Welcome To Knot ~ Season1: #91

「食早餐啦，講咁多！」我將兩份egg benedict放係靖嘅枱面，嘗試扯開話題。
「咁比起我個肚，我覺得Oppa嘅幸福緊要啲囉…靖呵~」Taz嘟起小咀向靖。
呢個烈女，睇嚟都搵到個可以令佢馴服嘅人喇。
「係咩BB？」靖回應「唔緊要，最多我一陣同你再去食過。因為比起我個肚，我都覺得Sky嘅幸福緊要啲。」
「嘻嘻…BB我嘅心靈相通呀~」Taz甜笑住。
 
「夠啦！ 好痺呀你哋。駛唔駛咁肉麻呀？都費事理你哋~」啫喱邊抗議，邊開身行去後門，應該係準備返過舖頭。
就係佢開門打算離開之際，拎住一喼行李嘅Scarlett就啱啱想推門行入嚟。
結果好自然地，Scarlett係一手㩒咗落啫喱嘅胸口，並且一頭栽咗入啫喱嘅懷抱到。
 


「呀~唔好意思呀！我冇心架！」兩人即時彈開，Scarlett面紅紅咁講。
「唔…啊！我…唔好意思就真！」被人意外胸襲完，啫喱完全係未反應得切。佢瞄一瞄Scarlett個喼，再望向我，似係有眼神詢問緊我發生咩事。
我解釋：「啊~Scarlett佢今日會搬嚟Knot到住，咁佢本身住得遠，成個暑假又會返full time，咁我咪叫佢搬過嚟住，返工都唔駛咁辛苦嘛。」
 
「嗯~」啫喱並唔多說話，只係一手幫Scarlett拎起個喼，就轉身行上樓。
「嘩~ Oppa強勁嘅臂彎，又出動啦。」Taz一對心心眼咁望實慢慢行上樓嘅啫喱「Sky你就幸福啦。強勁嘅臂彎…啪啪啪…」
「咩啪啪啪呀？講到咁難聽！」我即時反擊。
「BB！唔可以咁講嘢架，女仔要斯文啲~」以為靖幫緊我口，點知…「你可以話Sky你就『性』福啦！」
「喂啊~ 靖你同佢一齊癲！」我抗議。
「咩呀？你哋誤會晒！」Taz義正詞嚴咁話「我係話，Oppa有強勁嘅臂彎，可以好大力咁啪啪啪撻啲粉團呀！你哋諗咗去邊呀？諗埋啲衰嘢。」


 
就係我準備反駁Taz嘅時候，啫喱已經落返嚟，後面就跟住Scarlett。
「唔該晒你呀啫喱。You are so strong！你真係好勁呀！」 Scarlett一面讚賞。
「唔…唔駛寫氣。Sky，我返過去先。」唔知點解，我覺得啫喱有小小好似想逃離現場咁。
 
我都冇去細諗發生咩事，只係請Scarlett幫手去開門做生意。
正當我行埋靖到想幫佢添水嘅時候，Taz一臉凝重咁捉住我：「Sky，你要小心啲，睇實啫喱。」
「係咪重要講呀？」我心諗，重講？！
「唔係呀。我懷疑 Scarlett對啫喱起痰呀」靖似乎真係同Taz開始心有靈犀。
「係囉， Scarlett明顯鍾情於Oppa對強勁臂彎啦。」Taz愈講愈細聲，搞到我同靖都要俯前哄埋先聽到佢講咩「唔單止， Scarlett佢重…好重口味架！！」