<第叄期實體書,經已有售>今年我三十三歲,回到了1998年 (校園、穿越、奇幻): Chapter　７３.5　霸氣（下）續

 
探望學姐後，我正要離開醫院之際，在電梯大堂碰見了布正麗，布正麗瞧見我，問道：「咦！成皇志，你又會喺到嘅？」
 
在這裡碰上她，我亦感到訝異，反問道：「布正麗，妳嚟依度係探柳豔？」
 
布正麗怔了怔道：「係喎！學生會會長都受傷入咗嚟醫院喎？不過我唔係嚟探佢架！我今日係嚟探范倚敏架！」
 
布正麗提起了范倚敏，我才記起范倚敏亦被送來了仁濟醫院，因為我的介入，產生了蝴蝶效應，改變了她悲慘的結局，現在的她有了不一樣的人生。
 
我和布正麗一起走到了范倚敏的病房，范倚敏四肢均被打上了石膏，臉上與頸項有不少結了痂的傷痕。




 
范倚敏瞧見我們先是一呆，然後她的視線停留在布正麗的臉龐上，片晌過後，她才道：「妳…係救咗我嗰個女仔？」
 
布正麗瞧了我一眼，才點頭道：「當時…妳醒返，我係晌屋入面，但我唔知我算唔算救咗妳，因為我本身去周平泰屋企嗰陣係諗住救我嘅朋友，但當我去到門口嗰陣，我就見到嗰個叫沈雲樂嘅男人同成皇志打起嚟。」
 
范倚敏瞧向我，我把柳豔失去聯絡，然後我與楊鳳瑤前往周平泰家中尋人的經過告訴給對方，但我當然沒有透露曾經與房侍農、水桂麗前往加連威老道的唐樓找她。
 
范倚敏聞言現出一臉猶有餘悸的樣子，道：「如果唔係你地咁啱上咗嚟，我相信我已經死咗喇！」
 
布正麗瞧見范倚敏現出激動的神情，安撫道：「妳唔需要再擔心喇！傷害妳嘅人，已經全部落網喇！」




 
范倚敏搖頭道：「你地唔會明白我當時嘅痛苦，佢地唔當我係人，佢地不斷咁虐待我、痛打我，佢地每日都有唔同方法去整治我、迫我去做啲…無人可以接受嘅事，我唔肯就打到我肯，我無時無刻都好似活喺地獄咁。」
 
布正麗拍著范倚敏的肩膀道：「我明架！我明白妳所受嘅痛苦，我真係明架！」
 
范倚敏流著淚，搖頭道：「妳唔會明，無人會明我所受嘅痛苦，我畀佢地虐待到個人迷迷糊糊，我夢見佢地將我殺死，然後斬開一碌碌，放入煲煮熟佢，有啲就拎去餵狗、有啲就扔落街，佢地仲將我個頭塞入去吉娣貓公仔入面，好恐怖架！」
 
布正麗淚盈於睫，道：「我話明白妳嘅痛苦，唔係隨便安慰妳嘅說話嚟嘅！我有個好朋友都係畀佢地害死架！」
 
范倚敏聞言全身一顫，然後瞧向布正麗，道：「妳朋友畀佢地殺咗？」




 
「唔係直接畀佢地殺，係畀佢地迫死架！」
 
布正麗把顧琛琛的事告訴給范倚敏聽，范倚敏聽畢，波動的情緒漸漸平伏過來，她倒過來安慰憶及舊事因而流淚的布正麗，她道：「唔好咁傷心啦！」
 
當自身及身邊人有相近的經歷，受害人才會相信對方真的明白自己的痛苦，距離拉近了，才能夠打開心扉，釋放傷痛。
 
范倚敏道：「我畀佢地禁錮嗰段時間，我自己同自己講我要撐住，我要見返囝囝，聽佢叫我一聲媽媽，睇住佢讀幼稚園、小學、中學、大學，見證住佢嘅成長。其實依家睇返成件事，我覺得好似有隻無形之手去改變咗我嘅結局咁，可能喺琛琛在天之靈見到我經歷緊佢嘅苦難，佢唔忍心見到我有一個悲慘嘅收場，於是佢地指引你地嚟救我，本來我係無勇氣出庭面對佢地三個，但係佢地三個都係害死琛琛嘅兇手，我應該出庭去指證佢地，依樣係我可以幫琛琛做嘅野。」
 
探病時間結束，我與布正麗離開醫院。
 
我見布正麗一臉沉思的樣子，不禁問道：「妳成個諗樣咁，諗咁啲咩野啊？」
 
布正麗道：「成皇志，我諗返起成件事都好似好多巧合咁，我收到阿芳嘅外賣電話，原來就係周平泰屋企，之後因為收到靜宜電話話莉莉唔見咗，就折返去周平泰屋企；而你就因為學生會會長失蹤，就同楊鳳瑤一齊去周平泰屋企，唔通真係琛琛在天有靈，要我地幫佢報仇？」
 




「聽妳咁講又好似係喎！咁其實都幾好喔！善惡到頭終有報，有啲人做咗壞事，避過咗法律制裁，但避唔過個天，如果真係有個無形嘅主宰，去審判世間善惡，我覺得對生活喺依個世界嘅人會公平啲、幸福啲。」
 
布正麗又道：「成皇志，我聽醫生講，范倚敏要去戒毒，而且佢出庭指證嗰三條友，可能又會面對琛琛通到嘅壓力，我驚佢最後都好似琛琛一樣。」
 
我搖頭道：「我覺得就算沈雲樂今次再貼街招，都唔會迫到范倚敏自殺，首先，范倚敏被禁錮嘅時間比琛琛短；其次，范倚敏係一個媽媽，佢個仔都未夠一歲，佢今之死過翻生，可以見返個仔，妳頭先都聽到佢係佢咁掛住個仔架啦！」
 
「真係咁咩？」
 
我笑道：「或者有日妳做咗媽媽，妳就會明白咩叫母愛？母愛嘅力量係幾咁偉大，范倚敏會捨得佢個仔咁細過就無咗媽媽咩？」
 
「超！你講到自己好似有仔女咁？你生到仔咩？」
 
我咕嚕道：「搵個女人咪可以生囉？」
 
「成皇志，你口噏噏，講啲咩啊？」




 
「無，我話我雖然未有仔女，但係我係我阿媽個仔，當然知道母愛嘅偉大啦！」
 
＊＊＊
 
今天，高等法院審判沈雲樂、劉星祖和黎洪瑋三人涉及的案件，受害人范倚敏出庭作證，加上阿芳和周平泰的證供，陪審團一致通過被告沈雲樂、劉星祖非法禁錮、嚴重傷害他人身體、強姦范倚敏罪名成立，主謀沈雲樂各項罪名加起來被判處十年、身體殘障的次被告劉星祖被判處七年、選擇認罪的黎洪瑋，法官覺得他對自己的行為有悔意，而且犯案的程度較低，被判處入獄三年。
 
我改變了范倚敏的結局，讓本應犯下誤殺罪的沈雲樂三人變成了較輕的罪名，因而他們被判處的刑期亦大幅縮減。
 
我與布正麗、管佳莉、呂靜宜三人亦有出席今天的旁聽，管佳莉道：「嗰三個人有份迫死琛琛，雖然佢地唔係因為琛琛件事被判入獄，但總算受到法律嘅制裁，琛琛泉下有知應該會覺得欣慰。」
 
布正麗搖頭道：「可惜嘅係周平泰無入埋去坐監。」
 
呂靜宜道：「咁又唔可以話周平泰一啲事都無嘅，佢之前畀我大表姨揸車撞低，瞓咗一排醫院，頭先見佢出庭嗰陣，個人瘦咗好多，聽人講佢好似撞鬼。」
 




布正麗道：「抵死，最好遲啲痴Ｑ埋線入去青山過人世。」
 
呂靜宜見我沉默不語，便問道：「成皇志，仲咩一粒聲都唔出啊？」
 
我苦笑道：「過多兩日就輪到我爸爸上庭，我好擔心佢啊！」
 
呂靜宜安慰道：「唔好咁擔心啦！你爸爸係好人嚟！當時佢只係想救莉莉同阿興，先出手打劉星祖嘖！有莉莉做人證，你爸爸一定無事嘅！」
 
儘管我知道這只是安慰說話，但仍然感激呂靜宜的好意。
 
＊＊＊
 
明天就是爸爸上庭的日子，這晚我瞧見他一個人在露台抽悶煙，與其說抽煙，不如說他夾著煙屁股在呆呆出神。
 
我見狀不禁問道：「爸爸，你係咪好擔心聽日嘅審判啊？」




 
爸爸苦笑道：「其實我已經有咗最壞嘅打算喇！不過等緊宣判依段時間係最難捱。」
 
我安慰道：「爸爸，你一定無事架，你保護阿興，你出於自衛之嘛！管佳莉可以做證架！」
 
爸爸搖頭道：「龐律師話當時嗰個女仔昏迷緊，根本睇唔到當時嘅情形，而且我的確用咗過份武力，依條罪好難打得甩。」
 
「就算個官判咗，我地都可以上訴架！一次唔得咪兩次囉！」
 
「阿志，唔好嘥埋依啲無謂錢喇！我知你有啲積蓄，但係唔好用係依啲地方，龐律師話黎洪瑋都係判三年，我唔會多得過佢，三年好快過嘖！」
 
想到全因為我自己去嘗試去改變命運，而連累了爸爸，這一刻我不禁悔疚得流淚，我哽咽道：「爸爸，對唔住啊！係我…累咗你啊！我累咗你坐監…如果唔係我多事，個…結局唔會咁架…」
 
爸爸拍了拍我的肩膀道：「傻仔嚟！喊咩嘖！唔好喊！條友係阿爸打傷嘅，關你咩事嘖？如果再嚟多次，阿爸都會咁做，邊個蝦你兩兄弟，我都唔會放過佢地。」
 
我聞言更加泣不成聲，回到１９９８後，我一直以為自己比這個世界領先了十多年，有時會覺得自己很厲害，可是當爸爸因為我兩兄弟出事的時候，我除了站在這裡哭便什麼辦法也沒有，還要反過來讓爸爸安慰我，我真的很沒用。
 
爸爸再拍了拍我的肩膀，安慰道：「好喇！好喇！唔好喊喇！你大個仔喇！」
 
過了一會，我才止住了哭泣，爸爸問道：「阿志，你係咪好憎黑社會啊？」
 
我怔了一怔，然後點頭。
 
「嗯，阿志，啱啊！加入黑社會無前途架！老豆就有板你睇，成世人一事無成，攪到家不成家咁，你千祈唔好好似老豆咁啊！老豆見你依排生性識諗，你比我依個老豆識做人好多，老豆讀書唔多，教唔到你啲咩！阿志，你應承我老豆，我唔係到嗰陣，你要睇住細佬，要睇住依頭家，好唔好？」
 
我抿著唇，點了點頭。
 
「好喇！都夜喇！你早啲瞓啦！我地一家人好耐都未飲過茶喇！聽朝飲完茶先上庭啦！」
 
翌日，我們三父子與爸爸的女友芬姐一同飲茶，席間大家的話都很少，離開前，芬姐道：「阿豪，無論幾耐我都會等你架！」
 
媽媽、大伯、二伯、林玄德等人，亦有前來旁聽。
 
控辯雙方盤問了所有證人後，開始進入了結案陳詞，龐律師道：「法官大人，各位陪審員，受害人劉星祖有多宗傷人案底，事發前一小時，就將一名叫范倚敏嘅女人打致重傷；事發時，佢正要迷姦一名未成年嘅少女管佳莉，從而可以證明受害人係極度兇殘嘅人士，被告成人豪因為眼見佢嘅只得十一歲嘅小兒子成家興，被受害人斬傷，身為父親嘅成人豪出於保護兒子心切，先誤傷受害人，懇請陪審團，判予我當事人嚴重傷害他人身體罪名不成立。」
 
控方律師道：「法官大人，各位陪審員，儘管受害人劉星祖犯上咗其他罪名，但係佢係依件案嘅受害者，醫生已經診斷佢右手永久傷殘，左手、左腳都係得番六成功能，證人周平泰當時離開咗現場，而另一名證人管佳莉當時亦陷入昏迷未能目睹事發經過，當時受害人劉星祖已經被被告制服，但係被告仲使用過度武力將受害人打致殘廢，而且被告之前留有傷人、公眾場所打鬥、非法集會嘅案底，事發後亦參與另一場集體打鬥，從而可以證實被告係一名行為暴戾、經常使用暴力嘅人，懇請陪審團，判予被告嚴重傷害他人身體罪名成立。」
 
陪審團以大比數裁定爸爸嚴重傷害他人身體的罪名成立，法官宣判道：「被告成人豪令到受害人劉星祖身體受到嚴重傷害係不爭嘅事實，但出於被告成人豪護子心切，其情可憫，加上制止咗另一場罪案發生，都係減刑嘅因素，現在判處成人豪入獄兩年，即時執行。」
 
我和阿興聞言，立時衝向犯人欄，握著爸爸的手，阿興泣不成聲，我強忍淚水，道：「爸，你放心，我會睇住阿興、睇住頭家，等你，等你出返嚟！」
 
爸爸亦強忍淚水，頷首道：「嗯！有啲咩事，等我出返嚟，我地三父子坐低再慢慢講。」
 
我與阿興流著淚目送阿爸爸被押走。
 
＊＊＊
 
這晚，我站在露台點起了一支煙，放在一旁並沒有抽，我很討厭別人抽菸，但我站在爸爸昨晚的位置，點起了煙，就好像他還在這裡。
 
這晚，我一夜無眠，想起以前和爸爸相處的時光，不知怎地，從前的我每當憶起他，只記起他的壞；但現在我思念他，只想到他的好。
 
天邊泛起魚肚白，不知不覺間我在露台坐到了清晨六點，這時阿興沒精打采地走到了露台，他道：「哥，你成晚無瞓啊？我都瞓得唔好啊！我好掛住爸爸啊！」
 
「阿興，你唔係要同榮仔跑步練功嘅咩？」
 
阿興頹然地搖了搖頭，道：「唔練喇！爸爸坐監，我無心情。」
 
我道：「點可以咁架？無爸爸睇住我地，我地更加要爭氣，就算爸爸暫時唔喺到，我地都要保護自己，唔好令爸爸擔心，我暫代爸爸個角色，陪你地練功、跑步，快啲打畀榮仔，一切照舊。」
 
人生總是有起伏跌宕，經歷低潮，不開心一會，便要咬著牙關撐起來。
 
不想讓自己與身邊人受到欺壓，便要自強，當你自暴自棄，人人亦會來欺負你；但當你堅強發奮，人們欺負你前，便要多想一想後果了。


=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl