<第叄期實體書,經已有售>今年我三十三歲,回到了1998年 (校園、穿越、奇幻): Chapter　７６　千金（下）

 
Chapter　７６　千金（下）
 
４Ｄ班的同學離去後，人流逐漸由高峰回來，我們暫時可以喘一口氣。
 
游大輝雙手按著肚子，道：「今朝好早起身無去紮馬，我去練埋最後一式先。」
 
我聞言搖著頭道：「去啦！去啦！真係懶人多屎尿。」
 
游大輝快要走出攤檔之際，我叮囑道：「你條友開完大，記住洗乾淨手先好返嚟啊！」




 
「得喇！你當我讀幼稚園咩？」
 
我見暫時空閒向其他人道：「你地邊個有需要去洗手間就趁依家人少嘅時候去，靜間啲人流多番就走唔開架喇！」
 
陳依官以手背拭汗，道：「嘩！對住個炸爐同鐵板真係好熱。」
 
「依官，我都知道你個位辛苦，原先Mattew諗住抽個人落嚟幫手，但係佢地又要準備開張，又要應付常石梨ＣＡＦＥ嘅運作，調咗布甸落嚟，佢地嗰邊人手已經好緊拙，一係靜間我同你調一調位，我企熟食嗰邊。」
 
陳依官點了點頭，道：「好啊！我地輪流頂熟食個位，我依家去洗個面先。」




 
布正麗趁著空閒，亦拿起了水樽，扭開了樽蓋，喝一口水，濕潤一下喉嚨，她舒展一下筋骨，發現一名七、八歲的小女孩怔怔地望著凍櫃的甜品。
 
小女孩眉清目秀，長有一副美人胚子，模樣很討人歡喜，讓布正麗禁不住去逗弄一下她，道：「小妹妹，妳流晒口水咁，係咪好想食啊？」
 
小女孩聞言抬起了頭，打量了布正麗一眼，瞧見布正麗笑盈盈地看著自己，她問道：「姐姐，依啲一個個唔同顏色嘅漢堡包係咩嚟架？」
 
「哦！依啲叫Macaron，中文叫法國小甜餅，有八種唔同口味。」
 
小女孩詫異道：「啲漢堡包甜嘅？係姐姐妳整架？」




 
布正麗搖了搖頭，指了一下站在收銀處的成皇志道：「啲甜嘅漢堡包係一位姨姨整嘅，不過嗰位哥哥都有份幫手。」
 
小女孩瞧了瞧成皇志，訝異道：「哦！原來啲甜嘅漢堡包係嗰個哥哥整嘅。」
 
布正麗道：「小妹妹，妳想食嘅話叫妳爹地媽咪買畀妳囉！」
 
小女孩搖了搖頭，道：「我爸爸、媽媽做緊野，唔得閒。」
 
「吓！咁邊個同妳嚟啊？」
 
「七哥同九姐囉！」
 
布正麗訝異道：「吓！小妹妹，妳屋企有咁多個兄弟姊妹啊？」
 




小女孩點頭道：「係啊！」
 
布正麗再看真一點小女孩，發現小女孩一身名牌，頸項上戴上一條銀色項鍊，項鍊上有一個梨形的粉紅色水晶。
 
這小女孩衣著打扮、散發出來的氣質並不像一般小孩，而且聽她說有多個兄弟姊妹，家境應該不是泛泛之輩。
 
布正麗問道：「小妹妹，妳條水晶頸鍊好靚喎！喺邊度買架？」
 
小女孩搖頭道：「姐姐，依條唔係水晶頸鍊，係鑽石頸鍊，條頸鍊係爸爸買畀我架！叫做The　Sweet　Laurinda，Laurinda係我英文名。」
 
布正麗被小女孩的話嚇得楞住了，小女孩道：「姐姐，如果我用依條頸鍊可以換到幾多個Macaron啊？」
 
小女孩接二連三的說話，讓布正麗震驚不已，同時她腦海浮現出一些新聞報導，勾起了她的回憶，眼前的小女孩就是…
 
我瞧見布正麗如雕塑一樣，呆若木雞佇立在原地，便上前問道：「喂！布甸，妳無事喔嘛！見攰嘅話，去抖陣先。」




 
一把童稚、清脆如銀鈴般的笑聲響起：「姐姐，原來妳個名叫布甸啊？」
 
我循聲瞧去，立時虎軀一震，瞧見一名年約七、八歲的小女孩，小女孩臉上漾出如蓮子蓉般的笑容。
 
眼前這個小女孩，在我腦海裡急速遽變成十七年後，那個經常出現在娛樂新聞被傳媒譽為全球最漂亮的千金。
 
小女孩見我呆呆的瞧著她，向我揮了揮手道：「Macaron哥哥，你好。」
 
我伸出發顫的手指著她，震驚道：「妳戴住嗰條鍊叫The　Sweet　Laurinda，妳係賭王柯漢生嘅孻女柯麗華。」
 
柯麗華訝道：「Macaron哥哥，你識得我嘅咩？」
 
攤檔內的阿興、榮仔和呂靜宜瞧見賭王的千金光臨我們的攤檔，一時間亦紛紛停下手頭上的工作，把焦點集中在柯麗華身上。
 




賭王柯漢生一生傳奇，他的幾名姨太太和十多位子女長期活在鎂光燈下，就算打個噴嚏亦會吸引傳媒爭相報導，如果有人不認識，除非那人一直住在荒島。
 
我點頭道：「當然識啦！Laurinda，我成日喺報紙電視見到妳，妳就好似啲明星咁。」
 
「嘻嘻，我又無唱歌、又無拍戲，但係點解啲記者成日影我嘅？」
 
此時柯麗華應該只有七歲，可能她亦未明白作為柯漢生的女兒，一言一行成為大眾的焦點是理所當然的事。
 
布正麗笑道：「可能你嗰樣似明星，啲記者先影妳。」
 
柯麗華喜道：「係咩？其實我過都想做明星啊！」
 
布正麗道：「如果妳想做明星，一定好多公司爭住簽妳。」
 
柯麗華訝異道：「真係架？」




 
我點頭道：「妳唔係有個家姐已經做咗明星咩？妳做明星隨時紅過妳家姐啊！」
 
長大後的柯麗華，經常與中港台的明星往來，身邊好友不乏娛圈中人，而且其中一名男友更是當紅偶像。
 
柯麗華聞言臉上漾出甜甜的笑容，我見狀心想難怪這麼多公子哥兒為她傾倒，在賭王的冠冕上，柯麗華就是一顆最亮麗耀眼的明珠。
 
柯麗華捏了捏頸上的梨形粉紅鑽問道：「Macaron哥哥，我想食你啲Macaron，但係我身上無錢，我用The　Sweet　Laurinda可以換到幾多個Macaron？」
 
七歲的柯麗華一直生活優渥，看來並沒有金錢的觀念，她這一條以千萬計的粉紅鑽項鍊拿去套現，可以買下多個像呂靜宜家那樣的復式單位。
 
我搖頭苦笑道：「Laurinda，妳條頸鏈可以買晒我地成個檔攤有突，剩低嗰啲我都無咁多錢可以找番畀妳。」
 
布正麗問道：「妳唔鍾意條頸鍊咩？無咗妳唔會唔開心咩？」
 
柯麗華道：「又唔係唔鍾意，我鍾意屋企嗰條The Blue Moon of Laurinda多啲！」
 
瞧見柯麗華對凍櫃內的Macaron一臉唾涎，布正麗道：「麗華，妳想食Macaron，姐姐請妳食喔！」
 
布正麗打算從凍櫃內取出Macaron，我立時阻止，我道：「Laurinda，如果喺平時，哥哥，請妳食幾塊Macaron有乜所謂喔！但係哥哥同姐姐依家做緊生意，唔可以請妳喇！如果妳想食就要畀錢。」
 
布正麗聞言大吃一驚，道：「成皇志，你唔係真係諗住打麗華條頸鏈主意啊？」
 
我壓低聲音在布正麗耳邊輕聲道：「妳以為我謀咗嗰條The　Sweet　Laurinda，賭王會放過我咩？我先唔會咁唔識死去貪依啲野啊！」
 
我瞧見柯麗華一臉失望，立時道：「Laurinda，不如咁喔！你幫哥哥打工，報酬就係妳可以任飲任食攤檔裡面嘅食物。」
 
柯麗華雙目膛大，問道：「打工？咁要做啲咩架？」
 
「好似明星咁，做我地嘅代言人，幫我地做宣傳。」
 
柯麗華聞言覺得新鮮有趣，立時點頭道：「好啊！好似明星做代言人，好好玩啊！」
 
我把攤檔內的所有種類的食物，都給予柯麗華品嘗試食，她邊食邊點頭道：「好好味啊！」
 
布正麗瞧見柯麗華嘴角佈滿食物碎屑，便拿出紙巾替柯麗華抺拭。
 
在攤檔外派發傳單的宛琳珊，瞧見我們停下了工作，圍攏在一名小女孩身前，她有點訝異，想上前一探究竟，就在此時，她被一個神色匆匆的男人撞倒，向後傾去。
 
正當她快要仆倒地上之際，一隻手抄向她的腰肢，她由跌在地上變成了倒在別人的懷裡。
 
「小姐，妳無事喔嘛？」
 
宛琳珊入目的是一名大約二十多歲的青年，青年散發著一種翩翩佳公子的氣質，面相輪廓有點像混血兒。
 
宛琳珊面頰緋紅，道：「唔該。」
 
那名青年把宛琳珊扶穩，練完了最後一式回來的游大輝恰好把一切瞧在眼裡，立時怒氣沖沖，向青年指罵道：「喂！你個死臭飛想點啊？」
 
那名青年瞧了游大輝一眼，向宛琳珊問道：「你朋友嚟啊？」
 
此時一名女生走過來，道：「七哥，搵到麗華未啊？」
 
青年向攤檔指了指，道：「九妹，麗華係嗰邊。」
 
青年向宛琳珊點頭一笑，然後便與那名女生向攤檔走去。
 
游大輝問道：「宛琳珊，妳見點啊？頭先妳有無蝕底畀個臭飛？駛唔駛我走去打佢一身啊？」
 
宛琳珊冷笑一聲，道：「好啊！你快啲去打佢喔！嗰個係賭王嘅七公子柯恩繼，你夠膽就依家過去打佢。」
 
游大輝聞言嚇了一跳，想不到居然在這裡碰上了賭王的兒子，對方有如此顯赫的身份，就算給他天大的膽子，亦不敢去找對方麻煩，他還非常後悔剛才無禮對待賭王之子，不知對方會不會秋後算賬？只要對方一句話便可以讓他吃不完兜著走了。
 
「麗華！」
 
柯麗華別頭回望，喜孜孜道：「七哥、九姐。」
 
那名廿多歲的男子，我認出是三房的七阿哥柯恩繼；而那女的是三房的九小姐柯麗萍。
 
柯麗華是四房的唯一子嗣，可是江湖傳聞四房曾經有一名叫光義的兒子，後來一次訪問，三房的八阿哥恩承出來否認，說要澄清一直以來的誤會，柯家從沒有一個叫光義的男丁。
 
這傳聞其實有幾點可疑之處，首先，四房的事由三房的人來說，不過賭王四房中，長房正室，不理世事；二房人丁最旺，勢力最廣；三房的三太譚琪精明能幹，大有挑戰二房的統治地位之意；四房勢力最弱，要看其餘三房面色做人。其次，那個不知是否存在的柯光義，據說與三房的八阿哥恩承同齡，柯恩承今年十九歲，可是四太曾雲在十二年前才與賭王認識，十年前才與賭王結婚，時間上好像並不相符。最後，柯家這一輩男的是恩字輩，女的是麗字輩（就好像二房的三小姐麗盈、三房的九小姐麗萍等），而那個光義並不屬於恩字輩，所以另有傳光義是真有其人，不過並不是出自四房，而是賭王在外面的私生子，不過柯光義的身份一直眾說紛紜，究竟是否真有其人也說不準，人們都當作茶餘飯後的奇聞軼事聽了便算。
 
柯麗萍以手指點了柯麗華秀氣的鼻子一下，道：「『為食貓』，一見到有野食，就走埋去，妳唔見咗人，我同七哥周圍搵妳，驚妳畀人擄走啊！」
 
柯麗華道：「咁頭先真係好悶喔嘛！嗰個肥伯伯講野又長又慢，我見你地都聽到好眼瞓咁！」
 
柯麗萍笑道：「哈，妳咁樣講即係拖埋我地落水啦！」
 
柯麗華道：「個肥伯伯講緊野，如果我喺打喊路會好失禮，所以我先走出嚟。」
 
柯恩繼薄責道：「麗華，嗰個係特首先生，靜間見到佢，唔可以叫佢做肥伯伯，喺佢面前咁樣叫就真係會好失禮喇，知唔知啊？」
 
柯麗華點了點頭，柯麗萍瞧見柯麗華挽著一個袋子，內裡有很多食物，訝道：「麗華，妳應該無錢架！點解可以有咁多野食架？」
 
柯麗華昂首道：「我做咗代言人，依啲係我嘅報酬。」
 
柯麗萍啞然失笑道：「妳咁細過，有人搵妳做代言人？」
 
柯恩繼問道：「麗華邊個話搵妳做代言人架？」
 
柯麗華用手指向我，道：「係Macaron哥哥啊！」
 
柯恩繼走到我面前，問道：「我細妹食咗你地幾多錢野啊？」
 
賭王之子柯恩繼面對面與我說話，我生起了一種異樣的感覺，我連忙搖頭，道：「柯公子，唔需要喇！咩代言人，我只係同小妹妹講下笑，嗰啲小小野食，唔需要咁客氣啦！」
 
柯恩繼瞥了我一眼，從錢包取出了五千蚊放到我面前，道：「數目分明好啲，我地柯家大業大，不時有啲人想嚟混水摸魚，依度五千蚊，麗華無論食咗咩都夠找數喇！」
 
布正麗聞言一臉慍色，道：「柯公子，我地雖然係窮人，但都知道咩叫骨氣，我地只係見小妹妹生得可愛，請佢食下野嘖，無諗住打咩主意。」
 
話畢布正麗從我手上取回五千蚊，還給了柯恩繼。
 
看著到手的五千蚊飛走了，我真的感到可惜。
 
呂靜宜與陳依官面面相覷，布正麗以這種態度和柯恩繼說話，不知對方會不會發怒，要知道柯家財雄勢大，只要一個不高興，這個攤檔隨時可以提早結業。
 
柯恩繼瞧著布正麗，目光異彩連連，他抱歉道：「小姐，唔好意思，頭先我嘅語句用得唔恰當，我無貶低你地嘅意思，只係家父成日叮囑我地防人之心不可無同懷璧其罪嘅道理，既然小妹食咗你地啲野，我身為佢哥哥好應該畀錢嘅。」
 
我不待布正麗再有什麼話說，立時從柯恩繼手上「奪回」五千元，道：「柯公子，言之有理。阿興榮仔，快啲整兩盒全口味嘅Macaron畀柯公子同九小姐啦！靜宜，收錢。」
 
此時，攤檔外出現了一陣騷動，特首東方華聯同數名官員、商賈在數十名警員保護下四處行逛。
 
柯麗華回頭一看，瞧見賭王柯漢生在東方華身旁，立時喚道：「爹地啊！」
 
柯恩繼三人向賭王走去，賭王抱起了柯麗華，問道：「麗華，個袋咁大個嘅？裡面裝啲咩啊？」
 
柯麗華從膠袋取了一個Macaron出來，道：「爹地，依隻餅叫Macaron，好好食架！你試下啦！」
 
賭王在眾人的圍觀下，咬了Macaron一口。
 
呂靜宜見狀喜道：「成皇志，你見唔見到啊？今次無死喇！咁多記者影住，賭王食我地嘅Macaron，聽日實上Ｃ１喇！咁仲唔係最好嘅宣傳？」
 
我嗯了一聲，瞧了站在攤檔外湊熱鬧的宛琳珊一眼，長大後的宛琳珊投身入娛樂圈，並與半個娛圈中人的柯恩繼認識，從而介入到對方的婚姻裡，轟動一時，而現在柯恩繼並未成為人夫，兩位當事人比原來的歷史更早一步碰上，不知兩人的結局會否與之前一樣？
 
第一天花卉展結束，游大輝知會了游世伯駕車來接載他，他藉詞接送宛琳珊回家，借機親近心中女神，宛琳珊樂得有免費司機接送，沒有拒絕游大輝獻殷勤，她道：「陳依官，你住喺我隔離嗰座，你都上車啦！」
 
游大輝聞言嚇了一驚，立時拒絕道：「架車無位架！又要擺野，陳依官，你搭巴士啦！」
 
陳依官道：「我仲有啲野要同成皇志傾，你地走先啦！」
 
「咁聽日見啦！拜拜。」游大輝話畢立時把車門關上，一副害怕陳依官會強行上車的樣子。
 
我與呂靜宜在攤檔結算今日的生意額，瞧見陳依官走回來，不禁問道：「咦！依官，你唔係跟游大輝車嘅咩？仲乜返轉頭嘅？」
 
呂靜宜笑道：「你慌唔係游大輝想同宛琳珊獨處，唔畀佢上車咩？」
 
我嘆了一口氣：「唉！嗰個游大輝，依家個腦入面靜係得宛琳珊架咋！」
 
陳依官話題一轉，道：「係呢！今日做到幾錢生意啊？」
 
我笑不攏嘴，道：「今日原來做咗差唔多萬八蚊生意，睇個勢聽日嘅生意會仲更加旺，我已經同呂伯母講咗，請佢整多啲Macaron，頭先啲Macaron，五點未夠就賣晒。」
 
陳依官點頭道：「係啊！我見到亞洲亞洲嘅「今ＤＡＹ望真啲」同大台嘅「都市張望」都有人嚟報導，柯麗華攞住我地印有我地招牌嘅膠袋餵賭王食Macaron，畀咁多間報社影到，啲人睇到報紙隨時走嚟幫襯我地。」
 
想不到會在這裡遇到那位十年後被稱為最索千金的柯麗華，神推鬼擁下成了我們的「代言人」，那些報紙、電視媒體上免費幫我們作出了植入式廣告，當初我對呂伯母說幫助她宣傳，她以成本價為我們提供食物，並沒有想過事情會有這樣的發展。
 
陳依官問道：「咦！布甸、榮仔同阿興呢？」
 
呂靜宜道：「佢地走咗喇！我媽咪揸車嚟緊喇！車埋你喔！」
 
陳依官瞧了瞧呂靜宜，再瞧了瞧我，搖頭道：「唔駛客氣喇！我自己搭巴士得喇！」
 
陳依官走後，我問道：「收咗成日錢，妳攰唔攰啊？」
 
呂靜宜笑道：「ＯＫ啊！我頂得住。」
 
「不如好似宛琳珊同榮仔咁，出番份糧畀妳啦！」
 
「唔駛啦！我又唔係白幫你嘅，係幫媽咪宣傳佢間新鋪，如果你覺得虧欠我嘅，下個月我生日，你送畀我份禮物大份啲咪得囉！」
 
呂靜宜給了我這個難題，她家境富庶，什麼也不缺，要送一份合她心意的禮物，難度著實不低。
 
我苦笑道：「我儘量啦！」
 
距離沙田公園一街之隔的小巴站，布正麗、榮仔、阿興正在等待開往石梨的小巴。
 
阿興抱怨道：「布甸姐，走咗班車喇！起碼等四個字，點解唔等呂伯母車嘖？阿哥、靜宜姐姐加埋呂伯母都係三個人，我地坐迫啲都上到啦！一程就可以返到屋企，聽日我地仲要一早返嚟準備。」
 
布正麗道：「阿興，我都知你好攰，但係我地通氣吓！靜宜同你阿哥，應該有好多野想講，我地唔好做電燈膽阻住佢地啦！」
 
榮仔道：「布甸姐，妳最識為人著數，咩都諗咗人地先。」
 
阿興道：「唔知阿哥今次同靜宜姐姐拍拖拍幾耐呢？之前佢同管佳莉都係拍咗三個月，管佳莉就飛咗佢，唔知佢今次又可以拍幾耐呢？」
 
布正麗問道：「阿興，你唔鍾意靜宜咩？好似唔係好想佢地一齊咁。」
 
「緊係唔係啦！我依家屋企用緊部電腦都係佢送畀我地，之不過阿婆成日話木門對木門，竹門對竹門，我地屋企同呂靜宜屋企差太遠喇！我地邊度襯得起人地喔！」
 
布正麗道：「阿興，一個人嘅出身唔係決定一個人嘅一生架！你阿哥咁上進，將來實可以有一番事業架！」
 
阿興吐了吐舌頭道：「咁其實我又唔介意邊個做我阿嫂嘅！最緊要阿哥開心嘖！好似我阿爸同阿媽咁，佢地分開咗各自有另一半，但係佢地都仲係我阿爸同阿媽啊！」
 
布正麗訝道：「阿興，估唔到你咁識諗喎！」
 
「嘻嘻！依返說話唔係我諗架！係阿哥同我講架！」
 
此時，有一輛新簇的寶馬駛過來，汽車的車窗徐徐落下，柯恩繼的臉容出現在三人眼前。
 
柯恩繼向布正麗招了招手，道：「咁夜你地仲喺到等車，去邊啊？車埋你地喔！」
 
布正麗婉拒道：「柯公子，唔駛客氣喇！小巴就快嚟喇！」
 
阿興道：「布甸姐，架小巴啱啱先走，邊有咁快嚟啊！」
 
柯恩繼道：「最近治安唔係太好，有扑頭黨出沒，一個女仔帶住兩個小朋友咁夜喺條街度唔係咁好，就算妳唔怕，兩個小朋友都覺得眼瞓啦！」
 
阿興作狀打了一個呵欠，道：「柯公子，講得有道理，最近好多扑頭黨，我地早啲返屋企安全啲。」
 
阿興未待布正麗作出表態，他已經敞開了後座的車門，進入車箱。
 
布正麗拿阿興沒輒，只好跟著上車，她道：「柯公子，咁麻煩你喇！」
 
布正麗坐在司機位旁，而阿興與榮仔則坐在後座，不知是寶馬的車箱太舒服，還是兩人經過一天的辛勞後太疲倦，上車後不久兩人便睡著了。
 
柯恩繼道：「係呢？妳個名叫布甸啊？」
 
「哦！依個花名嚟嘖！柯公子！」
 
「唔好叫我做柯公子喇！我英文名叫Ronaldo，妳可以叫我英文名。」
 
「朗…朗拿度？踢波嗰個？」
 
「其實朗拿度未成名嗰陣，我已經開始用依個英文名，巴西同馬交以前都係葡萄牙殖民地，Ronaldo個名其實喺葡萄牙好普通嘖！不過其實我都係朗拿度嘅球迷。」
 
「係咩！原來係咁啊！朗拿度係肥仔，你都唔肥，個英文名唔襯你。」
 
柯恩繼笑了笑，話題一轉，道：「係呢！之前我見妳調配奶茶有板有眼咁，妳做咗餐飲好耐啊？」
 
「唔係啊！晌一間ＣＡＦＥ兼職咗一排嘖！你地做開大生意，我地啲小本經營，你地實覺得好兒戲啦！」
 
柯恩繼搖頭道：「我媽咪都有做餐飲業，開咗幾間梳打埠冰室，賣招牌嘅豬扒包，我都試過去佢鋪頭幫手，做過侍應架！」
 
布正麗訝道：「你做侍應？」
 
「或者你地外人睇我地都係含住金鎖匙出世，應該一入職就做高層，得閒就開下會、喺啲文件上面簽個名咁，但係就算我依家做緊嘅雨順集團，我都係由基層做起，我媽咪未識我爹地之前都係基層出身，佢成日要我地幾兄弟姊妹做前線，歷練多啲，打好啲根基，佢話真正做過前線，先唔會紙上談兵。」
 
「你媽咪幾有見地。」
 
此時，柯恩繼駕駛的寶馬進入了城門隧道，他道：「喺呢？妳地住邊架？」
 
「石梨。」
 
「石梨？依頭啲路，我唔係好熟，妳可唔可帶一帶路啊？」
 
「好啊！直行第二個路口轉左。」
 
「係呢？妳知道我叫柯恩繼，但係我仲未知妳叫咩名？」
 
「我叫布正麗。」
 
「哦！布正麗，係呢！我之前睇雜誌，石梨好似發生咗一件幾轟動嘅案中案，案情好複雜，妳有無聽過啊？」
 
布正麗直認不諱：「嗯！有啊！雜誌講嘅其中一個女仔就係我嚟。」
 
柯恩繼感到詫異，他憶起雜誌的內文提及到一名姓布的女生，那名姓布的女生還拿著刀劈人，所說的那名布姓女生，應該就是身旁的布正麗。
 
柯恩繼陷入沉思當中，布正麗外表美麗、性格強悍不屈、率直爽朗，讓他留下了深刻的印象，她有吸引著他的特質，可是眼前這女生背景很複雜，媽媽的那番話在他的腦海浮現：
 
「恩繼，阿媽將所有希望都放晒喺你地兩兄弟身上，我將你地個名改做恩繼、恩承就係希望你地可以繼承到你爸爸嘅事業，依家大房嘅嫡子恩澤死咗，二房嘅恩隆以為依家佢係長子就可以坐正，但係你地都係賭王個仔，你地都可以坐正，你地兩兄弟要爭氣，唔可以畀人睇死，知唔知啊？嗰個恩隆除咗識玩女人，仲識啲咩啊？你地千祈唔可以行差踏錯，只要恩隆繼續犯錯，我地就會有機會，阿媽會幫你地兩兄弟成為第二代賭王。」
 
就在柯恩繼想當年的時候，不經不覺間他已經把布正麗等人載到了目的地。
 
布正麗別過頭去搖醒阿興與榮仔道：「喂！到喇！你地兩隻野好醒喇！」
 
阿興與榮仔搓揉著惺忪的睡眼，道：「到喇？」
 
布正麗道：「柯…Ronaldo，唔該晒！再見喇！」
 
「拜拜！」
 
柯恩繼瞧著漸漸走遠的布正麗，他想問對方的聯絡方法，但他記起了母親的話，如果他與這背景複雜的女生一起，被二房抓住了把柄大做文章，可能會惹起父親不快，儘管他對布正麗萌生了一點點情愫，還是趁現在放棄吧！
 
在豪門裡，婚姻就是政治的聯繫，二房的麗娜就是嫁與政府高官，令家族的事業得以擴展，所以二房的勢力才得以壯大，如果他與布正麗一起，意味著他將要放棄賭王繼承人的寶座。
 
柯恩繼瞧著布正麗的身影沒入了黑夜中，嘆了一口氣駕車離去。


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl