<第叄期實體書,經已有售>今年我三十三歲,回到了1998年 (校園、穿越、奇幻): Chapter　６０　療傷（上）

Chapter　６０　療傷（上）
 
我趕到荃灣仁濟醫院的時候，榮仔、布正麗、管佳麗、呂靜宜均在，人人都黯然神傷，雙目紅腫，呂靜宜瞧見我來到，她一把扭著我，哭道：「琛琛佢…夜晚偷偷返咗去…石梨屋企…上到天台跳咗落嚟…」
 
「最衰都係我，佢話唔開心…要我陪佢飲酒，我飲到醉晒，半夜醒返先發現佢唔見咗…」布正麗自責不已。
 
管佳莉拍著布正麗的肩膊，安慰道：「布甸，唔關妳事架！妳唔好怪自己啦，琛琛咁樣，無人想架，佢封遺書…都講咗…佢活得好痛苦。」
 
我問道：「咩遺書啊？」
 




「係琛琛寫畀我地嘅遺書。」呂靜宜把一封信遞給我。
 
我打開了那封信，那是琛琛寫給我們的信。
 
親愛的細佬、布甸、莉莉、靜宜與成皇志：
 
當你地睇到依封信後，我諗我已經離開咗依個世界喇！依句說話好老土哦！
 
希望我嘅離開你地唔好傷心咁耐啦！要快啲開心返啊！
 




我其實好唔捨得你地，我以為我可以忘記過去，重新做人，但係當每次我照鏡嘅時候，我發現身上面嘅刺青，都提醒我之前發生過嘅事，嗰段痛苦嘅經歷已經烙印係我人生裡面，成為我生命嘅一部份，跟隨我一世，每當我合埋眼，每一幕嘅畫面都會好清晰浮現，我知道我依一生都擺脫唔到，如果要擺脫，唯一嘅辦法，就係離開依個世界。
 
莉莉，我地中一就已經識，對唔住，我無聽妳講，無帶眼識人，最後我嘅人生毀咗，妳要帶眼識人啊！唔好好似我咁，祝妳搵到幸福，我地來世再做好姊妹啦！
 
靜宜，雖然我地認識時間好短，但係妳同妳屋企人對我好好，我好感激妳地為我所做嘅一切，妳話音樂對我嘅病有幫助，遲啲會教我彈紅河村，但係我跟唔到妳學喇！下世再跟妳學啦！
 
成皇志，莉莉同我講原來我地中一係同一班，我真係無咩印象！你睇嚟好成熟，榮仔話你好叻，睇得出佢好崇拜你，我依個做家姐好無用，佢無咗我依個家姐，如果有你做佢哥哥，咁我就放心啦！
 
榮仔，家姐走喇！你唔可以跟住家姐自尋短見，你一定要堅強，好好咁生活，努力去讀書，家姐知你好叻，你唔可以好似家姐咁無用，家姐走咗，以後布甸就係你家姐，你一定要聽佢話啊！依個係家姐對你最後嘅要求，如果你唔聽家姐嘅說話，家姐會嬲你。
 




布甸，依個世界上我唯一放唔低嘅就係榮仔，以後榮仔就拜託妳喇！我知道妳唔會托我手踭，我地兩姊妹，唔講咁多，我欠妳嘅，來生再還啦！
 
本來喺嗰段日子，我以為我會咁樣直到死，但係居然可以見返你地，好多謝你地喺最後依一個月陪住我走埋佢，就畀我帶住依段美好嘅回憶離開依個世界啦！
 
　　　　　　　　　　　　　　　　　　　　　　　　　好愛你地嘅顧琛琛上
 
閱畢顧琛琛的遺書，我眼前的景象亦變得模糊起來，顧琛琛自殺，讓我想起了我亦曾經做過相同的事，我也是抱著絕望的心情一躍而下，結果回到了１９９８，現在回想起當時自己所經歷的事與顧琛琛一比，我自殺的原因變得有點可笑。
 
布甸再讀了顧琛琛的遺書一片，哽咽道：「琛琛，妳…好過份，妳話妳放…唔低，妳睇死…我一定應承妳…」
 
呂靜宜黯然地輕輕哼著紅河村：
 
「人們說…你就要離開村莊，
我們將懷念你的微笑。
你的眼睛比太陽更明亮，




照耀在我們的心中…
想一想你走後我的痛苦，
還有那熱愛你的朋友…」
 
所有人都陷在一片悲傷裡，在場的五人除了我外，不是女流，就是小孩。
 
人死了，有很多事情要去辦，好像死亡證、出殯等事宜。
 
顧琛琛的親人，除了榮仔外，只有那位七、八十歲的姨婆，怎可能倚靠她們去辦理顧琛琛的後事？
 
經我們多番聯絡，終於找到了顧琛琛的父親，告知了他顧琛琛的死訊，他說會儘快回來香港。
 
我放下電話，奇道：「咦！點解佢聽到個女死咗，好似無咩野咁嘅？」
 
布正麗道：「聽琛琛講，佢老豆上面好似有第二頭住家，佢老豆無乜點理佢地兩姊弟。」




 
我道：「咁琛琛後事，好難旨意佢老豆喎！」
 
呂靜宜道：「我返去同屋企人商量下，媽咪之前同我講，話琛琛咁慘，有咩野要幫手，佢會盡量去幫。」
 
布正麗道：「靜宜，唔可以要妳同妳屋企人負責晒，我會諗辨辦法。」
 
我亦道：「之前榮仔幫過我賺錢，我會出番份，仲有我爸爸識人做白事嘅，我返去問下佢有無信得過嘅人介紹。」
 
布正麗道：「成皇志，你有無辦法搵到啲禮儀師可以洗咗琛琛身上嘅刺青，我唔想佢死咗都要帶埋依啲屈辱落棺材。」
 
我點頭道：「嗯，依樣一定。」
 
這幾天，我們有很多事情需要處理，顧琛琛的爸爸回到香港，辦妥了顧琛琛的死亡證，他說他沒有多餘錢去辦琛琛的後事。
 




布正麗大怒，指著他罵道：「你點做人老豆，個女死咗你都好似唔在乎咁。算喇！琛琛條命唔好，有你依個老豆，佢嘅後事，我地會諗辦法，點都會攪得好好睇睇。」
 
管佳莉沒有當兼職，布正麗的積蓄也不多，我最多可以拿兩三萬出來，最後我們去找呂伯母商量，呂伯母答應為我們墊支。
 
布正麗道：「伯母，唔該妳啊！我會出去搵多幾份兼職，分期還番畀妳架！」
 
我亦道：「伯母，我地問妳借住先咋！我地真係會還番畀妳架！」
 
呂伯母搖頭，嘆道：「你地仲讀緊書，邊有能力搵錢喔？唉！琛琛依個女仔條命真係苦喇！」
 
我找了爸爸向我推薦的禮儀師，那是個很好的老人，我告知他顧琛琛的情況及我們的要求，他說可以辦到我們的要求。
 
布正麗還在圓玄學院為琛琛買了個長生位，她安葬的位置離她們的家不遠，好讓她們感到顧琛琛還在她們的身邊，方便拜祭，但這需要一筆六位數的開銷。
 
大致上，我們可以做的都已經做了，我們照妥了死者的後事，但生者的情感更加難去處理。




 
五人當中，可能我與顧琛琛的交流不多，我的傷感沒有其餘四人來得那麼強烈，與顧琛琛感情最深厚的榮仔與布正麗，依舊沈溺在傷感當中。
 
榮仔的話很少，我吩咐阿興多點陪伴他。
 
布正麗則陷進內疚的泥沼裡，認為自己需要為顧琛琛的死負上責任。
 
距離顧琛琛出殯的日子還有一星期，他們二人的心結依然未解，外表看不出明顯的變化，只是他們把這種情感埋藏在內心深處，但越是去壓抑，問題終究並未去解決。
 
這一天，我送了呂靜宜回家，回家途中，到了附近的七仔買東西，此時呂靜宜致電給我，與我談論顧琛琛和榮仔的事情。
 
她道：「榮仔真係慘啊！佢阿爸又唔理佢，相依為命嘅家姐又離開咗，佢日後都唔知點算？」
 
我道：「榮仔仲有布甸同我地睇住，而且妳唔好睇榮仔小學都未畢業，佢畀我地想像中都要成熟架！」
 
她道：「我係驚佢諗埋一邊，會搵湯仲謀同周平泰報仇，我聽大表姨講，依家死無對證，警方好大機會無足夠證起訴佢地兩個。」
 
就在我排隊繳費的時候，我發現了布正麗原來也在七仔裡面，她從冰櫃拿了幾罐啤酒，沒有給錢便直接離開。
 
店員發現，連忙喝止道：「喂！靚妹，仲未畀錢架！妳唔好走啊！」
 
我向呂靜宜道：「喂！我見到布正麗啊！有啲麻煩，唔講住喇！」
 
掛了線後，我向店員道：「唔好意思，識得架！佢買咗咩啊？我同佢畀喔！」
 
我害怕布正麗再鬧出什麼事，付款後離開了七仔，向布正麗追去。
 
我追上了布正麗，發現她一身酒氣，臉頰酡紅，訝道：「妳仲咩飲到咁醉啊？」
 
布正麗有點醉態，她皺著眉道：「咩啊？你有無讀過書架？無聽過一醉解千愁咩？」
 
我瞧見布正麗再拉開了另一罐啤酒的蓋掩，我一把搶過她手上的啤酒，她問道：「你想點啊？」
 
與其擔心布正麗獨個兒喝悶酒生事，都不如在我看管下給她宣洩一下情緒，我呷了一口啤酒，道：「一個人飲邊有癮架？我陪妳飲，醉完好醒喇！」
 
布正麗從我的手上奪回了啤酒，呷了一口，才道：「罐啤酒我架，你要飲自己買啦！」
 
「哈！妳真係醉喇！妳嗰幾罐啤酒都係我畀錢架！如果唔係咁啱我喺到，妳畀人拉咗返差館喇！」
 
布正麗抱怨道：「依度得咁少酒，夠你飲定夠我飲啊？」
 
「唔夠，咪返七仔買過囉！」
 
我重回七仔買了一打喜力，問道：「酒就買咗喇！咁，依家去邊度劈啊？」
 
「上我屋企囉？」
 
我訝道：「上妳屋企？妳屋企無人咩？方唔方便啊？」
 
「咩啊？驚啊？驚我食咗你啊？」
 
「哦！咁妳身為女仔都唔驚，我依啲麻甩仔驚啲咩嘖？」
 
於是我跟隨布正麗到了她位於石興樓的家，敞開門，亮了燈，她的家比我想像中要整齊，初時我還以為她的家會相當凌亂，看來是她媽媽經常打掃家裡。
 
可是我偷偷打量了她的家一眼，只發現她與一個男人的合照，那男人大概四十多歲，中等身材，皮膚黝黑，五官端正，不禁問道：「依位係妳爸爸啊？」
 
布正麗白了我一眼沒好氣道：「依度係我屋企，嗰個唔係我爸爸，唔通係你爸爸啊？」
 
「ＯＫ，妳贏。」
 
布正麗命令道：「除鞋，唔好整污糟我屋企，雖然我日日都掃地、執屋。」
 
「估唔到妳識做家務喎？」
 
「好奇啊？我老豆返工搵錢，全屋嘅家頭細務都係我做嘅。」
 
我還以為布正麗是那些好吃懶做的不良少女，實在想不到她居然有賢良淑德的一面。另外，聽她的話，我相信她的媽媽並不是與他們住在一起。
 
「入房飲酒吹水啦？費事我老豆返嚟見到你，誤會我地有野啊？」
 
我心想：「入去妳房咪仲惹人懷疑？」
 
想雖這樣想，但我還是走進了布正麗的閏房內，內裡有很多不同卡通人物的毛公仔，而房間的佈置裝潢亦有很多卡通人物的元素，好像床單被褥就分別印上小鹿斑比與米奇老鼠。
 
我道：「嘩！估唔到妳間房入面咁多毛公仔同卡通人物喎？」
 
「好出奇啊！我今年先十六歲咋！」
 
布正麗說得沒有錯，其實我們只是十五、六歲的中四學生，可是現在我們的經歷遠非中四學生可以處理，加上我實際年齡已屆三十三，所以有時我忘記自己現在是一名中四學生的身份。
 
布正麗呷了一口啤酒，拿起床頭上那張她與顧琛琛的合照端詳一番，道：「我同琛琛好似，我地好細個嗰陣，阿媽就走咗，我淨係知道佢係台灣人，佢走咗之後，我就無再見過佢，阿爸好少提起佢，我唔係好知佢啲野。」
 
我道：「嗯，咁我好過妳，我阿爸同阿媽都分開咗，但係我都成日可以同佢地見面。」
 
布正麗逕自道：「琛琛有個細佬，但係佢阿爸唔鍚佢地；我無兄弟姊妹，但係老豆把口雖然唔講，但係我知佢錫我，依方面算係打和啦！除咗依樣似，我地都係鍾意咗同一個男人，但係…」
 
從前我也試過在布正麗面前提起湯仲謀，每次她都反應甚大，這次她喝了酒後，並不忌諱在我面前提起這個人。
 
我問道：「我記得中一嗰陣，妳同湯仲謀讀１Ｃ１班，我就同顧琛琛讀１Ｂ３班，嗰陣我就聽過佢好多傳聞，我想知…」
 
布正麗斷然道：「你想知點解我聽過佢咁多衰野，仲咁犯賤痴埋去？」
 
「我唔係咁嘅意思，我知道湯仲謀對女人好有吸引力，我只係想知道佢多啲野嘖！」
 
布正麗對我說，湯仲謀是花生幫現任坐館湯伯符的同父異母兄弟，他的媽媽是花生幫創幫龍頭大哥湯文台的姨太太，湯仲謀有爸等於沒爸的家庭背景與布正麗的情況很相似，湯仲謀希望出人頭地，加入了比花生幫規模更大的數字幫，就是希望有朝一日可以壓到那個同父異母的哥哥。
 
布正麗突然問道：「我無記錯你爸爸叫高佬豪哦？」
 
「哦！佢啲兄弟係咁叫佢嘅！咩事啊？」
 
「無，聽人講你爸爸個大佬叫林玄德，同湯文台係同輩兄弟。以前香港嘅黑社會就數真技安、數字幫、果仁幫三個幫派最大，之後果仁幫最後一個大佬韓俊死咗之後，果仁幫就四分五裂，出現咗好多新字頭，好似湯文台嘅花生幫、林玄德嘅杏仁幫、夏暪嘅栗子幫咁。」
 
這些黑道傳聞應該是以前湯仲謀告訴給布正麗聽，聽她這樣說起原來我和湯仲謀有這樣的一層關係。
 
我道：「湯仲謀想壓過佢大佬，睇嚟唔得喇！數字幫大佬蛀牙，依家畀司警通緝緊，數字幫又畀香港警察打壓緊，就算湯仲謀可以避過琛琛依件事，佢都好難借助數字幫出人頭地啦！」
 
當我提起了顧琛琛，布正麗的眼眸變變得瑩光波動，道：「係我害咗琛琛。」
 
我嘆道：「根本就唔關妳事，琛琛件事無人想架！」
 
布正麗自責道：「之前我仲咩同佢反面喎？如果我唔同佢反面，佢遇到困難實會搵我傾，咁樣成件事就唔會發生啦！」
 
我搖頭道：「嗰陣琛琛咁鍾意湯仲謀，邊個講佢都唔會聽架！」
 
布正麗又自責道：「佢自殺嗰晚，我明知佢會做傻事，我都阻止唔到佢，我真係好無用啊！」
 
我再搖頭道：「琛琛唔係一時衝動，佢係諗清楚，就算妳阻止到佢依一次，下次佢都係會作出同樣嘅選擇，妳可以阻止到佢幾多次？」
 
布正麗無言，再次喝酒，我則陪著她喝。
 
她喝完了一枝啤酒，醉意又多了一分，道：「成皇志，上次你辯論比賽講過一句說話…就係『你以為人地唔明白…你以為你明白人地。』…我地身為局外人啊！以為琛琛唔明白…佢自殺，令到榮仔同我地傷心；我地又唔了解琛琛承受嘅係點嘅痛楚啊？佢一定係好絕望先咁做架！如果佢有一絲希望，佢係…唔會揼低榮仔架！」
 
布正麗所說那句話的正是我在與安邦進行辯論比賽時所說的話。
 
我亦有幾分醉意，道：「係啊！所以妳唔好再自責喇！琛琛自殺唔關妳事，就算我地點拉住佢，都係鬥唔過推佢去絕路嗰一度力。」
 
布正麗哭道：「但係…我聽人講人自殺，死咗之後會落地獄架！琛琛在生前時，條命已經咁苦，死咗之後仲要落地獄，佢真係好慘啊！」
 
「邊個講…人死咗一定會…落地獄架？或者琛琛…已經返番舊時呢？」
 
「咩…舊屎啊？…你就舊屎…」
 
「我係話…返番…過去啊？返番去…無同妳…反面嗰陣啊！佢無…同湯仲謀一齊…所有野都…畀佢重新選擇啊！」
 
「…哈哈，好啊！無反面…但係你點知啊？你唔好…吹水…」
 
「…我…無吹水，我…之前…都係跳樓…係天台一跳，由三十三歲…變咗十五歲啊…」
 
「…三十三…減十五，即係…十八，你…依家再跳…十五…減十八，即係…」
 
啤酒罐散落一地，我和布正麗亦喝得醉醺醺，我背靠牆壁休息，她則爛醉如泥趴在床上，夢囈道：「…好啊！重新開始…無反面…好朋友…」
 
我比布正麗喝得少，酒醉還有三分醒，我以手按著牆壁借力，緩緩站起來。
 
我瞧著酣睡的布正麗，搖頭道：「平時扮晒大家姐，其實外剛內柔，性格衝動，做野唔理後果，但係重情義，聽到朋友有事，就命都唔要咁。妳啊！唔可以冷靜啲咩？邊個鍾意妳，就預咗同妳去擋，真係呢！命都短幾年啊！」
 
這刻的布正麗很美，我瞧見她眼角掛著一滴淚珠，憐惜地為她拭去，為她蓋上了被，柔聲道：「唔好喊，瞓醒就係新嘅一日。」
 
我走出了房間，到了洗手間洗臉，好讓自己清醒一下，當我再要進入布正麗的睡房時，屋外傳來了鎖匙碰撞的聲響。
 
未幾，門敞開，一名皮膚黝黑的中年人與我打了個照面。
 
那人一臉詫異，道：「你係邊個啊？仲咩入去阿麗間房啊？」