<第叄期實體書,經已有售>今年我三十三歲,回到了1998年 (校園、穿越、奇幻): Chapter　１１３　會長（上）

 
Chapter　１１３　會長（上）


 
羅家環與鍾仔春風滿臉從熊貓酒店出來，他們剛剛又得到了免費的款待，兩人邊走邊作「賽後檢討」。
 
鍾仔眉飛色舞地道：「頭先個泰妹嗰對車頭燈真係無得頂，功夫又一流，畀佢騎住，就算係史泰龍都扯白旗啦！」
 
羅家環沒有作出回應，只是瞧著一群剛下課的女學生。




 
羅家環忿忿不平道：「嗰日同阿禮打牌，輸咗成雞野畀佢不特止，仲要聽佢成晚講自己個女幾叻：又話升中派位派到女拔、又話個女參加啲乜鬼比賽攞獎、彈琴又幾多級，真係屌佢老味喔！」
 
鍾仔阿諛奉承道：「超！啲女上到中學就拍拖，鬼望佢個女識個差仔，畀個差仔滾大個肚，到時睇佢仲有無面成日將個女掛喺嘴邊？」
 
鍾仔見羅家環一言不發，於是沿著對方的視線瞧去，他一臉淫邪地笑道：「下次叫湯仲謀叫啲女著住校服，玩下制服誘惑都幾過癮。」
 
羅家環淡然道：「假學生妹有乜好玩啊？撈味重，成個雞格擺晒出嚟。要玩就玩真嘅學生妹，慢慢調教，最好就係處。」
 
鍾仔道：「開學生妹罐頭，依啲機會真係難過中三重彩？不過嗰個湯仲謀成個女人湯丸咁，應該有辦法嘅。」




 
羅家環冷哼一聲，道：「我幫咗佢做咁多野，佢點都同我死個學生妹處女畀我啊！」
 
究竟是近朱者赤，近墨者黑的影響，所以讓羅家環的行為品格像個卑劣的黑道？
 
抑或是物以類聚，人以群分，才讓羅家環與湯仲謀臭味相投呢？這就不得而知了。
 
只知道這刻的他與市民期望的真正警察大相逕庭。
 
＊＊＊




 
飯桶武在自強會的當眾指責讓楊鳳瑤受了很大的打擊，她一直認為湯仲謀已經改過了，只是成皇志等人對湯仲謀的成見太深；可是飯桶武等人受傷、湯仲謀前往保釋施襲者，還有湯仲謀突然問她自強會的幹事名單，所有事情加起來，讓她對湯仲謀的信任產生動搖。
 
為了弄清楚整件事情，她覺得有當面問過究竟的必要？所以她一個人前往８座，自從上次８座事件後，她已經沒有再來過這裡，而湯仲謀亦沒有帶她來。
 
楊鳳瑤不知道可以在８座那裡尋到湯仲謀，上次８座事件她與成皇志曾經在８座的茶餐廳遇上了朱斌仔，她打算到那裡碰運氣。
 
事有湊巧，楊鳳瑤居然瞧見湯仲謀從茶餐廳走出來，正當她想呼喚對方之際，一名青年上前與湯仲謀交談。
 
楊鳳瑤距離太遠聽不到他們的對話內容。此時，他們朝８座的後樓梯走去。
 
楊鳳瑤悄悄跟著他們，當她走到後樓梯的時候，她聽到湯仲謀與那名青年的聲音從樓上傳來。
 
「阿謹，你帶咁多人去，都搞唔掂兩條細路，有無搞錯啊？」
 




「阿湯，嗰兩條靚仔精過鬼咁，畀佢地發現唔妥，追佢九條街先追到佢地。」
 
「追到佢地，唔帶返嚟見我？」
 
「我地圍住佢地嗰陣，一個黑人同一個中年人突然出現救咗佢地，嗰個中年人原來就係栗子幫嘅夏瞞啊！夏瞞仲話如果我地搞嗰兩條靚仔，實會同我地算帳啊！」
 
「吓！夏瞞點解要攬成家興？」
 
「阿湯，聽講成皇志老豆成人豪係杏仁幫林玄德嘅手下，唔通林玄德已經同夏瞞聯成一線？你話佢地知唔知道我地嘅圖謀喔喇？」
 
「阿謹定啲嚟，唔好自己嚇自己。」
 
「阿湯，大事要緊，你要記住我地嘅目的，啲私怨暫時放埋一邊啦！」
 
此時，傳來了一陣重物墜地的聲音，兩人立時生出警覺。




 
阿謹喝道：「邊個？」
 
兩人立時沿樓梯向下走，走到Ｇ／Ｆ，並沒有發現任何人。
 
阿謹四處張望亦沒有任何可疑的人，奇道：「頭先我地都聽到聲，會唔會有人偷聽我地講野呢？」
 
湯仲謀道：「有聲都唔一定係有人嘅，可能高空扔物啫？」
 
阿謹釋懷道：「嗯，可能我太過敏感啦！不過我都覺得始終要小心為上。」
 
阿謹離開後，湯仲謀把腳移開，一塊吳林紫娣的女子跨欄銀牌出現在他的面前。
 
＊＊＊
 




夏瞞的介入，加上發現楊鳳瑤遺下的銀牌，已經讓湯仲謀很心煩，可是在這種時間，羅家環卻來找他，要他準備未經人道的女學生給他享用，他聞言不禁憤怒，對方把自己當成扯皮條嗎？可是有些事情還得以倚仗對方，他只能忍氣吞聲。
 
這晚，湯仲謀心煩意亂，他很想見楊鳳瑤。
 
楊鳳瑤的樣貌與顧琛琛有幾分像，初時他認為因為自己對顧琛琛有幾分歉疚的關係，所以才會喜歡上楊鳳瑤；可是最近他才清楚自己喜歡楊鳳瑤的原因是：因為對方的神韻很像布正麗。他知道很難得到布正麗，所以把楊鳳瑤當成布正麗的代替品；亦因為他對布正麗的偏愛，所以他才沒有強行去佔有楊鳳瑤，他覺得與楊鳳瑤這樣純真的相處，就如回到當日與布正麗一起的美好時光。
 
自從那天他撿到楊鳳瑤遺下的銀牌後，楊鳳瑤便推說要應付中期試而沒有空見面。
 
湯仲謀推測楊鳳瑤因為偷聽到當日他與阿謹的對話，所以不與自己見面。
 
這晚他來到了楊鳳瑤家的樓下，他致電給楊鳳瑤，道：「鳳瑤，我係阿湯啊！我好想見妳啊！」
 
電話彼端傳來了楊鳳瑤的聲音：「過幾日就考試喇！我要溫書啊！」
 
「鳳瑤，我依家喺妳樓下，有啲野要畀妳架！」




 
十分鐘後，楊鳳瑤出現在湯仲謀的面前。
 
楊鳳瑤問道：「你咁夜嚟搵我，要畀啲咩野我啊？」
 
湯仲謀把那塊銀牌在楊鳳瑤面前揚了揚。
 
楊鳳瑤有點驚喜，她把這塊銀牌扣在書包當鎖匙扣使用，不知道在什麼地方弄丟了，現在居然被湯仲謀撿回。
 
楊鳳瑤接過銀牌問道：「唔該你啊！原來塊銀牌掉咗喺你到。」
 
「唔係喺我屋企發現架！我係喺８座樓梯發現架！」
 
楊鳳瑤聞言臉上變色，湯仲謀道：「鳳瑤，係咪因為嗰日妳聽到我嘅說話，所以先唔見我？」
 
楊鳳瑤聞言憤怒道：「你呃我！你話想同成皇志和好，你又利用我去對付自強會，仲要搵人去打佢細佬。」
 
湯仲謀一臉可憐亏亏的道：「鳳瑤，我…好多野妳唔清楚架！我同你講過我屋企嘅事，我做好多野都身不由己架，一切都係大媽同大哥，佢地迫我咁做，我唔想又可以點啊？」
 
湯仲謀把一切過錯都歸咎於自身的不幸。
 
瞧見湯仲謀的模樣，楊鳳瑤不禁有些心軟，道：「湯，其實你有得選擇架！你依啲叫愚孝，就算唔靠佢地，你都可以生活架！你收手啦！」
 
楊鳳瑤握著湯仲謀的手，湯仲謀反問道：「鳳瑤，如果我同成皇志對敵，妳會企喺我嗰邊嘅？」
 
楊鳳瑤道：「湯，成皇志唔係你嘅敵人，點解你喺都要對付佢？」
 
湯仲謀瞧著楊鳳瑤的雙眼，道：「鳳瑤，你係咪鍾意成皇志？」
 
楊鳳瑤聞言迴避湯仲謀的目光，半晌道：「依啲過咗去架喇！」
 
湯仲謀擁著楊鳳瑤，道：「唔緊要架！妳依家鍾意我就夠架喇！妳唔會離開我嘅？」
 
楊鳳瑤柔聲道：「湯，我唔想見到你地成為仇敵啊！應承我唔好再同佢鬥喔？等考完依個試，我地…入長洲玩返幾日喔！到時…我聽晒你話。」
 
楊鳳瑤說到後來聲如蚊蚋，經驗豐富的湯仲謀當然明白楊鳳瑤暗示獻身給自己，可是他聞言只感到驚怒交集。
 
之前楊鳳瑤一直推搪自己的要求，現在竟然為了保護成皇志，而獻身給自己，成皇志仍在楊鳳瑤的心中，而且地位還要高於自己，她可以為成皇志作出犧牲。
 
對自己極度自負的湯仲謀，不能接受楊鳳瑤喜歡成皇志多於自己。因為布正麗，所以湯仲謀仇恨成皇志，而現在再加上楊鳳瑤的關係，他恨不到立刻把成皇志殺死。
 
擁著喜歡成皇志的楊鳳瑤，湯仲謀的心理變得更加扭曲，他在心中狠狠道：「我湯仲謀得唔到嘅野，就算整爛佢，都唔會畀其他人。成皇志，鍾意你嘅人，都唔會有好結果！」
 
＊＊＊
 
明天就是一連五天的中期試，活動室被學校收回，我們到了學校的圖書館溫習。
 
雖然我們拿著各式筆記，可是口中所說的都是自強會的事情。
 
自強會雖然遭到家長教師會的打壓，被迫在學校裡消失；可是尚興國等部份會員認為自強會不滅，就算自強會不能在校內舉行活動，他們仍舊會在校外組織活動。而陳依官亦打算繼續自強會的校外聯繫工作，我知道他為自強會付出了很多精神與心血，難以接受自強會遭到學校的無理打壓。
 
陳依官給我的印象一直很溫文儒雅，這次他亦很不滿學校的做法，他咬牙切齒道：「太過份喇！我地依件事都無錯，就算學校覺得我地做法有爭議，都應該係作出勸喻或者警告，而唔係一刀切。」
 
管佳莉亦道：「成皇志，雖然今次學校咁做對你嘅打擊好大，但係你應該都睇到仲有好多會員支持你，你唔好放棄啊！」
 
看見其他會員對自強會這麼有愛，我亦很感動，但想到湯仲謀因為對我的怨恨，而遷怒到其他自強會的成員，我便感到很為難。
 
我道：「考埋依個中期試先再講啦！」
 
布正麗道：「係呢！月尾大除夕後就係千禧年，不如自強會搞過倒數活動啦！」
 
管佳莉附和道：「好提議啊！一千年一次，過咗真係無第二次，可以同大家一齊倒數，真係太好喇！」
 
陳依官亦點頭贊同：「考完依個試鬆一鬆，玩完再去溫過，今次活動要叫埋其他自強會分校一齊參加，等佢地知道自強會never die，就算校長佢地唔容許自強會喺學校存在，但係自強會都可以喺出面遍地開花。」
 
平常口齒伶俐的布正麗囁嚅道：「不如…我地叫埋鳳瑤喔！我諗經過今次依件事後，佢應該睇清楚湯仲謀份人，佢只係畀湯仲謀蒙騙，依件事佢都唔想發生。」
 
布正麗此言一出，我們都變得靜默，管佳莉對布正麗的意見不置可否，而我在這件事情上從來沒有怪責過楊鳳瑤，我反而害怕她被湯仲謀利用。
 
我們三人把視線放在陳依官身上，想不到的是一向世故的陳依官否決了布正麗的提議，他搖頭道：「我都相信楊鳳瑤唔想發生依件事，但係今次遇襲嘅同學因為佢同湯仲謀嘅關係對佢好不滿，如果佢繼續留喺到，對自強會內部團結會產生好大嘅問題，依家自強會會員嘅人數加埋超過一百人，一個組織唔可以因為我地嘅個人喜惡而作出有害依個組織嘅決定。」
 
我道：「其實我覺得要為今次事件負責嗰個係我，因為湯仲謀憎我，所以先遷怒自強會嘅其他會員，我先係危害自強會團結嘅真兇，而唔係楊鳳瑤。」
 
陳依官怒道：「成皇志，我唔想咁講，但係你身為會長，你嘅態度好唔成熟，講依啲說話好幼稚。」
 
我亦有點慍怒道：「我就係咁唔成熟，你覺得我做唔好依個會長，不如我退落嚟，由你頂上。」
 
我們二人怒目盯著對方。
 
布正麗和管佳莉二人見氣氛變得劍拔弩張，她們亦作出勸解。
 
布正麗道：「依家喺自強會咁艱難嘅時刻，你地兩個唔好內訌啦！」
 
「其實你地都唔需要爭論，其實…楊鳳瑤都未必再想留喺自強會。」管佳莉話畢瞧向布正麗。
 
布正麗默然，其實她亦不知道楊鳳瑤的取態。
 
＊＊＊
 
與陳依官鬧翻後，我便離開了圖書館。
 
其實沒有與陳依官鬧翻，我也差不多時候離開圖書館，因為今天游大輝邀約了我到石梨的ＣＡＦＥ。
 
當我來到ＣＡＦＥ的時候，游大輝已經到了。
 
我向他招手，但他卻視而不見。
 
我走到他身旁，發現他好像在打電玩。
 
我揚聲道：「喂！大輝，打咩ＧＡＭＥ打到咁入神啊？」
 
游大輝瞥了我一眼，道：「我唔係打機啊！喂！城隍廟，你知唔知宛琳珊去咗邊啊？」
 
「我又唔係佢邊個，鬼知佢去咗邊咩？不過好似見到佢放學同陸永祥一齊走。」
 
游大輝詫異道：「咩話？佢真係呃我，佢又話好攰，返屋企休息。」
 
我安慰道：「佢同陸永祥一齊走，可能陸永祥送佢返屋企呢！」
 
游大輝指著手上的ＧＡＭＥ　ＢＯＹ，道：「佢唔喺屋企，頭先最後顯示佢係昌榮路。」
 
我瞧見游大輝手上的ＧＡＭＥ　ＢＯＹ屏幕有點奇怪，訝異道：「咩嚟架？」
 
游大輝向我詳述他手上的東西是何方妖物。
 
要說明這東西是什麼來？先要說說這東西的製造者——游大輝的堂哥。
 
游大輝的疏堂大佬游偉自小很聰明、很會唸書，夢想成為大空人或科學家，可是家貧，將來職業不是農民便是在工廠做裝嵌。幸好游大輝爸爸，這位疏堂叔叔當中港車司機有些錢，供游偉到美國的麻省理工大學唸書，而游偉亦沒有糟蹋游大輝爸爸的一番心血，學成回國，在中國航天科技工作，每月領取國家發放四千人仔的特惠津貼。
 
游偉熱忱於發明的工作，所以把ＧＡＭＥ　ＢＯＹ和頸鍊改裝成追蹤器，追蹤器的有效範圍大概兩公里。
 
游大輝覺得頸鍊的款式普通，宛琳珊未必接受，所以他另花數千元到金鋪購置一個精美的吊墜，送給宛琳珊作為聖誕禮物。
 
我聽畢不禁向游大輝比了一個拇指，道：「大輝哥，你真係一個痴…情漢，我真係服咗你喇！你洗咁多錢喺佢身上，有無得到咩回報啊？」
 
游大輝道：「佢都送咗對手襪畀我。」
 
我揶揄道：「真係公平喇！」
 
游大輝嘆道：「城隍廟，你咁有異性緣，身邊咁多囡，緊係唔明白苦緣一個人嘅滋味啦！」
 
其實曾幾何時，我對管佳莉的痴戀比游大輝更甚，我根本沒有取笑他的資格，我拍了拍游大輝的肩膀以示安慰。
 
游大輝道：「我知自己有啲病態，但係我想知道佢係邊度？」
 
這間ＣＡＦＥ與宛琳珊家的距離不足兩公里，難怪他約我在這地方見面啦！
 
當初回到１９９８的時候，我第一個找的朋友就是游大輝，我主動與他和好，改變了我倆的關係，同時亦改變了他的人生，這刻我有點後悔與他和好。
 
為了讓氣氛沒有那麼傷感，我把話題轉到自強會身上。
 
游大輝作為你為你的自強會分支代表，他向我簡述了他的工作進程，他向我提及他的事很多都交給陳依官去處理，讓我知道陳依官一直默默為自強會付出了很多。
 
我心想：「其實陳依官當自強會的會長更加稱職，我才是危害自強會的原兇，因為我的存在，湯仲謀才會去對付自強會，我脫離自強會的話，他們才會安全。」
 
游大輝把另一套追蹤器送給我，道：「城隍廟，識你咁耐都無送過野畀你，我多咗套追蹤器，就送畀你啦！」
 
我失笑道：「痴線，我又唔係痴…情漢，要依啲追蹤器有咩用？」
 
游大輝道：「難保有一日，你好似我咁，遇到一個你好鍾意嘅女仔。」
 
「好啦！咁多謝你喇！」我收下了游大輝送給我的禮物，我突然道：「喂！大輝，我聽人講，如果有朋友將自己心愛嘅玩具轉送畀朋友，代表對方生無可戀，從而自尋短見，你唔係打算做傻事啊？」
 
游大輝嗤一聲笑道：「我住緊層樓，老豆諗住寫我名，如果有一日我將層樓送畀你，你再擔心我啦！」
 
我拍了拍游大輝的肩膀道：「好兄弟，我等緊依一日。」
 
游大輝繼續痴痴的瞧著他的ＧＡＭＥ　ＢＯＹ，而我就離開ＣＡＦＥ。
 
在ＣＡＦＥ樓下，遇上了布正麗，布正麗截著我，道：「成皇志，你唔駛扮野喇！」
 
我聞言感到錯愕，反問道：「我扮咩野啊？」
 
「你借啲意同陳依官鬧翻，就係想離開自強會，我知你咁做，係唔想連累其他人，係咪？」
 
「痴線，我都唔知幾憎佢，如果唔係喺學校，我實一招猛虎硬爬山，當佢拍薑咁拍啊！」
 
布正麗一言不發瞧著我，我給她看得很不自在，她噗哧一笑，道：「你啲戲好屎，傻仔都睇穿你台戲啦！」
 
我不置可否地道：「得喇！最叻係妳喇！」
 
「咦！你手上嗰啲係咩嚟架？」
 
我聞言忽發奇想，道：「聖…誕禮物嚟架！妳要唔要喔？」
 
「突然送聖誕禮物畀我咁好死？」布正麗打開了盒子，皺著眉道：「條頸鍊粗野嚟架喎？不過算啦！帶住先啦！」
 
我瞧見布正麗把我送給她的銅牌扣在頸鍊上，我皺著眉道：「布甸姐，妳啲品味都幾獨特吓喎！」
 
「咩啫！人靚著bossini都靚，人唔靚就算著armani都係seven架啦！」
 
「好有道理喎！」
 
布正麗急道：「唔好咁多廢話，我扣唔到啊！幫一幫我啦！」
 
我雙手繞到布正麗的頸項後，握著頸鍊，此時我發現這個動作好像有點問題，我的臉和她的臉很接近，我們彼此呼吸的氣息，都要噴到對方的臉上，我們都覺得這動作有點尷尬，只好把視線挪開，但距離這樣近，我們的目光能夠放在那裡？
 
終於我把頸鍊扣上，我拉開了距離，布正麗道：「我返工喇！你返屋企小心啲喇！拜拜。」
 
我揮手道：「咁妳畀心機返工啦！拜拜。」
 
我在家裡溫習，看到牆上的時間顯示為晚上十一時，我打開了ＧＡＭＥ　ＢＯＹ，瞧見代表布正麗的紅點由大隴街緩緩朝著圍乪街移動，我呆呆的打量著這單調的屏幕，二十分鐘後，紅點停在布正麗的家裡，我才捨得把ＧＡＭＥ　ＢＯＹ關上。
 
我覺得自己有點…變態。



=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl