Welcome To Knot ~ Season1: #44. 靖

眼見Taz同嗰個貓貓flirt得咁開心，其實我真係冇嘢可以做到。
我唔係佢邊個，根本無權去管佢。
 
唯有搵個藉口離開。
我揸住車，漫無目的咁四圍去。
 
如果有人問我，個心咪好痛？ 我會答係。
但我痛，唔係為咗自己；我係為咗Taz而痛。
 
曾經有人同我講過，無人天生就係player，每個player背後，都一定有一個好傷嘅故事。


 
我唔知Taz嘅故事係咩。
我問過佢，當時佢只係望咗我好耐。
 
嗰日，我記得佢係Silence到玩咗好多round，過完一張枱又到一張枱。
到佢返到嚟吧枱時，個人都已經有、8分醉(唔好忘記佢嘅special shooters)。
我唔忍心佢玩到咁癲，就開始撩佢傾計。傾下傾下，我就問咗佢一句：「其實咩原因，你要咁玩？唔通你冇試過想為一個人停落嚟咩？」
Taz當下望住我，眼神由酒後嘅迷糊，變得有所焦點。
但我好清楚，佢個焦點唔係我，亦唔係呢個空間。
佢嘅思緒，似乎飄咗去好遠。


隔咗好耐，佢眼神突然變得哀傷，佢答我：「有。但呢個人，已經唔存在。」
講完，佢又走咗去混入人群中。
 
我亦問過啫喱、樂少同King。
佢哋三個都俾唔到咩答案我。
只係知道，佢以前唔係咁，後尾去咗兩年美國，返到嚟個人就變晒。
 
佢哋覺得唯一慶幸嘅係，佢仍然會聽啫喱話，同繼續咁重朋友。
但感情上，三個都俾唔到任何答案我。
 


我明白有時有啲嘢，係需要時間，就好似Sky咁，唔迫得。
所以，我可以做嘅係守護佢。
只要佢唔會有危險，呢啲時間，我俾到。