<第叄期實體書,經已有售>今年我三十三歲,回到了1998年 (校園、穿越、奇幻): Chapter　３７　禍不單行

Chapter ３７禍不單行
 
從今放學後不用到吾萬達物流公司上班，我變得很悠閒，可能之前過於去強迫自己發奮，現在身心亦有點兒累，儘管被爸爸拿了兩萬多元，但我還是儲下了三四萬的私己錢，這更有理由讓我把步伐放慢下來，不去找兼職，去做回一個中四學生該做的事情。
 
之前我只忙著賺錢，已經有一段時間沒有去圖書館，在中國文學、中史的學習進度停滯不前，再加上還有不足一個月便到中期試，為了可以達成老馮給予我的目標，我還是開始略為認真唸一下書。
 
當我一步入學校的圖書館，便瞧見了楊鳳瑤、呂靜宜和柳豔三人，我坐下了那張空出來的椅子，本來埋首在書本中的楊鳳瑤抬起頭，瞥了我一眼，詫異道：「咦！稀客喎！」
 
柳豔現出驚喜的神情道：「成皇志，你今日唔駛返工咩？」
 




我搔著頭，道：「我應該有排都唔駛返，我畀人炒咗喇！」
 
楊鳳瑤格一聲笑道：「成皇志，我一早批你做唔掂，不過人地可以容忍到你咁耐都算好人。」
 
我搖了搖頭，笑了笑道：「其實成件事唔係妳咁諗囉！我畀人炒嘅原因唔係工作能力，而係一啲我控制唔到嘅問題。」
 
楊鳳瑤白了我一眼，道：「死雞撐飯蓋。」
 
我懶得去和楊鳳瑤爭辯，轉向柳豔問道：「學姐，中國文學嘅進度去度邊度啊？」
 




柳豔翻了翻書本，道：「你應該落後咗兩課。」
 
「哦！兩課好易追返嘖！」
 
楊鳳瑤笑道：「成皇志，你唔單止中國文學落後我，數學都落後我啊！你早兩個月前係咁奚落我，我相信到中期試個成績出咗嚟，你會後悔之前笑我。」
 
我哈哈一笑，道：「嘩！大佬，妳唔係見我畀人炒咗，特登講個笑話畀我聽，想我開心番啊？」
 
楊鳳瑤冷哼一聲，道：「今時唔同往日，我已經唔係吳下阿蒙，你唔信，就問下靜宜啦？」
 




我瞧向呂靜宜，她點頭道：「鳳瑤好畀心機，進步咗好多。」
 
楊鳳瑤揚了揚下巴，道：「點啊！聽到未啊？」
 
「哦！呂靜宜不嬲好人事，講說話唔去得咁盡嘖！」
 
楊鳳瑤嗔道：「可惡，我唔同你一般見識，到時你就後悔。」
 
「嗱！既然咁有信心，不如我同妳賭返鋪喔！」
 
楊鳳瑤斬釘截鐵道：「好，我同你賭餐lunch，邊個數學低分過對方，就請對方食lunch。」
 
「等陣，唔好心急，賭咁細，邊好玩架！要賭就賭大啲。」
 
楊鳳瑤有點詫異，道：「你，你想賭幾大？」




 
「嗱！不如咁啦！我數學讓妳十五分，最後出嚟嘅分數，我多唔過妳十五分，我就輸；相反，我多過妳十五分，妳就輸，輸嗰個要聽嬴嗰個嘅說話，為期一個禮拜。」
 
楊鳳瑤聞言現出踟躕之色，呂靜宜則躍躍欲試，道：「嘩！讓十五分，我又玩。」
 
我道：「好啊！妳玩嘅話，調轉妳讓我十五分。」
 
呂靜宜聞言扁了扁嘴，她慫恿道：「鳳瑤，應承佢啦！我幫妳操多啲數，實可以拆佢招牌。」
 
楊鳳瑤聞言有點心動，她道：「等陣先，你個死人頭，萬一畀你贏咗，你會要我做啲乜架？」
 
「嚇！講出嚟邊好玩架，總知一定唔會係犯法野，但都係有啲難度，例如用箱頭筆畫到妳成個京劇大師咁，再要妳帶狗鏈，拖住妳遊街示眾咁上下囉！」
 
楊鳳瑤聞言為之氣結，杏目圓瞪，道：「你變態架？」
 




「打個比喻嘖！我讓妳成十五分，妳對自己咁有信心，話唔定係妳拉住我遊街示眾呢？」
 
「哼！我先唔會咁變態啊！哈哈，不過要你扮狗都幾好，挫下你氣燄，等你唔好以為自己好叻。」
 
「咁！成交架喇！在坐兩位做見證。」
 
柳豔嗅到我與楊鳳瑤之間的火藥味，連忙轉話題道：「就嚟聖誕，聖誕有歌唱比賽，之後放完假返嚟考試，考完試，再跟住係聯校辯論比賽，之後放農曆年假，返嚟就陸運會，然後放復活節假，過多排就考期終試，嘩！嚟緊有好多活動啊！」
 
楊鳳瑤道：「學姐，妳真係諗住參加聖誕嗰個歌唱比賽啊？」
 
柳豔點頭，道：「係啊！我諗住唱鄭秀文首默契參加比賽。」
 
楊鳳瑤道：「嚇！學姐，妳係咁多人面前唱歌，妳唔驚咩？ 」
 
柳豔道：「試下咋嘛！驚咩喎！鳳瑤，不如妳又一齊參加，如果妳又參加，我地兩個可以報埋合唱組。」




 
楊鳳瑤猶豫道：「如果有妳陪，我都可以參加合唱嘅！」
 
二人談起了歌唱比賽，我瞧見熱愛音樂的呂靜宜卻一言不發，便問道：「呂靜宜，妳仲未揀啱歌啊？下個星期就喺禮堂舉行初賽喎！」
 
呂靜宜一副悶悶不樂的樣子，搖著頭道：「未啊！過多兩日仲未有心水，就喺Sammi、gi gi、Kelly裡面求其揀一首，唉！之前仲諗住參加埋合唱組添！睇嚟都係無望喇！」
 
其實我不太明白呂靜宜的藝術家脾性，因為我認為只要她參賽的話，其他人最多只能競逐亞軍，她又何必這麼執著，定要把事情臻至完美呢？
 
由於多次婉拒了鋤ＤＥＥ會三大長老邀請我的ＤＥＥ聚，我開始感到他們在有意無意間疏遠我，儘管我心境已經是三十三歲，思想成熟得足以對抗這些排擠和歧視，但人總會有空虛寂寞的時候，人總不能把所有時間均花在有意義的事情上，人總是會把部份時間投放在無意義的事情上，所以我明知道與他們鋤ＤＥＥ只是「塘水滾塘魚」，面對他們鍥而不捨的再三邀約，我這次選擇了單刀赴會。
 
這天放學後，我們便上了郭左傑的家。
 
黎早強口氣囂張道：「大鳩志，難得你隻縮頭烏龜出山，等我炒到你極速收山啦！」
 




我冷笑一聲：「嘿嘿，垃圾。」
 
黎早強怒道：「大鳩志，你講邊個垃圾啊？」
 
「黎早洩，唔好誤會啊！我依番說話唔係針對你一個。」我掃視了姚智風、郭左傑一眼，再道：「我係話在坐各位統統都係垃圾。」
 
姚智風撥了額上的頭髮一下，食指前後晃動道：「就憑你依句說話，我要炒到你依個星期連飯都無得食。」
 
郭左傑哈哈一笑，道：「大鳩志，通常啲人口出狂言，最後都會輸得好慘架。」
 
「唔好咁多嗲，快啲派牌。」
 
黎早強派牌，我一看，立時嚇了一跳，三條Ｋ ，９、１０、Ｊ、Ｑ、Ｋ同花順，還有一條小蛇，如果是十三張的話，已經贏盡七注了。
 
姚智風嚷道：「快、快、快，階磚三出先，階磚三係邊個度？」
 
郭左傑笑道：「姚少，咁心急，揸緊靚牌啊？」
 
姚智風嘿嘿了一聲以示回應。
 
我心想：「依兩條柒頭表情多多，應該都係攞緊奇牌。」
 
黎早強道：「階磚三係我到唔好催，依家出，三條三。」
 
我是黎早強的下家，輪到我出牌，我打出了三條Ｋ，郭左傑嘿嘿一笑道：「唔打你，留番姚少打你。」
 
姚智風撥了撥頭髮，咬牙道：「大鳩志，我忍你。」
 
我詫異道：「係真唔係啊？咁樣益我，我諗依條順，你地都ＰＡＳＳ架啦？」
 
當我打出了９、１０、Ｊ、Ｑ、Ｋ的黑桃同花順時，他們三人均瞠目結舌，黎早強指著我，道：「你條仆街，剩低嗰五隻唔會又係一堂啊？」
 
「嚇！今次咁醒嘅黎早洩，咁都畀你估到，唔係好大，一條蛇仔嘖。」
 
姚智風把啤牌扔在地上以示發洩，道：「屌，揸四條ＤＥＥ都畀人炒十三。」
 
郭左傑訝道：「嚇，你有四條ＤＥＥ，頭先做咩唔打佢啊？」
 
姚智風沒有理會郭左傑，向我催促道：「你贏咗，快啲洗牌啦！」
 
今天的手風太順，三十五分鐘後，他們每人均輸過百隻，雖然只是玩兩毫子一隻，但在對當時沒有收入的中學生來說，已經是一餐午飯的價錢。
 
黎早強道：「唔玩鋤ＤＥＥ喇！轉玩十三張，大鳩志，你贏咁多，你打莊啦！」
 
「咁啊！好啦！你地買幾多？」
 
姚智風道：「五蚊七。」
 
郭左傑詫異道：「嘩！姚少，你賭咁大啊？」
 
姚智風道：「緊係，唔係點追數啊！」
 
黎早強道：「咁我都五蚊七啦！」
 
郭左傑的視線在姚智風與黎早強兩人身上遊移，然後猛一咬牙道：「咁我都玩五蚊七注啦！」
 
不知是我手風太順，還是他們運氣太差，每一鋪我所拿的牌都很整齊，段段有，再偶然拿一兩鋪奇牌，黎早強首先投降，他道：「大鳩志，都唔知你係咪養咗鬼仔，咁旺嘅，輸成百蚊，我止蝕算喇！」
 
郭左傑道：「我都夠皮喇！我約咗盛衣貝，依家要出街。」
 
我瞧見姚智風心有不甘的模樣，便道：「嗱，一係咁喇！大家玩咗咁耐都肚餓喇！我將贏返嚟嘅錢請大家落ＯＫ食鮮奶球再加支熱麥精喇！」
 
黎早強道：「嘩！你贏我地每人成舊水，好似出手低啲喎？」
 
「ＯＫ，咁再請埋你地聽日lunch，金鋒定寶石任你地揀，咁可以啩？」
 
黎早強道：「嘩！大鳩志，你轉性啊？咁大方？」
 
我道：「deal or no deal」
 
他們三人異口同聲道：「deal啊！」
 
在油麻地住了三天，不單我感到不便，連媽媽的生活亦受到影響，我聽到她坐在床邊通電話，她以為我睡了，壓低聲音道：「唔得啊！依排阿志喺到啊！你過一排先上嚟喔！」
 
媽媽和爸爸離婚後，各有各的生活，其實當兒子的我並不會反感，只要他們開心便可以了，反而我慶幸他們可以找到個伴，展開新的生活。
 
他們的伴侶，我亦見過（指２０１６年回來之前），媽媽那個親密好友森哥，我亦挺熟絡，經常一起吃飯；而爸爸方面，身邊亦有三四個女人在他身邊周旋，我不知道為何像他這副德性的人，居然會這麼受女人歡迎，可能這就是男人不壞，女人不愛吧！相比起來，我這個當兒子的，真的是非常不肖。
 
媽媽對我說：「阿志，我同你老豆傾過架喇！依度地方咁細，而且你讀書嗰頭都喺係石梨，你搬返去住好啲，佢話嗰件事，佢唔會再提。」
 
我有點慍怒道：「嚇！佢偷咗我啲錢，講到佢好似好大量原諒我咁！」
 
「依個問題，我都有問過佢，佢話肥佬陞會每個月，逐啲畀返你。」
 
既然他們都這樣說，我真的沒有再不回去的理由，我道：「咁…我喺到住多兩日就返去啦！」
 
這天ＰＥ堂，我們到了尚天隔鄰的七人石地足球場踢足球，短短的三十分鐘，未足以讓我們灑盡汗水，我們均有點意猶未盡，姚智風提議放學後再去足球場跟隊，這次我並沒有力排眾議，而是跟大隊去球場，我想踢足球是帶氧運動，總比鋤ＤＥＥ、十三張這些「塘水滾塘魚」的活動有意義得多。
 
霍去登道：「大鳩志，無同你踢一排，勁咗喎，踢法成個阿祥咁，帶得、傳得、射得，以前踢前鋒，依家踢後衛都有波入。」
 
「緊係，我依啲帶刀後衛，踢法成個沙治奧拉莫斯咁。」
 
霍去登詫異道：「沙治奧拉莫斯？踢邊隊架！你唔係話自己係巴迪高咩？」
 
我又一時得意忘形，說出了與世界相悖的話，我可以說自己是希亞路、馬甸尼、蘇甘寶、杜林其中一人亦可以，但這時候的沙治奧拉莫斯只是一個名不經傳的青年軍成員。
 
幸好郭左傑在此時插言，道：「大鳩志，盛衣貝話每日朝早都見到你跑街，勁喎！」
 
我有點囂張，道：「郭左傑，我依家只係回復顛峰狀態嘅四成功力，當我覺醒重拾１２０％嘅究極狀態，你連尾燈都見我唔到啊！」
 
郭左傑哈哈一笑，道：「大鳩志，你近排講野風趣咗咁多嘅，係咪行緊昇爺路線啊？」
 
我們來到了球場，球場內有一班尚天的學生在一邊半場射龍門，場邊有幾個五釀丸、北葵的學生，我們見狀連忙佔領球場的另一邊，陳依官向那群尚天的學生喚道：「餵！鬥唔鬥波啊？」
 
「好啊！」
 
我們排出的陣形：
 
陳依官（門將）
郭左傑（左閘）我（中堅）霍去登（右閘）
陸泳祥（中場）
林海原（左翼）姚智風（右翼）
 
基本上這個陣形差不多是４Ｄ班的最己陣，之前我是和姚智風打雙箭頭的，但我改變了踢法，陸泳祥便參與更多的進攻，有時何敏傑或黎早強亦會來客串一下。
 
對方先開球，當中堅的我提場道：「餵！姚少、阿原，唔好兩個迫一個啦！左邊嗰個無人睇啊？」
 
果然，那名盤球的球員把球傳給左方的球員，然後向前走位，我嚷道：「唔好跟波，跟人，甩咗喇，姚少跟返，阿原迫返帶波嗰個。」
 
對方大腳長傳，皮球飛向我們的右後方，對方球員急奔，但距離較近的霍去登應該先對方一步把球搶去，我再嚷道：「ＥＡＳＹ，霍去登攞定先。」
 
豈料，霍去登把球按甩，皮球彈前給對方，對方盤球突襲，我趁對方大推的時候食位，把球清出場邊。
 
我拍著手道：「餵！認真喇！唔好夢遊。」
 
郭左傑上前助攻，給對方打突撃，我嚷道：「餵！閘呢？上前助攻，畀人攞咗波，就快啲回防啦！」
 
陸泳祥盤球時，我嚷道：「餵！姚少、阿原唔好望啦！走入去，幫阿祥拉開啦！」
 
陸泳祥作出中距離射門，把球打偏，我嚷道：「唔好浪射，姚少個位，你傳入去，佢就單刀啦！」
 
林海原盤球過了一個對方球員，我嚷道：「右邊空曬喇，畀啦！欸，你又死扭，人地都回曬防喇！」
 
姚智風盤球時，我道：「餵！唔好死去，去唔到傳返後，唉！你去埋啲死位，又何苦呢？你…仲帶埋出界。」
 
對面一個突擊，對方球員快放，我嚷道：「keeper，出嚟清波，快啦！唔係就要開追悼會啦！」
 
對方球員扭過了陳依官，射進了空門。
 
「唉！依官，你快半秒出嚟都清到波啦！」
 
此時，牆邊有人喊道：「跟隊。」
 
輸了一球的我們無奈地走出球場，我道：「哦！一分好快嘖！不過下場，我地啲位打番好啲，唔好咁亂，對面好渣姐，我地輸埋啲大意波。」
 
霍去登一字一頓地道：「唔—踢—喇！」
 
我詫異道：「嚇！踢咗廿分鐘唔夠就唔踢？好無癮喎！」
 
我打量其他人一眼，發現其餘六人均神色不善，林海原不滿道：「大鳩志，你咁叻你踢埋佢啦！」
 
陸泳祥沉著臉道：「係囉！你自己一個人跟隊囉！」
 
姚智風亦扳起了臉孔，道：「大鳩志，你頭先把口未停過，你用把口踢波架？」
 
我道：「唔係，我只係…」
 
霍去登道：「唔踢喇！小西上你屋企打拳皇啦！」
 
未幾，他們全都走了，我瞥了球場一眼，自己亦離開了，雖然我還想繼續踢，但一個人是不能夠跟隊的。
 
我多次致電到石梨貝的家，都是沒有人接聽，我並不是找誰，而是希望家裡沒有人，可以讓滿頭大汗的我回去洗澡。
 
我收拾好東西後，便從安捷街徒步走回家，回想剛才自己的行為，亦覺得惹人討厭，自己之前亦非用嘴巴踢球的人，可能最近諸事不順，個人脾氣有點暴躁吧！
 
當經過石梨街時，有人從後踢了我一腳，這一腳踢得我有點兒痛，我回頭瞧去，一名一頭金髮、不足一米六的北葵學生站在我五步處。
 
我感到詫異，我並不識認識對方，依稀記得剛才我從球場離開時，他便已經跟隨在我身後，他為什麼突然襲擊我呢？
 
正當我想開口問個究竟時，他搶先一步開口，道：「我屌你老母啊！」
 
他問候完我娘後，立時轉身狂奔。
 
本來今天踢足球被人排擠，我已經不爽了；然後被不知從那裡冒出來的金毛豆丁踢了我一腳，我更加不爽；他踢完我一腳，還問候我娘，我更加是極度不爽。
 
我怒喝了一聲：「仆街！」後，立時朝他的身影追去。
 
我心想：「你個死臭飛，畀我捉到你就剃光你個死人頭，再擰甩你個屎坑嘴。」
 
我揹住書包，手挽紙袋，而對方輕裝上陣，儘管我已經拚命追趕，還是讓他領先我三四個身位。
 
他走到了８座，拐了一個轉角處，當我亦跟隨其後轉個彎時，我倏地收步。
 
那名金毛的北葵學生氣喘噓噓地瞧著我，他嘴角上揚現出了一個姦計得逞的笑容。
 
我神色凝重地瞧著他身後的四人，四人中的其中一人，是一張熟悉的臉孔，他就是南乳。
 
手持木棍的南乳，眼神流露出仇恨，嘴角扭出了一個猙獰的笑容。



=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl