Welcome To Knot ~ Season1: #69

當我回復意識嘅時候，我發現自己已經身處係自己嘅房間。
 望望床頭的小鬧鐘，8:00am。
忍住頭痛嘅難受感覺，我爬落床再去梳洗。
今日係Scarlett第一日返工，作為老闆嘅我，無理由第一日就不在狀態架。
 
8:30am，Scarlett已經返到嚟：「早晨Sky！」
「早晨Scarlett，今日開始要辛苦你喇。暑假期間要麻煩你返全日喇。」我報以微微一笑。
「Sky你面色唔係幾好喎，冇事呀嘛？」
「哦…我OK呀…」
 


同一時間，後門傳來了叩門聲。
「我幫你開門呀！」話口未完，Scarlett已經一枝箭咁走咗去開門。
門後嘅，係啫喱。
呢個鐘數，佢應該係送貨嚟。
 
「呀…你係…？」Scarlett同啫喱兩個同時都講出同一句說話，亦同時望住咗我。
「嗯！Scarlett，呢位係啫喱，係前面Jerry's Bakery嘅老闆，每朝Knot開明前佢都會送貨嚟；啫喱，呢位係Scarlett，我新請返嚟嘅幫手。」
 
Scarlett聽完我介紹，就伸出咗右手，想同啫喱握一握手。
啫喱放底咗手上嘅麵包蛋糕，亦伸出手握一握。


就係兩手相遇嘅同時，我隱約覺得Scarlett個樣有少少唔同咗！
 
「Sky，你無事呀嘛？」啫喱留意到我微微嘅搖晃，走咗嚟我身邊，輕輕扶住因為頭痛而有啲暈暈地嘅我。
「嗯…啫喱？！ 無事，有少少頭痛啫。」我抖擻一下精神，撐起笑容。
 「咁不如你返上去抖下啦，Kwan仔同楊言都差唔多返，應該唔會有問題架。」啫喱嘗試說服我。
「唔好啦，Scarlett第一日返工，我冇理由咁架。」我反駁著。
「返上去休息！」啫喱突然好man咁，對我落咗呢個命令。
我只好扁一扁咀，轉向Scarlett：「唔好意思呀Scarlett，你等一陣啦，Kwan仔同楊言好快就返，佢哋會話你知點做。晏少少我會再返落嚟幫手架啦。」
 
講完我就轉身返咗上樓，乖乖地休息多陣，留底啫喱同Scarlett了。