<第叄期實體書,經已有售>今年我三十三歲,回到了1998年 (校園、穿越、奇幻): Chapter　３０　助人助己（上）

Chapter ３０助人助己（上）
 
這天放學，我約了阿興和榮仔到了葵芳的創藝卡拉OK，我向阿興和榮仔分別發放了出售史露比所得的花紅，道：「依度係成個計劃裡面純利嘅一成，你地各得一半。」
 
阿興打開了信封，喜道：「阿哥，依度成二千幾蚊，我可以買多部ＧＡＭＥ ＢＯＹ ＣＯＬＯＲ啊！」
 
榮仔亦喜道：「多謝你啊！志哥，你真係好叻啊！成日都咁有計，我都好想有個咁叻嘅哥哥啊！」
 
阿興搭著榮仔的肩膊，道： 「榮仔，我地係好朋友嚟架嘛！我阿哥實睇住你嘅！」
 


其實榮仔在這次計劃裡充當的角色比阿興重要得多，阿興極其量只是作為榮仔的副手，但我把他們的報酬對分成一半，榮仔並沒有怨言，加上我覺得榮仔醒醒目目，將來定必有前途，我認為阿興身邊有這樣的朋友真的是百利而無一害，所以作為哥哥的我應該為阿興作出打算，繼續加深彼此間的交情。
 
我道：「榮仔，你係阿興最好嘅朋友，如果你以後有啲咩困難，只要你覺得我能力範圍內解決得到，你即管開聲。」
 
榮仔感動道：「多謝你啊！志哥！」
 
「欸！男人老狗，唔好流馬尿，嚟唱歌。」
 
阿興拿起了咪高峰，道：「咦！係浩南哥首友情歲月，榮仔，我地一齊唱喔！」
 


我拿著遙控器，揀選歌曲，撳到了伊申清的歌曲選單，發現全都是舊歌，沒有我的飲歌——明年今日，這亦難怪，現在是１９９８年，伊申清只是出了五六隻碟，他還只是嶄露頭角，香港樂壇仍舊是由四大天王所統治，於是我點選了一首叫我甚麼都沒有的經典歌曲。
 
阿興道：「阿哥，乜你好鍾意伊申清咩？」
 
「四大天王之後，伊申清會係香港樂壇數一數二嘅歌手喇！佢啲歌好好聽架！」
 
榮仔奇道：「志哥，你又知？」
 
我沒有理會榮仔，因為已經輪到我所點選的我甚麼都沒有，我唱道：「我沒有我沒有沒有從運氣到信心到天空宇宙全屬某某未明何處有～～」
 


一曲唱罷，榮仔鼓掌道：「志哥，你唱得幾好，把聲真係幾似伊申清喎！」
 
阿興奇道：「阿哥你係幾時開始鍾意伊申清，我記得你前排同我一樣都係鍾意伊麵架？」
 
我敷衍道：「唏！欣賞一個歌手嘖！又唔係簽咗賣身契，可以隨時轉會架嘛，我識有人係勝利球迷，嗰屆曼聯好成績就捧曼聯，阿仙奴好成績就捧阿仙奴啦！」
 
阿興和榮仔繼續以他們那稚嫩的聲線唱著伊麵一系列古惑仔的歌曲，我不知是否喝了剛才那杯波斯貓的關係，肚子很不舒服，於是我到了男厠解放。
 
我走進了厠格，脫下了褲子，污辱了馬桶，正當我享受緊衝破括約肌的快感之際，我聽見有兩人走進了厠所。
 
其中一人埋怨道：「嘩！咁撚臭嘅？整飛菸先。」
 
另一人道：「餵！阿謹，快啲揸完水好返去，頭先我靜靜雞趁條學生妹唔為意，係佢杯野到加咗料，返到去應該發作喇！講明啊！今次我上先。」
 
後者的聲音有點耳熟，我從厠格的門縫瞥去，瞥見其中一人有一頭突出的藍髮，那人赫然是布正麗的朋友南乳。


 
阿謹道：「你條鹹濕仔拎咗阿湯啲春藥嚟亂咁用，知唔知啲藥好貴架？阿湯，用嚟喺啲唔聽話嘅囡身上架！」
 
南乳道：「阿湯咁靚仔，氹啲囡幾句，啲囡即刻自動波啦！駛鬼落藥咩？」
 
「同阿湯做啲囡緊係無問題啦！但係要佢地走私鐘，咩客都要接？地盤佬、賣魚佬、厠所佬，甚至阿差、南亞佬都要，嗰啲友唔好話同佢地做，企埋嚟都成陣味，所以有時真係要落藥先攪得掂。」
 
「係呢！阿湯都出咗去半年，幾時返嚟８座。」
 
「依家阿湯出去佐敦幫阿公攪靚啲場，佢係咁氹啲靚妹下海，依家我地數字幫啲場大把新血，原本幫襯開隔離真技安啲客都過曬嚟。」
 
「其實阿湯個親大佬——湯伯符係花生派嘅坐館，點解佢唔幫佢大佬手啊？」
 
「你係度講好喇！千祈唔好係阿湯面前提起佢大佬啊！我驚佢斬撚死你啊！佢地同一個老豆，但係唔同老母架，佢就係唔想靠佢大佬，要威畀佢大佬睇。」
 


南乳道：「我緊係唔會講啦！做兄弟嘅野識做嘅！」
 
「係喎！聽人講你同啫喱玩得好埋喎！提一提你阿湯擺明仲係霖緊佢，你唔好亂嚟！」
 
「唏！傻啦！我幫阿湯睇住佢咋！著紅鞋、勾二嫂咁無義氣嘅事，我南乳先唔會做啊！」
 
「係就最好啦！你唔好睇阿湯平時斯斯文文成個公子哥兒咁款，佢顛起上嚟，唔係講笑架！」
 
「哈哈！阿謹你支菸食完未，房入面條學生妹應該出曬水喇！我都硬撚曬喇！」
 
「仆街仔！講起撲野你就最精神，出去啦！」
 
身在厠格的我，想不到ＣＣＴＶＢ的情節會發生在我的身上，居然在厠所內聽見熟悉的人的秘密。
 
那個叫阿謹的臭飛口中的啫喱應該是指布正麗吧？


 
還有一件重要的事，就是兩名禽獸向一名學生妹下了春藥，現在打算「就地正法」。
 
當我辦完大事，抺乾淨屁眼後，從厠格走出來，已經不見了南乳和阿謹的蹤影。
 
現在怎麼辦呢？
 
要逐間房拍門嗎？但有這麼多間房要怎麼找？
 
要報警嗎？警是要報，但並不是由我來報，儘管我看不過眼南乳等人的無恥惡行，亦不想因為一個不相識的女生而與他們結怨，因為當我報警的話，那班警察會找身為報案人的我問長問短，隨時要我協助調查，那時候南乳便會知道是我壞了他的大事。
 
自從看完三五成群之後，我便感到一班臭飛童黨聚集起來的結果是多麼可怕，他們互相影響下，什麼也膽敢去做，我不想成為下一個阿雞，被燒成焦炭葬送在將軍澳堆填區。於是我找了一名男侍應，對他說：「餵！頭先我係男厠聽到有兩條友話喺依度落藥迷姦學生妹喎！你快啲去睇下啦！」
 
那男侍應詫異道：「嚇！咁大件事！我做part time咋！話唔到事架！你去搵經理啦！」
 


「咁經理係邊喔？」
 
男侍應向前方招了招手，道：「經理，依位先生有事搵你。」
 
我向那名年約三十多歲的女經理覆述剛才在男厠的耳聞，那名女經理，皺著眉道：「先生，會唔會係你聽錯咋？」
 
「我係咪聽錯，妳去確認下咪知囉！」
 
此時，有兩人從轉角處拐出來，一人是曾倩萍，另一人居然是管佳莉。
 
二人瞧見我均現出錯愕之色，曾倩萍依舊向我揮手打招呼，管佳莉並沒有如常地垂著頭急步走過，而是一反常態地向我點頭示意，難道是我上次對她說的話產生了效用？她想通了，不再把我當作透明，前來向我示好？但由於我忙於與那名女經理爭論，只是微笑著向她們點了點頭。
 
我繼續與那名女經理作出爭論，道：「嗰條仔藍色頭髮好易認之嘛！妳咪去睇下囉！到時真係出事，妳個心都唔安樂啦？」
 
「但係憑先生你一句說話，就要去周圍搔擾客仔，咁唔係幾好喎！」女經理依然舊調重彈應道。
 
雖然管佳莉在場，我想當一個謙謙君子，但女經理的態度實在讓人氣結，我慍怒道：「妳唔係以為我搵依啲野嚟玩啊？我食飽飯無野做咩？ 」
 
這時，曾倩萍和管佳莉與我交錯而過，曾倩萍倏然道：「成皇志，你講嗰個藍色頭髮嘅人，應該係我隔離房嗰班人，佢地唔單止食煙，又試過入嚟搔擾我地啊！真係超衰！」
 
我向女經理道：「嗱！依家唔駛妳逐間房搵，妳快啲去啦！仲企係到做咩下？再遲啲個學生妹畀人溶咗架喇！」
 
「咁！但係無證無據，無理由…」
 
這個女經理很明顯是本著多一事不如少一事、不做不錯的態度去敷衍我，想到這裡我立時光火，恫嚇道：「同妳講，依家我就成件事同妳講咗，如果個學生妹係依度有咩事？我敢寫包單，妳實無得置身事外，到時警察實會搵妳去問話，告妳知情不報，就算畀妳走甩依條罪，到時方向、生果依啲報紙日日去採訪妳，妳都幾頭痕下！」
 
女經理態度轉趨屈服，道：「咁若果唔係先生你咁講，到時就會得失咗啲客人？」
 
我怒道：「妳唔好再搵藉口啦！妳驚誤會，可以叫人扮送野飲做藉口，入去間房到睇下，如果無事咪話攪錯咗囉！」
 
這時女經理向那男侍應吩咐道：「阿仔，你照依位先生嘅說話咁做去睇下啦！」
 
曾倩萍告知男侍應南乳所在的房間號碼，我們三人隨後跟著男侍應，我問道：「係呢！得你地兩個嚟唱Ｋ咋？」
 
曾倩萍道：「唔係！我地同幾個朋友嚟。」
 
「宋蓮同陳慧瓊？」
 
管佳莉道：「唔係，佢地今次無嚟。」
 
這是自從我回到這個時空後，管佳莉第一次主動和我說話，而且難得的是宋蓮和陳慧瓊不在她的身邊，如果不是有別的事要幹，真希望能夠找個地方與她坐下來詳談。
 
托著餐盤的男侍應，敞開門，道：「先生，你點嘅凍鹹檸七同熱柑桔蜜。」
 
我瞧見管佳莉想走前，連忙拍了拍她的肩膀一下，道：「我地食花生就唔好走咁前，如果唔係會好似宋蓮咁。」
 
由於我們是經歷了近四個月的不揪不採（在那個時空來說），剛剛我才正式破冰，所以這樣輕微的身體接觸，亦令雙方感到尷尬。
 
管佳莉雙頰微紅，但她又有點好奇問道：「咩叫食花生啊？」
 
「即係有圍觀、湊熱鬧咁嘅意思。」
 
管佳莉聞言噗哧一笑，現出了她那招牌的虎牙，不知是覺得這個形容詞形容得夠生鬼、貼切；還是憶起了宋蓮食花生的慘況。
 
管佳莉久違已久的動人笑靨再度出現在我眼前，我不禁有點兒出神，想起了那時我們曾經的甜蜜時光。
 
她瞥見我怔怔地看著她，她低垂頷首現出窘態，我見狀亦有點不好意思。
 
此時，傳來了南乳的聲音道：「餵！嗰兩杯野唔係我地架，你快啲走啦！」
 
男侍應道：「餵！等陣瞓係沙發嗰個女仔做咩啊？」
 
阿謹道：「佢攰咪瞓喺度囉！快啲走啦！」
 
我們三人藏身在轉角處，離那房間有一段距離，只看見那男侍應站在門口處，瞧不見房間內的情況。
 
男侍應道：「等陣，個女仔會唔會唔舒服啊？好似無咩反應咁？」
 
「關你撚事咩？快撚啲走啦！」房間內傳來了數把男聲。
 
男侍應看來有點招架不住，開始有打退堂鼓的跡象。
 
就在此時，我身後的其中一度房門打開，走了一人出來。
 
『鮑魚刷』髮形、二撇雞、模樣猥瑣的中年男人，那人居然是梨木樹警署的沙展房侍農。
 
真的是想打瞌睡就有人送枕頭。
 
我立時上前打招呼，道：「房沙展。」
 
房侍農瞇著眼上下打量著我，很明顯他一時間想不起在那裡見過我。
 
我道：「房沙展，前面間房有一班臭飛想迷姦個學生妹。」
 
房侍農嘿嘿笑了一聲，拍了拍那個大肚腩道：「依啲勞資糾紛，我理唔到嗰喎！」
 
眼看房侍農要轉身離去，我嚷道：「你夠膽就唔好理，我記低咗今日時間地點，如果個學生妹真係有咩冬瓜豆腐，我一定去ＣＡＰＯ度投訴你。」
 
在旁的管佳莉與曾倩萍聞言嚇了一跳。
 
房侍農瞪了我一眼，然後氣沖沖走向南乳的房間，猛力拍門，喝道：「發生咩事？」
 
南乳道：「哦！原來係房ＳＩＲ，咁啱啊！」
 
阿謹道： 「ＨＩ，房ＳＩＲ，你又嚟唱Ｋ啊！幾時再嚟８座睇波飲酒啊？」
 
房侍農道：「阿ＳＩＲ，今日唔同你地咁多廢話，個女仔邊個嚟？」
 
南乳道：「房ＳＩＲ，我都唔知條囡邊度嚟架？」
 
阿謹道：「係啊！房ＳＩＲ，講你都唔信，我地成班人唱唱下Ｋ，條囡突然打開門，瞓咗係沙發，嚇得我地喔！」
 
房侍農道：「條囡係邊個啊？無端端衝入嚟？」
 
阿謹道：「南乳，房ＳＩＲ問你識唔識條囡啊？」
 
南乳道：「阿謹，我仲以為條囡係你啲ＦＲＩＥＮＤ添！乜原來你都唔識架。」
 
「你地唔駛係我面前扯貓尾，你地班仆街仔有無攪人啊？」
 
阿謹道：「房ＳＩＲ，唔好玩啦！我地好潔身自愛架！點知條囡乾唔乾淨架？淨間瀨野咪死？依啲囡睇個款未讀完小學隻豬就無咗啦！」
 
房侍農道：「你地唔好喺我面前咁多嗲，快啲走！」
 
南乳道：「無問題，房ＳＩＲ，我地都想埋單，依家走。」
 
擾攘了一輪後，房侍農居然就這樣放了南乳等人離去。
 
待南乳等人走了，我向房侍農強烈表達了我的不滿，道：「餵！你有無攪錯啊！就咁放佢地走？佢地差啲輪姦個學生妹喎！」
 
房侍農冷哼了一聲道：「你都識講差啲啦！我地警方凡事講求證據，無任何證據證明個女仔畀人強姦，加上個女仔都無話要報警，個女仔應該去搵老師或者社工，而唔係警察。」
 
從２０１６回來的我一向對警察的印像都非常差，加上房侍農的處理手法，讓我極度不滿，我禁不住數落道：「你地啲差佬，最想就係咩事都唔做白逗人工，咁你都唔拉人，叫我地點去期望你地依班人保護到我地？」
 
房侍農肅穆道：「差人做野唔駛你教，咩啊！係啲囡面前扮型啊？鬧警察好威啊？駛唔駛拉你返去扣留你四十八小時冷靜下啊？」
 
經歷了國教、雨傘、魚蛋，一幕又幕的警察不公執法在我腦海浮現；再加上我遇到金融騙局時，尋求警察幫助不果，這一刻，我失去了理智，從牙縫裡迸出一句話：「黑警！你選擇性執法。」
 
我這句話把房侍農徹底惹毛了，他怒道：「你講咩啊！」
 
他一把揪住我的衣領，把我摁進了他剛才走出來的那個房間裡。
 
我腳步踉蹌，房侍農再推了我一把，我跌坐在沙發上，他順手把門關上。
 
房內只有我們二人，我迅速打量了這個房間一眼，看到桌上散落了一份馬經、一份波經及數個啤酒罐。
 
房侍農指著我罵道：「你個仆街仔，上次咒我巴塞開唔到上盤，累我輸兩皮野，我都忍你；今次撞到你又喺兩條囡面前扮型，話我係黑警，我依家就黑畀你睇，打鑊金你，再捉你返去坐番四十八個鐘。」
 
我聞言又驚又怒，有點兒後悔剛才因一時之氣，把話說得太盡。
 
當房侍農要撲過來時，我向旁一翻，我在前面走，他則在後面追，我們在這二百尺的空間裡圍著跑圈。
 
房侍農跑了三個圈便腆著那個大肚子，氣喘吁籲。
 
我喊道：「等陣！」
 
房侍農扠著腰，喘著氣道：「咩啊！嗄！嗄！無…無氣…喇！嗄！正一…一打壞後嗄！…後生！阿叔…仲有…嗄！大把貨！」
 
我與他各據房間的一角，問道：「餵！你欖住張ＰＡＳＳ，即係返緊工啦！你返緊工，居然係Ｋ房到飲酒度馬度波！」
 
房侍農指著我道：「阿ＳＩＲ做野唔駛你教！」
 
話畢我們再次在房間內展開追逐，這一次，我走了兩個圈，便被他逮著，他笑道：「你個仆街仔，走嚟走去，最後咪畀阿叔捉住，今次唔執劑你，都當阿叔好蝦。」
 
房侍農掄起拳頭，眼看便要把我暴打一場。
 
我喝道：「等陣！你知唔知我舅父係邊個？你打我，你會好麻煩啊！」
 
「咩啊？靠嚇啊？你舅父係邊個社團大佬啊？你講出嚟？我告多你一條自稱三合會成員。」
 
「我舅父唔係黑社會，我舅父係總警司。」
 
房侍農聞言臉色微變，他放下了拳頭，嘲笑道：「你舅父係總警司？守邊個環頭？」
 
情急之下，我胡扯了一番，我有兩個舅父，但兩位均不是當差的，一個舅父在港鐵工作，一個則是當運輸。
 
在雨傘爆發的時期，當時我曾留意警隊最高負責人苟雄的事跡，所以對他的警隊生涯都略知一二。在這危急的關頭，希望冒認是苟雄的外甥，可以蒙混過關。
 
「我舅父叫苟雄，佢係總警司，喺灣仔警區做指揮官。」
 
我的心跳得很快，害怕房侍農與苟雄很熟絡，拆穿我不是他的外甥；亦害怕房侍農孤陋寡聞未曾聽過苟雄的名字。
 
房侍農一臉狐疑，道：「你舅父係苟雄？」
 
我強撐道：「緊係啦！呃你有獎啊？如果唔係我點識咩叫ＣＡＰＯ同ＰＰＲＢ啊！」
 
「有咩證據啊？你話係就係啊？我點知你係咪大我啊？唔通你話一哥係你老豆，我就信你啊？」
 
我故作鎮定，道：「係囉？如果我大你點解我唔認你地一哥做親戚啊？反而搵個灣仔總警司啊？佢出名過你地一哥啊？」
 
房侍農的說話反映他對我的話是半信半疑，我就以反問的說話讓他去作出更多的臆測。
 
趁他思索的時候，我嚇唬道：「之前你賭外圍波；頭先又選擇性執法，差啲連累個學生妹畀人強姦；依家又畀我發現你工作期間喺Ｋ房飲酒賭馬，仲拉我入嚟想打我一鑊，如果我同舅父講，以佢嘅性格一定追究到底，睇嚟你都可以搵定其他工。」
 
房侍農聞言臉色一下子變得煞白，他指著我道：「你…你想點？」
 
我徐徐嘆了一口氣，道：「我舅父都係當差，如果佢畀人投訴無咗份工，會無埋長糧又真係好慘嘅，而且你話曬都叫做救番個學生妹，預防咗罪案發生喔！都叫做功過相抵喔！係咪先？」
 
我這番裝作有同理心的話，就是希望給予房侍農一個下台階，他馬上咧嘴笑道：「哈哈哈！係啊！係啊！」
 
我背對著房侍農，緩緩地扭開了門柄，裝模作樣地再嘆一口氣，道：「其實你本質唔懷，你可以做一個好警察，希望我唔好睇錯人啦！」
 
「我擺明係一個好警察嚟！幫我問候下你舅父喔！」
 
我敞開了門，向身後的房侍農揮了揮手。
 
走出了房門，管佳莉與曾倩萍已經不知去了那兒，我外表故作淡然，但內心是十分緊張，害怕房侍農發覺不妥，從房間內追出來。當走到了轉角處，發現身後沒有異樣，我連忙急步走回我那間卡啦ＯＫ房裡。






=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl