加洛仔在馬交足球博彩公司有投注戶口，現在香港的足球博彩還未合法化，去馬交賭波就是較為穩妥的做法。
 
於是我向加洛仔提出要他替我投注的要求，在旁的添名道：「一係咁啦！聽日放假，你同我地去馬交，我幫你開個投注戶口啦！」
 
添名一臉淫邪道：「嗱！我地今晚過大海，搵柯生攞番啲洗費，再去桑拿一邊揸波一邊睇波。」
 
加洛仔與添名不懷好意地瞧著我，我來了這裡不久，二人經常游說我跟他們一同過大海，我知道他們想把我導成「雞蟲」，好讓他們多了一位炮友。
 
我道：「我都未夠十八歲，賭場同桑拿我都入唔到去架啦！」
 
添名道：「你個樣生得老成，你唔同人講，人地鬼知你唔夠十八歲咩？」
 
加洛仔道：「阿志，今晚跟我地去，我就幫你開戶口囉！如果你唔去，咁就算喇！」
 
贏錢的機會就在眼前，面對他們的脅迫，我只能就範。
 
晚上六時，我們坐船出發去馬交，添名替我到馬交足球博彩公司開了投注戶口，然後隨便吃了些東西，便到柯生旗下的賭場碰運氣。
 
添名與加洛仔在百家樂和大小點數的賭桌遊走，加洛仔道：「喂！阿志，你唔玩番兩手？聽大哥雄講你係爛賭二嚟，見工嗰陣已經問大哥雄借糧去賭。」
 
我來是要贏錢，不是要賭錢的。
 
我道：「我剩係鍾意賭波咋！」
 
添名道：「賭波要九十分鐘先知結果，大細、百家樂一分鐘就知輸贏，緊係咁樣過癮啦！」
 
我並不是尋求賭博產生出來的那種快感，而是尋求資金得到翻倍的結果。
 
我道：「我出去行陣先，轉頭返嚟。」
 
加洛仔嘆了一聲，荷官打開了骰盅，三三三圍骰，大小通吃，他所押住的五百元大，被荷官殺了。
 
我到了賭場的Ｂ２樓層，這裡有些食店和小商店，有不少衣著性感的女郎在這裡蹓躂，我經過時，不斷向我拋媚眼，有些更走向我，以普通話問道：「去不去？」
 
我的心神都放在今晚的球賽上，對她們的挑逗視而不見，走到報攤前，我買了一份報紙，翻到了體育版，今天有兩場球賽，分別是德國對羅馬尼亞和葡萄牙對英格蘭。
 
其實我對這屆歐洲國家盃的印象並不深，加上已經有十多年的歷史。記憶所及，我只記得法國加時擊敗了意大利奪冠、荷蘭與葡萄牙均有好表演、法國淘汰葡萄牙、意大利淘汰了荷蘭。
 
如果要穩操勝劵的話，把所有錢押在法國奪冠就是最安全的做法，可是我查過了，法國是今屆的大熱門，奪冠賠率只有四倍，我可動用的資金為兩萬多，把所有錢投注進去的話，最後連本帶利可以收回十萬。這樣看似回報不錯，然而人性存在著貪念，知道未來局勢走向，這種得天獨厚的機會，只是賺取三倍回報的話，便覺得大大的不值，我要獲取更多的利潤。


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl