Welcome To Knot ~ Season1: #89. 啫喱

4：40am，我終於捨得離開張床，攝手攝腳咁去咗洗手間梳洗。
床上嘅人仍然熟睡中，我唔捨得嘈醒佢，所以只係喺床邊望咗佢一陣，輕吻咗佢嘅額角一下，摸一摸頭髮，就依依不捨咁離開咗。
 
過返舖頭，我都費事上去，就直接行咗入工房，開始一日嘅工作。
 
就係我好專注嘅時候，工房外個條樓梯就傳嚟有人落樓嘅聲音。
望一望鐘，7：36am。
強哥係爐個邊忙緊，強嫂就係舖面，咁好明顯落緊嚟嘅，就只有…
 
果然！


左肩膀俾人重重咁拍咗一下：「Oppa！早晨！」
「點呀！執好間房未架？你知我唔搞你同樂少間房架，咪諗住我會執！」我眼尾都冇望過，都知Taz宜家一定係到渺咀渺舌！
「咩啫！你講到我好似嚟爆房咁！」Taz隨手就係盤杏仁到拎起一粒就放入口。
「喂！」我抬頭瞪一瞪佢，一手拍落佢手背「咁咪污糟啦！好餓咩你？」
「𠽌~痛架！」Taz按住自己隻手，刻意回避我嘅問題「呀！Oppa！不如宜家教我整麵包呀！我想學呀，點開始架？」
 
Taz好明顯係搞搞震居多，似乎係想分散我注意。
「你想學？哈！等多陣啦，我轉頭送貨過Knot，同你一齊過去食早餐好過啦！」我偷瞄咗Taz一眼，只係見佢不斷將眼神飄向樓上「叫埋上面嗰個一齊食啦！」
Taz一臉受驚咁望住我：「咩…咩上面！邊有人啫，得我一個咋嘛！」
「一個？」我停低手上嘅動作，抬頭望住個衰妹「之前次次玩玩下嗰啲，就拖住落嚟，重搵我做擋箭牌；宜家呢個就介紹都唔介紹，重係到搞呢搞路想轉移我視線？」


 
「都…都唔知Oppa你講咩？」Taz開始唔自然咁係工房入面，亂搞我啲材料。
「咪搞啦！」我一手拉住個衰妹，邊拉佢出工房門口。
正正要推開道門，就見到一臉尷尬嘅靖企咗係到：「啫喱，早晨！」
 
「噢！」我望一望被我拉住嘅Taz，再轉頭同靖打招呼「早晨呀靖！琴晚…好瞓嘛？」
「吓？」靖望一望Taz，又望一望我「都…幾好！不如…過Sky到食早餐？！」
「好~」我揚一揚咀角「你同Taz過去先啦，我轉頭送貨過去再join你哋。」
 
「嗯！」靖大方咁伸手拖住Taz，同一時間走埋我身邊，細細聲同我講「轉頭到你講下琴晚你瞓得好唔好喇！」


「我？！」都唔等我俾任何反應，靖已經拉咗Taz走咗去啦。