Welcome To Knot ~ Season1: #68. 靖

諗諗下，我哋三個真係好耐冇一齊食飯吹水喇。
唔係話冇見面，次次成班去Silence或者Knot有party，我哋都會見面。
但係坐定定咁，只有我哋三個靜靜咁吹下水，咁就真係好耐未試過喇。
 
其實我識咗佢哋幾耐呢？
嗰時Sky同路比係同學，而Sky就跟我學瑜珈。
 
記憶中當時嘅Sky比宜家更開朗，一臉大無畏嘅樣，好多時身邊朋友遇到唔公平事時，佢都係做代人出頭嗰個。
好明顯Sky性格係唔會定落嚟，佢會鍾意接受挑戰，睇佢次次都要挑戰高難度動作就知。
當年佢一頭紫髮加紅highlight，同埋佢眼入面個團不甘平凡嘅火，就知佢有幾野性難馴。


 
而路比呢？佢以前比較肥…呀！有肉地！白白淨淨，點似宜家，操到幾fit 幾man呀！
佢以前都幾薯，或者應該話…純囉！頭髮唔似宜家咁短，驟眼望過去，就似一個鄰家清純小男生。加埋佢笑起上嚟個對酒窩…呢~佢絕對係G姐姐們會忍唔住蝦佢個啲呢？
 
我記得有次Sky係衝住咁入嚟課室架…
「嗄嗄…Sorry呀…嗄…我學校亞sir放遲咗呀…嗄…」
「得得得！你去換衫先，我哋都係熱緊身啫。」我嘗試安撫眼前因為趕住嚟而滿頭大汗嘅Sky。
 
轉個頭，Sky 就換好衫，但又一臉尷尬咁行到我身邊：「Miss呀，唔好意思！我頭先個同學打俾我，話我成個銀包漏咗係佢到，佢轉頭會拎上嚟俾我；所以我一陣會出一出去，你唔駛理我架！」
我做了一個ok手勢，就示意Sky埋位了。


 
唔知係咪心掛掛，Sky全堂都好唔專心。
做瑜珈，唔專心就好易出事。
話口未完，Sky 就突然輕呼咗一聲！
經過簡單嘅檢查，Sky 佢只係扭親手腕，尚算萬幸。
 
係直到堂上完，手包紥完，Sky嗰個同學先出現！
無錯！就係薯仔路比。
佢烚烚下咁入咗嚟，見到Sky紥住隻手，先識得快步衝入嚟！
 


路比一臉唔好意思，摸住自己個後尾枕，係咁同Sky講對唔住。
當年嘅Sky年少氣盛，又冇咁多經歷，所以根本未識好似宜家咁去體諒人，係咁單打路比；而呢個傻仔，就只係粒聲唔出咁受晒。
 
結果個次就係Sky屈咗路比請我同佢食飯，亦開始咗我哋三個嘅友誼。