<第叄期實體書,經已有售>今年我三十三歲,回到了1998年 (校園、穿越、奇幻): Chapter　４１　聖誕歌唱比賽（上）

Chapter ４１聖誕歌唱比賽（上）
 
我訝異道：「咦！妳咁夜都未走嘅？」
 
呂靜宜反問道：「你夠係咯？」
 
「我因為扔書包單野畀人罰留堂，妳唔會又畀人罰留堂啊？」
 
呂靜宜抿唇笑道：「我本來喺到準備緊三日後嘅聖誕歌唱比賽嘅初賽，勉強揀咗Sammi首親密關係作為參賽歌曲，但係硬係覺得表現未如理想，咁咪去厠所洗個面，返嚟就見到你坐喺到自彈自唱，真係睇唔出你彈得幾好，係呢？你都未答我頭先嗰首係咩歌？」
 




「哦！伊申清嘅明年今日，我飲歌嚟架！」
 
「伊申清？明年今日？伊申清嘅ＣＤ我都齊曬，但係從未聽過有首歌叫明年今日喎？係啱啱派台架？」
 
糟！我一時口快，居然再次說出了不應該說的話，現在我應該怎去向呂靜宜解釋２００２年才派台的歌曲出現在１９９８呢？
 
沒辦法了，我唯有這樣解釋吧！
 
「哦！其實咁嘅，伊申清係我一個好鍾意嘅歌手，咁我好希望佢可以唱到依一首歌，妳頭先聽唔出我嘅唱腔好伊申清咩？」
 




呂靜宜恍然道：「哦！你咁樣一講我又覺得又幾似喎！咁即係依首歌，曲詞編都係你一手包辦喎？」
 
為了完謊，我只好艱難地頷首，道：「嗯！妳…都可以咁講嘅？」
 
呂靜宜現出有一分詫異兩分敬佩三分驚訝四分仰慕的神色，鼓著掌道：「好厲害啊？曲詞編都完美，係唱就爭啲？」
 
我聞言有點尷尬，雙頰有些微紅，輕咳一聲道：「多謝。」
 
我對不起植爺、對不起少霞、對不起暉洋，高登仔經常說的一句話：「搭時光機返到過去抄襲。」現在我真的應驗了這句話，我回到過去，成了一個文化的剽竊賊匪，把別人辛勞的成果據為己有。
 




呂靜宜續道：「成皇志，原來你咁厲害架，不如你又參加嚟緊嘅歌唱比賽喔！」
 
「嚇！要我喺全校人面前獻醜？我唔掂架？」
 
呂靜宜說服道：「咩獻醜嘖？頭先我見你自彈自唱，沉醉係音樂世界都不知幾咁型！」
 
我指了指自己，訝道：「我型？」
 
我很少聽到異性讚我型，除了有一次上班時，女同事見水機缺水，喚道：「型仔，去換水啦！」
 
呂靜宜俏臉微紅地點了點頭。
 
得到呂靜宜這種校花級的美女讚賞，我有點如在雲端的飄飄然感覺。
 
「咁你係咪參加歌唱比賽嘖！」




 
我搲著頭道：「咁啊！依層…」
 
霍然一種想法在我腦海浮現，就是在平安夜的學校禮堂，在管佳莉面前、在全校師生面前，自彈自唱出那代表我心跡的明年今日。
 
老實說，雖然我開始接受永遠也得不到管佳莉的事實，但管佳莉佔據我內心十多年，我並不可能立刻把她忘記，我就像一個剛經歷了大手術的病人，身體非常之虛弱，距離痊癒還有一段很漫長的道路。
 
我曾經看過一本書，內裡記述了一個母親，因為女兒一出生便夭折，她深受打擊，她的丈夫見狀，便要求醫生允許他們帶嬰屍回家一天，兩夫婦和嬰屍生活了一天，果真讓兩夫婦的精神得到治癒，慢慢接受了女兒逝去的事實。
 
逃避是解決不了問題，我要去面對我這精神創傷，最好的辦法就是在全校的師生面前，透過演繹這首明年今日，作出最深情的告白，我不是希望藉著這首歌曲可以打動管佳莉，讓她回心轉意；而是對多年來深愛著管佳莉的自己一個交代，為這橫跨了十多年、穿越了兩個時空的初戀劃下了休止符，將那個最完美的管佳莉、那份最單純、最真誠的情感封塵於記憶中。
 
我相信透過這一個舉動可以有效宣洩情感，讓我得到治癒，至於什麼名次獎項對我來說，並不重要。
 
我想通了一切後，道：「好，我想參加依個比賽，但係依家報名仲嚟唔嚟得切啊？」
 




「嗰日午飯，同學生會報名就得架。」呂靜宜又道： 「不如我地參加埋合唱組喔？之前我搵唔到partner，依家有你喺度，報埋名啦？」
 
「嚇！依層…」
 
我瞧見呂靜宜熱切期盼的目光，想到她在我低潮時，沒有和我割蓆，單憑這份情義，我已不想拂逆她的提議，而且有她當partner，應該最少有前三吧！
 
我道：「好喔！如果妳唔怕我拖累妳，咁我地參加啦！」
 
呂靜宜雀躍道：「YEAH！咁我地揀咩歌參加比賽啊？」
 
我想了想，道：「咁就揀會過去的喔？」
 
「嚇！會過去的？邊個唱架？」
 
我訝異道：「會過去的喎？魯樹安同車近近嘅經典合唱歌，妳唔會未聽過啊？」




 
呂靜宜瞪大了雙眼道：「我真係未聽過喎？等陣先，依首歌係咪又係你想作畀魯樹安同車近近嘅歌？」
 
我在心中叫苦，想道：「乜依首歌又未面世嘅咩？我真係記唔起依首歌係幾時推出街喎！今日我究竟攪咩啊？」
 
我迴避呂靜宜的目光，道：「不如我自彈先唱一次畀妳聽下，睇下合唔合妳心意先。」
 
我十隻手指在琴鍵上律動，響起了暉洋作曲的「會過去的」的旋律，我唱出歪雲所寫的歌詞：
 
「早知一定與你分手最愛往往難以相廝守
愛過你之後我怕沒然後…
…沒有這犧牲怎可讓你我得救
每個劫數時間會善後…
…從前共你講不要分別不要歸去明明還流過一點眼淚…」
 




一曲唱畢，呂靜宜現出驚為天人的神色，讚嘆道：「天才，你真係一個天才，你未夠十六歲，點可以作出咁好嘅曲？同填出咁靚嘅詞？」
 
我對呂靜宜的稱讚感到受之有愧，我轉移話題，道：「有無紙同筆，不如我寫低啲歌詞，講畀妳聽我唱邊段，妳唱邊段。」
 
我抄寫了整首「會過去的」的歌詞，指著第一段，道：「第一段妳唱先。」
 
呂靜宜皺著眉道：「等陣先，早知一定與你…跟住係咩啊？」
 
我聞言感到有點尷尬，我的字跡一向如狂草一樣，曾被不少老師投訴過看不清我所寫的字。
 
於是我讀出了歌詞，呂靜宜則作出筆錄。
 
花了一些時間，呂靜宜補寫了「會過去的」的整首歌詞，她的字體端莊秀麗與我那鬼劃符的字跡形成了強烈的對比。
 
「係呢？你係咪作咗好多歌架？有無啲歌啱我唱架？其實我揀嗰首歌好似唔係好適合我咁？如果你有啲適合我嘅歌，我想轉。」
 
今天，我已經侵犯了兩次知識產權，正確一點來說，應該是知識文化的逆權侵佔；但正所謂一件污、二件穢，我亦不介意當第三次的文化竊匪，於是我微微點頭道：「我諗依首歌應該啱妳唱。」
 
因為這首歌挺冷門，加上先前我又不是經常演繹，所以我想了想，彈奏了幾次，終於彈奏出這首歌的melody，我邊彈邊唱道：
 
「～在那天寧願乾旱地死不沾一勺水
逃避釀成眼淚…
…曾將身體髮膚隨便北風宰割～」
 
我將胡姬妮的「生命樹」彈奏了一次，我瞧見呂靜宜用雙手摀住嘴巴，帶點激動道：「點解你可以咁厲害嘅？三首歌風格都唔同，你究竟個腦裝咗啲咩啊？可以填出咁靚嘅詞嘅？」
 
我心想：「緊係唔同風格啦？三首歌嘅詞出自三個唔同嘅作詞人。」
 
呂靜宜不斷地給予原本不屬於我的讚譽，讓我羞愧得臉紅耳赤。
 
呂靜宜問道：「係呢？依首歌你原本打算寫畀邊位歌手架？」
 
 
呂靜宜這個問題再次考起了我，這首歌是由胡姬妮脫離少女組合迷你飯煲後，獨立發展的作品，現在這個時候連元祖少女組合九個飯煲都未正式面世，我亦不知道現今胡姬妮身在何方，我真的不知怎樣去回答呂靜宜這個問題。
 
我硬著頭皮胡謅道：「嗯，依…依首歌，我無諗過作畀邊一位歌手，上年聖誕歌唱比賽，我聽過妳嘅歌聲，我覺得依首歌由妳去唱…係好適合架！」
 
呂靜宜訝道：「你…你嘅意思係依首歌寫畀我嘅？」
 
「嗯！妳覺得可唔可以？」
 
呂靜宜點頭道：「雖然我未唱過，但係頭先我聽過個melody就覺得好適合我，我想到時用依首歌參加比賽。」
 
其實我覺得呂靜宜的唱腔、音域、聲線與胡姬妮有六七分相似，所以我才在呂靜宜面前奏出這樂曲。其實我個人認為呂靜宜在技巧、高音、假音方面比九個飯煲中公認唱功最好的胡姬妮還要更勝一籌。
 
我道：「妳覺得啱妳就最好喇！但係三日後就係初賽，妳依家先換歌，時間上好似好倉促，怕唔怕啊？」
 
呂靜宜沈吟了片刻，喃喃道：「我真係覺得我同首歌好夾啊！好想將依首歌做參賽作品啊！點算好呢？」
 
呂靜宜霍然間像想通了什麼一樣，道：「我諗住兩手準備，首先趁依幾日記熟、唱熟首歌，到咗初賽嗰日我應該發揮到六七成，離平安夜嘅決賽仲有一個星期，到時我應該可以駕馭到，如果到咗初賽嗰日同首歌未夾，我就用番本來嗰首歌參賽，就咁決定啦！」
 
平時的呂靜宜嫻雅文靜，話也不多說半句，像個小家碧玉的知性文青；但當她談起音樂時，我隱約從她眼內看到一團火，此刻的她整個人像發出光芒一樣，非常有熱誠和幹勁。
 
此時，校工滿叔敲門道：「餵！兩位同學，依家六時半喇！你地唔放學，我都要收工架。」
 
和呂靜宜聊天、唱歌不經不覺間已經到了六時半，我見呂靜宜走出音樂室時現出落寞的神情，我臆測她是想把握時間去練好那首「生命樹」，但已經到了閉校時間，那亦是沒辦法的。
 
我們離開了學校，我向呂靜宜揮手道別：「妳喺嗰邊落和宜合道搭車，我行依邊落光輝圍，拜拜！」
 
呂靜宜拉著我的衣袖，道：「等陣啊！ 」
 
我別過頭來瞧著她，問道：「咩事啊？」
 
「成皇志，雖然我地係競爭對手，但你會幫我嘅？」
 
我明白呂靜宜的意思，我笑道：「我知妳心急，但係學校都關咗門，妳唔係想我同妳偷偷潛返學校去練歌啩？妳諗都唔好諗啊？人地話吳林紫娣以前係亂葬崗嚟！夜晚陰氣重，嗰啲野好猛架！」
 
呂靜宜現出沒好氣的神色，道：「緊係唔係叫你依家返去啦！」
 
「等等先，妳唔係要我同妳練歌咩？如果唔係返學校，咁去邊度啊？練歌起碼要有個唔畀人騷擾嘅地方、有鋼琴或者結他。」
 
呂靜宜道：「你講得啱，依三樣野我屋企都有。」
 
我膛大雙目，指著呂靜宜道：「妳…妳嘅意思，唔係要我依家上妳屋企啩？」
 
「係啊！你唔會唔得啩？」
 
「嚇！咁突然…我未有…準備喎！」
 
呂靜宜奇道：「你講野奇奇怪怪嘅？我屋企有鋼琴、有結他，你仲要準備啲咩啊？行啦，２３５埋站喇！」
 
呂靜宜握著我的手腕，拉著我向巴士站跑去。
 
我瞥了呂靜宜的手一眼，真想不到她會這麼大膽？
 
我們坐上了開往荃灣的２３５號九巴，我以手機致電給阿婆，告訴她我今天不來吃晚飯。
阿婆的聽力不太好，我重覆了數次，她才聽得明白，結果我被阿婆臭罵了一頓，她道：「你個衰仔，唔返嚟食飯，又唔早啲打電話返嚟！煮咗你米，又嘥曬！你真係嘥曬啲米飯啊！」
 
「哎唷！阿婆，我都係啱啱先知返唔到嚟食咋！下次我會早啲打番嚟架喇！係咁啦！拜拜！」
 
呂靜宜以手掩著嘴巴偷笑，道：「電話嗰個係你婆婆啊？佢鬧你鬧得好好笑啊！」
 
我白了呂靜宜一眼，道：「妳仲笑，我畀阿婆鬧都係因為妳，原本我已經返咗去食飯喇！嗱！我唔理啊！妳叫我陪妳練歌，今晚餐飯無得走啦！我唔要麥噹噹架，起碼去老人雞叫個桶餐。」
 
「食咩炸雞喔！咁熱氣，到時比賽失聲就弊喇！」
 
「嚇！呂大小姐，妳唔係諗住老人雞都慳番唔請啊？」
 
「飯實要食，我屋企煮咗飯，我媽咪煮餸好叻架！你嚟度加雙筷嘖！」
 
我訝道：「妳媽媽喺屋企？」
 
呂靜宜點頭道： 「唔止我媽媽，仲有爹地、阿哥、Daphne同埋Mariana。」
 
「嚇！乜咁齊人啊！Daphne同埋Mariana喺妳邊個啊？」
 
我初時還以為只有我和呂靜宜兩人獨處在她的家中，想到待會我要面對她的家人，我便感到有點緊張。
 
「佢地係我屋企請嘅菲傭，我六七歲嗰陣已經喺度喇。」
 
「嚇！菲傭都有兩個？妳間屋好大架？」
 
「又唔係嘅，爹地話Daphne離鄉別井好慘，就請埋Mariana陪佢。」
 
我豎起拇指讚道：「嚇！世伯真係唔話得，直頭可以叫得上做良心僱主，連工人嘅心理狀況都照顧埋。」
 
「我地從來無當Daphne同Mariana係工人架，我地當咗佢地係一家人嚟。」
 
我笑道：「打妳地工都幾幸福，我都想做啊！仲請唔請人啊？」
 
呂靜宜笑道：「咁你識做啲咩家務喔？」
 
「吸塵、洗衫、煲飯、煎隻蛋都得嘅，但妳叫我煲湯、煮餸就真係唔得喇，我阿婆煮餸好好食架，佢成日話佢幾歲就要落田幫手，十歲未夠就煮曬成家人嘅飯，話我咁大個人連炒碟菜都唔掂，話我好無用。」
 
呂靜宜幽幽地嘆了一口氣，道：「你點會叫無用啊！我就真係無用喇！細細過就學彈琴、唱歌，畀歌唱老師讚幾句就以為自己好有天份，但係頭先聽到你作嘅歌，我先知道咩叫天才。」
 
「妳…真係唔好再讚我喇！其實我…」
 
「睇你成塊面紅曬咁，人地讚你，你會怕醜？」
 
我不知怎去向呂靜宜解釋，我盜用了別人的作品，得到了不屬於自己的讚賞，我是感到羞恥和不安的。
 
呂靜宜續道：「不過我頭先見你彈琴嗰陣，啲指法唔係咁正確咁。」
 
此時，２３５號九巴到了力生廣場門口，下了車，我跟著呂靜宜走。
 
步行了十分鐘，我們到達了愉景新城。
 
呂靜宜的家在頂層的一個複式單位，聽她說她的家面積達二千多尺，即是我石梨貝的家的八倍面積。
 
她以鑰匙打開了大門，一名菲藉女子以半鹹淡廣東話道：「小姐，返嚟喇！」
 
呂靜宜應道：「係啊！Daphne。」
 
此時，另一名菲藉女子上前為呂靜宜遞上了拖鞋，呂靜宜道：「Mariana，唔該曬！」
 
Mariana說著半鹹淡的廣東話問道：「小姐，依位係邊個嚟架？」
 
「依個我同學嘅架！佢今晚會喺度食飯架！」
 
此時，一把綿韌甜美的聲音響起，道：「baby，返咗嚟喇！」
 
我循聲瞧去，一名黛眉如畫、杏眼如星，體態曼妙無比，步姿裊裊依依，端的是一副風情萬種模樣，驟眼看最多三十歲，但那騷在骨子裡的女人味，讓我覺得她實際年齡應該並不止三十。
 
那女人瞧見我，微微吃驚，道：「靜宜，你帶咗朋友返嚟啊？」
 
呂靜宜應道：「媽咪，佢係我同學嚟架，佢叫成皇志。」
 
我聞言感到詫異，眼前這個有七八分像水野朝陽的女人，居然就是呂靜宜的母親？外貌那麼年輕怎麼可以誕下呂靜宜？等等，呂靜宜還有一位哥哥，按照這樣推算眼前這女人隨時有四十歲以上。
 
我微微點頭道：「Hi， Auntie。」
 
呂Auntie微笑道：「喔！你好啊！你叫成皇志啊！靜宜喺我面前提起過你幾次架！我仲以為係好似吾言早嗰啲高大靚仔嘅類型添！不過都叫五官端正。」
 
我聞言不禁瞥了呂靜宜一眼，呂靜宜兩頰各昇起了一片紅暈，嗔道：「媽咪啊！」
 
呂Auntie笑道：「baby ，比上一次有進步架喇！依個好過上次嗰個大雄，下次帶個出木杉番嚟！」
 
我趁著呂靜宜母女聊天的時候，偷偷地打量了呂Auntie一眼，呂Auntie身材很兇，上圍目測最保守估計達f cup，再加上一條沒有多餘贅肉的黃鋒腰，豐盈而緊緻的長腿，家有這樣的尢物作嬌妻，我相信呂世伯天天上班應該都會精神不振，希望天天早點回家。
 
我微微一笑道：「Auntie，其實我地喺嚟練歌，因為我地參加咗歌唱比賽，時間倉促，所以要上嚟打擾妳，唔好意思。」
 
呂Auntie聞言微微現出錯愕的神色，然彼笑道：「喔！原來你都係玩開音樂架？嗯，好喔！大家都有共同嘅嗜好，好投契哦！」
 
「我都係玩票性質嘖，呂靜宜先係高手嚟！」
 
呂Auntie笑道：「唔係我讚自己個女啊！靜宜喺音樂方面好有天賦，佢上年已經考到鋼琴嘅演奏級喇！好多音樂老師都讚佢。」
 
呂靜宜道：「媽咪，唔好再讚我喇！成皇志，先係真正嘅音樂天才。」
 
呂Auntie現出喜出望外的神色，道：「真係架？乜原來成皇志，你係一名音樂才子嚟架！」
 
今天我接連被兩名大小美人謬讚，雖然讓近來跌至谷底的我重拾了少許自信，可是一而再得到不屬於我的讚美，我內心的罪惡感卻同時增加。
 
我轉移話題道：「Auntie，頭先第一眼見到妳，妳唔講我仲以為妳係呂靜宜家姐添！」
 
呂Auntie笑逐顏開道：「嗨嗨，成皇志，你真係識講野，把口浪過油，平時係咪講好多甜言蜜語咁氹我地靜宜啊？」
 
呂靜宜嗔道：「媽咪啊！我地係朋友嚟咋！」
 
呂Auntie捏了呂靜宜的臉捏，道：「細路女，面皮嫩，媽咪唔講喇！入去準備埋晚飯，等爹地返嚟就開飯啦！成皇志，你都係度食飯啦！」
 
「我上嚟正要試下Auntie嘅手勢，呂靜宜話Auntie你煮嘅餸好好食。」
 
呂Auntie風情萬種地甜甜一笑道：「我保證一定食到你舐舐脷。」
 
呂Auntie走回廚房後，呂靜宜道：「 BAND房喺二樓，你跟我嚟喔！」
 
呂靜宜領我走上了一條螺旋形的樓梯，到達了第二層。
 
這讓我想起了小時候，我騙阿興上格床的天花有度暗門，打開了會有一個遊戲室，內裡擺放了超任和世嘉，那時候天真爛漫的他很易騙。
 
「我媽咪佢成日講笑，無嚟正經，你唔好理佢啊！」
 
我笑道：「我睇得出妳地關係好好。」
 
「嗯，我地關係好似朋友咁，所以我有咩都同佢講嘅！」
 
我試探道：「Auntie都見過戴建雄？」
 
「嗯，我同佢講同戴建雄分咗手，佢驚我做傻事，要我成晚同佢睇碟，我話眼瞓都唔畀我返房瞓，其實我都無唔開心。」
 
我聞言笑了笑，道：「聽妳咁講，Auntie真係好鍚妳。」
 
經過一個偏廳，我瞧見有一部投影機，還瞧見一部剛推出不久，世嘉最後出產的家用機dreamcast。
 
我不禁上前打量一番，問道：「咦！呂靜宜，乜妳都鍾意打機咩？」
 
呂靜宜道：「麻麻地啦！我多數都係睇我阿哥打嘅，部機係佢上個月託人去日本買嘅。」
 
我撫摸著ＤＣ那個笨重的手掣，喃喃道：「真係令人懷念啊！ＤＣ有好多正ＧＡＭＥ，莎木１、２、生化聖女密碼、人面魚、 PSO等，不過可惜…」
 
「可惜啲咩啊？」一把男聲響起。
 
我別過頭去，一名身形高大、皮膚白晢、留有一頭浩南哥長髮，有幾分馮德倫影子的青年站在我身後。
 
呂靜宜喚道：「哥哥。」
 
 
=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl