<第叄期實體書,經已有售>今年我三十三歲,回到了1998年 (校園、穿越、奇幻): Chapter　１０７　打波定打人

Chapter　１０７　打波定打人
 
陸運會完結，翌日回到學校。
 
在班房裡，有不少同學在讚頌成敏研連續第五年成為陸運會的最佳運動員，她被其他簇擁道賀，她瞧見我道：「小志，尋日你喺陸運會好勁啊！有一金一銅。」
 
我苦笑道：「叫好過上年啦！但係拍馬都追唔上妳，妳五金喎！」
 
此時，霍去登走過來搭著我的肩膀，道：「鳩爺，你就威啦！尋日連阿祥同小西都跑唔過你。」
 




我再度苦笑道：「唔好玩啦！我都係得個銅牌，勁嘅話，就攞金牌啦！」
 
霍去登指著我嘩然道：「哇！鳩爺，咁你即係串阿祥同小西渣啫！」
 
「邊有咁講啊！你唔好屈我喎！」
 
成敏研道：「小志，今個月嘅聖誕歌唱比賽，你係咪又諗住用自創嘅歌曲參加啊？我好期待啊！」
 
原來這麼快已經一年了，我與呂靜宜一同參加歌唱比賽就好像昨天的事，當初我參加歌唱比賽是因為我要在管佳莉面前唱出自己的心聲，現在我已經放下了管佳莉，而呂靜宜已經到了外國，我今年再沒有參加歌唱比賽的理由。
 




我道：「唔喇！依啲野試一次就夠架喇！其實上台面對咁多人唱歌唔係咁啱我。」
 
成敏研聞言，有點失望道：「吓！仲諗住可以聽到你嘅作品添！」
 
我心想：「上年嗰三首歌都唔係我作嘅。」
 
小息的時候，我在走廊碰上了譚慧詩和許詠欣，譚慧詩道：「喂！尋日陸運會完咗，你同布甸之後去咗邊啊？」
 
「無去邊啊！我地喺門口撞到，之後就搭車返屋企囉！」
 




許詠欣奇道：「你地咩野都無發生？無理由架！個衰妹尋日唔同我地一齊走，我地都估佢會等埋你，仲以為你地會發生啲咩事添！」
 
譚慧詩責道：「成皇志，你醒啲啦！成舊蕃薯咁，尋日咁好機會都唔上，你份人有無咁鈍啊？」
 
「吓！會唔會你地諗多咗啊？尋日佢等埋我，都係想要塊獎牌啫，況且妳地唔係不嬲覺得我配唔上布甸嘅咩？」
 
許詠欣拍了額頭一下，道：「救命啊！你份人呢？我真係畀你激到急尿啊！唔同你講啦！係咁啦！」
 
譚慧詩與許詠欣兩人離去。
 
我心想：「聽佢地咁講，唔通布甸真係對我有意思？」
 
正當我的心情因為譚慧詩與許詠欣的說話弄得七上八落之際，楊鳳瑤喚道：「喂，成皇志，係到撞到你就啱喇！學姐搭今晚機去台灣，應該唔會再返嚟，你會唔會去送機啊？」
 
想到我曾經與柳豔差點成為了夫妻，而現在她居然把我忘記了，我便不禁感慨良多。




 
我踟躕了一會，最後點頭道：「好啊！一齊去吖！」
 
布正麗得知柳豔要移民到台灣展開新的生活，儘管她與柳豔並不熟絡，但她還是希望前往機場送別柳豔。
 
放學後，我們三人來到機場，來送別柳豔的人，除了我們三人之外便沒有其他人，不知是柳豔的朋友太少；還是她發生了這些事後，那些朋友都疏遠了她的關係；反而董老師有不少朋友來送別他，連植爺與暉洋都前來送別董老師。
 
楊鳳瑤與柳豔的感情最好，她想到以後和柳豔隔了一個台灣海峽，不禁悲從中來，她雙眼通紅擁著柳豔抽抽噎噎。
 
柳豔撫著楊鳳瑤的頭，安慰道：「鳳瑤，妳唔好咁啦！台灣同香港唔駛兩個鐘頭機，妳得閒可以過嚟探我架！」
 
楊鳳瑤哽咽道：「學姐，妳會唔會唔記得我架？」
 
「傻啦！我點會唔記得妳啫？」
 




「妳唔記得咗好多野，我怕妳最後連我都唔記得。」
 
柳豔詫異道：「鳳瑤，我係咪有啲好重要嘅野唔記得咗啊？」
 
楊鳳瑤聞言才驚覺自己說得太多，忙道：「無啊！」
 
柳豔嘆了一口氣，道：「唉！瑞秋阿姨同我講，有啲野唔記得仲好，去到嗰邊可以重新開始。」
 
瑞秋阿姨曾與我談論過柳豔的問題，柳豔對援交、懷孕和我的事都沒有印象，所以她希望我們不要把這些事對她說，讓她可以在台灣重新開始。
 
柳豔的視線與我相觸，道：「你係…之前嚟過醫院探我嘅同學？」
 
「哦！係啊！」
 
「唔好意思，我好多野都唔記得喇！我係咪識得你架？」




 
「依層…」
 
楊鳳瑤幫腔道：「學姐，妳之前幫過佢補中國文學同中史架！所以佢專登嚟送妳機。」
 
「係…係啊！楊鳳瑤講得無錯。」
 
柳豔對我微微一笑道：「係咩？原來我幫你補過習啊，嚟緊嘅會考你地要畀心機啊！」
 
「哦！我會架喇！」我不其然反手搥打自己的胸口。
 
柳豔微微錯愕。
 
此時，董老師走過來，道：「阿豔，我地夠鐘入閘架喇！」
 




董老師瞧見我，向我微微點頭示意。
 
我們向柳豔揮手道別，楊鳳瑤喊道：「學姐，妳記得多啲寫信畀我啊！」
 
布正麗向楊鳳瑤遞上紙巾，楊鳳瑤接過紙巾用來拭淚，我安慰道：「學姐講得啱，香港同台灣好近，妳得閒可以去探佢。」
 
楊鳳瑤責道：「我唔明你點解可以若無其事咁樣，你話晒同學姐都曾經一齊過。」
 
面對楊鳳瑤的指控，我變得默然。
 
布正麗幫腔道：「楊鳳瑤，依家咁樣做，對柳豔嚟講係最好架喇！唔通成皇志好似妳咁喊到收唔到聲，到時柳豔實會覺得奇怪。」
 
楊鳳瑤歉意道：「成皇志，對唔住啊！我頭先嗰句說話唔係有心要令你難堪架！」
 
我聳了聳肩，道：「唔緊要。」
 
片晌，楊鳳瑤很感慨地道：「先係靜宜，之後輪到學姐，佢地都離開咗香港，過多幾個月就係會考喇！會考完咗，我諗我地都係各散東西，以後都未必可以成日見面。」
 
布正麗道：「喂！做咩講到咁傷感啫！依家咩世代啊？科技咁發達，我地撥個輪就可以約出嚟唱Ｋ啦！」
 
楊鳳瑤道：「但係妳會唔會唔搵我架？」
 
布正麗道：「痴線，我布甸出名夠雷，點會唔搵妳啊？除非妳又離開咗香港啫！」
 
我們與楊鳳瑤各自離去，我和布正麗一同乘搭機場巴士回家。
 
布正麗突然問道：「成皇志，到時會考完咗，我地應該會好少聯絡嗰嗨？」
 
「未必，我地係自強會嘅成員，又住得咁近，實會見面架！」
 
布正麗嗯了一聲，然後我們都變得默然。
 
過了一會，我感到她靠在我的肩膀，我別過頭去看，她好像睡著了。
 
她白天上學，晚上又要去當兼職，應該很累了。
 
我瞧著她側面的輪廓，再瞧向她那片嫣紅的唇瓣，想起她曾經有兩次主動親吻我，第一次是她在楊鳳瑤面前親吻我；而另一次是我與柳豔分手後，她見我情緒低落，所以親吻我。
 
我想起之前譚慧詩與許詠欣的說話，布正麗會不會真的對我有幾分情愫呢？
 
我又想之前她親了我兩次，現在我主動親回她一次，也不算過分吧？
 
正當我想把腦海的念頭付諸實行之際，呂靜宜和柳豔的倩影在我腦海浮現，這短時間發生的兩段感情，讓我受到了傷害，布正麗說得對，我處理感情的問題很稚拙，每當我感到難以負荷的時候，我都是選擇去逃避。
 
我這種心態還是不要去害人害己了，而且距離會考只剩下四、五個月，還是把心神放在會考上，我之前曾經承諾要改變我的人生，會考就是其中一個關鍵的轉捩點。
 
＊＊＊
 
這天放學，阿興與榮仔沒有去練拳，他們相約小學同學一同到保羅廿世隔鄰的籃球場打籃球。
 
由於兩人經常到阿益的拳館練拳的關係，儘管他們不過是十二歲的少年，可是亦鍛鍊出一身肌肉。他們有意無意脫去上衣打籃球，在小夥伴伴面前show off，讓小伙伴們羨慕不已。
 
他們感到有點累，便坐在場邊喝水。
 
在猩猩猿唸書的肥仔嘜打量著兩人，嘩然道：「你兩條友仔無見一排，變咗超級撒亞人咁款喎！」
 
阿興箍著肥仔嘜的頸項，道：「死肥仔，你唔好食咁多甜筒，跟我地去操下拳，你都可以架！」
 
「喂！放手啊！透唔到氣喇！」
 
阿興鬆開了手，肥仔嘜急喘了幾口氣，才道：「聽人地講咁細過唔好操肌操得太過份，如果唔係會影響發育架！你地操肌都係為溝女啫，到時生得唔夠高，畀你操到成個阿諾舒華新力啤咁都唔會有女仔鍾意。」
 
榮仔默然，他去練拳的原因不是為了讓身型變得好看，而是復仇。雖然大部份害死顧琛琛的人都得到了法律的制裁，可是罪魁禍首湯仲謀仍然活得逍遙自在，因為復仇他才可以咬緊牙關勉強去跟上阿興的進度，亦因為操練讓他內心的痛苦得以舒緩。
 
他相信成皇志的說話，為了他朝一日能夠為顧琛琛雪恨，他努力去唸書、努力去鍛鍊；待年長一點，便去不同的地方，擴闊自己的眼界；主動去認識不同的人，建立人脈，慢慢去累積自己的力量，當他學懂了運用這個世界的遊戲規則，便是他復仇的時候。
 
而與榮仔交情甚篤的阿興，亦希望能為這個命途多舛的好朋友盡一分力，所以他努力去習武，讓自己可以擁有保護自己和朋友的力量，就算遇到像上次８座事件的遭遇，爸爸不在身邊，亦可以自保。
 
肥仔嘜見兩人默然，有點錯愕道：「你地做乜突然之間唔出聲啊？我又講錯野啊？」
 
此時，其他人休息完畢開始走出球場，就讀尚天的拉柴喊道：「喂！你地抖完未啊？出嚟打多場先啦！」
 
阿興搭著肥仔嘜的肩膊，沒好氣道：「留番啖氣打波啦！靜間交波畀你，唔好又走唔郁啊！」
 
當他們在籃球場鏖戰正酣之際，有一群臭飛走進了球場內，其中一人喊道：「喂！邊個畀你地喺依個球場玩架？即刻同我走。」
 
驀地一群臭飛亂入，阿興等人只好暫時停下球賽，把注意力集中到對方身上。
 
拉柴上前問道：「唔該，你地係咪ＢＯＯＫ咗場？有無場紙睇下。」
 
一名臭飛用力拍了拉柴的頭一下，道：「個波地真技安睇架，場紙？燒畀你好唔好啊？」
 
阿興指著對方罵道：「喂！做咩打人啊？依到唔係石蔭，個場幾時變咗係你地架？」
 
此時，榮仔從那群臭飛當中找到兩張熟悉的面孔，就是曾經欺負過他們的貓仔與番獌。
 
貓仔越眾而出，道：「哦！你條濕星，我認得你，上次先畀我地執完一劑，依家又想回味下啊？」
 
這時番獌亦走到肥仔嘜面前，拍打對方的臉，道：「死肥仔，我喺學校講過見你一鑊打你一鑊架，你今日唔好彩喇！」
 
肥仔嘜聞言全身發顫，求饒道：「唔好打我。」
 
阿興的其他朋友見狀，均被嚇唬得噤聲。
 
番獌揪著肥仔嘜的耳朵，道：「唔想畀人打，就除低條褲爬出球場。」
 
倏地，阿興捏著番獌的手腕，番獌吃痛不禁鬆開了手。
 
阿興甩開了番獌的手，番獌怒道：「屌你老味，你想死啊？」
 
阿興睨了番獌一眼，道：「唔好咁多嗲，夠薑就隻揪喔！」
 
番獌平時只是仗著幾位哥哥撐腰，狐假虎威可以；但是要打架的話，真的不行。他打量了阿興一眼，便被阿興的氣勢所懾，不禁後退了一步。
 
「你想隻揪喔嘛？我同你打。」貓仔把衣服扔在地上。
 
阿興無懼地回視著對方，點頭道：「好啊！驚你有牙啊！」
 
肥仔嘜與貓仔和番獌在同一所學校唸書，貓仔是中五學生，比中一的阿興要年長四歲，貓仔的身形比阿興高大，而且肥仔嘜知道貓仔經常在外蝦蝦霸霸，他覺得阿興還是少惹對方為妙，他走到阿興身後，輕聲勸道：「阿興，我地快啲走啦，你就算學過下拳，都係得十二歲，唔夠佢地打架！」
 
「痴線，你有無睇聖鬥士架！啲黃金聖鬥士正式成為黃金聖鬥士，都係同我地差唔多年紀咋！」
 
肥仔嘜急道：「嗰啲係漫畫嚟架！呃人架！」
 
如果是單打獨鬥的話榮仔是對阿興有信心的，只怕對方未必會有這種氣量與風度。
 
榮仔把肥仔嘜拉到身後，他踏上前一步，指著貓仔道：「喂！你係咪真係隻揪先？睇你嗰死款，靜間唔夠人打，都係圍揪架啦！」
 
榮仔向貓仔施以激將法，頭腦簡單的貓仔，道：「打你啲ＫＡＩ子要人幫手，我貓仔唔駛出嚟行啦？」
 
榮仔喊道：「係你話架！靜間你要人幫手就唔好出嚟行喇！」
 
眾人讓出了一些空間給予貓仔與阿興，面對只有十二歲的阿興，貓仔覺得吃定了對方；而阿興亦認為這一年他刻苦鍛鍊，平常在拳館亦與年長幾歲的尚興國對戰，他已經不是那個被對方摔壞了ＧＡＭＥ　ＢＯＹ，只懂哭哭啼啼的小孩，就算對方比他年長幾歲，他亦無所畏懼。
 
阿興瞪著貓仔，擺出架式，他把這場單挑當成平常與尚興國的練習；貓仔比阿興高半個頭，從這樣的視角瞧向對方，他感到自信滿滿。
 
貓仔緩緩靠近阿興，然後一拳打向阿興，阿興沒有躲避，提起雙臂護著頭，以手臂擋架貓仔的拳擊，貓仔得勢不饒人，接連出拳，打得阿興只有招架的份兒。
 
貓仔的同黨見狀，立時喝采連連，道：「個ＫＡＩ子原來無料到架！貓仔快啲打柒佢啦！」
 
肥仔嘜看見阿興被打得沒法還手，嚇得臉色煞白，只有榮仔還是對阿興充滿信心，他們在拳館第一樣要學的東西，便是捱打。
 
阿興硬捱貓仔的拳擊就是要知道對方的力量，貓仔的力量比他強，但是比不上尚興國，而且他是以肘骨擋格對方的拳頭，他痛對方亦一樣痛。
 
阿益經常教導他們一膽二力三功夫，他的力量與貓仔有些差距，可是他不怕痛，不怕傷，而且他的功夫要比對方優勝。
 
專注防守的阿興，靜待反擊的機會，他掌握了貓仔的出拳節奏，當貓仔出拳打向他的時候，他向旁一讓，避開了對方的攻擊，踏前一步，再順勢一拳打向貓仔的臉頰，貓仔來不及作出防禦，吃了阿興一拳。
 
貓仔的同黨見狀立時變得鴉雀無聲，他們想不到貓仔會臉頰中拳。
 
在拳館浸淫過一段日子的阿興，他的力量其實與貓仔的差距並不太大。
 
貓仔中拳處，傳來陣陣刺痛。
 
旁觀的榮仔對阿興更加有信心，阿興被打的是手臂，而貓仔被打的是臉頰，誰人較吃虧？這些不用說了。
 
臉上中拳的貓仔惱羞成怒，他瘋狂向阿興作出攻擊，在旁觀的肥仔嘜看來很是駭人；但在阿興看來，他這樣大開大闔的攻擊，在防守方面出現很大的破綻，他知道貓仔這樣的攻勢只靠一道怒氣，並不能持久，所以他先以回避和防禦為主。
 
呯！啪！啪嗒！劈啪！
 
阿興把握住貓仔因著重攻擊而做成的防守漏洞，趁虛而進，他攻擊的是貓仔的頭臉、身軀，而貓仔只能打中他的手腳，如果阿興與貓仔年齡相若，相信貓仔已經倒地了。
 
只是過了不足兩分鐘，貓仔已經有點暈頭轉向、氣喘吁吁，而經常在擂台上與尚興國打架的阿興，依然戰意如虹。他在阿益的拳館，第一樣練的是捱打，第二樣練的是體能。在擂台比賽，一回合是要堅持三分鐘的，阿興的汗水沒有白流，單以耐力論，他比貓仔強上太多了。
 
貓仔的體能下降了很多，阿興感到貓仔的拳頭打向自己的力量已經弱了。
 
貓仔見拳頭奈何不了阿興，便向阿興施以踢擊，他一腳向阿興踹去。
 
阿興抱著貓仔的腿，撞向貓仔的懷內，貓仔失去了平衡倒在地上。
 
阿興左腳壓著貓仔的胸腹部，右腳壓著貓仔的咽喉，並同時夾緊，雙手抱捏著貓仔的胳膊用力向外扳。
 
阿興居然使出了一招ＭＭＡ常見的鎖技——十字固。
 
被阿興壓制的貓仔，動彈不得，發出了一聲殺豬的痛嚎，向其他臭飛喊道：「嗚啊！仲企晌到，幫手啊！仆街，我隻手斷喇！」
 
在旁觀戰的榮仔，其實一直留意著其他臭飛的動靜，為防其他臭飛突然介入，他暗中拿了一條皮帶，雙手一直放在身後。
 
貓仔這一聲呼救，站在最前面的兩名臭飛，立時衝向阿興。
 
榮仔見狀立時甩出皮帶，皮帶的金屬扣劈頭劈臉打在兩名臭飛臉上，中招的兩名臭飛掩臉呼痛。
 
榮仔喚道：「阿興，閃喇！」
 
阿興在貓仔的頭上踹了一腳，才急急起來逃走。
 
阿興和榮仔迅捷地翻過了球場的欄杆逃走，其他的臭飛鍥而不捨在他們身後追趕。
 
阿興在前領跑，榮仔跟在身後，他感到奇怪，不知為何阿興會選擇沿著梨貝街向北葵中學的方向逃跑，要知道這一段路是一條大直路，根本難以擺脫身後貓仔等人追截，而且他還發覺當他們拋離貓仔一段距離的時候，阿興總是慢下來。
 
榮仔為之氣結，道：「阿興，我地依家走緊佬架，你搞乜鬼啊？」
 
阿興別過頭，回望身後一眼，道：「太快撇甩佢地就唔好玩啦！畀個希望佢地，等佢地追近啲，我地再爆一段，放心啦！佢地唔夠我地快架！」
 
榮仔急道：「佢地成六、七個人追緊我地，畀佢地追到，實唔會放過我地架！」
 
此時，阿興與榮仔差不多走到石排街與梨貝街的交界，一直回頭張望的阿興，臉色一變，急道：「榮仔，我地要走快啲喇！」
 
瞧見阿興現出慌張的神色，榮仔在好奇心作祟下，不禁扭頭回望，他赫然發現，有兩名臭飛踏著俗稱「子彈仔」的單車，在他們身後趕過來。
 
阿興與榮仔使出吃奶之力沒命奔逃。
 
＊＊＊
 
這天放學，游大輝代表你為你中學的自強會分部出席完跨校會議後，本打算藉著送宛琳珊回家的時候，談談心事。他已經有兩星期沒有與宛琳珊單獨共處，聽成皇志說，那個叫做陸永祥的男生，很積極地展開攻勢，如果他還不急起直追，宛琳珊說不定會被對方追上手。可是其他人不通氣，硬要一起走。
 
尚興國道：「喂！『瀨屎輝』，你唔係住葵興嘅咩？仲咩行依度嘅？」
 
游大輝怒道：「你叫邊個啊？你唔係叫我啊？」
 
游大輝瞧見宛琳珊嘴角噙著一絲笑容，連忙解釋道：「宛琳珊，我已經年幾無瀨過屎喇！唔係…最少三年，對上嗰次阿媽生日，一齊去美麗華食自助餐，我食得飽得濟，忍唔住有半條痴住喺底褲到，咁應該唔算瀨喔？」
 
宛琳珊一臉厭惡啐道：「你都十六歲，好心你份人就企理啲啦！」
 
游大輝連忙申辯道：「我依家好企理架喇！最多都係底褲有啲跡啫！」
 
此時，他們走到石梨１０座附近，聽到前方傳來一陣聒噪叫罵的聲音。
 
關國安道：「咁嘈嘅？前面係咪有人打架啊？」
 
朱思遠道：「唔奇喔！依排數字幫成日同真技安打嚟打去架啦！」
 
游大輝聞言，道：「嘩！啲臭飛打嚟打去，隨時會殺錯良民喎！宛琳珊，我地兜路行喇！」
 
尚興國眺目一看，道：「等陣先，最前面嗰兩個咪係阿興同榮仔？」
 
落荒而逃的阿興亦看見尚興國等人，立時招手道：「喂！阿國、阿安救命啊！」
 
尚興國訝道：「阿興、榮仔，你地做乜畀人追住嘅？」
 
口齒伶俐的榮仔搶著道：「頭先我地喺保羅廿世隔離個籃球場打籃球，嗰班臭飛就入嚟話個場係佢地，仲恰我地啲朋友，阿興睇唔過眼，就話隻揪，點知佢地打輸咗，就成班追住我地喇。」
 
兩名踏著單車追截阿興的臭飛，瞧見尚興國等人突然出現，在不知道對方底蘊的情況下，只好等待其他同伴前來。
 
未幾，貓仔等人亦氣喘吁吁的趕過來，貓仔的額頭青腫了一塊，他瞧見尚興國等人，怒吼道：「咩啊？搵幫手？你知唔知我阿哥係邊個啊？真技安嘅拳佬同牙佬啊！」
 
尚興國的父親阿益就是江湖中人，從小他已經與那些黑道中人打交道，所以貓仔向他撻朵，他卻處之泰然，他問道：「阿興，你頭先就係同佢隻揪啊？」
 
阿興點頭，尚興國瞧向貓仔，笑道：「喂！好心你啦！你擺明大人幾年，咁都打輸，我係你就搵窿捐啦！」
 
榮仔指著貓仔道：「佢頭先當住咁多人面前話如果隻揪要人幫，佢以後唔駛出嚟行喎！」
 
關國安搖著頭，掩嘴笑道：「依啲就叫做出爾反爾、丟人現眼喇！」
 
說話一向有欠玲瓏的貓仔被對方這麼冷嘲熱諷一番後，勃然大怒，道：「仆你個街，串鳩我，同我打撚柒班柒頭皮。」
 
貓仔那方有七人；而尚興國這方，不包括宛琳珊，亦有七個人：尚興國、關國安、萬季常、朱思遠、游大輝、阿興和榮仔。
 
游大輝雖然很害怕，但是宛琳珊在場，他要表現得自己具有男子氣慨，他道：「宛琳珊，妳唔駛擔心，我會保護妳架！」
 
游大輝得不到宛琳珊的回應，回頭一看，才發現宛琳珊一早已經躲得遠遠的。
 
游大輝分神之際，一不小心吃了一名臭飛的一記直拳。
 
尚興國武藝得到阿益真傳，兩三下功夫便把一名臭飛打得趴在地上。
 
關國安的武藝不如尚興國，但仍比那些臭飛高出至少一班。
 
萬季常與朱思遠在拳館操練不勤，加上第一次打架，膽顫心怯，被兩名臭飛打得只懂防守。
 
阿興剛才先與貓仔單挑，再狂奔了一段距離，體力消耗不少，面對貓仔的復仇，他只好擺出鎖技的架式，來虛張聲勢一番，吃過鎖技苦頭的貓仔，不敢冒進。
 
此時，番獌被榮仔壓制，番獌呼救道：「貓仔救我啊！」
 
阿興趁著貓仔分神之際，一腳踢向貓仔腿外側，貓仔忍痛用雙手抱住阿興的腿，阿興立時奮力把身體升起，而另一條腿踢向貓仔，中門大開的貓仔，被阿興這一腳掃過正著，向後連腿數步，才止住跌勢。
 
這時榮仔亦打倒了番獌，走過來與阿興來個以多欺少。
 
貓仔打量了二人一眼，怒道：「你地人多打人少。」
 
阿興挖苦道：「學你嘖！」
 
此時，尚興國和關國安替萬季常、朱思遠解圍，那個與游大輝對打的臭飛亦吃了尚興國一拳，跪在地上喘氣。
 
之前被那名臭飛在宛琳珊面前打，他覺得很丟臉，於是他揪著那名臭飛的頭髮，狠狠地打了對方三拳還以顏色。
 
貓仔看到自己那方陷入劣勢，立時喊道：「停手，唔好打喇！」
 
尚興國等人都停下手腳，尚興國瞧著貓仔道：「頭先又係你話打交，依家又唔打，想點啊？」
 
貓仔哼了一聲，道：「過嚟傾幾句，ＯＫ？」
 
其他人瞧著尚興國，尚興國走向貓仔。
 
阿興瞧見兩人聊了一會後，雙方伸出手來互握。
 
阿興有點詫異。
 
貓仔等人離去後，阿興問道：「阿國，你地頭先傾啲咩啊？傾到握手嘅？」
 
尚興國笑道：「我地同佢地又無咩深仇大恨，只係為啖氣，交都打完咯！啖氣都消咗啦！揸番個爬咪算數囉！依啲情況我見唔少啦！」
 
阿興愕然道：「咁即係無事？」
 
尚興國點頭道：「係啊！佢頭先話算數，應承咗我唔會覆焯、唔會搵你地晦氣。」
 
阿興道：「佢地講說話唔算數架！頭先先追我地九條街。」
 
榮仔道：「阿興，我覺得佢地應該好似阿國咁講，唔會再搵我地晦氣。」
 
阿興與榮仔別過尚興國等人後，回到籃球場，肥仔嘜與拉柴等人亦在這裡等候他們。
 
肥仔嘜瞧見阿興與榮仔回來，不禁淌淚道：「你地兩個無事返嚟就好喇！」
 
阿興愕然道：「肥仔嘜仲咩喊啊？我地兩個走咗之後，貓仔佢地蝦你？」
 
肥仔嘜搖頭，拉柴道：「頭先你地走咗之後，我地都好擔心你地，佢地成班追出去，你地都可以走得甩。」
 
阿興把遇到尚興國的事說出來，拉柴訝道：「嘩！貓仔咁多人追出去，都畀你地打番轉頭？」
 
肥仔嘜哽咽道：「阿興、榮仔，我覺得自己好無用，頭先幫唔到手，點解你地可以一啲都唔驚佢地嘅？」
 
阿興搭著肥仔嘜肩膀道：「畀人蝦就要反擊，唔好做懦夫，聽日跟我地去拳館打拳，捱下打就唔會驚架喇！」
 
「吓！我唔得架！」
 
阿興在肥仔嘜頭殼上打了一個爆栗，道：「未試過點知唔得啊！唔好成日畀藉口自己。」
 
阿興與榮仔別過拉柴與肥仔嘜後，拿回書包一同離去。
 
阿興與榮仔繼續討論剛才的問題。
 
阿興道：「嗰個貓仔講野無口齒架！應承咗嘅野唔會算數架！」
 
榮仔持相反意見，道：「我唔係話佢地係咩有氣量、有口齒嘅人，只係我覺得唔係個個人都咁記仇，為啖氣打完場交，仲要繼續去沒完沒了？而且佢地同我地握手言和，都係因為我地有可以同佢地對抗嘅實力，你諗下，如果貓仔頭先打贏你，又或者尚興國打輸咗，佢仲肯唔肯講和喔？佢地一定會乘機踩到我地上心口。」
 
阿興點頭道：「嗯，榮仔，你依番說話好似我阿哥會講嘅說話咁，你都講得啱，依個世界如果人地蝦你，你唔反抗，嗰啲人只會變本加厲，反而抗爭到底，先會贏得對方尊重，你話係唔係啊？」
 
此時，榮仔瞧向對面行人路，他臉色一沉。
 
阿興見榮仔沒有回應，他便循榮仔視線的方向瞧去，他瞧見湯仲謀，湯仲謀神情親暱地牽著一名女生，那名女生他有數面之緣，她是成皇志的同學，好像見做楊鳳瑤。
 
為什麼哥哥的同學楊鳳瑤會與湯仲謀在一起的？
 


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl