《將軍澳迴旋處上的時空裂縫》: 第一章第六回：二人實驗小組

第一章第六回：
二人實驗小組


凌晨一點，彩明街盡頭的迴旋處。
 
我跟林少解釋了一次實驗做法，要他背著一個放了計時器的背包，但並沒有對他說他可能會見的情景，一來怕嚇走他，二來避免我的經歷會影響他的第一身感覺。

「踩得啦！去啦！」
 




林少開始圍住迴旋處踩單車，我在外面大約十米之外的地方，用手機拍 video，看看能否拍攝到時間停頓的證據。
 
我見林少踩了十多個圈，應該隨時可以進入時間停頓，但我看不到有任何異樣。如是者，他踩了差不到三十個圈。
 
我心裡開始懷疑：「其實係咪得我先會做到？」


 
突然，林少停下了單車，把單車放好，走過來我這裡。
 




「頂！你依個咩魔術黎架，咁堅嘅？點做架？」林少說時一直用手搓下巴，以我對他的了解，這表示他很驚慌。
 
「你啱啱見到啲咩呀？詳細對鏡頭講一次呀。」我把手機鏡頭對住林少。
 
林少深呼吸一下：「我頭先照你指示，喺嗰個迴旋處度，圍住佢踩單車，係咁轉，係咁轉，轉到成……我諗三四十個圈都有啦，我咪大嗌咗一句，『喂，仲要踩幾耐呀？』。點知你無應我。我踩多三四個圈，發現你好似成個人呆咗咁，郁都唔郁，對眼望實我，但唔眨眼架喎！哇，我幾驚呀，以為你做乜，咪停咗架車，行去你度囉。點知，我行到半路，行唔到喎頂佢！我都唔知做乜！好似有度隱形牆咁，行極都行唔到去你度。我怯啦開始，嗌多你幾次，你都係無反應。」

「我以為你睇漫畫學咗啲唔知咩煉成陣揾我黎做祭品添呀！賢仔，究竟發生咩事呀？」
 
林少剛剛這句語氣中帶有委屈，眼神中有怒火，好像被自己朋友出賣完。他說完我都有點內疚。





「對唔住呀，林少，其實我都唔清楚咩事呀，所以而家咪調查下囉。咪就係嗰晚 Rachael 生日 party 完咗，我同你一齊踩單車返屋企嗰陣時發現嗰囉。依件事全世界得你同我兩個人知架咋，我最信你，先揾你一齊做實驗架咋。」

我停下了，我都覺得自己頭先咁對朋友好仆街。林少眼神中尚帶有恨意。

「除咗你，我真係諗唔到可以揾邊個同我一齊做實驗啦......」

有點 gay ,不過字字真心。

「唉，得啦。不過我唔會再幫你踩單車架，因為真係好恐怖。幫你揸機拍片就得。」
林少真係脾氣好，咁快就原諒我。

「得得得，無問題！以後我負責踩。Okay？你唔嬲就得啦。」
成功安撫到林少的情緒了。






「係啦，講返頭先，咁最後點呀？」
 
「最後我見你郁得返，我咪行去你度，問你『你依個咩魔術黎架，咁堅嘅？』咁囉。」
 
咦，我見到的，同林少說的，似乎在先後次序上有些出入。不過既然拍了片，可以回家再重組案情又未遲，現在錄取即時口供要緊。
 
「林少呀，咁你覺得依個唔尋常嘅情況維持咗幾耐？」
 
「我諗呀…… 呃…… 大概兩三分鐘掛。大概係咁上下啦。」
 
「Okay，係嘅。你攞你背囊俾我睇睇呀唔該。」
 
我把林少剛才揹著的背包入面的兩個計時器取出來，跟我身上的兩個計時器比對。無錯，都是相差了三分鐘。我用手機把這四個計時器所顯示的時間都拍攝下來。
 
好，現在實驗證實，「踩單車的人」並非重要因素，並非只有我才能造成時間停頓。而今次實驗更有了錄像證據，人證，口供，又發現了一個新的 observation ，就是在時間停頓時，迴旋處會有一個類似結界的限制，人不能夠走出這個結界，直至時間回復正常為止。




 
「實驗完成。下一個實驗，測試『地點』同『迴旋處直徑』。林少，我哋行啦！唔好嬲啦......今次我踩。」
 

(待續)